¿Tärä tikani ketebu Pedrokwe ye tä dre driere nie ja töi kräke?

1. ¿Pedro jämi krüte ye känenkri Jehovakwe sribi meden mikani kisete?

APÓSTOL Pedro Jehová mikani täte kä kwati krubäte te. Jesukwe kukwe driebare ye ngwane, nänbare kwe ben aune kukwe driebare kwe nitre mada ñaka Judío ie arato, bitikäre mada sribibare kwe nitre braibe konkrekasionte jökrä ngübabitikä ye erere. Apóstol Pedro jämi krüte ye känenkri kä namanina braibe käne namanina gare ie yete Jehovakwe sribi mada mikani kisete. Kä 62 aune 64 niarakwe tärä ketebu tikani üai deme köböire, Pedro 1 aune 2 ye tikani kwe. Apostol kukwe tikani yekwe nitre kristiano dimikadre jankunu niara krütadre ye bitikäre ie tö namani (2 Ped. 1:​12-15).

2. ¿Tärä tikani Pedrokwe ye ñobätä namani kwin krubäte?

² Ja mräkätre kristiano nämäne “ja tare nike bätäkä ngwarbe” ye ngwane Pedrokwe tärä ne tikani (1 Ped. 1:6). Nitre ruäre käme nämäne kukwe ngwarbe niere ja mräkätre ie, ja mräkätre konkrekasionte ye töi mikakäre blo (2 Ped. 2:​1, 2, 14). “Jondron jökrä krütadre ye käi jatanina ja ken” ye nitre kristiano nünanka Jerusalén käkwe tuadre ye abokän juta Jerusalén aune templo ye gadrete nitre Romanonkwe medenbätä blita nämäne (1 Ped. 4:7). Metrere tärä tikani Pedrokwe ye käkwe nitre kristiano nämäne ja tuin kukwe tare ben kä ye ngwane ye dimikani aune mikani juto ja tuakäre kukwe tare ben ja tuadre kwe ye kräke.b

3. ¿Ñobätä ja kitadre tärä tikani Pedrokwe yebätä?

³ Pedrokwe tärä ne tikani nitre kristiano siglo kena kräke akwa Jehová ja töi mikani mikete Bibliabätä. Ne kwe ni jökrä kä nengwane ye dimikadre kwe (Rom. 15:4). Nita nüne kä käme te känti nitre ñaka tä ja ngwen kwin aune nita ja tuin kukwe tare ben ye köböite ñan tä nemen nuäre ni kräke Jehová mikakäre täte. Jerusalén aune templo ganinte ye ngwane ja tare nikabare krubäte, akwa ja tare nikadi bäri kri ye köböra nemen bare. Ye medenbätä tärä tikani ketebu Pedrokwe ye tä kukwe ütiäte driere nie ne kwe nikwe ja ngwandre ngwäte köbö Jehovakwe ye ngübare ngäbiti, aune nitre kä tibienbätä ye ñaka jürä ngwen jabätä arato ja töi mike kwatibe ja mräkätre tarere bäri. Kukwe mikata gare ne käkwe nitre umbre ji ngwanka dimikai ja mräkätre dimike tätre ribere jai ye ngwane.

JA NGWANDRE MOKRE

4. ¿Dre raba tödeka nikwe ngwen di nekä? (2 Pedro 3:​3, 4).

⁴ Metrere kukwe nieta Bibliabätä kä ja känenkärebätä ye nitre ñaka mike era jai. Kä kwati te nita kukwe driere kä jutobiti yebätä nitre tä ja mike ni rüere ye tä nemen ni kötaire aune kä mrä ñaka rükai jire tätre niere (ñäkädre 2 Pedro 3:​3, 4 yebätä). Kukwe ye kwrere nie raba nie kukwe driekänti, sribikänti o ni mräkäkwe ye raba tödeka nikwe ngwen di nekä. ¿Dre raba ni dimike? Pedro kukwe mikani gare ye ani mike gare jai.

5. ¿Dre käkwe ni dimikai kä krüte ye ngübare bätärekä? (2 Pedro 3:​8, 9).

⁵ Jehová ye tä ngrötöte krubäte kä käme ne gatekäre nitre ruäre tä nemen nütüre. Akwa Pedrokwe kukwe niebare ye tä kukwe ütiäte ngwen törö nie. Käta niken ta ni kräke ye erere ñaka Jehová kräke (ñäkädre 2 Pedro 3:​8, 9 yebätä). Niara kräke kä mil krati ye köböitibe kwrere. Aune niara tä ni ngübare bätärekä, ni gadrete ye ie niara ñaka tö. Akwa köbö kwe ye rükai aune kä käme ne gadite kwe. Ye medenbätä, kä nebera braibe nie aisete ni tö kukwe kwin ye driei kä jutobiti nitre jökrä ie, ¿ñan ererea?

6. ¿Ja mika raba ño juto köbö Jehovakwe ye kräke? (2 Pedro 3:​11, 12).

⁶ “Ni tätre mokre” köbö Jehovakwe ye ngübare ngäbiti niebare Pedrokwe mäträkäre nibätä (ñäkädre 2 Pedro 3:​11, 12 yebätä). ¿Raba nemen bare ño nie? Raba ngwane nikwe töbikadretari köbö kwatire kwatire kä mrä bä nuäre te nikwe nünandi yebätä. Mäta nüne kä jäme te aune mrö kwin kwete, ¿ye mätä bämike ja töite? Mä mräkätre tare mäkwe krutani mäkän ye rukaita nire ye mätä kain ngäbiti aune profecía Bibliabätä namani bare ño metre ye mätä mike gare nitre nünanbare kira ie, ¿ye mäta bämike ja töite? Mäkwe töbikadretari kukwe nebätä ye käkwe mä dimikai ja ngwen mokre aune nita nüne kä krute näire ye ngwen törö jai . Dre rabai bare ja känenkäre ye gare nie ye medenbätä kukwe ngwarbe nieta ye nikwe ñaka tuadremetre ja töi kwite (2 Ped. 3:17).

ÑAKA NITRE JÜRÄ NGWANDRE JABÄTÄ

7. ¿Nitre jüräta nemen nibätä yebätä dre raba nemen bare nibätä?

⁷ Köbö Jehovakwe nebera no gare nie. Yebätä ni tö nitre kwati ie kukwe kwin gobran Ngöbökwe yebätä ye mikai gare. Akwa ruäre ngwane ñan tä nemen nuäre ni kräke blitakäre. ¿Ñobätä? Ñobätä ñan aune nitre jüräta nemen nibätä. Ye erere namani bare Pedrobätä deu köbö te Jesús kani ngite mürie ketakäre yete. Niara ñaka ja tötikaka Jesukwe niebare kwe aune bä kabre Jesús ñan gare ie niebare kwe (Mat. 26:​69-75). Akwa ja känenkäre mada kä jurä ye ganainbare kwe ñobätä ñan aune niebare kwe: “munkwe ñan ni ye jürä ngwian jabtä amne mun ñan rekwetaka käne” (1 Ped. 3:14). Kukwe nieta kwe ye tä mike gare metre nie, nitre jüräta nemen nibätä ye ni raba ganainne.

8. ¿Nitre jüräta nemen nibätä ye ganainkäre dre raba ni dimike? (1 Pedro 3:15).

⁸ ¿Nitre jüräta nemen nibätä, ¿ye ni raba ganaine ño? Pedro tä mäträre krörö nibätä: ‘Munkwe ja töi mika kwatibe Kristo mikakäre ütiäte ja Dänkien kwrere ja brukwäte’ (ñäkädre 1 Pedro 3:15 yebätä). Ne nuainkäre nikwe Jesukristo, ye kisete sribi ño tä aune niara die yebätä töbikadretari. Aune ni rabadre kukwe driere ye ngwane, kä jurä raba nemen nibätä o ni raba nemen ja gaire ye ngwane, Jeús tä kä kwinbiti gobrane aune angeletre tä millon kwati bäre ye bämikadre ja töite. Aune niara kisete “kä käinta se amne kä temen ne Ngöbökwe mikani gare jökrä ie” arato niara “tädi kärekäre nibe köbö kwatirekwatire nebebe kä mrä te” ye nikwe ngwandre törö jai (Mat. 28:​18-20). Ni tätre “juto biarebe” tödeka nikwe ye mikakäre gare niebare apostol Pedrokwe. ¿Medente erere mä raba kukwe driere yebätä mäta ja töi mike kukwe driere ñodre, kwelate, sribi käite o kä mada känti? Ye erere ngwane ñongwane o ño mä raba nuainne yebätä mäkwe töbika aune mäkwe drebätä blitai yebätä mäkwe ja kita. Jehovakwe mä dimikadre ñaka kä jurä ngwen jabätä mäkwe kärä ie aune niarakwe mä dimikadi yei mäkwe tö ngwan (Hech. 4:29).

“JA TAREDRE ERAMETRE KWÄRIKWÄRI”

9. ¿Ñongwane Pedro ñaka ja tare bämikani? (Üai mikadre ñärärä).

⁹ Ja taredre ye dre gäräta ye nükani gare Pedro ie. Jesukwe kukwe ne niebare ye ngwane Pedro nämäne yete arato, Jesukwe niebare: “Ti bike kukwe bien nuendre btin munye, ne erere munkwe nuen abko krörö: Mun ja töitikaka tibe käkwe ja taredre kwärikwäri. Tita mun tarere ño, ye kwrere munkwe ja tare kwärikwäri” (Juan 13:34). Akwa ja käne mada nitre kristiano ñaka judio yebe Pedro ñaka mröbare, ñobätä ñan aune nitre jürä namani bätä. Pedro ja bämikani jerekäbe niebare apóstol Pablokwe bätä (Gál. 2:​11-14). Apóstol Pablo mäträbare Pedrobätä ye kani ngäbiti kwe aune ja töi kwitani kwe. Apóstol Pedro tärä tikani ketebu yekänti mikani gare metre kwe nikwe ja mräkätre taredre akwa ye ñan ngöräbe ni rabadre bämike arato.

10. ¿Dre käkwe ni dimikai “ja tarere erametre aune ñaka ja bämike jerekäbe”? (1 Pedro 1:22).

¹⁰ Nikwe ja mräkätre “taredre erametre” aune ñaka ja bämikadre jerekäbe niebare Pedrokwe (ñäkädre 1 Pedro 1:22 yebätä). Ja mräkätre tareta erametre ye abokän nita “kukwe metre mike täte” kukwe yebiti nüke gare nie “Ngöbö tä ni kitete ñakare” (Hech. 10:​34, 35). Ja mräkätre konkrekasionte ruäre aibe nita tarere erametre ngwane, ni ñaka tä kukwe niebare Jesukwe ja taredre erametre kwärikwäri ye mike täte. Metrere ja mräkätre ruäre ben nita ja kete bäri kwin namani bare Jesubätä nitre ja tötikaka kwe ben ye erere (Juan 13:23; 20:2). Akwa Pedro ngwaninta törö nie nikwe “ja mräkätre jökrä taredre” erametre ñodre, ja mräkätre jen nikwe tareta ye kwrere (1 Ped. 2:17).

11. ¿Nitre “taredre ja brukwä tätebiti” ye dre gärätä?

¹¹ Pedrokwe mäträbare krörö: “Nikwe ja taredre ja brukwä tätebiti”. Ja brukwä “tätebiti” ye abokän ni jatai nitre tarere bäri ngwane nitre ñaka tare nikwe ye ni jatai tarere. Ñodre, ni iti käkwe ni nuaindre tare o kukwe blo niedre ni rüere ngwane, ¿nikwe ja töi mikadre ño? Metrere ni ñaka ja töi mikadre tarere ñakare aune ni tö rabadre ja ngie diainkäbiti. Akwa nikwe kukwe ye erere nuaindi ngwane, nikwe ñaka kä mikai juto Jehovabätä, Jesukwe driebare Pedro ie erere (Juan 18:​10, 11). Apóstol Pablo kukwe ne tikani: “Ni mdakwe kukwe nuen blo mun rüere angwane, munkwe ñan kukwe nuenta blo btä ja dokwäre. Erere arato, ni mdakwe ñäkä taretare munbtä angwane, munkwe ñan ñäkäta taretare btä ja dokwäre amne munkwe ja di kärä kräke Ngöböye jirekäbe” (1 Ped. 3:9). Mätä nitre tarere töi bäkänbiti ngwane, nitre kukwe tare nuain mäbätä ngwane mäkwe ja töi mikai kwin kräke aune mäkwe töi mikai nüke gare jai.

12. a) Nikwe ja mräkätre taredi ngwane, ¿dre mada nuaindi? b) ¿Video “Cuidemos nuestra valiosa unidad” ye tä ni töi mike dre nuainne?

¹² Tärä tikani kena Pedrokwe yekänti “ja taredre erametre”. Ja tare ye abokän ñaka ngite ruäre aibe kitadre jabiti ta ñakare aune ni madata “ja mike ngite” ni ruere ngwane nita juto biarebe dekänbiti ta meden gärätä (1 Ped. 4:8). Jesukwe kukwe driebare Pedro ie ngite kitadre ta ni madabiti yebätä kä nikani kwati ta ye nükaninta törö Pedro ie nämäne kukwe ne tike ngwane. Pedro nämäne juto biarebe ngite kitakäre ta nitre madabiti “bä kükü jire” niebare kwe yebiti nämäne ja töi mike kwin krubäte namani ruin ie. Akwa Jesukwe niebare ie, ngite kitadre ta “bä 77 jire” nitre madabiti ye abokän ngite kitadre bäbe ta ni madabiti ye ñan tändre jire meden gärätä. Ye tä kukwe ütiäte driere nie ja töi kräke arato (Mat. 18:​21, 22). ¿Ñan tä nemen nuäre mä kräke mäträbare ne mikakäre täte? Ye erere ngwane mäkwe ñaka ja di ngwan nekä. Ni jökrä ngite ye medenbätä nita Jehová mike täte akwa ruäre ngwane ñan tä nemen nuäre ni kräke ngite kitakäre ta ni madabiti. ¿Mä raba dre nuainne? Mäkwe ja di ngwan ngite kite ta mä mräkä yebiti aune ja mäketa ben ye bäri ütiäte.c

NITRE UMBRE, MUNKWE OBEJA NGÜBA

13. ¿Ñobätä ñan raba nemen nuäre nitre umbre kräke ja mräkätre konkrekasionte ye ngübakäre?

¹³ Jesús nükaninta nire ye bitikäre kukwe ne niebare kwe Pedro ie “Nitre tödekaka tibti tä obeja kwrere, ye makwe ngibia” ye ñaka käi nikwitaninkä Pedrobiti (Juan 21:16). Mä ni umbre ji ngwanka ngwane mä rabadre kukwe ne mike täte arato. Akwa ruäre ngwane ñan raba nemen nuäre mä kräke kä diankakäre jai sribi ütiäte mikani mä kisete ne nuainkäre. Nitre umbre mräkätre tä dre ribere jai ja üairebiti, ja ngätärebiti, ja töibiti ye rabadre mike käne. Aune rabadre kukwe kwin bämike kukwe driebätä, rabadre ja kite kwin gätä kräke aune kukwe kädriedre kwe gätä krite yebätä. Ruäre abokän tätre sribire Comité de Enlace Hospital ben o Departamento Local de Diseño y Construcción konkrekasion yete yebätä. Nitre umbre tä sribire krubäte.

14. ¿Ñobätä nitre umbre ji ngwanka töta ja mräkätre tä obeja kwrere ye ngübai aune dre raba dimike? (1 Pedro 5:​1-4).

¹⁴ Ja mräkätre kristiano ji ngwanka mada ye ie Pedrokwe kukwe ne niebare: ‘Nitre tödekaka tä obeja kwrere, ye munkwe ngibia’ (ñäkädre 1 Pedro 5:​1-4 yebätä). Ja mräkätre umbre ye tä ja mräkätre mada ye tarere aune tö ngibiai. Akwa tätre sribire krubäte o kä ñan nemente ie yebätä ñan raba kukwe ne nuainne kwin ye tä nemen ruin ietre. Ye erere ja ruin mäi ngwane, ¿mäkwe dre nuaindre? Ja ruin ño mäi ye mäkwe nie Jehovai. Pedrokwe tikabare: “Munkwe sribi ni mda mda die mikakäre angwane, Ngöböta ja di bien ño munye, ye erere bti munkwe sribi nuen ja di ngöi jökrä ni mda mdakrä” (1 Ped. 4:11). Mä mräkä tä ja tuin kukwe tare ben aune ükate ñan raba kä nengwane. Akwa Jesukristo obeja ngibiaka bäri ütiäte kri ye raba kukwe nuainne bäri mä kräke gwäune aune ja känenkäre kä mrä yete ye mä ngwan törö jai. Nitre umbre ye rabadre ja mräkätre mada ye tarere, ngübare aune kukwe kwin nuainne ja mräkätre mada ye okwäbiti ye ie Jehová tö.

15. ¿Ni umbre ji ngwanka iti tä dre nuainne obeja ngübakäre? (Üai mikadre ñärärä).

¹⁵ William ni ji ngwanka ünä ja üairebiti aune kukwe gare krubäte ye ie ja mräkätre tä obeja kwrere ngibiadre ye tuin ütiäte krubäte. Pandemia COVID-19 kömikani ye ngwane, William aune nitre umbre mada kräke blitadre nitre itire itire grupo sribebare kukwe driekäre yete yebe, bämä kratire kratire ye namani tuin ütiäte krubäte. ¿Ñobätä? Niara tä mike gare: “Ja mräkätre nämäne kaibe gwi ye medenbätä töi nämäne drebätä yebätä nämäne bäri nuäre kräke töbikare. Aisete nämäne bäri nuäre töbikakäre kukwe blo yebätä”. Ja mräkä iti tä ja tuin kukwe tare ben ngwane, William tä kukwe nuin kwekebe, ja mräkätre ye tä dre ribere jai aune dreta mike töbike mikakäre gare bäri kwin jai. Ye köböire tä kukwe meden raba ja mräkätre dimike ye känene, metrere video tä sitio nikwe yete yebiti. William tä niere arato: “Ja mräkätre tä obeja kwrere ye ngübadre ye bäri ütiäte. Nita ja di ngwen kukwe kwin Jehova bätä mike gare nitre ie. Ye erere arato nikwe ja di ngwandre ja mäkrätre tä obeja kwrere ye ngübare ye abokän ja mräkätre ye dimikadre ne kwe tädre ja ngwen jankunu metre Jehovai”.

NIKWE JEHOVÁ TUADREMETRE JA KITE TÄTE

16. ¿Pedrokwe tärä tikani bätä nikwe ja kiti ye mika raba ño täte?

¹⁶ Kukwe ja tötikara nekänti kukwe ütiäte ye ruäre aibe nibi gare nie tärä tikani ketebu Pedrokwe yebätä. Aune kukwe ruäre mä raba ükete nibi gare mäi raba ruin nunye. Ñodre, ¿mäkwe nünandi kä bä nuäre te yebätä mätä töbiketari bäri? ¿Mäta ja töi mike kukwe driedre kwelate, sribikänti o kä madakänti? O ¿ja mräkätre tare erametre mäkwe ye mä tö bämikai ie kukwe madabiti yebätä mä tärä töbike? Mä abokän ni umbre ji ngwanka ye ngwane, ¿mäta juto biarebe ja mräkätre obeja kwrere ye dimikakäre kä jutobiti aune tö kwatibebiti? Mäkwe ja trä tuadre töi bäkänbiti ngwane kukwe ruäre mäta nuainne blo ye jutuen mäi jabätä ngwane mä ñan ja di ngwan nekä. “Ni Dänkien moto kuin era metre” niara mä dimikai ye mäkwe ngwan törö jai (1 Ped. 2:3). Pedro tä kukwe ne niere nie: “Ngöbö ye ara jire käkwe mun mikadi juto biare nüne jakrä. Erere arato, mun mikadi nünenkä dite kwe amne ja di biandi kwe munye amne mun mikadi dikekä janknu kwe Jesukristobe arato” (1 Ped. 5:10).

17. ¿Nikwe Jehová tuainmetre ja kite täte aune kukwe ngübadre bätärekä ye köböire dre kwin rabai nikwe?

¹⁷ Bati ja namani ruin ngwarbe Pedro ie rabakäre Ngöbö monsoi ngwärekri (Luc. 5:8). Akwa Jehová aune Jesukwe Pedro nämäne tare aune nämäne dimike yebätä nänbare jankunu kwe Jesube. Ye köböire, “ni Dänkien, ni Diantarikä Jesukristo tä gobrane kärekäre, ye känti Ngöbökwe niara kadi ngäbti kise kubu ja känti sete” (2 Ped. 1:11). ¡Regalo bä nuäre krubäte ¿ñan ererea?! Mäkwe kukwe ngüba bätärekä Pedro erere aune mäkwe Jehová tuainmetre ja kite ünä ye ngwane ja nire käre ye rabai mäkwe arato. Ye abokän “ni rabaite kwäre” (1 Ped. 1:9).