Iglesia ngwarbe tä Ngöbö bämike käme

Ngöbö ja tarekä aune nitre ji ngwanka iglesiate tätre niara kukwei driere nieta kwetre, ¿se ño amare tätre kukwe käme krubäte nuainne? Ñobätä ñan aune, niaratre iglesia ngwarbe. Kukwe ngwarbe aune kukwe käme nuainta kwetre yebiti tätre Ngöbö kä mike käme. ¿Tätre nuainne ño? ¿Yebätä jata nemen ruin ño Ngöböi? ¿Kukwe ye ükaite ño kwe?

1. ¿Iglesia ngwarbe tä kukwe driere yebiti tä Ngöbö bä mike ño käme?

Nitre iglesia ngwarbebätä tätre “kukwe ñakare era metre” driere Ngöböbätä (Romanos 1:25). Ñodre, Ngöbö kä ño drie ñaka kwetre. Akwa, Ngöbö kä tärä aune ni rabadre kädeke drieta Bibliakwe (Romanos 10:13, 14). Kukwe tare tä nemen bare ngwane, ye Ngöbö köböite nitre ji ngwanka kukwe ngwarbebätä tätre niere. Akwa kukwe ye ngwarbe. Ngöbö ñaka ngite jire kukwe käme nemen bare yebätä (mäkwe ñäkä Santiago 1:13 yebätä). Kukwe ngwarbe ne kwrere, tä nitre kwati töi mike ñan nökrö Ngöbö ken.

2. ¿Iglesia ngwarbe tä kukwe nuainne yebiti tä Ngöbö bämike ño käme?

Iglesia ngwarbe ñan tä nitre mike tuin jai Jehová erere. Bibliata niere, kukwe “käme nuenbare kwetre ye nena kabre Ngöbö ngwärekri kä käinbti” (Apocalipsis 18:5). Kä kwati krubäte te, nitre kukwe ngwarbebätä tä ja mike politicate, tä nitre murie ketamana aune ja mike rüte. Nitre ji ngwanka iglesia te ye ruäre tä nüne kwin aune tä ngwian kärere nünankäre jai nitre kukwebätä ben ie. Yebiti tätre bämike Ngöbö ñaka gare ietre. Aisete, ¿tätre Ngöbö kukwei driere nie raba? (Mäkwe ñäkä 1 Juan 4:8 yebätä).

3. ¿Iglesia ngwarbe tä kukwe nuainne yebätä ja ruin ño Ngöböi?

Iglesia ngwarbe tä kukwe käme nuainne ye tä mate blo mäbätä, ¿se mate ño Jehovabätä raba ruin mäi? Nitre tare Ngöbökwe, akwa niarata rubun krubäte nitre ji ngwanka iglesia ngwarbe te kräke, ñobätä ñan aune tä nitre ngwen ja tare nike aune tä niara bä mike käme. Ngöbökwe iglesia ngwarbe gaite aune ñaka tuaita jire käbämikata kwe (Apocalipsis 18:21). Kä nebera braibe ne kwe niarakwe iglesia jökrä gadrete (Apocalipsis 18:8).

JA TÖTIKE BARI NGUSETA

4. Ngöbö ñaka iglesia ngwarbe kain ngäbiti

Ji metre Ngöbö kokwäre ye Iglesia jökrä tä driere, nieta nitre kwatikwe. Akwa, ¿ye metre? Ñäkädre Mateo 7:13, 14 yebätä aune kukwe ne kädriedre jabe:

• ¿Ji ño niken ni ngwena ja nire kokwäre nieta Bibliakwe?

VIDEO mikadre ñärärä, biti kukwe ne kädriedre jabe:

VIDEO: ¿Ngöböta kukwe mikata täte ye jökrä kain ngäbiti? (oto chi) (3:22)

• ¿Ngöböta iglesia jökrä kain ngäbiti drieta Bibliakwe?

5. Iglesia ngwarbe ñan ja tare Ngöbökwe bämike

Kukwe keta kabrebiti iglesia ngwarbe käkwe Ngöbö bämikanina käme keteiti ye abokän, rü. Mikakäre gare jai VIDEO mikadre ñärärä, biti kukwe ne kädriedre jabe:

VIDEO: Rü kri bobukäre yete iglesia ngwarbe dre nuainbare (2:22)

• ¿Rü kri bobukäre yete nitre ji ngwanka iglesia ngwarbe te käkwe dre nuainbare?

• ¿Kukwe nuainbare kwetre yebätä mä raba dre niere?

Ñäkädre Juan 13:34, 35 aune 17:16 yebätä aune kukwe ne kädriedre jabe:

• ¿Iglesia ngwarbe tä ja mike rüte yebätä ja ruin ño Jehovai raba ruin mäi?

• Kukwe käme keta kabre namanina bare niaratre köböite aune ñaka ja tare Ngöbökwe bämike, ¿dreta mike gare kukwe nieta nete ye metre?

6. Ngöbö tö nitre mikai kwäre iglesia ngwarbe yebätä

Ñäkädre Apocalipsis 18:4 yebätäa aune kukwe ne kädriedre jabe:

• Ngöbö tö nitre mikai kwäre iglesia ngwarbe yebätä, ¿mä raba dre niere kukwe yebätä?

7. Mäkwe ja tötika jankunu Ngöbö metre yebätä

Iglesia ngwarbe tä kukwe käme nuainne, ¿yebätä mä rabadre töbike käme Ngöböbätä? Töbike kukwe nebätä: ni rüne iti tä mäträre kwin monso kwebätä, akwa monso tä kämikekä gwi aune tä kukwe käme nuainne, ye ñan debe rün kräke. Akwa, monso tä ja dokwä mike ribi aune tä kukwe blo nuainne, ¿rün ngite ni raba niere?

• ¿Iglesia ngwarbe tä kukwe nuainne ye Jehová köböite niedre aune ñan ja tötikadre jankunubätä ye kwin ya?

¿DRE NIBI GARE MÄI?

Iglesia ngwarbe tä Jehová bämike käme, kukwe drieta kwetre yebiti aune kukwe käme nuainta kwetre yebiti. Aisete, Ngöbö köböra gainte.

Ngwankäreta törö

• Nitre ji ngwanka iglesiate tä kukwe ngwarbe driere aune kukwe käme nuainne, ¿ye tuin ño mäi?

• ¿Jehová töita ño iglesia ngwarbe yebätä?

• ¿Dre nuaindi kwe iglesia ngwarbe yebätä?

KUKWE MIKE GARE BÄRI JAI

Ñobätä iglesia ngwarbe tuin käme Ngöböi ye mike gare jai.

“¿Iglesia jökrä tä ji metre Ngöbö kokwäre driere?” (Artículo jw.org)

¿Ñobätä nikwe Jehová mikadre täte keteitibe ie niara tö?

“¿Ni tädre kukwebätä Ngöbö mikakäre täte?” (Artículo jw.org)

Sacerdote nämäne kukwe metrebätä ya, ñan nämäne gare ie. Akwa ye ñan ketaninbätä kukwe metre mikakäre gare jai Ngöböbätä.

“Sacerdote iti kämikaninkä iglesiate” (Ni mikaka Ngwäte, febrero 2015)

Ngöbö ye käme aune ñaka ni töibikaire ye iglesia ngwarbe driebarera siklo kwati te, kukwe ngwarbe nieta ye mike gare ketamä jai.

“Kukwe ngwarbe drieta köböite ni ñaka nökrö Ngöbö ken” (Ni Mikaka Mokre, 1 noviembre 2013)