Täräkwata Kukwe nieta kena Kukwe Ngöbökwe yebätä yebiti nikwe blita kömikadre
1. ¿Täräkwata meden sribebare ni dimikakäre kukwe driekäre?
1 Bitinkä täräkwata Kukwe nieta kena Kukwe Ngöbökwe yebätä ye bianba nie. Täräkwata yebätä kukwe keta kabre Bibliabätä mikata gare texto keta kabrebiti, tärä Razonamiento ye erere, yebätä kwin krubäte blita kömikakäre. ¿Ni raba ja tötike ño täräkwata yebätä kukwe driekärebiti?
2. ¿Täräkwata Kukwe nieta kena Kukwe Ngöbökwe yebätä yebiti ni raba kukwe driere ño?
2 Ñodre, kukwe ngwantarita 8 ye kädriekäre mä raba niere: “Nunkwe blitani nitre nünanka mä bäre ben aune Ngöbö köböite nita ja tare nike ye niaratre kwati tätre ngwentari jai nibi tuin nunye. [Kä ruäre känti kukwe ngwantarita ye mikadre tuare täräkwata yebätä ye bäri kwin.] ¿Mä abokän töita ño? [Mäkwe tuanmetre blite.] Biblia tä kukwe ne mike gare metre”. Biti texto tä yete ye keteiti o keta kabrebätä mä raba ñäke aune kädriere. Ni yei kukwe ye rabadre tuin kwin angwane, kukwe ngwantarita 20 jatäri página kena täräkwata yebätä ye mäkwe mika tuare ie aune mä törba blitai ben kukwe ye keteitibätä köbö mada ngwane mäkwe nie ie. Tärä o täräkwata medenbiti nita nitre tötike ye mä raba driere ie aune tä blite bäri kukwe yebätä mäkwe nie ie.
3. ¿Nitre tä kukwe madabätä yebe ni raba blita kömike ño täräkwata mrä yebiti?
3 Kukwe ngwantarita 4 aune 13 nemen 17 ye kwin krubäte kukwe driekäre nitre tä kukwe madabätä yei. Ñodre, kukwe ngwantarita 17 yebätä mäkwe blitadre angwane mä raba niere: “Nunta näin jötrö ngwarbe nere nitre ja mräkäre dimikakäre. Tätre ja tuin bäri kukwe kri ben tuin nunye. ¿Mä abokän töita ño? [Mäkwe tuanmetre blite.] Nitre gure kwati tätre kukwe ütiäte ne ngwen törö jai: ‘Meri gure rabadre muko kwe ye mike ütiäte krubäte jai’. [Mätä blite Efesios 5:33 yebätä ye mä ñaka nie ie. Mä tädre blite meri ben angwane, mäkwe ñäkädre Efesios 5:28 yebätä ye bäri kwin.] ¿Kukwe nieta ne nitre gure käkwe nuaindre ye ütiäte raba ruin mäi?”.
4. ¿Nitre tä kukwe madabätä ben mäkwe blitadre ünä ye ngwane mä raba dre nuainne?
4 Mäkwe blita ünä ni yebe angwane, mä raba nikenta känti blitakäre bäri kukwe yebätä ben mäkwe nie ie. Mä rikata känti angwane, kukwe ngwantarita medenbätä munkwe blitabare yekänti bersikulo mada tärä ye mäkwe kädrie ben. Mätä kukwe kwin kädriere ni yebe ye tä Bibliabätä mäkwe nie ie. Munkwe blitabare kukwe medenbätä aune Biblia tuin ño ie ye ererebätä tärä aune täräkwata meden raba tuin ütiäte ie ye mäkwe drie ie. (Mäkwe Sribi Nikwe Ngöbökrä diciembre 2013, páginas 3 nemen 6 ye mika ñärärä.)