Nikwe nitre mrä kukwebätä dimikadre nemen dite kukwe ja üairebiti

¡Jehová köböire nitre ükakröta kwati krubäte ye käi juto nibätä! (Deut. 28:2.) Kä kwatire kwatire te nitre 250,000 biti bäri tä ja ngökö ñöte. Akwa ni ja tötikaka Bibliabätä tä ja ngökö ñöte ye ngwane, ni niara tötikaka ye töi ñaka raba nemen tötike jankunu Bibliabätä ne kwe rabadre nitre mada dimike yekäre. Arato ni ja tötikaka ye töi ñaka raba nemen jankunu ja tötike Bibliabätä ne kwe rabadre kä denkä bäri jai kukwe driekäre. Akwa, ütiäte krubäte nitre ja tötikaka Bibliabätä ye tädre dite kukwe ja üairebiti. Rabadre “ja töi mik[e] kwatibe” Kristobätä aune rabadre “tödek[e] kwatibe” (Col. 2:6, 7, Kukwe Kuin Ngöbökwe; 2 Tim. 3:12). Yebätä, nitre ja tötikaka Bibliabätä ja ngökadre ñöte ye bitikäre rabadre ja tötike jankunu tärä Dre drieta aune tärä “Ngöbö Taredre” yebätä nememe krütadre ietre ye ngwane (Sribi Nikwe Ngöbökrä abril 2011, página 2 ye mikadre ñärärä).