Pedro erere, nikwe nändre jankunu ja käne

1. ¿Kukwe ñan tuabare namani bare Pedrobätä gwa kitabätä ngwane, töi namani ño?

PEDRO nikani gwa kite ye ngwane, kä namanina raire deu akwa ñaka gwa kitani jire kwe. Kukwe kwin nuainkäre kräke, Jesukwe niebare ie: “Ñö okwä bäri mente nguse, ye känti ru ngwena, bti munkwe krade kita ñöte gwa gakrä” (Luc. 5:4). Erametre Pedrokwe gwa kitai ere ye ie ñan namani tö ngwen akwa ja mikani täte kwe. Niarakwe krade kitani mrente ngwane, gwa namani ere krubäte yebätä krade namani nötöte. Kukwe namani nakainkä ye abokän kukwe ñan tuabare jutuabare Pedro ie aune nitre nämäne näin ben ye ie ngwane, “töi namani ñan krütare”. Pedro niebare: “Ti Dänkien, ma deme ti ngwä. Ti abko moto kämekäme dikaro, aisete nän mento tibtä” (Luc. 5:​6-9). Ja ñan namani ruin kwin Pedro ie nänkäre Jesube.

2. ¿Kukwe namani bare Pedrobätä yebätä ja kitadre yekwe ni dimikai ño?

² “Ti abko moto kämekäme” niebare Pedrokwe, bäkänä niarakwe kukwe metre niebare. Niarakwe kukwe niebare aune kukwe nuainbare ye bitikäre ruäre ngwane ja namani ruin ngite ie nieta Bibliakwe. ¿Ja ruin Pedro ye erere mäi? ¿Kukwe ruärebätä mä ñan tä ja ngwen kwin aune kukwe ruäre mä ñan tä nuainne kwin yebe mäta ja tuin kirabe? Ye erere, tä nemen bare mäbätä ngwane mäkwe ñaka ja ngwan di nekä. Kukwe namani bare Pedrobätä ye raba mä dimike. Töbike kukwe keta kabre blo nuainbare apóstol Pedrokwe yebätä. Ngöbö tö rabadre akräke kukwe namani bare niarabätä ye ñaka tikamanandre kwe Bibliabätä. Akwa niarakwe tikamana bare kukwe ütiäte driekäre nie (2 Tim. 3:​16, 17). Kukwe ben Pedro nämäne ja tuin aune ja nämäne ruin ño ie yebätä nita ja kite ngwane, kukwe ñaka randrete jire chi nie ye Jehová ñaka ngübare nibätä tä nüke gare nie. Ñakare aune, nikwe ja di ngwandre jankunu aune kä ngwandre nüke jai kukwe ben nita ja tuin yebiti ta.

3. ¿Ñobätä nikwe kä ngwandre nüke jai?

³ ¿Nikwe kä ngwandre nüke jai ye ñobätä kwin? Ñobätä ñan aune, kukwe nieta ne erere, “Ni iti tä kukwe keteiti nuainne bä kabre, ye köböire tä nemen ni dirikä ye erere”. Ani bämike kukwe nebiti. Ni iti tä ja kite musika täke ngwane, jondron keteiti musika täkäkäre yebätä tä ja kite kä kwati krubäte te. Aune kä jökrä ye ngwane, bä kabre tä nuainne blo. Ye bitikäre tä nemen ni dirikä erere akwa tärä nemen dirire, yebiti ta ruäre ñaka tä nuainne kwin. Akwa yebätä ñan tä ja ngwen di nekä. Ye erere arato raba nemen bare nibätä. Kukwe ruäre ben nita ja tuin ye ni tärä ganaine tä nemen ruin nie akwa ni raba matetubuta. Akwa nikwe ja di ngwandre jankunu ja tuakäre kukwe yebe. Ni jökräbätä tärä nemen bare erere, nita kukwe niere o kukwe nuainne ye bitikäre jata nementa ruin ngite nie. Akwa, nikwe ja di ngwain jankunu ngwane, Jehovakwe ni dimikai ja ngwankäre bäri kwin (1 Ped. 5:10). Pedro kä ngwani nüke jai yebätä ani ja kite bäri. Kukwe naninte bä kabre ie akwa Jesukwe niara mikani tuin bobre jai yebätä nikwe ja kitai käkwe ni dimikai sribire jankunu Jehová kräke.

KUKWE KWIN NAMANI PEDROKWE AUNE KUKWE BEN JA TUANI KWE

4. ¿Pedro ara käkwe blitabare ño jabätä aune Jesús käkwe niara töi mikani ño jäme? (Lucas 5:​5-10).

⁴ Ñobätä Pedro kädekani “ni ja mikaka ngite” aune drebätä ja mikai ngite kwe bätä nämäne töbike ye nie ñaka jire Ngöbö Kukweibätä (ñäkädre Lucas 5:​5-10 yebätä). Pedrokwe ja mikani ngite arato raba ruin nie. Kä jürä namani Pedrobätä jutuabare Jesús ie ngwane, Pedro ñan nämäne tö ngwen jai nükani gare ie. Akwa Pedro raba ja ngwen metre nämäne gare ie. Aisete Jesukwe niebare Pedro ie: “Ma ñan rekwetaka ja jiebti”. Jesús nämäne tö ngwen täte Pedro ie ye gani kwe ngwane, yekwe niara dimikani. Ja känenkäre mada, Pedro aune eteba kwe Andrés nämäne sribire gwa kitabätä ye tuanimetre kwetre aune ja töi mikani kwe kwatibe näin Mesías ben. Niaratre kukwe kwin diani jai ye köböire kukwe kwin krubäte namani kwetre (Mar. 1:​16-18).

5. ¿Kä jürä nämäne nemen Pedrobätä ye ganainbare kwe aune Jesukwe nübaibare kani ngäbiti kwe ye köböire dre kwin namani kwe?

⁵ Ni ja tötikaka Jesukwe erere, apóstol Pedrokwe kukwe ñan tuabare bä nuäre krubäte tuani nemen bare. Pedrokwe Jesús tuani nitre bren miketa räre, chokali juentari nitrebätä aune nitre ngwakare gainkröta (Mat. 8:​14-17; Mar. 5:​37, 41, 42).b Arato kukwe kwin rabai Jesukwe gobrandi kwe kä kwinbiti ye ngwane, tuani Pedrokwe ye ñaka käi nikwitaninkä jire chi biti (Mar. 9:​1-8; 2 Ped. 1:​16-18). Pedrokwe kukwe ñan bämikabare jire chi ja töite ye tuani kwe. ¡Niara nämäne töbike blo jabätä ye ie ñaka ja tuanimetre ganaindre kwe yebätä kä namani jutobätä raba ruin nie! Niarakwe ñaka ye erere nuaindre akräke kukwe keta kabre kwin ye rikadre bäre.

6. ¿Kukwe ruäre ñaka kwin nuain nämäne Pedrokwe ye tuanimetre bengwairebe kwe?

⁶ Kukwe keta kabre tuani Pedrokwe aune kukwe nuani kwe yebiti ta kukwe ruäre ben nämäne ja tuin ye ñan namani nuäre kräke. Ñodre, bati Jesús ja tare nikai aune murie ketai ne kwe profecía nämäne Ngöbö kukweibätä rabadre bare mikani gare kwe ye ngwane, Pedrokwe ñäkäbare Jesuye (Mar. 8:​31-33). Bä kabre, Pedro aune nitre ja tötikaka Jesukwe yekwe ja kwetabare nire abokän bäri ütiäte yebätä (Mar. 9:​33, 34). Köbö te Jesús murie keta jämi ye känenkri deu Pedro namani rubun krubäte käkwe ni iti olo tikaninkä (Juan 18:10). Köbö ye arabe te deu kä jürä Pedro ganainbare yebätä bämä jire ja ketamuko kwe Jesús ye ñan gare ie niebare kwe (Mar. 14:​66-72). Ye bitikäre, Pedrokwe muabare kri kä bäre mento (Mat. 26:75).

7. Jesús ganinkröta ye bitikäre, ¿kä biani kwe dre nuainkäre Pedro ie?

⁷ Pedro nämäne ulire krubäte akwa Jesús ñaka niara käi kwitaninkä jabiti. Jesús nükaninta nire ye bitikäre, Pedro nämäne tarere ye rabadre bämike ie ye ngübabare kwe. Töi bobrebiti Pedro rabadre oveja ngübarebiti ye Jesukwe ribebare ie (Juan 21:​15-17). Ye ngwane, nakani ngäbiti kä jutobiti Pedro ie. Ye medenbätä, niara nämäne Jerusalén kä Pentecostés ye ngwane, nitre dianinkä käne üai deme köböire nänkäre kä kwinbiti ye ngätäite niara nämäne.

8. ¿Pedrokwe kukwe meden blo krubäte nuainbare Antioquía?

⁸ Pedro dianinanka nänkäre kä kwinbiti akwa ye bitikäre nämäne ja tuin kukwe ruäre ben. Kä 36, ye ngwane üai deme nämäne nemen Cornelio, ñaka judío yekwe ye tuani kwe. Yebiti bämikani metre Ngöbö abokän ñaka ni kitete aune nitre juta mada mada te ye raba nemen juta Ngöbökwe yete arato ye nükani gare (Hech. 10:​34, 44, 45). Yete ja käne mada, Pedro ñan namanina töbike mrökäre nitre juta madate yebe, ñobätä ñan aune ye känenkri niarakwe ñaka nuaindre jire chi (Gál. 2:12). Ne madakäre, nitre kristiano judío aune nitre kristiano juta madate ye ñaka rabadre mröre keteitibe nitre kristiano judío ben namani nütüre. Nitre kristiano nämäne töbike kore ye namani Antioquía ngwane, Pedro ñan namani mröre jankunu nitre kristiano juta madate yebe, ñobätä ñan aune ye erere nuaindre kwe ngwane ñaka rabadre kwin nitre judío kräke ye jürä namanibätä. Pedro nämäne ja ngwen kore ja bämikakäre jerekäbe ye jutuabare apóstol Pablo ie ngwane, mäträbare kwe Pedrobätä nitre kwati ye okwäbiti (Gál. 2:​13, 14). Pedrokwe ñan kukwe kwin nuainbare yebiti ta ñaka ja di ngwani nekä kwe. ¿Drekwe dimikani?

¿DREKWE PEDRO DIMIKANI NÄIN JANKUNU JA KÄNE?

9. ¿Pedro nämäne ja ngwen metre ye bämikani ño kwe mikata gare Juan 6:​68, 69 yekänti?

⁹ Pedro ja ngwani metre. Aune kukwe blo krubäte nuainbare kwe yebiti ta niarakwe ñaka ja ngwani di nekä. Ñodre niara ja ngwanka metre bämikani kwe, Jesukwe kukwe niebare ñaka nükani gare nitre ja tötikaka Jesukwe ie ye ngwane (ñäkädre Juan 6:​68, 69 yebätä). Kukwe niebare ye dre gärä nämäne ye ñaka ngwanintari kwetre o Jesukwe mikadre gare ye ñaka ngübabare kwetre aune kä mikaninkä kwe bätä. Akwa Pedro ñaka kä mikaninkä. Ñobätä ñan aune, Jesús aibe kwe “kukwe ja nire kärekäre kräke” nämäne niebare kwe.

10. ¿Jesús nämäne tö ngwen Pedro ie ye bämikani ño kwe? (Üai mikadre ñärärä).

¹⁰ Jesukwe ñaka Pedro tuanimetre jire chi. Deu köbö te Jesús murie ketai ye näire Pedro aune apóstol mräkä yekwe Jesús tuainmetre ye nämänena gare ie. Akwa yebiti ta, Pedro rükaita krö aune ja ngwain metre kwe ie yei nämäne tö ngwen kwatibe (Luc. 22:​31, 32). “Mun töi abko tä biare jändrän kuin nuene, akwa mun di ñakare” kukwe nieta, ne nämäne nüke gare kwin Jesús ie (Mar. 14:38). Ye medenbätä, Jesús ñan gare Pedro ie niebare kwe ngwane, Pedro ñan ja ketaita Jesube ye ñaka nütübare kwe. Jesús nükaninta nire ye bitikäre ja mikani tuare kwe Pedro ie, akwa kaibe raba ruin nie (Mar. 16:7; Luc. 24:34; 1 Cor. 15:5). Ja namani ruin blo krubäte Pedro ie yebätä kukwe yekwe niara töi mikaninta jäme.

11. ¿Jehovakwe Pedro ngübai ye Jesukwe mikani gare ño ie?

¹¹ Jehovakwe Pedro ngübai ye Jesukwe käbämikani ie. Jesús ganinkröta ye bitikäre apóstol Pedro aune apóstol mada nämäne gwakite ye ngwane, Jesukwe kukwe ñan tuabare nuainbare bobukäre (Juan 21:​4-6). Jesukwe kukwe ñan tuabare nuainbareta ye ngwane, dre ribere nämäne Pedrokwe jai ye biandi Jehovakwe ie ye namani gare metre ie. Yete ja käne kukwe käbämikata “jändrän jökrä Ngöbökwe tä mikani jenena munkrä, ye munkwe känäntari käne” ye nämäne nüke törö Pedro ie (Mat. 6:33). Kukwe namani gare Pedro ie yebiti ja töi mikani kwe sribire Gobran Ngöbökwe kräke aune nämäne sribire gwakitabätä ye tuanimetre kwe. Pentecosté kä 33 yete kukwe ütiäte krubäte mikani gare kwe käkwe nitre mil kabre dimikani kukwe kwin Gobran Ngöbökwebätä ye mike gare jai (Hech. 2:​14, 37-41). Yete ja känenkäre, nitre samaritano aune nitre juta madate o kä mada känti ye dimikani kwe nemen ja tötikaka Jesukwe (Hech. 8:​14-17; 10:​44-48). Nibira gare metre nie, Pedro ye nämäne ütiäte krubäte Jehová kräke, ñobätä ñan aune niara köböire nitre kwati jene jene dimikani kwe nemen juta Ngöbökwe yete.

KUKWE JA TÖIKRÄ NIE

12. ¿Kukwe keteiti ben nita ja tuin käre ngwane, kukwe ben apóstol Pedro ja tuani ye raba ni dimike ño?

¹² Jehová arato raba ja di bien nie ñaka ja ngwankäre di nekä. Kukwe ne erere ben nita ja tuin mekerabe ngwane bäri ñan raba nemen nuäre. O kukwe ben nita ja tuin ye bäri tare kukwe ben Pedrokwe ja tuani ye kräke ni raba nemen nütüre. Akwa Jehovakwe ja di biain nie nänkäre jankunu ja käne (Sal. 94:​17-19). Ani töbike ja mräkä iti nämäne nemen brare ruäre ben yebätä. Kä kwati te niarakwe ja tuani kukwe yebe akwa biti tuanimetre kwe. Akwa yebiti ta, niara töita nemen kukwe blo nuainbätä. ¿Dre niara dimikani ja tuin kukwe yebe? Tä mike gare: “Jehová tä ja di bien nie”. Tä niere arato: “Jehová üai deme köböire, ni raba näin jankunu, ji metrebiti ye niena gare tie”. Mrä mada niara tä niere: “Jehovata ti tuenmetre sribire ja kräke, ti ngite yebiti ta aune täbe ti dimike jankunu”.

13. ¿Pedro ja ngwani ye erere ni raba ja ngwen ño? (Hechos 4:​13, 29, 31; üai mikadre ñärärä).

¹³ Bä kabre, nitre jürä namani Pedrobätä. Akwa ja di käräbare kwe Jehovai ye köböire ja ngwani dite kwe (ñäkädre Hechos 4:​13, 29, 31 yebätä). Kä jürä tä nemen nibätä ye ni raba ganainne. Monso bati kädekata Horst, nünanka Alemania nazi yebätä ani töbike. Bä kabre, niara ja tuanimetre ganaindre kä jürä ie kwelate, yebätä niara: saludo Heil, Hitler niebare. Niara rün ñaka rubun kräke ñakare aune orabare kwe ben aune Jehovakwe ja di biandre ie ye ribebare kwe. Rünkwe dimikani aune ja dimikamananbare kwe Jehovai ye köböire, Horst namani dite ja ngwankäre metre. Ja känenkäre mada kukwe ne niebare kwe: “Jehová ñaka ti tuanimetre jire”.c

14. ¿Nitre umbre ji ngwanka raba ja mräkätre tä di nekä ja üairebiti ye dimike ño moto kwinbiti?

¹⁴ Nikwe ñaka Jehová aune Jesús mikadi täte jankunu ye niaratre ñaka nütüre jire. Apóstol Pedrokwe Jesús rükaninte bämä jire ye ngwane, kukwe keteiti ütiäte namani diandre nuaindre jai ie. ¿Ja ngwandre di nekä kwe? ¿O nändre kwe jankunu Jesube ni ja tötikaka kwe ye erere? Jesukwe orabare kisere Jehovai ne kwe tödeka ñan riadrete Pedrokän. Ye bitikäre, niara orabare krubäte Jehovai ne kwe tödeka ñan riadrete Pedrokän. Aune Pedrokwe ja mräkätre mada dimikai ye ie tö ngwani kwatibe kwe mikani gare kwe ie (Luc. 22:​31, 32). ¡Jesukwe kukwe niebare yebätä Pedro nämäne töbiketa ngwane nämäne niara dimike krubäte! Ni arato ie kukwe ütiäte rabai diandre nuaindre jai. Ye ngwane, nitre ji ngwanka yekwe töi kwinbiti ni dimikai ja ngwankäre metre jankunu (Efes. 4:​8, 11). Paul, ja mräkä iti tä sribire ni umbrere konkrekasionte ye tä ja di ngwen ja mräkätre dimikakäre. Ja mräkätre ruäre tä kite di nekä ja üairebiti tä tuin ie ngwane, ja mräkätre jän jatani ño Jehovakwe kukwe metre kokwäre ye tä ngwenta törö ietre. Niaratre tare Jehovakwe aune ñaka käi kwitekä jabiti ye ta ngwenta törö ietre arato. Paul, tä sribire ni umbrere konkrekasionte yekwe ja mräkätre kwati nämäne di nekä ja üairebiti ye tuanina nementa dite Jehová köböire.

15. ¿Kukwe nieta Mateo 6:33 ye tä nemen bare käre ye kukwe namani bare Pedrobätä aune ja mräkä Horstbätä ye tä mike gare ño metre?

¹⁵ Nibira gare nie erere, apóstol Pedro aune apóstol mada mada nämäne dre ribere jai ye erere Jehovakwe biani ie. Ye erere arato, nikwe Gobran Ngöbökwe ye mikai käne ngwane, nita dre ribere jai ye erere Jehovakwe biandi nie (Mat. 6:33). Rübare kri ketebukäre ye ngwane, Horstbätä nikwe blitanina, ye käkwe ja töi mikani prekursor nuainne. Akwa niara ye bobre yebätä ngwian ñaka nämäne kwe, aisete raba prekursor nuainne o ñakare yebätä namani töbike krubäte. ¿Dre nuainbare kwe? Ja töi mikani kwe Jehová töi gain, bämän te ni circuito tuabitikä nämäne konkrekasion tuinbiti ye ngwane, köbö jökrä yete niarakwe ja töi mikani kukwe driere. Bämän ye krütani ngwane, ni ni tuabitikä yekwe sobre ngökaninkä krati ie akwa nirekwe juani ye ñaka kä nämäne tikani bätä, yete ngwian nämäne, niara töi namani ñan krütare. Ngwian yebiti niara raba prekursor nuainne sö kabre te. Regalo biani Horst ie yebiti Jehová raba niara ngübare ye kwrere mikani tuin kwe jai. Yete ja käne, Gobran Ngöbökwe ye mikani käne kwe (Mal. 3:10).

16. ¿Pedrokwe tärä tikani aune ja ngwani ño kwe yebätä nikwe töbikadretari ye ñobätä kwin?

¹⁶ ¡“Nän mento tibtä” niebare Pedrokwe Jesús ie ye ñaka nuainbare Jesukwe yekwe kä mikani jutobätä raba ruin nie! Jesukwe Pedro tötikani jankunu ne kwe rabadre apóstol ja ngwanka metre aune rabadre kukwe kwin bämike ni kristiano kräke yebätä. Niarabätä kukwe ütiäte krubäte raba nemen gare ni jökrä ie. Pedrokwe tärä ketebu tikani üai deme köböire juani kwe konkrekasion siglo kena ie, yete kukwe ruäre ütiäte aune kukwe mada kädekaninte kwe. Kukwe ja tötikara ja känenkäre yebätä kukwe mada rabai gare nie kukwe ruäre ütiäte kädekaninte kwe täräkwatabätä yebätä aune ni raba mike ño täte ye rabai gare nie arato.