Kukwe ja tötikara 17
Ja ketamuko rabadre nikwe gäre, nikwe ja ketadre
Ja taredre yebiti ja keta raba. Makwe ja tötikai bäri Jehovabätä, ye angwane niara rabai bäri tare mäkwe bätä mä tö rabai bäri mikai täte. Ne käkwe mä töi mikai ja mike ja tötikaka Jesukristokwe (Mateo 28:19). Nitre testiko Jehovakwe kä juto bätätre ni ja mräkäre ye kwrere, mäkwe ja ketadre ben aune mä raba ja mäke kärekäre Ngöböbe. ¿Mäkwe dre nuaindre ne kwe mä rabadre nemen niaratre ngätäite?
Ngöbö tare mäkwe ye mäkwe bämika kukwe kwe ye mikabätä täte. “Ye abko, nita Ngöbö tarere angwane, nita kukwe biani Ngöbökwe nuendre nie ye mike täte jökrä amne, kukwe biani nuendre kwe nie, ye abko ñakare tare nuene, ñakare tribe doboko kwrere.” (1 Juan 5:3, Kukwe Kuin Ngöbökwe.)
Kukwe nüke gare mäi ye erere mäkwe nuain. Kukwe kirabe kädriebare Jesukwe abokän kätä ne erere bämike. Ni brare iti töbätä käkwe ju sribebare jäbiti kwin, bätä ni mada iti töi ñakare abokän käkwe sribebare ümanbiti. Murie kri jatani tibien ye angwane, ju sribebare jäbiti kwin ye namaninte krö, akwa ju sribebare ümanbiti ye abokän nikani tibien aune ngö namani krubäre. Jesukwe niebare nitre kätä niara kukwe nuin bätä tä nuainne ye abokän ni brare töbätä käkwe ju sribebare jäbiti kwin ye kwrere. Arato niebare kwe nitre kätä niara kukwei nuin akwa ñakare nuainne ye abokän ni brare töi ñakare käkwe ju sribebare ümanbiti ye kwrere. ¿Nitre nibu ne meden erere mä törba ja tuai? (Mateo 7:24-27.)
Mäkwe ja dianka mento Ngöbö mikakäre täte. Ne mä raba nuainne orasion yebiti, känti mäkwe niedre Jehovai Niara tö dre dre ie ye erere mä tö mikai täte kärekäre mäkwe niedre ie. Ngöbö tö dre dre ie ye erere nikwe nuaindre ngwane, nikwe bämikai tuare ni ja tötikaka Jesukristokwe (Mateo 11:29).
Mäkwe ja ngöka ñöte. “Ma rika ja mike ngökadre ñöte amne tödeka makwe ni Dänkienbti [“mäkwe niara kä ye kädekate”, NM] angwane, Ngöbökwe ma ngite kukwe kämekäme nuenbtä bätädrete jökrä mabtä.” (Hechos 22:16, Kukwe Kuin Ngöbökwe.)
Mäkwe Ngöbö mika täte ja di ngöi jökräbiti. “Munkwe dre dre nuen, erere munkwe nuen kuin ja di ngöi jökrä amne, ñan munta sribire ni kä nebtä kräke, akwa munta sribire ni Dänkien [. . .] ara jire kräke abko munkwe nütü käkwe sribi kore.” (Colosenses 3:23, Kukwe Kuin Ngöbökwe.)