Mun ja ngwan nitre Ngöbö kukwei niekä erere: Amós
1. ¿Amós kukwe kwin bämikani ye raba ni dimike ño?
1 ¿Jondron ñaka mäkwe o mä ñaka ja tötikabare krubäte kwelate köböite mä ñaka raba kukwe driere yebätä mä tärä töbike ruäre ngwane? Ye erere angwane, Amós kukwe kwin bämikani ye raba mä dimike. Niara ni bobre nämene obeja ngübare aune kä ruäre te nämene sribire, akwa Jehovakwe dianinkä kukwe ütiäte mikakäre gare (Amós 1:1; 7:14, 15). Kä nengwane Jehová tä nitre bobre mike kukwe driere arato (1 Cor. 1:27-29). ¿Kukwe drieta nikwe ye ngwane kukwe medenbätä mada Amós kukwe kwin bämikani ye raba ni dimike?
2. Nita kukwe driere yekänti ni rüe rakadrekä ye ngwane, ¿ñobätä nikwe ja ngwandre dite?
2 Ja mikani rüere yebiti ta ja ngwani dite kwe. Amós kukwe niebare juta 10 nitre Israelkwe nämene ngwitärikri yei angwane, sacerdote Amasías nibi ngäbä mikaka ngöböre jai, yekwe niebare ie niara rikadreta aune ñaka nitre ye nikadre kwe, ñobätä ñan aune nitre ye nämenena kukwebätä (Amós 7:12, 13). Amós nämene kukwe driere ye rei Jeroboán ñäkäidre ie yekäre, Amasías käkwe ni Ngöbö kukwei niekä ye rüere kukwe ngwarbe niebare (Amós 7:7-11). Akwa Amós ñaka niaratre jürä ngwani jabätä. Kä nengwane, nitre iglesiate ye ruäre tätre ja mike gobrantre yekri ne kwe gobrantre ye rabadre niaratre dimike ja mike juta Ngöbökwe rüere. Akwa, Jehová tä mike gare metre nie jondron keta kabre rükäre yebiti ja mikai ni rüere akwa kukwe tare ñaka nuaindi nibätä (Is. 54:17).
3. ¿Kukwe meden ketebu nita mike gare kä nengwane?
3 Ngöbökwe kukwe ükaite aune kukwe kwin nuaindi niebare kwe. Kukwe ükaite juta 10 nitre Israelkwe ben ye Amós niebare, akwa tärä Bibliabätä kädekata niara käbiti tikani mrä kwe yekänti Ngöbökwe juta kwe mikaita nüne kwin aune kukwe kwin nuaindi kwe kräketre käbämikani kwe ye tikabare kwe (Amós 9:13-15). Ngöbökwe “kukwe ükaite nitre käme ben” ye nita mike gare arato, akwa “kukwe Ngöbö gobrainbätä” ye ni ñaka tä mike gare jökrä (2 Ped. 3:7, Ngöbö Täräe [NGT], tärä okwä ükaninte; Mat. 24:14, NGT). Armagedón yebiti Jehovakwe nitre blo gaite, ye köböire Kä tibien kwitai bä nuäre (Sal. 37:34).
4. ¿Ñobätä gare kwin nie Jehová tä dre nuainmana nie ye ni raba nuainne?
4 Ni rüe krubäte ngätäite nita kukwe kwin Gobran Ngöbökwe yebätä driere. Ye medenbätä, ni töita kwatibe Jehová mikabätä täte aune nikwe ja dianinkä niara kräke ye ererebätä ni tö nünain ye nuainkäre ni rabadre ja di ngwen bäri (Juan 15:19). Akwa, gare kwin nie niarakwe ni dimikai jankunu tä dre nuainmana nie ye nuainkäre, Amós dimikani kwe ye erere (2 Cor. 3:5).