Nikwe ja brukwä mikadre kwin Jehová erere

1. ¿Kokokrä ye erere ni kristiano rabadre ja ngwen ño? (Üai mikadre ñärärä).

“MURIE ribi tä kri ötökä, kokokrä bädrebe ye tä murie di nuin kwäräbe”. Kokokrä bädrebe yebätä tä nemen dite jabätä murie tä mate dite yete, ye tä kukwe ütiäte driere nie. Ye erere ni ririadre jankunu ja üairebiti yekäre kukwe mikadre nüke gare jai, ja töi mikadre bobre ja töi kwitakäre. ¿Nuaindre ño? Kukwe tä nikwite jene ye ngwane ye ererebätä ja töi kwitadre. Arato nitre tä dre den nuaindre jai aune tä töbike ño ye mikadre tuin ütiäte jai.

2. ¿Kukwe tare tä nemen bare ye ngwane, töi kwin meden raba ni dimike ja tuakäre ben? ¿Dre rabai gare nie kukwe ja tötikara nebätä?

² Ni Jehová mikaka täte ye jökrä tö ja ngwain moto kwin aune ja töi mikai bobre bätä ni mada mike tuin bobre jai. Töi kwin ne käkwe nitre kristiano dimikani ja tuin kukwe namani bare jene yebe. Ye erere arato, ni raba nuainne ño ye rabadi gare nie kukwe ja tötikara nekänti. Akwa, kena Jehová aune Jesús, aibe brukwä bäri kwin aune kukwe mike nüke gare jai yebätä nikwe ja kitai.

JEHOVÁ AUNE JESÚS YE MOTO KWIN KRUBÄTE

3. ¿Jehová moto kwin ye ñokänti gare nie?

³ Jehová ye abokän “Jä” nieta Bibliakwe ñobätä ñan aune tä ja töi mike kwatibe kukwe nuainkäre (Deut. 32:4). Jehová ye moto kwin. ¿Ñokänti gare nie? Kä nebätä kukwe tä niken nikwite jatäri ye ererebätä Ngöböta ja töi mike ne kwe niara töi ye rabadre bare. Jehovakwe ni sribebare ja kwrere, ye medenbätä kukwe tä niken nikwite, ye ererebätä nikwe ja töi kwitadre arato. Niarakwe kukwe ja jie ngwankäre Bibliabätä mikani gare kwin nie. Ye tä ni dimike kukwe kwin den nuaindre jai kukwe ño rakadrekä ye jökräbiti ta. Jehová tä ja ngwen ño aune kukwe bianta kwe yebiti tä nemen gare nie niara abokän tä ja töi mike kwatibe kukwe nuainkäre, akwa moto kwin arato.

4. Kukwe keteitibiti Jehová moto kwin mikata gare ye ani mike gare jai (Levítico 5:7, 11).

⁴ Kukwe ükateta Jehovakwe mikakäre täte ye kwin krubäte aune nuäre mikakäre täte. Niara ñaka kukwe ribi mike nuaindre aune ni mike ja dibiti ja mike täte. Ñodre, ja moto mikani kwin kwe nitre israelita kräke yebätä ani töbike. Nitre jondron bokäne krubäte aune nitre bobre yekwe jondron ja erebe kukwadre ye ñan ribebare kwe. Ñakare aune, nitrekwe jondron nämäne nuäi ye ererebätä rabadre jondron bien kukwadre mikani gare kwe Leibätä (Ñäkädre Levítico 5:7, 11 yebätä).b

5. Jehová töi bobre aune tä ni mada mike tuin bobre jai tä mike gare ño ye mä raba mike gare.

⁵ Jehová moto kwin ñobätä ñan aune niara ye töi bobre aune tä ni mada mike tuin bobre jai. Ñodre, niarakwe kukwe ye bämikani namanina chi nitre käme nünanka Sodoma gadrete kwe ye ngwane. Kä ye ngwane, Lot rabadre ngitie kä mobe kä tokwäre yete niebare gare kwe Lot ie ángel itibiti. Akwa, kä jurä namani Lotbätä rikakäre kä yekänti. Yebätä bikabare tidrä kwe Jehovabätä, tuadremetre kwe niken mräkätre kwe yebe kä Zóar ribebare kwe. Juta ye Jehová tö nämäne gatebätä. Jehová tö rabadre akräke, ja dibiti Lot mikadre kwe niken kä tokwäre ye känti, akwa ñaka nuainbare kwe. Lotkwe kukwe ribebare ie ye kukwe mikani ruin kwe jai, ñaka kä Zóar gadrete kwe yebiti ta (Gén. 19:18-22). Siklo nikani ta yete, Jehovakwe nitre nünanka Nínive mikani tuin bobre jai. Nitre nünanka Nínive nämäne ja ngwen käme krubäte yebätä gaite ye Jonás juani kwe mike gare. Akwa, niaratre ja töi kwitani yebätä namani tuin bobre Jehovai aune ngite kitani tabiti kwe yebätä ñaka juta ye ganinte kwe (Jon. 3:1, 10; 4:10, 11).

6. Jesús moto kwin Jehová kwrere, ¿ye bämikani ño kwe?

⁶ Jesús ye moto kwin Jehová erere namani gare metre kukwe driebare kwe kä tibienbätä ye ngwane. ‘Juta israel nämäne nianinte oveja kwrere ye ie niara juani kukwe driere’. Akwa bati, niarakwe meri iti ñan israelita ye dimikani. Meri ye ngängänbätä üai käme nämäne nüne. Bikabare kwe tidrä Jesubätä aune Jesukwe ngängän mikadreta kwin ribebare kwe ie. Niara namani tuin bobre Jesús ie yebätä ngängän mikaninta kwin kwe (Mat. 15:21-28). Ani töbike kukwe madabätä: Jesús nämäne kukwe driere ye käi nikani ruäre ta ngwane, kukwe ne niebare kwe: “Nire nire käkwe ti rükandrete, ni ye abko gare ñakare tie abko tikwe niedi” (Mat. 10:33). ¿Pedrokwe Jesús rükaninte bämä jire yebätä Jesukwe ñaka niara kani ngäbitita? Ñakare. Niarakwe ja töi kwitani nämäne gare Jesús ie aune niara ja ngwanka metre nämäne gare ie arato. Jesús ganinkröta ye bitikäre, ja mikani tuare kwe Pedro ie. Ye ngwane, nämäne Pedro tarere aune ngite kitani ta kwebiti niebare kwe ie raba ruin nie (Luc. 24:33, 34).

7. Filipenses 4:5 tä mike gare erere, ¿ni mikadre tuin ño jai ie ni tö?

⁷ Jehová aune Jesús ye moto kwin krubäte nibira gare nie. Niaratre ye erere nikwe ja ngwandre ie Jehová tö (Ñäkädre Filipenses 4:5 yebätä).c Ni raba kukwe ne ngwentari jai: “¿Ti moto kwin, tita kukwe ruäre kain ngäbiti aune ja tuenmetre jie ngwandre ye nieta tibätä? ¿Ti gare nitre ie ñobätä ñan aune tita bike bäri aune kukwe ñaka nükebiti tie yebätä? ¿Tita ja dibiti nitre mike kukwe tä nemen tuin kwin tie ye nuainne? ¿Tita ni mada kukwe nuin aune tita ja töi kwite kukwe ruärebätä?”. Nikwe ja moto mikai bäri kwin ngwane, ni jatai bäri ja ngwen Jehová aune Jesús erere. Kukwe ketebu känti nikwe ja töi mikadre kwin ye ütiäte krubäte. Ni raba ja töi mike kwin yebätä ani blite. Kena ye abokän, kukwe ngüba ñaka nikwe tä nemen bare ye ngwane aune ketebu abokän, nita kukwe den nuaindre jai yebätä nitre mada ñaka töita nemen ni kwrere.

KUKWE JENE TÄ NAKAINKÄ NGWANE JA TÖI MIKADRE KWIN

8. ¿Kukwe jene rakadrekä ngwane dre ni dimikai töbike kwin? (Nota mikadre ñärärä).

⁸ Kukwe jene tä nemen bare nibätä ye ngwane, ja moto mikadre kwin aune kukwe mikadre nüke gare jai. Ñodre, jötrö ngwarbe ni raba nakain bren tare krubäte ie, ni raba nemen jondron ñakare o política yebätä kukwe ruäre raba nemen ni kisete. Kukweta nemen bare jötrö ngwarbe ne raba ni mike ja tare nike aune kukwe ngüba ñaka nikwe ye raba nemen bare nibätä (Ecl. 9:11; 1 Cor. 7:31). Ne madakäre, kukwe jene tä nemen bare juta Ngöbökwe yete ngwane raba ni nuinte. Akwa kukwe jökrä yebiti ta ni raba ja töi kwite kukwe tä nemen bare ye ererebätä. Akwa yekäre kukwe ketabokä raba ni dimike ye ani mike gare jai: 1) kukwe tä nemen bare ye kadre ngäbiti, 2) ja töi mikadre kukwe ja känenkäre yebätä, 3) ja töi mikadre kukwe kwinbätä, 4) ja töi mikadre kukwe nuainne ni mada kräke.d Kukwe kädekateta ne kwin krubäte gare metre ñan ñobätä aune namanina bare. Ruäre ani mike gare jai.

9. ¿Kukwe ñan ngüba nämäne nitre misionerokwe, akwa namani bare bätätre ye ngwane dre nuainbare kwetre?

⁹ Kukwe tä nemen bare ye kadre ngäbiti. Emanuele aune Francesca ye misionero juani juta madate sribire. Namanina kä yekänti ngwane, ja kitani kwe blite nitre ye kukweibiti aune ja mräkätre konkrekasionte mike gare jai. Ye bätärabe, pandemia COVID-19 ye kömikani. Yebätä ñan namani nuäre kräketre ja ükakrökäre keteitibe. Ne madakäre, Francesca meye krütani. Niara tö namani krubäte rababätäta mräkätre kwe ben keteitibe, akwa pandemia köböite ñaka namani dre kräke. ¿Dre niara dimikani ja tuin kukwe tare yebe? Emanuele aune Francesca orabare gwairebe Jehovai. Jehovakwe niaratre mikadre töbätä aune dimikadre kwe ja tuin köbö kwatirekwatire kukwe yebe ribebare kwe ie. Jehovakwe niaratre kukwe nuani aune juta kwe yebiti niaratre dimikani kwe. Nämäne dre ribere jai aune ñongwane nämäne ribere jai ye erere biani Jehovakwe ietre. Ñodre, ni testiko iti kukwe niebare videote yekwe niaratre dimikani krubäte: “Kukwe tä nemen bare jene ye ngwane, kadre ngäbiti jötrö ngwarbe. Ye köböire kä raba kiteta juto bäri jötrö nibätä aune kukwe mada keta kabre nuain raba”.e Ketebu, niaratre ja töi mikani kukwe driere bäri kwin telefonobiti aune nitre tötike Bibliabätä. Ketamä, ja mräkätre nämäne niaratre dimike aune kukwe kwin niere ietre bätä tarere ye kani ngäbiti kwetre yekwe niaratre dimikani. Kä kwati jire te, meri testiko iti käkwe ja töi mikani kwin niaratre kräke, nämäne käre kukwe tike ie aune texto keteiti juen ie. ¿Ye tä dre driere nie? Kukwe tä nemen bare jene ye ngwane, nikwe ja töi kwitadre jötrö ngwarbe aune kadre ngäbiti. Ye köböire, ni raba dre dre nuainne erere nikwe nuaindi ngwane kä täi juto nibätä.

10. ¿Meri testiko iti dre nuainbare ja tuakäre kukwe mrä namani bare yebe?

¹⁰ Ja töi mikadre kukwe kwin ja känenkäre yebätä. Meri testiko iti nünanka Rumania kädekata Christina, nämäne nüne Japón yekwe ja tuani kukwe ñan nuäre ben. Niara nämäne Japón konkrekasion kukwe inglere yete. Akwa konkrekasion ye ñan namanina. Niarakwe ñaka ja töi mikani jankunu kukwe yebätä, ñakare aune ja töi mikani kwatibe dre nuain raba kwe yebätä. Ja di ngwani kwe konkrekasion nämäne blite kukwe japonebiti ye dimike aune kukwe driere kukwe yebiti. Meri iti sribibare niarabe yei ja di ribebare kwe, niara dimikadre kwe blite bäri kwin japonés yekäre. Ja kitai kwe Bibliabiti aune täräkwata Mä raba nüne kä jutobiti yebiti niebare kwe. Sribi muko kwe ye kräke namani bä. Ye köböire Christina jatani blite bäri kwin kukwe japonebiti. Akwa ye ñan aibe namani bare. Ja känenkäre mada, meri ye käkwe ja tötika Bibliabätä kani ngäbiti. ¿Kukwe ye tä dre driere nie? Nikwe ja töi mikai kukwe kwin ja känenkäre yebätä ngwane, kukwe jene rabai bare ye erere nikwe kai ngäbiti ngwane, kukwe kwin keta kabre raba nemen bare ni kräke.

11. ¿Ni gure iti käkwe dre nuainbare ja tuakäre ngwian ñan namani ietre yebe?

¹¹ Kukwe nuaindre ni mada kräke. Nitre gure nämäne nüne juta känti kukwe drie ñäkäi nämäne yete yekän sribi nämäne kwe ye nianinte kän. Juta yete ngwian ñan namanina krubäte yebätä jondron namani kabre. ¿Dre niaratre dimikani ja tuakäre kukwe yebe? Kena, niaratrekwe ja töi mikani nüne jondron braibebiti. Ketebu, ñaka ja töi mikani kwetre kukwe nämäne nemen barebätä yebätä. Ñakare aune, ja töi mikani kwe nitre mada dimike aune kä denkä bäri jai kukwe driekäre (Hech. 20:35). Ja mräkä yekwe niebare: “Nun nämä käre kä denkä jai kukwe driekäre, aisete nun ñan nämä töbike krubäte kukwe nämä nun kisete yebätä. Nun nämä kä denkä bäri jai Ngöbö töi nuainkäre”. ¿Kukwe ne tä dre driere nie? Kukwe jene tä nemen bare nibätä ngwane, nikwe nitre mada dimikadre ye bäri kwin aune dimikadre metrere kukwe drieta ietre yebiti.

12. ¿Pablo kukwe bämikani ye tä ni dimike ño ja töi mike kwin kukwe drieta ye ngwane?

¹² Nita niken kukwe driere ngwane ja töi mikadre kwin ni mada kräke, ñobätä ñan aune nitre nüne jene jene, kite kä jene jene känti aune töbike jene jene ben nita blite yebätä. Apóstol Pablo nitre töi mikani nüke gare jai aune nämäne medente ye erere ja ngwani kwe yebätä nikwe ja kitadre. Niara nämäne dirire nitre ñaka judío ie arato. Jesukwe niara kädekani kukwe driekäre nitre ie (Rom. 11:13). Apóstol Pablo nämäne kukwe driere nitre judío, nitre griego, nitre töbätä, nitre menteni, nitre ütiäte krikri aune reitre ie arato. Pablo kukwe driebare matadre nitre brukwäte yekäre nämäne ja töi mike nitre nämäne nüne yekänti erere (1 Cor. 9:19-23). Pablo nämäne niken kukwe driere ngwane nitre nämäne nüne ño, ja ngwen ño aune nämäne dre mike täte ye ererebätä nämäne kukwe driere ietre. ¿Kukwe ye tä dre driere nie? Nita niken kukwe driere ngwane, nikwe töbikai kwin käne nikwe dre niei ni gwi ie. Ye köböire nitrekwe ni kukwe nuai bäri kwin aune kukwe drie ye rabai bare bäri kwin.

NITRE TÄ TÖBIKE YE MIKADRE ÜTIÄTE JAI

13. ¿Nitre tä töbike ño ye mikata ütiäte jai ngwane drebätä ja kriemikata? (1 Corintios 8:9).

¹³ Nikwe ja moto mikai kwin ngwane, rabai bäri nuäre ni kräke nitre töi mikakäre nüke gare jai. Ñodre, meritre testiko ruäre töta nemen ja jükai, ja dätei, akwa mada abokän ñaka töta nemen nuain. Nitre kristiano ruäre töta nemen dö ñain, akwa debe näre. Nitre kristiano mada abokän ñaka tä ñain jire. Ni kristiano jökrä tö ja tuabätä kwin, akwa tätre ja ngübare jene jene. Nita töbike ño ye erere ni tö rabadre nitre tuai töbike ja dibiti ngwane, ni raba ngwen ngoto ritete aune konkrekasion ñäkebiti. ¡Ni ñaka tö kukwe ye erere nuaindi jire chi! (Ñäkädre 1 Corintios 8:9 yebätä; 10:23, 24). Kukwe ja jie ngwankäre Bibliabätä mikadre täte ye käkwe ni dimikai kä jäme känene. Ni raba mike ño täte kukwe ketebu känti ye ani mike gare jai.

14. ¿Nikwe dän ño kitai jabätä aune nita ja dätere ye ngwane, kukwe ja jie ngwankäre Bibliabätä medenbätä töbikadre?

¹⁴ Ja däteta aune dän kitata jabätä. Jehovakwe ñaka kukwe mikani gare metre ta ja ngwä kitadre ño yebätä, ñakare aune kukwe Bibliabätä ja jie ngwankäre biani kwe nie. Nita ja ngwä kite yebiti ni rabadre Ngöbö käikitekä, yebiti nikwe bämikai ‘ni abokän töbike kwin aune ja ükete kwin erametre’ (1 Tim. 2:9, 10; 1 Ped. 3:3). Aisete, nita ja ngwä kite yebätä nitre okwä rabadre nibätä yei ni ñan tö. Kukwe ja jie ngwankäre Bibliabätä yebiti nitre umbre ji ngwanka konkrekasionte raba monsotre dimike, akwa ñaka kukwe ükete kukwe mikakäre täte. Ñodre, konkrekasion keteiti te monsotre nämäne ja dokwä tikekä oto chi, akwa nämäne ja dokwä ngwen dube o ñaka nämäne sököi jai. Nitre umbre ji ngwanka tö namani niaratre dimikabätä. Yekäre, ja di ribebare kwe ni circuito tuabitikä ie. Nitre umbre käkwe niebare monsotre ie: “Munta niken kukwe kädriere ja ngwärekri sete ngwane, nitre tä ja töi mike munta ja ngwä kite ño yebätä aune ñan tä munta dre kädriere ye ai kukwe nuin ngwane, ¿ye ñan kwin ñan ererea?”. Kukwe ne kwrere niebare ietre yebiti kukwe nämäne nemen bare ye ükaninte.f

15. Lei aune kukwe ja jie ngwankäre Bibliabätä meden tä ni dimike, ¿kukwe kwin diankäre jai? (Romanos 14:5).

¹⁵ Ja ngübata kwin. Ni kristiano itire itire käkwe ja ngübai ño ye tä gare ie (Gál. 6:5). Kräkä meden medenbiti ja kräkäi mikai nikwe tä nemen diandre jai nie ngwane, nikwe ñaka däri kadre ngäbiti tä Bibliabätä ye nikwe mikadre täte, ja kriemikakäre kukwe chokakwe yebätä (Hech. 15:20; Gál. 5:19, 20). Ne madakäre, nitre töta nemen ja kräkäi mikai ño ye erere tätre nuainne. Nitre kristiano ruäre tä niken ja kräkä mikamana doctor ie. Mada abokän, tätre ja kräkäi den gwita. Dre nütüta nikwe o kukwe tuin ño nie yebätä ni töita kwatibe, akwa nitre mada tä töbike ño ye mikadre ütiäte jai, ñobätä ñan aune ja mräkätre ye tö ja ngübai ño ye tä gare ietre. Yebätä nikwe kukwe ne ngwandre törö jai: 1) Gobran Ngöbökwe ye aibe käkwe ja tare nika ye diainkä täte aune ni ñaka rabaita bren jire (Is. 33:24); 2) ni kristiano itire itire kräke dre bäri kwin ye tädre gare ietre (ñäkädre Romanos 14:5 yebätä); 3) Nitre mada tä kukwe den jai yebätä ni ñaka ñäke bätätre o kukwe mike jiete nuatekäre (Rom. 14:13), aune 4) ja mräkätre konkrekasionte tare nikwe aune ni tö tuai keteitibe, yebätä tätre kukwe den jai yebätä ni ñaka ñäke bätätre (Rom. 14:15, 19, 20). Kukwe ketabokä ne nikwe ngwain törö jai ngwane, ni täi ja kete bäri kwin ja mräkätre ben aune kä täi jäme konkrekasionte.

16. ¿Nitre umbre tä kukwe mike nüke gare kwin jai ye bämikata ño kwe? (Üai mikadre ñärärä).

¹⁶ Nitre umbre ji ngwanka rabadre kukwe bämike ni mada käne aune ja töi mike kwin (1 Tim. 3:2, 3). Ñodre, nitre umbre ji ngwanka konkrekasionte bäri umbre mräkätre kräke ye ñan aibätä dre nuain töta nemen kwe mikadre täte ribeta kwe. Ñakare aune, üai deme yebiti Jehová raba nitre umbre ji ngwanka mada bäri bati o kä braibebiti ni umbrere jie ngwen kukwe kwin diankäre nuaindre jai ye gare ietre. Ne madakäre, kukwe dianta nuaindre kwetre ye ñäkäi ñaka Bibliakwe ngwane, nitre umbre ji ngwanka tä töbike kwin ye tä dimike kä jutobiti kukwe tuin jene ietre o tä töbike jene yebiti ta.

KUKWE KWIN TÄ NEMEN NIKWE JA MOTO MIKABÄTÄ KWIN

17. ¿Nikwe ja moto mikai kwin ngwane kukwe kwin meden rabai nikwe?

¹⁷ Nita ja moto mike kwin ye köböire kukwe kwin keta kabre tä nemen nikwe. Ñodre, nita nemen ja kete kwin aune jäme ja mräkätrebe konkrekasionte. Ne madakäre, konkrekasionte ja mräkätre ja ngwen jene jene aune nüne jene jene ben nita keteitibe ye köböire nita nirien bäri kukwe ja üairebiti. Aune kukwe bäri ütiäte, ye abokän Jehová ni moto kwin krubäte erere nita ja ngwen ye tä kä mike juto nibätä.