Kukwe tare ngüba ñaka tä nemen bare yebätä Jehovakwe mä dimikai

1. ¿Dre gare metre nie?

NI JEHOVÁ mikaka täte ye niarata tarere aune tö kukwe kwin ie ni kräke ye gare nie (Rom. 8:35-39). Arato kukwe ütiäte Bibliabätä ja jie ngwankäre mikadre täte ye kwin ni kräke gare nie (Is. 48:17, 18). Akwa ¿kukwe tare ngüba ñaka tä nemen bare nibätä ngwane nita dre nuainne?

2. ¿Dre raba nemen bare nibätä aune ni raba kukwe meden ngwentari jai?

² Ni jökrä Jehová mikaka täte tä ja tuin kukwe tare ben. Ñodre, ni mräkätre tä kukwe niere o kukwe nuainne tä mate tare nibätä. Nita nemen bren yebätä ni ñan tä nemen sribire krubäte Jehová kräke. O kukwe tare tä nakainkä yebätä nita ja tare nike. Arato ja mikata ni rüere nita kukwe mike täte yebätä. Kukwe ye erere tä nemen bare nibätä ngwane, ni raba nemen kukwe ne kwrere ngwentari jai: “¿Ñobätä kukwe ne tä nemen bare tibätä? ¿Tikwe kukwe käme nuainbare? ¿O Jehová ñan tö niena kukwe kwin mikai nemen bare ti kräke?”. Ja tärä nemen ruin ye erere mäi ngwane mäkwe ñaka ja di ngwan nekä. Ni jökrä ja ngwanka metre Jehovai yebätä kukwe ye erere tärä nemen bare (Sal. 22:1, 2; Hab. 1:2, 3).

3. ¿Salmo 34:19 tä dre niere nie?

³ (Ñäkädre Salmo 34:19 yebätä).b Versikulo nekänti kukwe ketebu ütiäte mikata gare: 1) ni Jehová mikaka täte tä ja tuin kukwe tare ben 2) Jehová tä mike kwäre kukwe yebätä. Kukwe keteitibiti Jehovata ni mike kwäre ye abokän kä te nita nüne yebätä tä ni dimike. Nikwe Jehová mikai täte ngwane nünain kä jutobiti käbämikata kwe nie akwa ñan ja tuai kukwe tare ben ye ñan ai gärätä (Is. 66:14). Ja nire kärekäre rabai nikwe ja känenkäre yebätä nikwe ja töi mikadre ie niara tö, ja nire ye ara niara tö tuai nikwe (2 Cor. 4:16-18). Akwa kä ye jämi nüke känenkri kukwe tä nemen bare kä nebätä yebe niara tä ni dimike ja tuin köbö kwatire kwatire (Lam. 3:22-24).

4. ¿Dre rabai gare nie kukwe ja tötikara nekänti?

⁴ Nitre ja ngwanka metre Jehovai kirabe kädrieta Bibliabätä aune nitre ja ngwanka metre Jehovai kä nengwane yebätä kukwe ütiäte mikata gare rabai gare nie kukwe ja tötikara nekänti. Arato kukwe ngüba ñaka nikwe tä nemen bare nibätä angwane. Nikwe tö ngwain Jehovai ngwane ni dimikai kwe (Sal. 55:22). Ni täi ja kite kukwe nebätä ngwane mä raba kukwe ne ngwentari jai: “¿Kukwe ne kwrere rabadre bare tibätä ngwane tikwe dre nuaindre? ¿Raba ti dimike ño tö ngwen bäri Jehovai? Aune ¿dre ütiäte drieta ja töikrä kwe tie?”.

KUKWE NAMANI BARE KIRABE TÄ BIBLIABÄTÄ

5. ¿Kukwe meden ñan ngüba nämäne Jacobkwe ben ja tuani kwe? (Üai kena täräkwatabätä mikadre ñärärä).

⁵ Nitre ruäre kädekateta Bibliabätä käkwe ja tuani kukwe ñan ngüba nämene kwetre ben. Ani töbike Jacob yebätä. Rün käkwe niara juani ja mäkete Labán ni Jehová mikaka täte ye ngängän ben. Aune Jehovakwe kukwe kwin mikai nemen bare kräke ye käbämikani kwe ie (Gén. 28:1-4). Jacob käkwe rün mikani täte: aune nämäne nüne Canaán nikani Labán nämene nüne yekänti, yete Laban ngängän nämene nibu, Lea aune Raquel. Jacob ie Labán ngängän bäri bati ye namani tuin ja bä. Aune nämene juto biarebe sribikäre kä kwä kükü te Labán kräke ja mäkätekäre ngängän kwe ben (Gén. 29:18). Akwa Jacob nämene kukwe ngübare ye erere ñaka namani bare. Labankwe Jacob ngökani aune ngängän bäri umbre Lea ye biani kwe ie. Ye bitikäre Labankwe ngängän bäri bati Raquel ye biani ie, akwa Jacob rabadre sribire kä kwä kükü te mada kräke ribebare kwe ie (Gén. 29:25-27). Labankwe kukwe ükaninte Jacob ben ye ñaka mikani täte kwe aune Jacob mikani sribire kwe kä gre jire te ja kräke (Gén. 31:41, 42).

6. ¿Kukwe tare meden mada ben ja tuani Jacobkwe?

⁶ Kukwe mada ñan ngüba nämäne Jacobkwe yebe ja tuani kwe. Jacob mräkätre nämäne kwati aune ñan käre monsotre kwe käkwe ja ngwani kwin jabe kwärikwäri. Ñodre José rürübäinbare kwetre ni klabore erere. Aune monsotre nibu bäri umbre Jacobkwe Simeón aune Leví ye käkwe mräkätre aune Jehová ye kä mikani käme. Aune Raquel nämene murore jatabara monso nibukäre ngübare ngwane, krütani. Mrö nika nämäne krubäte ye medenbätä Jacob namanina umbre ye ngwane, niaratre nikani nüne Egipto (Gén. 34:30; 35:16-19; 37:28; 45:9-11, 28).

7. ¿Jehová nämene Jacob kain ngäbiti ye bämikani ño kwe ie?

⁷ Kukwe tare ben Jacobkwe ja tuani yebiti ta tö ngwani kwatibe kwe kukwe käbämikani Ngöbökwe ie yebiti. Jehová nämene kain ngäbiti ye mikani gare metre kwe ie. Ñodre kukwe tare keta kabre Labankwe nuainbare Jacobbätä yebiti ta kukwe keta kabre kwin Jehovakwe mikani nemen bare kräke. Aune José krütanina nämäne ruin Jacob ie ye tuaninta kwe ngwane debe biani krubäte kwe Jehovai ye gare metre nie. Kukwe tare keta kabre ben Jacobkwe ja tuani akwa yebiti ta kä ngwani nüke kwe jai ñobätä ñan aune nämäne ja kete kwin Jehová ben (Gén. 30:43; 32:9, 10; 46:28-30). Ye erere arato nikwe ja ketai kwin Jehová ben ye köböire kukwe tare ni ñaka ngübare yebe nikwe ja tuai ngwane nikwe kä ngwandi nüke jai.

8. ¿Rey David töi nämene dre nuainbätä?

⁸ David nämäne reire ngwane tö namani dre nuain Jehová kräke ye ñaka namani bare jökrä ie. Ñodre, brukwä tätebiti tö namani templo sribei Ngöbö kwe ye kräke ye niebare kwe Natán ie. Kukwe niebare kwe Natán ie ye ngwane, Natán niebare mada David ie: “Dre dre tä mä brukwäte ye mäkwe nuain, ñobätä ñan aune Ngöbö metre ye tä mäbe” (1 Crón. 17:1, 2). ¿Kukwe ne niebare David ie ngwane kä namani juto krubätebätä ye bämike ja töite? Ye bätärabe sribi kri ne nuaindi ño kwe yebätä namani töbike.

9. ¿David käkwe kukwe mikani nuaindre jai ye ñan namani bare ie ngwane dre nuainbare kwe?

⁹ Akwa kä ñan nikani raire ta profeta nikaninta kukwe ñaka kwin ye niereta David ie. Köbö yete deu Jehovakwe niebare Natán ie, David ñan aikwe templo ye sribedi ñakare aune monso iti kwe käkwe nuaindi (1 Crón. 17:3, 4, 11, 12). Kukwe ne juruabare David ie ngwane, ¿dre nuainbare kwe? Ja töi mikani kwe kukwe jene nuainne. Ngwian aune jondron ükaninkrö kwe ngobo Salomón templo sribedre yekäre (1 Crón. 29:1-5).

10. ¿Kukwe meden kwin Jehovakwe mikani nemen bare David kräke?

¹⁰ Davidkwe ñaka templo sribedi mikani gare ie ye bätärabe Jehovakwe kukwe ükaninte David ben: niara mräkä yekri ni iti jatai abokän käkwe gobrandi kärekäre ye käbämikani kwe ie (2 Sam. 7:16). Kä mrä yete Kristo gobrandi Kä Mil te, ni gobranka ye kite David yekri ye rabai gare ie ngwane kä rabai juto krubätebätä. Ni töita dre dre nuainbätä Jehová kräke ye erere ñan tä nemen bare nie, yebiti tä Ngöbö raba kukwe kwin mike nemen bare ni kräke ni ñan ngübare ngwane, ye tä nemen gare nie kukwe namani bare nebiti.

11. ¿Gobran Ngöbökwe ngüba nämäne nitre kristiano siglo kena yekwe ye näire ñan nükani, akwa dre kwin namani bare kräketre? (Hechos 6:7).

¹¹ Nitre kristiano siglo kena yekwe ja tuabare kukwe ngüba ñaka nämene kwetre yebe. Ñodre, gobran Ngöbökwe ye nämäne ngübare kisere akwa ñongwane rabai bare ye ñaka nämäne gare ietre (Hech. 1:6, 7). Akwa, ¿dre nuainbare kwe mada? Niaratre ñaka ja di ngwani nekä aune kukwe driebare jankunu kwetre. Kukwe drie jatani kä jökräbiti tibien ye jutuabare ietre ngwane, Jehová nämäne kukwe kwin mike nemen bare sribi nuain nämäne kwetre yebätä ye nükani gare ietre (ñäkädre Hechos 6:7 yebätä).

12. ¿Mrö nika nämäne krubäte ye ngwane nitre kristiano siglo kena ye käkwe dre nuainbare?

¹² Siglo kena nitre kristiano näire mrö nikabare kri “kä jökräbiti tibien” (Hech. 11:28). Gare metre nie nitre kristiano ja tuabare kukwe nebe arato. Ye ngwane nitre rüne namani töbike krubäte mräkätre kwe ngübai ño kwe yebätä. Aune monsotre bati töi nämäne kukwe driebätä bäri akwa ye mikai nuaindre kwe jai o ye nuaindre kwe ja känenkäre yebätä namani töbike. Kukwe ñokwa yebiti ta nitre kristiano käkwe dre nuaindre ye nükani gare ietre. Niaratre käkwe kukwe driebare jankunu aune dre dre nämäne kwetre ye döräibare töi kwinbiti kwe ja mräkätre judeate yebe (Hech. 11:29, 30).

13. ¿Mrö nika nämäne ye näire kukwe meden kwin namani bare nitre kristiano ye kräke?

¹³ ¿Kukwe tare ye näire kukwe meden kwin namani bare nitre kristiano kräke? Nitre kristiano nämäne dre dre ribere jai ye erere biani ie ye ngwane, Jehová nämäne niaratre ngübare ye tuabare ja okwä jeñebiti kwetre (Mat. 6:31-33). Ja mräkätre käkwe niaratre dimikani yebe ja namani ruin bäri keteitibe ie raba ruin nie. Aune nitre kristiano käkwe jondron biani o kukwe ño erere nuainbare kwe nitre kristiano dimikakäre yebätä kä namani juto (Hech. 20:35). Kukwe ñokwa yebiti ta nitre yekwe ja tuabare kwe ño ño namani bare yebe, nitre kristiano yekwe kä ngwani nüke jai ye köböire Jehovakwe kukwe kwin mikani nemen bare kräketre.

14. ¿Dre namani bare Pablo aune Bernabé yebätä aune ye köböire dre nakaninkä? (Hechos 14:21, 22).

¹⁴ Nitre kristiano siglo kena ye rüere ja mikani ngüba ñaka nämäne kwetre ye ngwane. Ñodre Pablo aune Bernabé ye nämäne kukwe driere Listra ye ngwane, dre namani barebätä ye ani mike gare jai. Kenanbe, nitrekwe kani ngäbiti kwin aune kukwe nuani. Ye bitikäre nitre ja mikaka niaratre rüere ye käkwe nitre mada mikani rüere arato nitre ye arabe käkwe täkäni jäbiti kämikani kwetre namani ruin ietre (Hech. 14:19). Akwa Bernabé aune Pablo nikani kä madakänti aune ñaka ja di ngwani nekä kwe käre kukwe driebare jankunu kwe ye köböire ¿Dre kwin namani bare? “Ni kwati käkwe kukwe kwin Jesubätä ye mikani era” aune niaratre kukwe niebare aune ja ngwani ño kwetre yebiti ja mräkätre dimikani kwe (ñäkädre Hechos 14:21, 22 yebätä). Pablo aune Bernabé ñaka ja di ngwani nekä nitre käkwe ja mikani rüere yebiti ta, ye köböire kukwe kwin namani nitre kwati yekwe. Ye erere kä nengwane ni ñaka ja di ngwain nekä aune Jehovakwe sribi biani nie ye ni täi nuainne jankunu ye ngwane kukwe kwin rabai nikwe.

KUKWE TÄ NEMEN BARE KÄ NENGWANE

15. ¿Dre raba nemen gare mäi ja mräkä Macmillan yebätä?

¹⁵ Kä 1914 ye känenkri, nitre Jehová mikaka täte nämäne kukwe ütiäte ngübare ngäbiti. Iti ye abokän kädeka nämäne Alexander Macmillan. Kä namanina braibe ne kwe nitre kwati niara erere ye näin kä kwinbiti nämänentre nütüre, akwa ye erere ñaka namani bare. Kukwe kädriebare kwe nitre kwati ngwärekri septiembre kä 1914 ngwane niebare kwe: “Ti bike kukwe kädriere ne mrä raba ruin tie”. Ye bitikäre kukwe ne tikabare kwe: “Nun näin ben gwairebe kä kwinbiti ye nun ruäre käkwe nütüba jötrö ngwarbe ruin nunye”. Biti niebare kwe: “Nunkwe kukwe Ngöbökwe ye driedre jankunu ye rükaba gare nunye”. Ye erere nuainbare kwe. Kukwe driebare kwe kä jutobiti aune ja mräkätre ja ngwanka neutral nämäne ngite ye dimikani kwe arato aune niara namanina umbre yebiti ta ñaka gätä juani jire ja bäre kwe. Ja mräkä Macmillan näin kä kwinbiti ngüba ngäbiti nämäne kwe ngwane ñaka kä juani ngwarbe jire ta kwe. Ye köböire ¿Dre kwin namani kwe? Kä 1966, niara jämi krüte ye känenkri kukwe ne tikabare kwe: “Tödeka tikwe nämä dite käne ye erere ti täbe tödeke nengwane”. Gare metre nie niara kukwe kwin bämikani ni jökrä kräke, nitre tä ja tuin kukwe tare ben nükebe kä nengwane aune tä kä ngwen nüke jai ye kräke bärira jire kukwe kwin bämikani kwe (Heb. 13:7).

16. ¿Jennings aune muko kwe käkwe ja tuani kukwe tare meden ngüba ñaka nämäne kwetre yebe? (Santiago 4:14).

¹⁶ Nitre kukwe mikaka täte metre yekwe ja tuani bren tare ñaka ngüba nämäne kwetre yebe. Ñodre ja mräkä Herbert Jennings bätä kukwe mikata gare yete niebare kwe niara nämäne sribire misionero erere muko kwe ben kä jutobiti kä Ghana yekänti.c Ye bitikäre bren tare namani dokwäte käkwe kä mikani ngwarbe dokwäbiti ye mikani gare ie. Kukwe ben ja mräkä Jennings nämäne ja tuin yebätä kukwe ne niebare kwe, dre rabai bare “‘jetebe’ ni ñaka ngübare” ye tä nemen bare nibätä Santiago 4:14 tä mike gare erere (ñäkädrebätä). Niarakwe tikabare: “Kukwe tare ben nun nämä ja tuin ye medenbätä nunkwe ja mikaba juto kä mikakakäre kä Ghana känti, ja mräkätre tare nunkwe yebätä nänkäreta Canadá [ja kräkäi mikakäre]”. Jehovakwe Ja mräkä Jennings aune muko kwe dimikani jankunu ja ngwen metre sribi nuain nämäne kwe ye nuainkäre kukwe tare yebiti ta.

17. ¿Kukwe namani bare ja mräkä Jenningsbätä ye tä ja mräkätre mada dimike ño?

¹⁷ Ja mräkä Jenningsbätä kukwe mikata gare yekänti kukwe metre erere nämäne nemen barebätä ye mikani gare kwe yekwe nitre kwati dimikani. Ñodre meri testiko iti käkwe niebare: “Ti ñaka ñäkäbare jire kukwe mikata gare ne kwrerebätä […]. Ja mräkä Jennings ye nämäne bren yebätä sribi nämene kisete tuanimetre kwe ne kwe rabadre ja ngübare ye käkwe ti dimikaba dre ben ti nämä ja tuin ye mike tuin debe näre jai”. Ja mräkä mada käkwe niebare: “Ti nämä sribire kä gre te ni umbrere konkrekasionte ye bitikäre sribi ye rababa tuadremetre tie, ñobätä ñan aune bren tare rababa ti dokwäte. Ja rababa ruin ngwarbe tie aune ulire krubäte ñäkäkäre kukwe namani bare nitrebätä mikata gare yebätä […]. Akwa ja mräkä Jennings käkwe kukwe ngübabare bätärekä ye käkwe ti dimikaba krubäte”. Kukwe tare ni ñaka ngübare ben nita ja tuin aune nita kä ngwen nüke jai yebiti nita nitre mada dimike ye kukwe ne tä ngwen törö nie. Aisete ni tö nünain ño akwa ye erere ni ñaka tä nüne yebiti ta tödeka nikwe aune nita kä ngwen nüke jai yebiti nita nitre mada dimike (1 Ped. 5:9).

18. ¿Meri iti nünanka Nigeria kän muko krütani yebätä dre raba nemen gare nie? (Üai mikadre ñärärä).

¹⁸ COVID-19 ngüba ñaka nämäne ye käkwe nitre kwati testiko mikani kukwe kri te. Ñodre meri iti nünanka Nigeria kän muko krütani, ngwian aune mrö ñaka nämäne krubäte kwe. Mrö köbö ye kräke dekä aibe namanina kwe ye ngwane ngängän iti käkwe ngwanintari ie ne bitikäre nikwe dre kwetadi. Niarakwe niebare ngängän ie mrö aune ngwian ñaka nikwe akwa meri kän muko krütani nünanka Sarepta kädekateta Bibliabätä ye erere ni rabadre ja ngwen. Ani mrö mrä sribere kwetadre biti nikwe tö ngwandi Jehová ie (1 Rey. 17:8-16). Niaratre jämi töbike mrö ñänä ruäre ye kräke bätä ngwane, ja mräkätre tä mrö ükekrö nitre dimikakäre ye nükani mrö ngwena. ¡Mrö biani ietre ye bämän krobu jire kräke! Yete nükani gare meri testiko ne ie niarakwe dre niebare ngängän kwe ie ye Jehová nämäne juto biarebe kukwe nuin. Metrere, nita ja tuin kukwe tare ñaka ngübata yebe ngwane tö ngwanta Jehovai ye tä ni dimike nökrö bäri niara ken (1 Ped. 5:6, 7).

19. ¿Ja mräkä Alexéi Yershov ye käkwe ja tuani kukwe ño ben?

¹⁹ Kä nikanina ruäre ta kukwe ñan ngübata yebe ja mräkätre ruäre käkwe ja tuanina ñodre: ja mikata ni rüere. Ja mräkä nünanka Rusia kädekata, Alexéi Yershovbätä kukwe namani bare ye ani mike gare jai. Niarakwe ja ngökani ñöte kä 1994 ye ngwane, nitre testiko nünanka Rusia ye nämäne kukwe driere töi jämebiti. Akwa ja känenkäre mada ñan namanina ye erere. Kä 2020, ye ngwane nitre sribikä gobranbe nikani gwä ja dibiti ju Yershov yekwe te, aune jondron nämäne kwe ye dianinkä jökrä kän. Ye bitikäre sö nikani ruäre ta nitre sribikä gobranbe yekwe multa mikani niarabiti. Ni iti tö namani kukwe mikai gari bäri Bibliabätä jai käkwe ja tötikabare kä ruäre te yekwe video grababare yebätä multa mikani niarabiti ni ja tötikaka ne käkwe ja mräkä Yershov ye ngökani kwäräbe.

20. ¿Dre nuainbarera ja mräkä Yershov yekwe ne kwe nämäne ja kete Jehová ben ye rabadre bäri dite?

²⁰ ¿Kukwe tare ben ja mräkä Yershov käkwe ja tuani ye köböire kukwe kwin namani kwe? Jän. Ñobätä ñan aune niara tä ja kete Jehovabe ye namani bäri dite. Niara tä niere: “Ti aune ti muko nunta orare bäri. Kukwe tare ben ti nämä ja tuin yebätä Jehovakwe ñaka ti dimikadre akräke ti di ñan rükadre jabätä ja tuakäre ben”. Tä niere arato: “Tita ulire ye ngwane tita ja tötike Bibliabätä ye tä ti dimike krubäte. Aune nitre ja ngwanka metre kirabe kädekateta Bibliabätä yebätä tita töbike ngwane tä ti dimike. Kä ngwandre nüke jai aune tö ngwandre ye ütiäte krubäte ye tä nemen gare nie, kukwe bämikata kädekateta Bibliabätä yebiti”.

21. ¿Dre nibi gare nie kukwe ja tötikara nekänti?

²¹ ¿Dre nibi gare nie kukwe ja tötikara nekänti? Kä käme te nita nüne nekänti kukwe tare ni ñaka ngübare tä nemen bare nibätä ye ngwane, nikwe tö ngwain kwatibe Jehovai ngwane, käre Jehová täi juto biarebe ni dimikakäre. Ñodre texto tä dianinkä kukwe ja tötikara ne kräke tä niere erere, “ni kukwe kwin nuainkä tä ja tuin kukwe keta kabre ben akwa kukwe jökrä yebätä Jehová tä mike kwäre” (Sal. 34:19). Ye medenbätä, kukwe tare tä nemen bare nibätä yebätä nikwe ñaka ja töi mikadre krubäte ñakare aune Jehová dite krubäte käkwe ni dimikai ja tuakäre kukwe tare tä nemen bare nibätä yebe yei nikwe tö ngwandre. Aune Pablokwe niebare erere nikwe kukwe ne niedi: “Kristo ti die mikaka, köböire ti raba jändrän jökrä nuene” (Filip. 4:13).