Ari ja die mike kwärikwäri gätäte

1. ¿Ñobätä nita blite gätäte?

¿ÑOBÄTÄ nita niken gätäte? Kukwe ütiäte bätä nita niken ye abokän ni tö Jehová käikitaikä (Sal. 26:12; 111:1). Gätäte nita ja dimike kwärikwäri, bärira jire kukwe tare ne näire (1 Tes. 5:11). Kukwe ketebu ne nuainta nikwe nita blite gätäte ngwane.

2. ¿Ñongwane ni raba blite gätäte?

² Gätä jökräbätä kä tärä nie blitakäre. Ñodre, Ni Mikaka Mokre yebätä ja tötikata bämän krütebätä. Aune gätä nuainta bämän grabare känti “Perla ükani känändre”, känti ni raba kise ngökö kwin, arato Ja tötika Bibliabätä konkrekasionte yete ni raba blite, arato ni raba blite ribeta nie ngwane, ni raba nuainne.

3. a) ¿Kukwe meden raba ni ketebätä blitakäre gätäte? b) ¿Hebreos 10:24, 25 ye tä ni dimike ño?

³ Ni jökrä tö blitai gätäte Jehová käikitakakäre aune ja mräkätre dimikakäre. Akwa kukwe ruäre raba ni ketebätä: Kä jüräta nemen nibätä yebätä ni ñan tä blite gätäte o nita kise ngökö bä kabre kwin akwa kä ñan bianta krubäte nie blitakäre. Pablokwe kukwe tikani nitre Hebreos ie, yekänti kukwe keteiti ütiäte raba kwe nie. Ñobätä gätä ütiäte krubäte yebätä blitabare kwe ngwane, “ni rabadre ja dimike kwärikwäri yebätä ja töi mikadre metrere mikani gare kwe” (ñäkädre Hebreos 10:24, 25 yebätä). Dre ie nita tö ngwen yebiti ni tö nitre mada dimikai nikwe blitai kukwe braibe biti ngwane. Kä jürä ñaka rabai krubäte nibätä kise ngökare kwin, ñan kä biandre krubäte nie blitakäre akwa nitre mada käkwe nuaindre ye käkwe kä mikai juto nibätä (1 Ped. 3:8).

4. ¿Kukwe meden ketamä nikwe mikai gare jai kukwe ja tötikara nekänti?

⁴ Kukwe ja tötikara nekänti ni raba ja dimike ño kwärikwäri konkrekasion chi känti ja mräkätre ñaka krubäte aune kä tärä krubäte nie blitakäre. Biti konkrekasion kri känti ja mräkätre tärä krubäte blite gätäte ye ngwane nikwe dre nuaindre ye rabadi gare nie arato. Mrä mada nita blite gätäte ye nikwe nuaindre ño ne kwe rabadre ja mräkätre dimike krubäte ye mikadi gare jai.

KONKREKASION CHI AKWA NI RABA JA DIMIKE ÑO KWÄRIKWÄRI

5. ¿Nita kwen braibe gätäbätä ye ngwane ni raba dre nuainne ja dimikakäre kwärikwäri?

⁵ Konkrekasion chi yekänti ja mräkätre tä gätä jie ngwen tä kukwe ngwentari ngwane, nitre ñan kwati comentario biankäre ye medenbätä gätä tä nuin raire ye tä nemen bare ngwane ye ñan tä ni dimike. Kukwe ne erere rabadre bare ngwane ¿ni raba dre nuainne? Ni tädre juto biarebe blitakäre gätäte ne kwe ja mräkätre mada töi rabai nuainbätä arato.

6, 7. ¿Kä jürä ñan rabadre krubäte mäbätä yekäre mäkwe dre nuaindre?

⁶ Ja mräkätre kwati tä ja töi mike blite gätäte ye känenkri kä jürä tärä nemenbätä ye erere nemen bare mäbätä ngwane, ¿mä raba dre nuainne? Mäkwe ja töi mika kukwe känene ne kwe kä jürä ñaka rabadre mäbätä blitakäre gätäte aune ye köböire mä rabadre nitre mada dimike.

⁷ Kukwe keteiti raba mä dimike ye abokän, Ni Mikaka Mokre bätä ja tötikani yebätä mä raba ja kite.b Kukwe keteiti bätä blitata ye abokän ja ükadrete kwin (Prov. 21:5). Drebätä blitata yebätä kukwe gare krubäte mäi ngwane, rabai bäri nuäre mä kräke blitakäre gätäte. Kukwe mada mä raba nuainne ye abokän kukwe braibe biti blite (Prov. 15:23; 17:27). Blitata braibe ngwane, kä jürä ñan tä nemen krubäte nibätä. Ne madakäre kukwe keteiti o ketebu niedre nita blite ye ngwane, tä nemen bäri nuäre rükakäre gare ja mräkätre ie blitata nga aune kukwe nieta krubäte ye kräke. Mäkwe blitai kukwe braibebiti aune ja kukweibiti ngwane, mäkwe ja ükaninte kwin aune drebätä blitata ye nüke gare kwin mäi ye rabadi gare ja mräkätre ie.

8. ¿Nita ja di ngwen ye tuin Jehovai ngwane jata nemen ruin ño ie?

⁸ Kukwe ne mä tärä nuainne akwa kä jüräta nemen jankunu mäbätä yebätä mätä blite bati o bobu aibe ngwane, ¿mä raba dre nuainne? Mätä ja di ngwen krubäte ye ütiäte Jehová kräke ye mä ngwan törö jai (Luc. 21:1-4). Kukwe ñan nuäre nuaindre mä kräke yebätä mä ja di ngwandre krubäte ye Jehová ñan tä ribere mäi (Filip. 4:5). Dre dre raba nemen bare mäi ye ererebätä mäkwe kukwe mika nuaindre jai, Jehovakwe mä töi mikadre jäme ye mäkwe ribe ie aune mäkwe ja di ngwan kukwe nuainkäre. Kömikakäre mäkwe blita kukwe braibebiti.

KONKREKASION KRI YEKÄNTI NI RABA JA DIMIKE ÑO KWÄRIKWÄRI

9. ¿Konkrekasion krite nita ngwane dre raba nemen bare?

⁹ Konkrekasion mäkwe yete ja mräkätre tä kwati yebätä mä raba ja tuin kukwe jene ben. Bä kabre mäkwe kise gainkä kwin akwa comentario bien ñaka mäi ja mräkätre tä kwati yebätä. Meri testiko iti Danielle yebätä ani töbike, niara töta nemen blitai krubäte gätäte.c Tä nuainne Jehová käikitakakäre aune kukwe metre gare ie rabadre neketeke bäri töite yekäre tä nuainne. Akwa ja kwitani kwe konkrekasion madate ngwane, ye erere ñaka namani bare, comentario ñan bian namani krubäte ie. Niara tä niere: “Ti rababa töbike krubäte aune kukwe ruäre ti nämä nuainne ye dianinkä tikän ti rababa nütüre. Ñan kä bianta krubäte nie blitakäre gätäte ngwane, nuainta nierare nibätä ta nemen ruin nie”.

10. ¿Mä raba dre nuainne blitakäre gätäte?

¹⁰ ¿Ja tärä nemen ruin Danielle ye erere mäi? Yebätä mäkwe ja töi mikani ñaka kise gainkä kwin aune jerekäbe nitre kukwe nuin. Mäkwe ñaka ja di ngwan nekä. Ye erere nemen bare mäbätä ngwane, ¿mäkwe dre nuaindre comentario biankäre bäri? Mäkwe ja ükate cometario biankäre kabre. Ye köböire mä ñan raba blite párrafo kena bätä akwa párrafo ja känenkäre yebätä mä raba blite. Mäta ja ükete kukwe ja tötikara Ni Mikaka Mokre yebätä ngwane, párrafo keteitire keteitire yete kukwe mikata gare ye abokän meden ja erebe kukwebätä blitata artículo yete yebätä mäkwe töbika. Ye köböire kukwe kwain mäi blitakäre gätäte. Ne madakäre kukwe metre Bibliabätä nguseta bätä blitata parrafobätä yebätä mäkwe ja töi mika blite (1 Cor. 2:10). Kukwe ne ñan tä nemen nuäre mikakäre gare yebätä párrafo nekänti nitre ñaka kise ngökö krubäte kwin. Akwa yebiti ta comentario ñan bianta mäi ye ngwane ¿mäkwe dre nuaindre? Gätä kömika jämi ye känenkri párrafo meden känti mä tö blitai ye mäkwe nie ni gätä jie ngwanka ye ie.

11. ¿Filipenses 2:4 tä kukwe nie erere nikwe dre nuaindre?

¹¹ (Ñäkädre Filipenses 2:4 yebätä). Üai deme Ngöbökwe köböire apóstol Pablo käkwe nitre kristiano töi mikani kwe kukwe ne nuainne, töbikadre jondron kwinbätä ni mada kräke kwetre. ¿Gätäte ni raba kukwe ne mike ño täte? Nitre mada tö blitai ye nikwe ngwandre törö jai.

12. ¿Kukwe meden ni raba nuainne ne kwe ja mräkätre ie ja rabadre ruin dimikani gätäte? (Üai mikadre ñärärä).

¹² Kukwe ne rükadre gare kwin nie yekäre ani bämike kukwe keteitibiti. Mäta blite ja ketamuko mäkwe ben ngwane, mä aibe ñan tä blite mätä niaratre tuenmetre blite ye erere tä nemen bare gätäte arato. Ja mräkätre kwati käkwe blitadre gätäte ye ie ni tö. Nita kä bien ja mräkätre ie blitakäre gätäte tödeka kwetre yebätä yebiti nita niaratre dimike (1 Cor. 10:24). Ja mräkätre kwati rabadre blite gätäte yekäre ni raba dre nuainne ye ani mike gare jai.

13. ¿Ni raba dre nuainne ne kwe ja mräkätre madakwe blitadre gätäte?

¹³ Nikwe blitadre kukwe braibebiti ye köböire kä rabadrete ne kwe ja mräkätre mada rabadre blite arato. Nitre tä mekerabe kukwebätä aune nitre umbre ji ngwanka konkrekasionte ye raba kukwe ne bämike ja mräkätre mada käne. Nikwe blitadre kukwe braibebiti ye ñan ngöräbe, ñakare aune nikwe ñaka kukwe mikadre gare krubäte. Nikwe blitai ye ngwane kukwe nieta parrafobätä ye mikai gare jökrä ngwane ja mräkätre mada ie kukwe ñan rabai niekäre. Ñodre párrafo nekänti kukwe ketebu käkwe ni dimikai ye mikata gare nie, kena blitadre kukwe braibebiti, ketebu ñaka kukwe mikadre gare krubäte. Comentario kena bian mäi ngwane, mä raba ja töi mike blite kukwe keteiti aibebätä.

14. ¿Ni töta nemen blitai bä kabre gätäte ngwane dre ngwandre törö jai? (Üai mikadre ñärärä).

¹⁴ Mäkwe blitadi bäbe gätäte yebätä mäkwe töbika kwin käne. Mäkwe kise kadrekä gwä gwä kwin ngwane, ni gätä jie ngwanka ye kräke ñaka rabai nuäre comentario biankäre ja mräkätre mada ie. Ne madakäre, nitre ñan tä comentario bien krubäte gätäte yekwe comentario biandre ye ñan ütiäte raba kite nütüre (Ecl. 3:7).

15. a) ¿Ñan tä nemen blitabare jire gätäte nie ngwane nikwe ja töi mikadre ño? b) ¿Ja mräkä tä gätä jie ngwen tä kukwe ngwentari ngwane dre ngwandre törö kwe jai? (Recuadro “Sección kukwe ngwantarita aune kukwe mikata gare ye jie ngwandre ño”, ye mikadre ñärärä)

¹⁵ Gätäbätä ja mräkätre kwati tä kise ngökö kwin blitakäre, yebätä ni töta nemen blitai krubäte gätäte erere ñaka tä nemen bare nie. Ruäre ngwane gätä ta krüte aune ñaka tä nemen blitabare jire chi nie, yebätä ni raba nemen ulire akwa nikwe ñaka mikadre mate tare jabätä (Ecl. 7:9).

16. ¿Ja mräkätre käkwe blitabare gätäte ye dimikakäre ni raba dre nuainne?

¹⁶ Mä töta nemen kukwe kädriei krubäte gätäte ye erere ñan tä nemen bare mäi akwa ja mräkätre mada tä blite gätäte ye mäkwe kukwe nua kwekebe aune blitabare kwin krubäte kwe yebätä mäkwe kwin nie ietre. Mäta kwin niere ja mräkätre ie ye tä dimike, mä tä comentario bien ye kwrere rabai kräketre (Prov. 10:21). Nita kukwe kwin niere ja mräkätre ie ngwane nita niaratre dimike arato.

KUKWE MADABITI NI RABA JA DIMIKE KWÄRIKWÄRI

17. a) ¿Nitre rüne raba dre nuainne? b) Videote mikata gare erere ¿kukwe ketabokä meden nikwe nuaindre blitakäre kwin gätäte? (Nota mikadre ñärärä).

¹⁷ ¿Dre mada ni raba nuainne ja dimikakäre kwärikwäri gätäte? Monso chi tärä mäkwe ngwane, kukwe nuäre kräketre yebätä mäkwe niaratre kita blitakäre gätäte (Mat. 21:16). Gätä ruäre te kukwe ngusetabätä blitata ñodre kukweta nemen jabätä nitre gure ie, blitata aune ja ngwanta mrebe ja mike gure yebiti känti monsotre kia ñan raba blite akwa yebiti ta párrafo tärä krati o krobu känti monsotre kia raba blite. Monsotre mäkwe käkwe bä kabre kise kadrekä kwin akwa ñan käre kä bian blitakäre ie ye mäkwe mika gare kwin ie, mäkwe kukwe ye mikai gare monso ie ngwane, comentario ñan bian ie aune bian ni madai yebätä ñan rabai dione (1 Tim. 6:18).d

18. Nita blite gätäte ngwane ñan nitre töi mikakäre jabätä, ¿ni raba dre nuainne? (Proverbios 27:2).

¹⁸ Ni jökrä raba ja ükete kwin blitakäre gätäte Jehová käikitakakäre aune ja mräkätre dimikakäre (Prov. 25:11). Ruäre ngwane ni raba blite kukweta nemen bare nibätä yebätä akwa ñan blitadre krubäte kukwe jakwebätä (ñäkädre Proverbios 27:2 yebätä; 2 Cor. 10:18).e Bäri kwin, nikwe ja töi mikadre Jehová, kukwe kwe aune juta kwe yebätä (Apoc. 4:11). Párrafo ruäre känti mä raba kukwe mike gare jabätä ye ribeta ngwane mä raba nuainne. Párrafo ja känenkäre yebätä kukwe mada raba mä dimike rabai gare mäi.

19. a) Nita gätäte ye ngwane nikwe ja töi mikai ni madabätä ¿ye köböire dre kwin rabai bare? (Romanos 1:11, 12). b) ¿Ñobätä mä töta nemen blitai gätäte?

¹⁹ Blitadre gätäte ño ye kräke kukwe ñaka ükaninte akwa ni jökrä raba ja di ngwen blite gätäte nitre mada dimikakäre. Kukwe ne abokän ja mräkätre ruäre kräke rabadre ja di ngwen blite bäri gätäte. Mada abokän kräke tä blite bati bobu ye kwin aune kä tä nemente blitakäre ja mräkätre mada ie ye käita nemen jutobätä. Nita gätäte ngwane, nikwe ja töi mikai ni madabätä ye köböire, nikwe ja dimike kwärikwäri ye käi rabai juto nibätä (ñäkädre Romanos 1:11, 12 yebätä).