¿Nitre testiko Jehovakwe yekwe Biblia sribebare jeñe ja kräke?
Biblia kwitani jene jene keta kabre yebätä nitre testiko Jehovakwe ja tötikabarera. Akwa, Biblia Traducción del Nuevo Mundo ye bäri tareta ñobätä ñan aune Ngöbö kä ño ye tä tikanibätä aune kukwe tikani kira ye ererebätä kwitani metre ta aune nuäre nüke gare. Biblia Traducción del Nuevo Mundo ye kwitani kukwe keta kabrebiti.
Ngöbö kä. Nirekwe Biblia sribebare ye nitre bäsi jökrä tärä sribekä (editoriales) ñan tä mike gare. Ñodre, nitre 70 biti bäri käkwe sribibare Biblia keteiti kwitabätä o kukwe mada nuainbare kwetre köböire Biblia ye namani bare, nitre ye jökrä kä tä tikanibätä. Akwa ni metrere Biblia sribekä ye kä ñaka tikani jirebätä: Jehová.
Kä keta kabre känti Ngöbö kä nämäne tikani kena ye erere tä tikani Traducción del Nuevo Mundo yebätä aune nire nire tä sribire Biblia ye kwitabätä ye kä ñaka tä mikanibätä.
Kwitani metre ta: Kukwe tikani kira kena ye erere Biblia ruäre ye ñaka tä kwitani. Ñodre keteiti tä Mateo 7:13 ye kwite krörö. “Näin jukwe chi yete ta, ñobätä ñan aune ji kri aune kwata kri ye niken ni ngwena kä ñukwäre yete”. Kukwe tikani kena yete “kä ñukwäre” ye nie ñaka, ñakare aune “gadrete” ye nieta. Ni kukwe käme nuainkä ye ngwanta ja tare nike kä ñukwäre yete nütü nämäne nitre Biblia kwitaka yekwe bä raba. Akwa Biblia ñaka kukwe ye erere mike gare. Ye medenbätä Traducción del Nuevo Mundo ye tä “gadrete” niere, tikani kena kira ye erere.
Nuäre nüke gare. Kukwe kwitani kwin ye abokän kukwe tikani kena kira ye ererebätä kwitadre akwa ye ñan aibe, ñakare aune rabadre nüke gare kwin arato. Biblia keta kabre tä Mateo 5:3 ye kwite metre ta kukwe nebiti: “Nitre bobre ja üairebiti ye kräke kukwe kwin”. Akwa ye ñan nuäre nüke gare nengwane, medenbätä Traducción del Nuevo Mundo yete bersikulo ne kwitata kore: “Nire nire ie gare tä kukwe ja üaire ribere jai yebätä käta juto”.
Traducción del Nuevo Mundo tä Ngöbö kä mike ütiäte, tä kukwe tikani kira ye erere kwite aune nuäre nüke gare. Akwa ye ñan ngöräbätä Traducción del Nuevo Mundo ye jene mada kräke: bianta aune ütiä kärä ñaka. Ye köböire nitre millón kwati krubäte raba ñäkebätä ja kukwei jeñebiti ngwian ñaka Biblia kökara kwati jai ie ngwane.