Kukwe ja tötikara 14

Nitre ja ketamuko Ngöbökwe ñaka jondron käme ye nuainne

Satana kätä ni nuintari ne kwe nikwe jondron käme ye nuaindre. Ni törba ja mäkäi Ngöböbe, angwane jondron tuin käme Jehovai ye nikwe mikadre tuin käme jai arato (Salmo 97:10). Jondron ruäre kädekateta nete abokän nitre ja ketaka Ngöböbe käkwe ñaka nuaindre:

Ni brare kätä ja mike ngite meribe. “Mä gure ne ngwane, mäkwe ñan ja mika gure bati bati ni mdabe.” (Romanos 13:​9, Kukwe Kuin Ngöbökwe.) Ni jämi ja mike gure metre känenkri ni nemen jabe ye abokän käme arato (1 Corintios 6:​18).

Dröbanika. Nitre “dröbanikaka [. . .] [ye] abokän gobran Ngöbökwe ye ñaka rabai kwe” (1 Corintios 6:10 ).

Ja kämikata bätä ngäbäkre jämi därere mürie ketata. “Mäkwe ñan ni kämika.” (Romanos 13:​9, Kukwe Kuin Ngöbökwe.)

Go. “Mäkwe ñan go.” (Romanos 13:​9, Kukwe Kuin Ngöbökwe).

Ni ngöka. Jehová brukwä “ni tidrä blitaka ngwarbe” yekrä (Proverbios 6:​17).

Ni ni mada nuainne tare bätä ni nemen rubun krubäte. Jehová “brukwä nitre ni mada nuainkä tare yekrä” (Salmo 11:5). “Ni [. . .] töi kämekäme abko erere mdeita neme ie käta nuene”, ye abokän ngätäite “ni moto nebe romon jötrö ngwarbe” ye kädekateta arato (Gálatas 5:​19, 20, Kukwe Kuin Ngöbökwe).

Jakata ngwianbätä. “Akwa nitre [. . .] jändrän ribere jirekäbe jakrä, [. . .] ni ye kwrere abko ben munkwe ñan ja getadre.” (1 Corintios 5:​11, Kukwe Kuin Ngöbökwe.)

Ni brukwä nemen ni mada kwata bä jene o kukwe bä jene yekrä. “Mun rüe ye munkwe taredre jankunu bätä mun rüe tä näin mun jiebiti ye ütiäre munkwe oradre.” (Mateo 5:​43, 44.)

Ngöböta jondron niere nie ye abokän kwinkäre nikrä. Ruäre ñaka nuäre nikrä jondron käme ye tuemetre, akwa Jehová diebiti bätä Testikotre kwe ye köböire, mä raba jondron ñaka tuin kwin Ngöböi ye tuemetre (Isaías 48:17; Filipenses 4:​13; Hebreos 10:24, 25).