Mä ñan tä kukwe ngübare ngwarbekäre

1. ¿Ñobätä Abrahán nämäne tö ngwen kukwe metre ie?

ABRAHÁN ja ketamuko Jehovakwe ye monsoi ye kiri juta keta kabre kä jökräbiti tibien yekwe kukwe kwin rabai käbämikani kwe ie (Gén. 15:5; 22:18). Abrahán nämäne tödeke krubäte Ngöböbiti yebätä tö ngwani kwatibe kwe kukwe käbämikani ye ie. Akwa, kä namanina 100 Abranbiti aune 90 Sarabiti aune monso ñan nämäne kwe jire iti (Gén. 21:​1-7). Kukwe ne mikata gare Bibliakwe kukwe käbämikani Abrahán ie “ye nämä era kräke aune nira rabai juta keta kabre rün erere yei tö ngwani kwatibe kwe” (Rom. 4:18). Aune mikata gare erere, niara nämäne tö ngwen kukwe ie ye namani bare metre: Abrahán namani Isaac rün erere. ¿Ñobätä Abrahán nämäne tö ngwen krubäte kukwe käbämikani ie yei?

2. ¿Jehovakwe kukwe käbämikani ye rabai bare metre ye ie ñobätä Abrahán nämäne tö ngwen kwatibe?

² Jehová nämäne gare kwin Abrahán ie, yebätä kukwe käbämikani kwe ie yei “nämäne tö ngwen kwatibe” (Rom. 4:21). Abrahán nämäne tödeke krubäte yebätä kädekani ja ngwanka metre aune kani ngäbiti kwe (Sant. 2:23). Romanos 4:18 yete mikata gare, Abrahán nämäne tö ngwen aune tödeke. Kukwe ie nämäne tö ngwen yebätä Pablo tä kukwe mike gare bäri Romanos kapitulo 5 yekänti.

3. ¿Kukwe ie tö ngwanta yebätä Pablo tä dre mike gare?

³ Kukwe ie nita tö ngwen ye “ñan ngwarbekäre” ye ñobätä tädre gare nie ye Pablo tä mike gare (Rom. 5:5). Kukwe ie nita tö ngwen ye raba nemen bäri ño dite ye rabai gare nie arato. Ni täi ja kite Romanos 5:​1-5 yebätä ngwane, kukwe ie mäta tö ngwen tä nemen bäri ño dite yebätä mäkwe töbika. Ne madakäre, kukwe bätä nikwe ja kitai ne köböire rabai gare mäi mä raba dre nuainne kukwe ye mäta tö ngwen ye mikakäre bäri dite. Käne ani blite kukwe ie nita tö ngwen bä nuäre krubäte aune Pablokwe niebare ñaka ngwarbekäre ye.

KUKWE KWIN KRUBÄTE IE NITA TÖ NGWEN

4. ¿Drebätä blitata Romanos 5:​1, 2 yekänti?

⁴ (Ñäkädre Romanos 5:​1, 2 yebätä). Pablo kukwe tikani ja mräkätre kristiano Roma ie. Ja mräkätre ye ie kukwe namani gare Jehovabätä aune Jesubätä, tö ngwani kwe aune ja mikani kwetre kristiano. Yebätä Ngöbökwe niaratre kädekani “ja ngwanka metre tödeka namani kwe yebätä” biti dianinkä üai deme kwe yebiti. Yete ja käne, niaratre nämäne tö ngwen kukwe kwin krubäte aune rabai bare metre ye ie.

5. ¿Nitre dianinkä nänkäre kä kwinbiti ye tä tö ngwen dre ie?

⁵ Apóstol Pablo kukwe ne niebare ja mräkätre dianinkä nänkäre kä kwinbiti Éfeso ye ie, niebare kwe ie. “Jändrän kuin ngibiata Ngöbökwe munkrä” (Efes. 1:18). Aune kukwe käbämikani ja mräkätre Colosas ie ye rabai bare medente ye mikani gare kwe ie. Kukwe nebiti: “Jändrän kuinkuin nämane ükani kä käinbti mun kräke” (Col. 1:​4, 5). Aisete ja mräkätre dianinkä nänkäre kä kwinbiti ye gaikröta nünankäre kärekäre kä kwinbiti, gobrankäre Kristobe (1 Tes. 4:​13-17; Apoc. 20:6).

6. ¿Ja mräkä iti dianinkä nänkäre kä kwinbiti yekwe dre niebare tö ngwanta yebätä?

⁶ Kukwe ie ja mräkätre kristiano dianinkä nänkäre kä kwinbiti nämäne tö ngwen ye nämä ütiäte krubäte kräketre. Ñodre, kä 1991 ye ngwane ja mräkä Frederick Franz niebäre krörö: “Kukwe ie nun 144.000 tä tö ngwen ye rabai bare täte nun itire itire kräke aune kukwe bäri kwin nun ñan bämike ja töite ye rabai bare”. Kä kwati te nämäne todeke Jehovai yebätä ¿ja nämäne ruin ño ie? Tä mike gare: “Kukwe ie nunta tö ngwen yebätä nun ñan ja töi kwite. Ñakare aune, [ . . . ] tuin bäri ütiäte nunye nunkwe ngübadre nuäi näre yebiti ta. Ñobätä ñan aune, ñan ngwarbekäre ja di ngwanta aisete, kä rikadre millón kwati. Akwa, kukwe ie nunta tö ngwen ye bäri ütiäte nunkrä”.

7, 8. ¿Ni Ngöbö mikaka täte bäsi jökrä tä tö ngwen dre ie? (Romanos 8:​20, 21).

⁷ Nitre kwati Jehová mikaka täte kä nengwane ye tä tö ngwen kukwe madai. ¿Meden? Abrahán ye erere: tä tö ngwen nüna kä tibienbätä biti Ngöbökwe Gobrandi ye ie (Heb. 11:​8-10, 13). Pablokwe kukwe tikani kukwe kwin krubäte käbämikata yebätä arato (ñäkädre Romanos 8:​20, 21 yebätä). Kukwe käbämikata Bibliakwe kä ja känenkäre kräke ye namani gare mäi ngwane, ¿kukwe meden käkwe mä töi mikani niä? ¿Ni rabai kwäre ngite yebätä aune nikwe nünandi töi metre erere? ¿O ni mräkätre krütanina ye gaikröta nünankäre kä bä nuäre yete? Nengwane ja käne, kukwe kwin krubäte Ngöböta käbämike ye ie mä raba tö ngwen.

⁸ Ni jökrä tä tö ngwen kukwe ie abokän tä kä mike juto nibätä, nikwe nünain kä kwinbiti o kä tibienbätä ye ie. Kukwe ye nita tö ngwen ye raba nemen bäri dite köbö kwatire kwatire. Rabadre bare nie yekäre, ¿dre nuaindre? Mikakäre gare jai, ani blite jankunu kukwe tikani Pablokwe yebätä. Niarakwe niebare kukwe ie nita tö ngwen ye abokän ñaka ngwarbekäre.

TÖ NGWAN RABA NEMEN ÑO BÄRI DITE

9, 10. Pablo erere, ¿dre rabai bare nibätä gare nie? (Romanos 5: 3, 4; üai mikadre ñärärä).

⁹ (Ñäkädre Romanos 5:​3, 4 yebätä). Nikwe ja tuadre kukwe tare ben ye köböire kukwe ie nita tö ngwen ye ni rabai tö ngwen bäri mikani gare Pablokwe kukwe niebare kwe ye raba ni töi mike niä. Ñobätä ñan aune, ni kristiano ie gare nikwe ja tuadi kukwe tare ben. Ani töbike kukwe niebare kwe ja mräkätre Tesalónica ie yebätä. Kukwe ne niebare kwe ietre: “Ñobtä ñan angwane nun näma munbe yete angwane, nikwe ja tare nikadi kri abko nunkwe nieba munye, mden erere tä nakenkä nibtä abko nena gare munye arato” (1 Tes. 3:4). Aune kukwe ne tikani nitre kristiano Corinto ie: “Kukwe rakakaba taretare krübäte nun rüere, ye abko rabadre gare munye, ie ti tö [ . . . ] käkwe nun di gakaba jökrä amne, nunkwe ñan nünandre mda rababa ruen nunye” (2 Cor. 1:8; 11:​23-27).

¹⁰ Kukwe ye metre ni kräke kä nengwane. Ni kristiano ie gare nikwe ja tuadi kukwe tare ben (2 Tim. 3:12). Mä jatani tödeke Jesubiti aune niara mike täte ye ngwane ¿mäkwe ja tuanina kukwe tare ben? Ja ketamuko mäkwe o mräkätre tärä mä kötaire raba ruin nie o ja ngwanbätä kwin sribikänti ¿mä ja mikanina kukwe krite? (Heb. 13:18). ¿Kukwe ie mätä tö ngwen yebätä mätä blite nitre ben yebätä gobrantre tärä ja mike mä rüere? Metrere kukwe tare ye jökräbiti ta kukwe niedre Pablokwe ye ngwandre törö jai, nikwe kä ngwandre juto jabätä. ¿Ñobätä?

11. ¿Ñobätä ja töi mikadre kwatibe kä ngwen nüke jai?

¹¹ Nita ja tuin kukwe tare ben ngwane kätä nemen juto nibätä. Romanos 5:3 tä niere: “Ja tare nika ye abko käta ni mike nünenkä bäri dite janknu mda”. Ni kristiano ja tuai kukwe tare ben ye gare nie, akwa ni jökrä rabadre ja töi mike kä ngwen nüke jai. Nikwe kä ngwain nüke jai ye köböire kukwe kwin rabai bare ni kräke. Nitrebätä blitabare Jesukwe bämikani kwe nüra tä mate jäbiti ye kwrere ni ñan tö ja ngwain. Niaratre “tä Ngöbö Kukwei kaen ngäbti, bti bä jötrö tä näin Ngöböbe, akwa tädre niken ja tare nike tödekabtä Ngöböbti, ye btäräbe tä Ngöbö Kukwei kiteta temen, bti tä nikenta ja jiebti” (Mat. 13:​5, 6, 20, 21). Metrere, ni ñan tö ja tuai kukwe tare ben o ni nuadrete ni ñan tö, akwa nikwe kä ngwandre nüke jai ye kwin krubäte ni kräke. ¿Ñobätä nita niere? Ye ani mike gare jai.

12. ¿Kä ngwanta nüke jai ye köböire dre kwin tä nemen nikwe?

¹² Ja tuata kukwe tare ben yebätä Santiagokwe kukwe ütiäte kädekaninte. Kukwe ne tikabare kwe: “Munkwe ja tare nikadre bätärekä ja täritäri abti mun nena nünenkä dite raire era metre, ye köböire abko mun rabadre nüne metre Ngöbö ngwärekri ni ünän kwrere amne mun ñan rabadre jändrän kuin Ngöbökwe mdei nike” (Sant. 1:​2-4). Ja tuata kukwe tare ben aune kä ngwanta nüke jai köböire kukwe kwin tä nemen bare. ¿Meden? Ni mada ngübata bätärekä, tödekata aune tö ngwanta bäri Ngöböi. Akwa ye ñan ngöräbe . Kukwe mada ütiäte tä nemen bare arato.

13, 14. ¿Nita kä ngwen nüke jai ye köböire dre tä nemen bare aune kukwe ie nita tö ngwen yebätä dre tä nemen bare? (Romanos 5:4).

¹³ (Ñäkädre Romanos 5:4 yebätä). Pablokwe niebare “nita nebe nünenkä bäri dite tödekabtä Jesubti, ye käta ni töi mike bäri metre Ngöbö okwäte” (Rom. 5:4). Nita kä ngwen nüke jai ye köböire Jehovata ni kai ngäbiti, akwa niara töta nemen ni tuai ja tare nike ye ñan ai gärätä, ñakare aune nita kä ngwen nüke jai ye käita nemen jutobätä. ¿Kukwe ütiäte nibi gare mäi ne tä mä dimike kä ngwen nüke jai aune ja ngwen metre jankunu ye ñan ererea? (Sal. 5:12).

¹⁴ Ani töbike Abrahán ie yebätä. Niara ja tuani kukwe tare ben aune kä ngwani nüke kwe jai yebätä Jehovakwe kani ngäbiti. Mikani tuin kwe jai ja ketamuko kwrere aune kädekani kwe ja ngwanka metre (Gén. 15:6; Rom. 4:​13, 22). Ye erere tä nemen bare nibätä arato. Nita sribire Jehová kräke o sribi tä ni kisete konkrekasionte ye ñan aibätä tä ni kai ngäbiti, ñakare aune kä ngwanta nüke jai aune ja ngwen metre yebätä. Kä nuäi nibiti, kukwe ñobiti nita ja tuin o dre nuain gare nie akwa ni jökrä kwe kukwe kwin ye raba nemen. ¿Gwäune mäta ja tuin kukwe ñan nuäre ben? Mäkwe ja ngwain metre ngwane, Ngöbökwe mä kai ngäbiti ye mäkwe ngwan törö jai. Ni käita juto Jehovabätä gare nie ye tä ni dimike krubäte aune kukwe ie nita tö ngwen ye tä nemen bäri dite.

TÖDEKA NIKWE TÄ NEMEN BÄRI DITE

15. ¿Pablokwe dre mikani gare jankunu aune ni raba nemen kukwe meden ngwentari jai?

¹⁵ Nibi gare nie erere, Pablokwe kukwe ne niebare nikwe kä ngwain nüke jai ngwane, Ngöbökwe ni kai ngäbiti. Ja känenkäre mada niara tä kukwe mike gare jankunu, tä niere: “Jesu ngibiare ngäbti kisere bätärekä, käi ngwiane nuäre jabtä bäri mda. Ñan nita Jesu ngibiare ngäbti ngwarbe abko gare kuin nie”. Aune kukwe ie nita tö ngwen ye ñan ngwarbekäre (Rom. 5:​4, 5). Akwa ye känenkri Romanos 5:​2, yekänti niara tä niere nitre kristiano Romano ye kräke, tödekara nämenentre “Ngöbökwe ni mikadita bäsi ja kwrere, ye nita ngibiare kisere abko käita neme nuäre nibtä”. Yebätä ni raba nemen kukwe ne ngwentari jai: “¿Nitre kristiano ye kräke tödekara nämänena niebare Pablokwe, amarebiti bobukäre blitabareta kwe kukwe ie nämäne tö ngwen yebätä?”.

16. ¿Ñokänti kukwe käbämikata ye raba nemen bäri era nitre kräke? (Üai mikadre ñärärä).

¹⁶ Kukwe ie nita tö ngwen ye jatai tuin bäri era nie, mikai gare nie ngwane arato kukwe niebare Pablokwe ye rükai gare bäri kwin nie. Ñodre nunandi karekäre kä bä nuäre te kä tiebätä abokon ie to ngwanta, kukwe nebätä blitabare kena mäbe yebätä tobike, kukwe ye abokän bä nuäre krubäte yebätä ñan metre namani ruin mäi. Akwa Jehová namani gare bäri kwin mäi aune kukwe käbämikata kwe Bibliabätä ye nükani gare bäri kwin mäi ngwane, kukwe käbämikata jatani tuin bäri metre mäi.

17. ¿Mäkwe ja ngökani ñöte ye bitikäre tödeka mäkwe ye tä nirien ño bäri?

¹⁷ Mäkwe ja ngökani ñöte ye bitikäre mäta tö ngwen ye tä nemen bäri dite jankunu kukwe tä nemen gare bäri mäi aune mätä nirien jankunu kukwe ja üairebiti (Heb. 5:13–6:1). Kukwe nieta 5:​2-4 ye erere namanina bare mäbätä raba ruin nunye, ye abokän mä jatuani kukwe tare ben ngwane, Jehovata mä kai ngäbiti ye niena gare mäi. Kukwe ie mä.nämä tö ngwen kenanbe ye ie mäta tö ngwen bäri nengwane tuin bäri ütiäte mäi aune ye tä nemen tuin metre mätä mä mräkätre mike tui ño jai, ja ngwen ño aune kä diankata mäkwe jai kukwe nuainkäre yebiti.

18. ¿Kukwe meden mikata gare metre Jehovakwe nie?

¹⁸ Ngöböta ni kai ngäbiti ye köböire nita nemen tö ngwen niebare Pablokwe ye bitikäre kukwe ütiäte mada niebare kwe: kukwe ie nita tö ngwen ye rabai bare metre. ¿Ñobätä? Ngöböta kukwe käbämike ye kädekaninte kwe nitre kristiano ie: “Ñan nita Jesu ngibiare ngäbti ngwarbe abko gare kuin nie, ñobtä ñan angwane Ngöbökwe ja Üai Deme biani nie amne, Ngöböta ni tarere kri ja moto kuinbti abko Ngöbö Üai Deme tä mike gare nie ” (Rom. 5:5). Aisete kukwe ie nita tö ngwen ye rabai bare metre tädre gare metre nie.

19. ¿Dre gare metre nie?

¹⁹ Töbikadre Abrahanbätä ye kwin krubäte. Jehovakwe kukwe käbämikani ie, kani ngäbiti kwe aune kädekani kwe ja ketamuko. Abrahán kukwe ngübabare bätärekä aune kukwe namani ngübare ye namani kwe. Biblia tä niere: “Abrahamkwe ngibiabare bätärekä abti Ngöbökwe ngäbäkre köböi mikani ie ye därebare. Ngöbökwe ja kukwei biani ie, ye erere namani bare” (Heb. 6:15; 11:​9, 18; Rom. 4:​20-22). Abrahán erere, nikwe ja ngwain metre ngwane, nikwe ñaka tö ngwandi ngwarbekäre, ñakare aune kukwe kwin rabai nikwe. Kukwe ie nita tö ngwen ye metre ye tä kä mike juto nibätä (Rom. 12:12). Pablokwe tikani: “Ngöbö tödekakrä nikwe ye käkwe kä mika bäri nuäre munbtä amne mun mika nüne jäme kwe, munta tödeke bti ye ngwane. Erere arato, Ngöbökwe jändrän kuin nuendre mda munkrä, yebtä munkwe ja töi mika ngibiare bätäre Ngöbö Üai Deme di kri ye köböire” (Rom. 15:13).