Sadoc erere ñan kä jürä ngwandre jabätä

1, 2. ¿Sadoc ye abokän nire? (1 Crónicas 12:​22, 26-28).

KUKWE ne bämike ja töite. Nitre kwati 340.000 jire tä ja ükaninkrö David mikakäre reire juta Israel yebiti. Köbö köbömä te nitre tä blite, kantakwe, nitre tä köte kä jutobiti ye kukwe ruin ngutuä kiare Hebrón yekäntita (1 Crón. 12:39). Monso bati Sadoc, nämäne yete, niara ye ñan nämäne ütiäte krubäte nitre kwati ye ngätäite. Akwa monso ye ütiäte Jehová kräke aune niara nämäne yete rabadre gare nie ye ie Jehová tö namani (ñäkädre 1 Crónicas 12:​22, 26-28 yebätä).a Akwa ¿Sadoc ye abokän nire?

² Sadoc ye ni sribikä sacerdote erere, nämäne sribire sacerdote bäri kri Abiatar yebe. Jehovakwe niara mikani töbätä aune Jehová töi ño ye erere rükadre gare ie yekäre (2 Sam. 15:27). Nitre nämäne niken niara känti mäträmana jabätä. Niara ye abokän ñan kä jürä ngwen jabätä jire chi. Niara ñan kä jürä ngwen jabätä aune nämäne ja ngwen dite yebätä ani ja kite kukwe ja tötikara nebätä.

3. a) ¿Ñobätä nikwe ñaka kä jürä ngwandre jabätä? b) ¿Drebätä ja kitai kukwe ja tötikara nekänti?

³ Kä krüte ne näire Satana tä ja mike bäri juta Ngöbökwe ye rüere (1 Ped. 5:8). Ni tädre ja ngwen dite nememe Satana aune kä gobrainta kwe ye Jehovakwe gaite ngwane (Sal. 31:24). Ni raba ja ngwen ño dite Sadoc erere ye ani mike gare jai kukwe ketamäbiti.

JA MIKADRE GOBRAN NGÖBÖKWE YEKRI

4. ¿Ja mikakäre gobran Ngöbökwe yekri ñobätä ja ngwandre dite? (Üai mikadre ñärärä).

⁴ Ni Jehová mikaka täte tä ja mike ja brukwä tätebiti gobran kwe yekri, akwa bäsi käre nita ja di ngwen ja ngwankäre dite aune ñan kä jürä ngwankäre jabätä (Mat. 6:33). Ñodre, kä käme te nita nüne nete nikwe ñan kä jürä ngwandre jabätä kukwe Jehovakwe ye mikakäre täte aune kukwe kwin gobran kwebätä ye driekäre nitre ie (1 Tes. 2:2). Arato ja ngwandre neutral ye ñan nuäre kä käme te nita nüne nete (Juan 18:36). Aune nitre testiko kwati yekwe jondron ñakare krubäte, nuainta tare o kitata ngite, ñan tä ja mike política o ja mike juto rükäre yebätä.

5. ¿Ñobätä Sadoc ñan kä jürä ngwani jabätä David dimikakäre?

⁵ David mikani reire ye käi ngwani juto jabätä kä Hebrón yete, Sadoc nikani käi ngwen juto jabätä arato. Akwa niara ñan nikani ye aibe nuainne, ñakare aune nämäne juto biarbe rükäre (1 Crón. 12:38). Nämä juto biarbe nänkäre David ben aune rükäre juta Israel dokwäre. Niara ie rü ñan nämäne gare krubäte akwa käre ja nämäne nüke törö ie.

6. ¿David ñan kä jürä ngwen jabätä ye bämikani ño kwe Sadoc käne? (Salmo 138:3).

⁶ ¿Drekwe Sadoc dimikani ñan kä jürä ngwen jabätä? Nitre dite ñan kä jürä ngwen jabätä ye aibe nämäne niara bäre aune yebätä ja kitani kwe raba ruin nie. Ñodre, iti ye abokän David. Niarabätä ñan kä jürä nämäne nitre rükä Israel ye jie ngwankäre, ye medenbätä mikani gobrane ye “nakaninbiti nitre jökrä ie” (1 Crón. 11:​1, 2). David nämäne tö ngwen Jehovai aune niara rüe nämäne näin jiebiti ye ngwane, nämäne Jehová känene ja dimikakäre (Sal. 28:7; ñäkädre Salmo 138:3 yebätä).b Ne madakäre, Jehoiadá aune monso kwe rükä, Benaya bätä nitre 22 tribu jie ngwanka ye nämäne kukwe kwin bämike aune nämäne juto biare ja mikakäre Davidkri ye Sadockwe tuani (1 Crón. 11:​22-25; 12:​26-28). David namani reire yebätä niaratre jökrä ja töi mikani dimike.

7. a) ¿Ñaka kä jürä ngwandre jabätä ye nire tä bämike kwin krubäte ni käne kä nengwane? b) ¿Video ja mräkä Nsilubätä ye tä dre driere nie?

⁷ Nitre ja ngwanka metre Jehovai tä ja mike gobran Ngöbökwekri yebätä ja kitadre ngwane, yekwe ni dimikai ja ngwen metre aune ñan kä jürä ngwen jabätä. Rei nikwe, Jesús, ñan ja mritani gobran Satanakwe yete jire chi (Mat. 4:​8-11; Juan 6:​14, 15). Käre tö ngwani kwe Jehovai ne kwe ja rabadre ruin dite ie. Arato monsotre bati kä nengwane ñaka ja mike política yete aune ñaka ja mike juto rükäre. Mä raba kukwe mikata gare niaratrebätä ye känene jw.org yete.c

MÄKWE JA MRÄKÄTRE DIMIKA

8. ¿Ñongwane nitre umbre ji ngwanka rabadre ja ngwen dite ja mräkätre dimikakäre?

⁸ Ni Jehová mikaka täte töta nemen ja dimikabätä kwärikwäri (2 Cor. 8:4). Akwa yekäre ruäre ngwane, ñan kä jürä ngwandre jabätä ye ribeta jai. Ñodre, rü gakata ye ngwane ja mräkätre tä kukwe ja üaire ribere jai o jondron ribeta kwe jai ye gare nitre umbre ie aune ja mräkätre tare kwetre yebätä tä juto biare dimikakäre, raba ja mike kukwe kri te yebiti ta (Juan 15:​12, 13). Yebiti tätre bämike tä ja ngwen dite Sadoc erere.

9. 2 Samuel 15:​27-29 yekänti, ¿David dre ribebare Sadoc ie? (Üai mikadre ñärärä).

⁹ Ja nire Davidkwe nämäne kukwe kri te. Monso kwe Absalón tö namani gobran diainka kän (2 Sam. 15:​12, 13). Yebätä David kämikadrekä Jerusalén Absalón ngäniene. Aisete Davidkwe niebare nitre sribikä kwe yei: “¡Brän, ani ngitie ñobätä ñan aune ni ñan gitiai ngwane, ni ñan kwäräbei Absalónbätä!” (2 Sam. 15:14). Nikanina ngwane, kä nükani ruin Davidbiti, aune ni rabadre iti Jerusalén Absalón tö nämäne dre nuainbätä ye gakäre nütübare kwe. Yebätä Sadoc aune sacerdote mada juaninta ja jiebiti kwe Jerusalén (ñäkädre 2 Samuel 15:​27-29 yebätä).d Nitre ne rabadre ja ngübarebiti krubäte, ñobätä ñan aune ja nire kwe ye nämäne kukwe tare te. Absalón ye abokän ni brukwä käme, käbäre aune ni ngökö. Absalón ngübatari nämäne ye gadre kwe jabätä ngwane, nitre ne bobre jakän.

10. ¿Sadoc aune nitre nämäne näin ben ye käkwe David kriemikani ño?

¹⁰ Davidkwe kukwe keteiti ükaninte känti Sadoc aune Husái mikani kwe, niara ye ja ketamuko kwin Davidkwe (2 Sam. 15:​32-37). David ño niebare Husái ie ye erere nuainbare kwe. Husái käkwe ja töi mikani kwin Absalón kräke aune Absalón töi ganainbare kwe, biti niebare kwe ie, rabadre kukwe keteiti nuainne ye köböire kä rabadrete David ie ja ükatekäre rükäre. Ye bitikäre mada, Husái käkwe kukwe ye täinbare Sadoc aune Abiatar ie (2 Sam. 17:​8-16). Aune niaratre nibu ye käkwe kukwe ye juani David kräke (2 Sam. 17:17). Sadoc aune nitre sacerdote mada yebiti Jehovakwe David mikani kwäre (2 Sam. 17:​21, 22).

11. ¿Nikwe ja ngwandre ño Sadoc erere ja mräkätre dimika manandre nie ngwane?

¹¹ Kukwe tare näire ja mräkätre dimikadre ribedre nie ngwane, ¿ja ngwan raba ño Sadoc erere? 1) Dre niedre nie erere nuaindre. Kukwe tare ye näire ütiäte krubäte ja mikadre täte ne kwe ni tädre keteitibe. Yebätä dre niedre sukursalkwe nie ye erere nuaindre (Heb. 13:17). Kukwe tare näire dre nuaindre mikata gare yebätä nitre umbre ji ngwanka rabadre ja kite ne kwe tädrera juto kukwe tare rakadrekä ye kräke (1 Cor. 14:​33, 40). 2) Ñan kä jürä ngwandre jabätä aune töbikadretari kwin (Prov. 22:3). Töbikadre kwin aune ñaka ja mikadre akwle kukwe tare te. 3) Tö ngwandre Jehovai. Niara töita nibätä aune ni tädre kriemikani ie tö. Ja mräkätre dimikadre ño kwin ye raba mike gare nie.

12, 13. ¿Dre nemen gare Víktor aune Vitali yebätä mäi? (Üai mikadre ñärärä).

¹² Víktor aune Vitali ye ni umbre ji ngwanka konkrekasionte, kä Ucrania yete niaratre nikani mrö aune ñö ngwena ja mräkätre ie. Víktor tä niere “Nun rikaba mrö känene kä jökrä känti aune kürü ngö aibe kukwei nämä nemen nun bäre. Ja mräkä iti kwe mrö nämä ükaninkrö ye bianba kwe ja mräkätre ie, ne kwe mrö tädre kwetre kä ruäre te, ye köböire ja mräkätre ñan mrö nikabare kä ruäre te. Bati, törö tie nun rikaba carrote ngwane, misil (bomba rükäre) ngö rükaba nun ken 20 metro näre (66 pie). Köbö yete tikwe oraba krubäte Jehovai ne kwe ti dimikadre kwe ja mräkätre dimike jankunu”.

¹³ “Ti ñan rabadre kä jürä ngwen jabätä”, nieta Vitalikwe. “Ti dikakaba kena ye ngwane tikwe dikakaba 12 ora jire. Ti nämä ji ngrabare ye ngwane tikwe oraba krubäte Jehovai”. Vitali ja ngwani dite, ñan kä jürä ngwani jabätä kwe aune töbikataribare kwin kwe ja käne: “Jehová ti mikadre töbätä aune ja ngwen kwin ye tikwe ribeba krubäte ie. Medente ta dikaka raba nie nämä gobrankwe yekänti ta ti rikaba. Ja mräkätre nämä sribire gwairebe tuaba tikwe ye käkwe tödeka tikwe mikaba dite. Niaratre nämä niken ji mike mrebe nun käne, nämäntre mrö ükekrö aune nämä niken ngwena carrote. Nämä mrö aune kä bien ja dükakäre Víktor ie aune tie”.

MÄKWE JA NGWAN METRE JANKUNU JEHOVAI

14. ¿Ni iti tare nikwe tä Jehová tuenmetre ngwane, jata nemen ruin ño nie?

¹⁴ Ni mräkä nikwe o ja ketamuko nikwe käkwe Jehová tuadremetre ye tare krubäte (Sal. 78:40; Prov. 24:10). Ni yebe nita ja kete kwin ngwane, bäri tä nemen tare nie. Ye erere namanina bare mäbätä ngwane, mäkwe ja tötikadre kukwe namani bare David aune Sadocbätä yekwe mä dimikai.

15. ¿Ñobätä Sadoc ñan kä jürä ngwani jabätä Jehová mikakäre täte jankunu? (1 Reyes 1:​5-8).

¹⁵ David nämäne gobrane akwa jatanina umbre ye ngwane, Jehová tö namani Salomón tuai gobrane, nämänena gare Adonías ie yebiti ta tö namani gobran diainkä Salomón kän (1 Crón. 22:​9, 10). Sadoc ja ngwani metre jankunu Jehovai, akwa ja ketamuko kwe Abiatar ye käkwe ja mikani Adoniakri (ñäkädre 1 Reyes 1:​5-8 yebätä).e Abiatar ñaka ja ngwani metre David aune Jehová ie, ye namani tare krubäte Sadoc ie aune namani ulire ye bämike ja töite. Kä nikani 40 ta, niaratre nibu sribibare gwairebe jabe sacerdotere (2 Sam. 8:17). Niaratrekwe “arca Ngöbökwe” ye ngübabare gwairebe (2 Sam. 15:29). David dimikani kwetre aune kukwe keta kabre nuainbare kwe gwairebe sribibätä Jehová kräke (2 Sam. 19:​11-14).

16. ¿Dre käkwe Sadoc dimikani ja ngwen metre jankunu Jehovai?

¹⁶ Abiatar ñaka ja ngwani metre Jehovai, akwa Sadoc ja ngwani metre, yebätä David tö ngwani jankunu Sadoc ie. Adonías tö namani dre nuain mikani gare David ie ye ngwane, niarakwe ja di käräbare Sadoc, Natán aune Benaya ie Salomón mikakäre reire (1 Rey. 1:​32-34). Nitre ja ngwanka metre Jehovai, ñodre Natán ja ngwani metre Jehovai aune David dimikani kwe tuani Sadockwe yekwe dimikani (1 Rey. 1:​38, 39). Salomón namani reire ye ngwane, sacerdote Sadoc ye mikani kwe “Abiatar ye täte” (1 Rey. 2:35).

17. Ni iti tare mäkwe käkwe kämikadrekä Jehovabätä ye ngwane, ¿mä raba ja ngwen ño Sadoc erere?

¹⁷ ¿Mä raba ja ngwen ño Sadoc erere? Ni iti tare mäkwe kitadrekä kukwebätä ye ngwane, mä tö ja ngwain metre Jehovai ye mäkwe bämika (Jos. 24:15). Jehovakwe ja di biain mäi ñan kä jürä ngwankäre jabätä. Mäkwe ja di käräi ie orasionte aune nitre ja ngwanka metre Jehovai yebe mäkwe ja keta. Mäta ja ngwen metre ye tuin ütiäte krubäte Jehovai aune kukwe kwin mikai nemen bare kwe mä kräke (2 Sam. 22:26).

18. ¿Kukwe namani bare Marco aune Sidsebätä ye tä dre driere mäi?

¹⁸ Dre namani bare Marco aune muko kwe Sidse bätä ye ani mike gare jai. Niaratre ngängän nibu ririabare ye ngwane, kämikaninkä kwetre Jehovabätä. Marco tä niere: “Monso nikwe tä därere ye ngwane, käta nemen juto krubäte nibätä aune nita juto biarbe kukwe ñokwa nuainkäre kriemikakäre. Ye medenbätä, tätre kämikekä Jehovabätä ye ngwane, ni brukwä tä nötöte jiebiti”. Aune tä niere arato: “Jehová tä käre ti dimike. Ti di ñan tä nemen ja üairebiti ye ngwane, Sidse tä dite. Sidse tä di nekä ye ngwane tita dite”. Sidse tä niere: “Jehová tä nun dimike ye aibe köböire nunta kä ngwen nüke jai. Nun köböite monso nunkwe kämikaninkä Jehovabätä rababa ruin tie, yebätä ja rababa ruin ngite krubäte tie. Aisete tikwe ja drieba Jehovai. Ye bitikäre, kä kwati te ti ñan nämä ja eteba iti tuin ye rükaba, niara kise kitaba ti ngärä, nikraba kwe tibätä aune nieba kwe tie: ‘Mä ñan ngite, ngwen törö jai Sidse’. Jehová tä nun dimike sribire jankunu kräke kä jutobiti”.

19. ¿Mä töita kwatibe dre nuainbätä?

¹⁹ Ni jökrä Jehová mikaka täte käkwe ja ngwandre Sadoc erere ie Jehová tö (2 Tim. 1:7). Nikwe tö ngwandre au jai ye ie Jehová ñan tö, ñakare aune nikwe tö ngwandre niarai. Nita ja tuin kukwe tare ben ye ngwane, nikwe ja di kärädre Jehovai aune niarakwe ni dimikai ja ngwen dite Sadoc erere yebiti tö ngwandre (1 Ped. 5:10).