KUKWE JA TÖTIKARA 11

Blitadre kä jutobiti

Hechos 18:24, 25

KUKWE MIKATA GARE: Mäkwe blita kä jutobiti nitre dimikakäre.

Mäkwe ja brukwä ükate. Mätä ja kite ngwane, kukwe kädriei mäkwe ye ñobätä ütiäte yebätä mäkwe ja töi mika. Mäkwe ja tötika kwin ne kwe kukwe ye metre mä kräke ye rabadre gare.
Töbike nitre mä kukwe nuaka yebätä. Drebätä mäkwe ñäkäi o mäkwe kukwe meden mikai gare nitre ie ye kwin kräketre yebätä mäkwe töbikatari. Mäkwe kukwe ükadrete ño jai ne kwe rükadre gare bäri kwin nitre ie aune rabadre ütiäte kräketre yebätä mäkwe töbika.
Mäkwe blita ja brukwä ngöibiti. Mäkwe blita kä jutobiti. Kukwe nieta mäkwe ye era mä kräke ye mäkwe bämika ja ngwärebätä aune kisebiti.

Mäkwe ñaka kukwe arabe nuain ne kwe ñaka rabadre nitre näkwite. Ñobätä aune ñokäre mäkwe nuaindi ye mäkwe mika gare kwin jai. Kukwe kädrieta mäkwe yekänti mätä kukwe ütiäte mike gare o mä tö nitre töi mikai kukwe keteiti mike täte ngwane, mäkwe blita kä jutobiti. Akwa mäkwe nuaindi bä kabre ngwane, nitre ñan törbai mä kukwe nuai.