KUKWE JA TÖTIKARA 8

Kukwe bämikadre dirikäre

Mateo 13:34, 35

KUKWE MIKATA GARE: Mäkwe kukwe nuäre bämika ne kwe nitre törbadre kukwe mikai gare jai aune kukwe bäri ütiäte driekäre ietre.

Mäkwe kukwe nuäre bämika. Jesús erere, jondron nuainta mantre jetebe yebiti mäkwe kukwe ütiäte mika gare aune kukwe nuäre yebiti mäkwe kukwe ñaka nuäre mika gare. Mäkwe kukwe bämikadre ngwane, mäkwe ñaka kukwe kädekate krubäte ne kwe nitre ñaka rabadre nianinte. Kukwe ütiäte mä tö driedi ye kukwe meden raba mä dimike mike gare nitre ie ye erere mäkwe bämika.

Mäkwe nikra ja bäre. Jondron tä mä bäre, tärä, täräkwata aune nitre dirikä kwin yebätä mäkwe ja kita. Kukwe bämikata ye meden meden raba mä dimike dirire bäri kwin ye mäkwe tika aune mika ngwäte.
Nitre mä kukwe nuaka yebätä töbike. Nitre tä dre nuainne o kukwe meden tuin ütiäte ietre ye ererebätä mäkwe kukwe dianka bämikakäre. Kukwe raba nitre mike jakaire o mike rubun ye mäkwe ñaka bämika.
Kukwe meden mä tö driedi ye mäkwe mika gare kwin. Kukwe ütiäte yekänti mäkwe kukwe bämika aune ñaka kukwe kiakia yekänti. Mä tö kukwe meden driedi ye rabadre törö nitre ie aune kukwe bämikata mäkwe ye ñan aibe rabadre törö ietre.