Kukwe ja tötikara 12

¿Nita krüte ye ngwane dreta nakainkä nibätä?

Gata ye ñaka ja erebe ja nire yebe. Gata ye abokän jadüka ngüseta ye kwrere (Juan 11:11-​14). Nitre krütanina ye ñaka raba ni kukwe nuin, kä ñaka raba tuin ie, ñaka raba blite aune ñaka raba töbike jire chi (Eclesiastés 9:​5, 10). Nita krüte ye ngwane nita niken kä mada üaire känti nüne ni mräkätre kira yebe nieta nitre kukwe ngwarbe driekä Ngöböbätä yekwe. Akwa Biblia ñaka kukwe ye driere.

Nitre krütanina ye ñaka raba ni dimike aune ñaka raba ni nuainne tare. Nitre kwati tätre nemen ja bäine kukwe keta kabrebiti bätä tätre jondron nire kämike kukwadre, ye abokän tä nemen kwin nitre krütani yekrä tä nemen nütüre. Akwa, jondron nuainta ne ñaka nemen debe Ngöbökrä, ñan ñobätä kukwe ne kite Satana yekri. Kukwe mada ngwarbe nebiti niara tö ni ngökai arato. Kukwe nuainta ne ñaka raba nitre krütanina ye dimike, ne ñan ñobätä niaratre ye ñaka niena nire. Ni krütanina ye nikwe ñaka jürä ngwandre jabätä bätä mikadre Ngöböre jai. Nikwe Ngöbö ye aibe mikadre täte (Mateo 4:​10).

Nitre krütanina ye rükaita nire. Kä ja känenkäre yete, Jehovakwe nitre krütanina ye mikaita nüke nire nünankäre kä bä nuäre yete Kä tibien nebätä (Juan 5:​28, 29; Hechos 24:15). Nitre kübani nita mike nüke ngwäte ye kwrere Ngöbö raba nitre krütanina ye miketa nüke nire (Marcos 5:​22, 23, 41, 42).

Ni ñaka krüte nieta ye abokän kukwe ngwarbe, Satana Diablu ye kätä ni kwati töimike kukwe ne mike ruin era jai. Satana bätä chokalitre tätre ni kwati mike nütüre nitre krütanina ye abokän üai tä nire, abokän köböire nita nemen bren o kukwe mada tare mike ni kisete. Satana kätä nitre ngökö, ruäre tä jondron ye mike tuin ietre o mike rite köbörebiti. Ye medenbätä, nitre töta nemen blitai ni krütanina ben ye tuin blo Jehovai (Deuteronomio 18:10-​12).