Jehová tä mä kain ngäbiti yei mäkwe tö ngwan

1. ¿Nitre Ngöbö mikaka täte raba nemen töbike drebätä?

¡“JEHOVABÄTÄ juta kwe käi juto” tä nemen gare nie, ye tä kä mike juto nibätä! (Sal. 149:4). Akwa, ruäre ngwane nitre raba di nekä aune raba nütüre: “Juta Jehovakwe ye käi jutobätä, ¿akwa erametre ti käi jutobätä?”. Nitre Ngöbö mikaka täte kirabe kwati kräke ñan namani nuäre, Ngöbö nämäne kain ngäbiti ye mikakäre era jai (1 Sam. 1:​6-10; Job 29:​2, 4; Sal. 51:11).

2. ¿Jehovata nire nire kain ngäbiti?

² Ni ngite akwa Jehová raba ni kain ngäbiti ye mikata gare metre nie Bibliakwe. ¿Akwa yekäre dre nuaindre? Nita tö ngwen Kristobiti aune nikwe ja ngökai ñöte yebiti nikwe bämikai (Juan 3:16 TNM). Yebiti nita ja mike ngite yebätä nita ja töi kwite aune nikwe Jehová töi nuain yete ja käne ye nita bämike ni jökrä ngwärekri (Hech. 2:38; 3:19). Nita kukwe ne nuainne rabakäre ja ketamuko Jehovakwe ye käi ta nemen nuäre krubätebätä. Nita ja denkä mento Jehová kräke aune nita ja di ngwen mikakäre täte ye ngwane, Jehová tä ni kain ngäbiti aune tä nemen ja ketamuko nikwe (Sal. 25:14).

3. ¿Kukwe ngwantarita meden rabai gare nie kukwe ja tötikara nebätä?

³ ¿Ñobätä nitre ruäre raba nütüre Jehová ñaka kain ngäbiti? ¿Ni käi juto Jehovabätä ye tä bämike ño nie? ¿Jehová tä ni kain ngäbiti ye dre raba ni dimike mike era jai?

ÑOBÄTÄ NITRE RUÄRE TÄ NÜTÜRE JEHOVÁ ÑAKA KAIN NGÄBITI

4, 5. ¿Ni ñan ütiäte tä nemen ruin nie akwa dre tädre gare metre nie?

⁴ Ni kwati nämäne chi ye ngwane ja nämäne ruin ngwarbe nie (Sal. 88:15). Ja mräkä iti kädekata Adrián tä niere: “Käre ja nämä ruin ngwarbe tie. Ti nämä chi ngwane ti nämä ribere Jehovai ti mräkätre ye rabadre nüne kä bä nuäre yete, akwa ye ñaka ti kräke ti nämä nütüre ye törö tie”. Tony rün ñan testiko yekwe ngibiabare ño tä mike gare: “Ti tare kwetre ye ñaka nämä niere tie aune ti nämä kukwe kwin nuainne yebätä ñaka nämä kukwe kwin niere tie. Niaratre nämä kukwe ngübare tibätä ye ñaka nämä nemen bare tie ye kwrere mika nämä tuin kwetre tie”.

⁵ Ruäre ngwane jata nemen ruin ngwarbe nie ye ngwane, Jehová ara jatani ni ngwena juta kwe yete ye nikwe ngwandre törö jai (Juan 6:44). Ni töi kwin aune ni ño ye ñan gare jabätä nie akwa Jehová ie ni gare kwin (1 Sam. 16:7; 2 Crón. 6:30). Aisete, ni ütiäte tä niere ngwane, ni raba mike era jai (1 Juan 3:​19, 20).

6. ¿Pablo ja mikani ngite yebätä nämäne töbiketari ngwane ja nämäne nemen ruin ño ie?

⁶ Ni jämi ja mike testiko ye ngwane nikwe kukwe käme nuainbare yebätä ja raba nemen ruin ngite jankunu nie (1 Ped. 4:3). Ni ruärebiti kä kwatibiti Jehová mikabätä täte akwa ni töita nemen kukwe käme nuainbätä yebe nita ja tuin. ¿Mä abokän ta ja tuin drebe? ¿Mä töi tä mä nike? Ye erere ngwane nitre Jehová mikaka täte kira ie ja namani ruin kore ye raba mä töi mike jäme. Ñodre, apóstol Pablo ngite yebätä nämäne töbike ngwane aingwaree, ti bobre jakän nämäne niere (Rom. 7:24). Niarakwe ja töi kwitani kukwe käme yebätä aune ja ngökani ñöte kwe, akwa niebare kwe “ti abokän bäri ütiäte ñakare” aune “ni kukwe kämekäme nuenkä, ye ngätäite ti abko bäri käme” (1 Cor. 15:9; 1 Tim. 1:15).

7. ¿Nikwe ja töi kwitai bökän ngwane dre tädre gare metre nie?

⁷ Kukwe käme yebätä nita ja töi kwite ngwane ni Rün kä kwinbiti käkwe ngite kitai ta nibiti tä niere (Sal. 86:5). Aisete, kukwe käme yebätä nikwe ja töi kwitani bökän ngwane, Jehová tä ngite kite ta nibiti ye nikwe mikadre era jai (Col. 2:13).

8, 9. Nita kukwe nuainne ye ñan debe Jehovakrä ñan nütüdre, ¿yekäre drekwe ni dimikai?

⁸ Ni jökrä tä ja di ngwen kukwe bäri kwin ye biankäre Jehovai. Akwa nita kukwe keta kabre nuainne ye abokän ñaka debe ne kwe Jehovakwe ni kadre ngäbiti ni raba nütüre. Meri testiko iti kädekata Amanda tä niere: “Tikwe kukwe nuaindre bäri kwin köbö kwatire kwatire, jondron bäri kwin biankäre Jehovai tä nemen ruin tie. Ye medenbätä, kukwe ñan raba nemen bare tie ye tita ja di ngwen bäri nuainkäre. ‘Ñan tä nemen bare tie’ ye ngwane tita nemen ulire krubäte ye erere Jehová tä nemen tibe tä nemen ruin tie”.

⁹ Nita sribi nuainne Jehová kräke ye ñan ütiäte ye nikwe ñaka nütüdre, ¿yekäre dre raba ni dimike? Niara ñan kukwe ribere kisere nie, aune kukwe ñan raba nemen bare nie ye ñaka ribere nie, ñakare aune kukwe mike nüke gare kwin jai. Nita kukwe kia o krikri nuainne akwa nita nuainne ja brukwä tätebiti ye ngwane tä mike tuin ütiäte krubäte jai. Arato nitre Jehová mikaka täte kirabe käkwe sribibare ja nire tätebiti Jehová kräke yebätä nikwe töbikadre. Ñodre, Pablo sribibare krubäte, kä kwati te nänbare kilómetro kabre kwe aune konkrekasion mrä mrä mikanintebe kwe nämäne kukwe driere ye ngwane. Akwa kä nükani ngwane kukwe namani nemen bare jene, ye medenbätä niara ñan kukwe driebare nuain nämäne käne kwe ye erere. Yebätä, ¿Jehová namani rubun kräke nie raba? Ñakare jire. Metrere Pablo raba dre nuainne ye erere nuainbare kwe aune Jehová kukwe kwin mikani nemen bare jankunu kräke (Hech. 28:​30, 31). Ye erere arato, ni tö kukwe nuain Jehová kräke ye ñan jökrä raba nemen bare nie, akwa ñobätä nita nuainne ye bäri ütiäte Jehová kräke. Ja känenkäre mada Jehová tä ni kain ngäbiti ye tä bämike kukwe ruärebiti nie ye rabai gare nie.

NI KÄI JUTO JEHOVABÄTÄ YE TÄ BÄMIKE ÑO NIE

10. ¿Ni käi juto Jehovabätä ye tä nemen gare ño nie? (Juan 16:27).

¹⁰ Biblia yebiti. Ni Jehová mikaka täte ye tare kwe aune tä kain ngäbiti ye niara töta mikabätä gare ie. Jesús ye nämäne tare kwe aune niara nämäne kain ngäbiti niebare kwe ie ye mikata gare bobu Bibliabätä (Mat. 3:17; 17:5). ¿Jehová tä mä kain ngäbiti ye niedre kwe mäi ye mä tö kukwe nuäi, ñan ñan? Niara tä kä kwinbiti aune ñan tä blite ni kä tibienbätä yebe akwa, Biblia yebiti tä nuainne. Jesukwe kukwe bä nuäre niebare nitre ja tötikaka kwe ie tä kwen nie Bibliabätä ye ara Jehová tä niere nie tä nemen ruin nie (ñäkädre Juan 16:27 yebätä). Jehová ye abokän ño ye Jesukwe bämikani kwin krubäte. Yebätä, nitre ja tötikaka Jesukwe töi ngite akwa ja ngwanka metre ye niara nämäne tarere niebare kwe ie, ye erere ni tare Jehovakwe tä niere nie ye bämike ja töite (Juan 15:​9, 15).

11. ¿Nita ja tuin kukwe tare ben ngwane, Jehová ñan niena ni kain ngäbiti ye kwrere ñobätä nikwe ñaka mikadre tuin jai? (Santiago 1:12).

¹¹ Kukwe nuainta kwe yebiti. Jehová tö ni dimikai, ñodre, nita dre ribere jai ye tö bian nie. Akwa, ruäre ngwane tä ni tuenmetre ja tuin kukwe tare ben, Job ni ja ngwanka metre bätä namani bare erere (Job 1:​8-11). Nita ja tuin kukwe tare be ye ngwane Jehová ñan ni kain ngäbiti ye ni ñaka nütüdre, ñakare aune nita niara tarere töi bökänbiti aune tö ngwen ie bämikakäre ie kwrere mikadre tuin jai (ñäkädre Santiago 1:12 yebätä). Kukwe tare ye näire tä ni tarere aune tä ni dimike ño ja tuakäre kukwe yebe ye rabai gare metre nie.

12. ¿Kukwe namani bare Dimitribätä ye tä dre driere mäi?

¹² Dimitri nünanka Asia yebätä kukwe namani bare ye ani mike gare jai. Niara kän sribi nianinte. Sö nikani kabre ta sribi mada ñan namani kwen ie yebätä niara ja töi mikani kukwe driere bäri, nämäne tö ngwen Jehovabiti ye bämikakäre ie. Sö nämäne niken jankunu ta ye ngwane sribi ñan nämäne kwen ie. Biti, jatani bren aune tädre kwekebe camabiti gwi nämäne ribere jai. Mrä mada, niara ye abokän ni rün ñan kwin aune ni muko ñan kwin, ye ñan nämene tuin kwin Jehovai jatani nütüre. Akwa, köböiti deu, ngängän chi kwe käkwe kukwe nieta Isaías 30:15 tikani täräbätä aune biani ie. Yete nieta: “Munkwe kukwe ngübadi bätärekä aune munkwe tö ngwandre yebiti mun rabadi dite”. Ye bitikäre, nikani ngwena ie aune niebare kwe: “Pa, mä raba ulire ngwane, mäkwe kukwe ne ngwan törö jai”. Yete Dimitri mräkätre yekwe, dän, mrö aune ju nämäne ye Jehová köböire nükani gare ie nieta kwe. “Tikwe tö ngwandre Jehovai aune kukwe ngübadre bätärekä” ye bäri kwin nüke gare tie. Mäta ja tuin kukwe tare ben ye ngwane Jehová tö mä dimikai aune ja di biain kwe mäi ja tuakäre kukwe yebe ye ngwen törö jai.

13. ¿Jehová tä ni kain ngäbiti ye kukwe meden madabiti tä mike gare nie?

¹³ Ja mräkätre yebiti. Jehová raba ja mräkätre ye töi mike kukwe kwin niere nie ni dimikakäre. Ye erere namani bare meri testiko nünanka Asia yebätä. Sribi nianinte kän aune bren tare namanibätä. Biti, ja käne mada, muko kwe käkwe ja mikani ngite krubäte aune ñan namanina sribire ni umbre ji ngwanka konkrekasionte erere. Kukwe tare ben nämene ja tuin ye nämäne mike töbike krubäte. Niebare kwe: “Ñobätä kukwe tare nämä nemen bare tibätä ye ñan nämä nüke gare tie. Tikwe kukwe blo nuainbare yebätä Jehová ñan nämä ti kain ngäbiti ti rababa nütüre”. Yebätä orabare kwe aune Jehová nämäne tarere jankunu ye mikadre gare kwe ie ribebare kwe ie orasionte, Jehovakwe orasion kwe kukwe nuani. ¿Nuainbare ño kwe? Niara tä niere: “Ni umbre ji ngwanka blitaba tibe aune Jehová nämä ti tarere jankunu ye mikaba gare kwe tie”. Biti ja käne mada niarakwe ja di ribebareta Jehovai. Jehová nämäne niara dimike ye mikadre tuin ie ribebare kwe ie. Niara tä niere: “Ye bätärabe ja mräkätre konkrekasionte nämäne ti tarere ye tikani kwe täräbätä aune bianba kwetre tie. Ti nämä ñäke bätä ngwane, Jehovakwe ti kukwe nuani ye kwrere rükaba gare tie”. Bäsi käre, ja mräkätre tä kukwe kwin niere nie ye kite Jehovakri tuin nie (Sal. 10:17).

14. ¿Ja mräkätre yebiti Jehová tä ni kain ngäbiti ye tä bämike ño nie?

¹⁴ Ja mräkätre tä mäträre nibätä yebiti Jehová tä bämike tä ni kain ngäbiti. Ñodre, siklo kena ye ngwane, apóstol Pablo töi mikani kwe kukwe tike nitre kristiano ie tärä 14 yebiti, yete mäträbare kwe töi kwatibebiti akwa ja tare bämikani kwe ietre. ¿Ñobätä Jehovakwe Pablokwe tuanimetre mäträre kore? Ñobätä ñan aune ni tare kwe aune kwin nikrä, “ni rüne tä mäträre monso tare kwe yebätä ye erere” ni tuin ie (Prov. 3:​11, 12). Aisete mäträdre nibätä Bibliabiti ngwane, Jehová ñan tä ni kain ngäbiti ye nikwe ñaka nütüdre. Ñakare aune Jehová tä ni kain ngäbiti jankunu tä bämike nie kukwe ye kwrerebiti (Heb. 12:6). ¿Jehová tä ni kain ngäbiti ye kukwe meden mada tä mike gare nie?

JEHOVÁ TÄ NI KAIN NGÄBITI TÄ NEMEN GARE NIE KUKWE MADABITI

15. ¿Nire nire ie Jehová tä üai deme bien aune dre tädre gare metre nie?

¹⁵ Nire nire ka ngäbitita Jehovakwe ye ie niara tä üai deme kwe bien (Mat. 12:18). Ni raba ngwentari jai: “¿Töi kwin keta kabre ye erere tita ja ngwen?”. Ñodre, mä jämi ja mike testiko ye ngwane ñan nämä nemen nuäre mä kräke kukwe ngübakäre bätärekä ¿akwa nengwane mä niena nuainne? Metrere töi kwin keta kabre erere nita ja ngwen ye ngwane nita kä mike juto Jehovabätä ye rabadre gare metre nie. (Recuadro “Üai deme tä ni töi mike kwin ye abokän. . . ” ye mikadre ñärärä).

16. 1 Tesalonicenses 2:​4, tä niere erere, ¿nire mikata Jehovakwe kukwe kwin ye driere? ¿Aune kukwe mikata gare nebätä ja ruin ño mäi?

¹⁶ Nire nirebiti Jehovata tö ngwen ye ie kukwe kwin gobran Ngöbökwebätä ye driedre tä niere (ñäkädre 1 Tesalonicenses 2:4 yebätä). Meri testiko kädekata Jocelyn ye ie kukwe ne metre nükani gare ye ani mike gare jai. Bati niara ñan tö namani kukwe driei. Tä niere: “Ja rababa ruin di ñakare tie aune ti ñan krörö nuaindre rababa ruin tie. Akwa ti prekursor yebätä tikwe kukwe driedre köbö yete ye nämä gare tie. Aisete tikwe oraba Jehovai aune ti rikaba kukwe driere”. Köbö yete Jocelyn blitabare Mary ben, Mary ye meri töi jäme aune ja tötika Bibliabätä ye kani ngäbiti kwe. Mary nämäne orare aune ja di kärere Jehovai ye ngwane Jocelyn janamane känti niebare kwe ie sö ruäre tä ye bitikäre. ¿Kukwe namani bare nebiti dre nükani gare Jocelyn ie? Niara tä niere: “‘Tita mä kain ngäbiti’ Jehová nämä niere tie ye kwrere ja rababa ruin tie”. Metrere nita kukwe driere ye ni jökrä ñan käkwe kukwe nuadi, akwa nita ja di ngwen kukwe kwin gobran Ngöbökwe yebätä mike gare nitre madai ye tä kä mike juto krubäte Jehovabätä ye tädre gare metre nie.

17. ¿Ni kökanintari yebätä dre nemen gare mäi kukwe niebare Vickykwe yebiti? (Salmo 5:12).

¹⁷ Jehová tä nire nire kain ngäbiti yebiti ta tä ngite kite, Jesús ni kökanintari köböire (1 Tim. 2:​5, 6). Akwa, ¿nita tö ngwen ni kökanintari ie aune nita ja ngökö ñöte yebiti ta Jehová ñan ni kain ngäbiti ruin nie? Ye erere ngwane, ni töita ño ye ñan käre mikadre era jai ye nikwe ngwandre törö jai. Akwa käre ni raba tö ngwen Jehovai. Nire tä tödeke ni kökanintari yebiti ye Jehová tä mike tuin jai ni ja ngwanka metre kwrere aune kukwe kwin nuaindi kwe kräke ye tä käbämike ie (ñäkädre Salmo 5:12 yebätä;a Rom. 3:26). Meri testiko iti kädekata Vicky käkwe töbikataribare ni kökanintari yebätä yekwe dimikani krubäte. Jehová nämäne niara tarere ye ñan nämene era kräke akwa kukwe ne nükani gare ie: “Jehová nämä ti ngübare bätärekä kä kwati te [ . . . ]. Akwa yebiti ta, ‘Jehová mä ñan raba ti tarere jire chi aune Monso mäkwe käkwe ja nire biani nun ütiäre ye ñan raba ngite kite ta tibiti ye kwrere ti nämä nütüre’”. Vicky erere nikwe töbikadretari ni kökanintari yebätä ngwane Jehovakwe ni tare aune niara tä ni kain ngäbiti ye rabai metre ni kräke.

18. ¿Nikwe Jehová taredi jankunu ngwane dre tädre gare metre nie?

¹⁸ Nikwe ja di ngwain krubäte kukwe miri gare kukwe ja tötikara nebätä ne jökrä nuainkäre, akwa ruäre ngwane ni raba di nekä aune Jehová tä ni kain ngäbiti o ñakare ni raba kite ngwentari jai, ye erere nemen bare mäbätä ngwane, ‘nire tä Jehová tarere’ ye niara tä tarere käre ye ngwandre törö jai (Sant. 1:12). Aisete mäkwe kröta jankunu Jehová kokwäre aune niara tä mä kain ngäbiti ye tä bämike ño mäi ye mä mika gare jai. Aune “Jehová ñan tä mente” ye ngwandre törö käre jai (Hech. 17:27).