Monso dimikadre ne kwe tödeka kwe rabadre dite

1, 2. ¿Monsotre tä kukwe ngwentari ye nitre rüne rabadre mike tuin ño jai?

NITRE kwati tä niere monsotre ngübadre ye sribi kri tä nitre rüne kisete. Yebätä, nirekwe monso kia tärä aune tä tödeka kwe mike dite yebätä kwin niedre ietre (Deut. 6:​6, 7). Monso tä kite nirien ye ngwane, kukwe mikata täte yebätä töta nemen kukwe mikai gare jai aisete dre kwin aune dre käme tä ngwentari.

² Tödeka monsotrekwe tä kite nete kän yebätä tä kite kukwe ngwentari, ye nitre rüne raba nütüre. Nierare monsotre tä kukwe ngwentari ne kwe kukwe rabadre nüke gare ie (1 Cor. 13:11). Monsotre tä kukwe ngwentari ye ñaka mikadre tuin ngwarbe jai, ñakare aune mikadre ütiäte jai ye köböire ñobätä tä tödeke Ngöböbiti ye rabadre nemen gare kwin ietre.

3. ¿Dre mikai gare jai kukwe ja tötikara nebätä?

³ Nitre rüne rabadre ño monsotre dimike 1) kukwe mikadre tuin era kwetre jai, 2) dre kwin aune dre käme Ngöbö kräke ye mikadre täte kwetre 3) ñobätä kukwe mikata täte kwetre yebätä blitadre kwe. Monsotre tä kukwe ngwentari ye ñobätä kwin aune nitre rüne raba kukwe ruäre nuainne ye ngwane raba blite monsotre ben ne kwe tödeka kwe rabadre bäri dite Ngöböbiti raba nuainne ño ye rabai gare nie kukwe ja tötikara nebätä.

MONSOTRE DIMIKE KUKWE MIKE ERA JAI

4. ¿Monsotre raba kukwe meden ngwentari jai aune ñobätä?

⁴ Nitre rüne kristiano yebätä monsotre kwe, ye rabai Jehová mike täte ye ñan nütüdre. Aisete monsotre tä därere ngwane, tödeka ñaka kwetre ye nierare. Ye medenbätä, monsotre tä nierare kukwe ne kwrere ngwentari: “¿Ngöbö tärä ye ñokänti raba nemen gare tie? ¿Kukwe nieta Bibliakwe yebiti ti raba tö ngwen?”. Biblia ara tä ni kristiano dimike “dre tuen dbe Ngöböye, ye erere nuene” aune tä “Ngöbö kukwei niere metre ya, ñakare ya, ye mika ñäräre kuin” (Rom. 12:1; 1 Tes. 5:21). Ne madakäre, ¿tödeka monsokwe rabadre dite yekäre munkwe dre nuaindre?

5. ¿Nitre rüne raba monsotre dimike ño tödeke bäri Bibliabiti? (Romanos 12:2).

⁵ Ñobätä kukwe era ni kräke ye monsotre dimikadre mike gare gai (ñäkädre Romanos 12:2 yebätä). Monsotre tä kukwe ngwentari ye ngwane, nitre rüne raba dimike kukwe ye känene akwle tärä Índice de las publicaciones Watch Tower aune tärä Ni testiko Jehovakwe jie ngwankäre ja tötike yebätä, ne kwe kukwe ye rabadre gare akwle ietre. Tärä Ni testiko Jehovakwe jie ngwankäre ja tötike yete niaratre raba niken kukwe kädrieta ja täri “Biblia” sección “Ngöbökwe ja töi mikani bätä” yete Biblia ñan ni kä tibienbätä kukwei, ñakare aune “Ngöbö kukwei” tä mike gare metre bätä (1 Tes. 2:13). Ñodre, raba kukwe känene juta kira Nínive yebätä. Juta ye ñaka nämäne ye nitre ruäre kukwe känänkä Bibliabätä käkwe niebare kirabe. Akwa kä 1850 ye ngwane, namani gare juta ye nämäne ganinte, ye tä mike gare kukwe mikata gare Bibliabätä ye metre (Sof. 2:​13-15). Arato raba mike gare jai, juta Nínive gaite ye mikani gare Bibliabätä ye namani bare ño känänkäre rabadre känene sección “¿Ne gare mäi?” tä Ni Mikaka Mokre noviembre 2021 yebätä. Monsotre tä kukwe känene tärä enciclopedia o tärä mada mada yebätä ngwane, kukwe tä nemen gare ie tä känene mada tärä juta Ngöbökwe tä bien yebätä ye ngwane, kukwe tä nemen gare bäri ie ye köböire tödeka kwe tä nemen dite Biblia yebiti.

6. ¿Nitre rüne raba monsotre dimike ño töbiketari aune kukwe mike gare jai? Mä raba mike gare (üai mikadre ñärärä).

⁶ Monsotre dimike töbiketari aune kukwe mike gare jai. Kukwe keta kabrebätä nitre rüne raba blite monsotre ben Bibliabätä aune dimike tödeke Ngöböbiti. Kriblü bä nuäre ükaninte aune museo nitre testiko Jehovakwe sukursalte yete nitre rüne raba niken basare monsotre ben, raba blite kukwe ütiätebätä bentre. Ñodre, museo yete basa rikadre o mikata tuare videote ye ngwane, jondron mikani yete ye namani bare ño yebätä nitre rüne raba blite monsotre ben ye köböire kukwe nieta Bibliabätä ye abokän metre rabadre gare ietre. ¿Jä moabita kira kä 3,000 näre biti yebätä Ngöbö kä tä tikani ye gare monsotre mäkwe ie? Jä ye tä Museo Louvre, París (Francia) yete. Exposición “La Biblia y el nombre divino” raba kwen central mundial Warwick (Nueva York) yete, jä ye kwrere raba kwen nie. Jä moabita yebätä rey Mesá nünanka Moab käkwe rübare nitre Israel ben mikata gare. Aune kukwe ye ara mikata gare Bibliakwe (2 Rey. 3:​4, 5). Monsotre rabai kukwe ne mike gare jai ngwane, kukwe nieta Bibliakwe ye metre tuadi ja okwä jeñebiti kwe, ye köböire tödeka kwetre rabai dite ñan ñobätä aune, Biblia tä kukwe mike gare metre ye rabai gare ietre (2 Crónicas 9:6 ye mikadre ñärärä).

7, 8. a) ¿Jondron sribebare bä nuäre ye tuin nie ye tä dre mike gare? Ye mä raba bämike. (Üai mikadre ñärärä). b) ¿Kukwe meden meden ngwantarita abokän biti monsotre dimika raba tödeke bäri Jehová jondron jökrä Sribekä ie?

⁷ Monsotre dimike töbiketari jondron sribebare yebätä. Mätä niken sribire tirete ngwane, basare parque o kä madakänti jondron ye sribebare bä nuäre aune tä ükaninte kwin jatäri yebätä mäkwe monso dimika töbiketaribätä. Jondron tä ükaninte bä nuäre jatäri ye abokän ni töbätä käkwe sribebare. Ñodre, chelere bolore aune kriblü ruäre bätä krikä ruäre tärä bolore arato muke tä ja käntibe bolore ye nita tuin aune nitre ja tötikaka krikri käkwe ja tötikanina kä kwati te jondron yebätä.a

⁸ Jondron keta kabre ye kwrere bätä monsotre raba ja kite kwelate. Ñodre, kri niken nirien ngwane, nemen kri aune nemen kidere jatäri ye abokän kri kri ye abokän kädekata fractal. Jondron ne kwrere raba tuin nie jondron mada sribebare yebätä. ¿Kukwe kia kia ükaninte kwin jatäri ye nirekwe nuainbare? ¿Nirekwe jondron bä nuäre ye dätebare? Jondron ne kwrere bätä monsotre kukwe ngwandretari ngwane, rabadre era kräke. Jehovakwe jondron ye sribebare ye köböire tödeka kwetre rabai dite (Heb. 3:4). Jehovakwe kukwe biani mikakäre täte ye mikai täte ngwane, kä rabai juto nibätä yebiti nikwe monsotre dimikadre tä kite nirien ye ererebätä aune Biblia ye kwin ja jie ngwankäre ye mikadre tuadre ietre.

NASA, ESA, and the Hubble Heritage (STScl/AURA)-ESA/Hubble Collaboration

DRE KWIN AUNE DRE KÄME MIKATA GARE BIBLIABÄTÄ YEBITI MONSOTRE DIMIKADRE

9. ¿Dre kwin aune dre käme tä Bibliabätä yebätä ñobätä monsotre raba kite kukwe ngwentari?

⁹ Dre kwin aune dre käme tä Bibliabätä yebätä monsotre rabadre kukwe ngwentari ngwane, nitre rüne rabadre töbike kwin käne blitakäre bentre. ¿Dre drieta Bibliakwe ye ñan tä nemen tuin metre ie yebätä tä kukwe ngwentari? ¿O kukwe mikata täte kwe yebätä kukwe ngwandretari ni madakwe ie ngwane, dre niedre kwe ñan nüke gare ie yebätä tä kukwe ye ngwentari? Dre kwin aune dre käme mikata gare Bibliabätä ye rabadre gare ie yekäre, rabadre ja tötike tärä Mä raba nüne kä jutobiti kärekäre yebätä.b

10. ¿Monsotre dimika raba ño ja kete kwin Jehovabe?

¹⁰ Monsotre töi mikadre ja kete kwin Jehovabe. Munta ja tötike monsotrebe ye ngwane, mä raba tärä Mä raba nüne kä jutobiti kärekäre yebätä üai tä mikani, kukwe ngwantarita yebiti dimike ne kwe niaratre töi ño ye rabadre mike gare (Prov. 20:5). Ñodre, ja ketamuko kwin tö kukwe kwin tuai nemen bare ja ketamuko kwe kräke ye erere Jehová bämikata kukwe ja tötikara 8 yekänti. 1 Juan 5:3 yebätä ja kitadre, bitikäre kukwe ne ngwandretari ietre: “¿Jehovakwe ni tare yebätä kukwe bianta kwe nie ye mikadre tuin ño jai?”. Kukwe ngwantarita ye raba tuin ngwarbe akwa raba monsotre dimike. Jehovakwe ni tare yebätä tä kukwe bien nie ye raba nemen gare ietre (Is. 48:​17, 18).

11. ¿Kukwe ja jie ngwankäre ye monsotre rabadre mike ütiäte jai yekäre dre nuaindre? (Proverbios 2:​10, 11).

¹¹ Kukwe ja jie ngwankäre ye raba ni dimike ño yebätä blitadre bentre. Mätä ñäke Bibliabätä o texto köbö kwatire kwatirebätä ngwane, kukwe ja jie ngwankäre mä mräkätre dimikanina ño yebätä munkwe blita bentre. Ñodre, ¿ni sribikä baliente aune ja ngwen metre ye kwin krubäte nüke gare monsotre ie? (Heb. 13:18). Kukwe ja jie ngwankäre ye raba ni kriemike ño ja ngrarebiti aune ja töibiti ye mikadre gare ie (Prov. 14:​29, 30). Kukwe ja jie ngwankäre yebätä blitadre monsotre ben ye raba dimike kukwe Bibliabätä ye mike bäri ütiäte jai (ñäkädre Proverbios 2:​10, 11 yebätä).c

12. ¿Nitre gure tä dre nuainne ne kwe kukwe ja jie ngwankäre ye rabadre tuin ütiäte monso kwe ie?

¹² Steve nünanka Francia, niara aune muko kwe tä monso kwe Ethan dimike. Jehovata kukwe bien nie ñobätä ñan aune ni tare kwe yebätä, ye nemen gare Ethan ie: “Nunta kukwe ne kwrere ngwentari ie: ‘¿Ñobätä nikwe kukwe ja jie ngwankäre ye mikadre täte gare mäi? ¿Jehovakwe ni tare yebätä tä kukwe ja jie ngwankäre bien nie ye ñokänti raba nemen gare nie? ¿Akwa ñan mikadre täte ngwane, dre raba nemen bare?’”. Niaratre tä blite ne kwrere ye tä Ethan dimike, dre kwin aune dre käme Ngöbö kräke ye mike tuin metre jai. Steve tä niere: “Kukwe kä kwinbiti ye bäri kwin kukwe kä tibienbätä ye kräke, ye nunta ja di ngwen mike nüke gare ie”.

13. ¿Kukwe ja jie ngwankäre ye ererebätä monsokwe ja ngwandre ye nitre rüne raba mike gare ño ietre? Mä raba mike gare.

¹³ Kukwe Bibliabätä ye ererebätä rabadre ja ngwen driedre ietre. Ñodre dirikä kwelate tä monso mike ñäke täräbätä ye ngwane, rabadre blite dre mikata täte kwe yebätä. Akwa tärä yebätä nitre kukwe käme nuainkä bämikata kwin ietre akwa metrere nitre ye ñan ja ngwanbare kwin. Nitre rüne raba monsotre kwe dimike töbike nitre tä ja ngwen käme kädrite ne erere ye kete kukwe ja jie ngwankäre Bibliabätä yebe aune meden kwin mike gare jai (Prov. 22:​24, 25; 1 Cor. 15:33; Filip. 4:8). Ye köböire, dre namani gare ie ngwandretari ie ye ngwane, monso ye raba kukwe kwin mike gare kwelate dirikä kwe ie aune nitre nänkä kwelate ben ie.

MONSOKWE BLITADRE DRE MIKATA TÄTE KWE YEBÄTÄ

14. ¿Kukwe meden raba kä jürä mike monso kristiano yebätä aune ñobätä?

¹⁴ Ruäre ngwane, ja ñan raba nüke törö monsotre ie blitakäre kukwe mikata täte kwe yebätä. Jondron kite nikwite jatäri yebätä blitadre ngwane, kä jürä raba nemen bätä blitakäre kukwe yebätä. Ñobätä ñan aune, kukwe ye tuin metre nitre dirikä ie. ¿Nitre rüne mun raba monsotre dimike ño ne kwe, dre mikata täte kwe ye erametre kräke rabadre gare ietre?

15. ¿Monsotre tä kukwe mike täte ye rabadre tuin metre ie yekäre rabadre dre nuainne?

¹⁵ Monsotre dimikadre kukwe mikata täte kwe yebiti tödeke kwatibe. Monsotre tä Ngöbö mike täte ye ñaka rabadre gaire (2 Tim. 1:8). Metrere ja nire ye ñaka nükani jerekäbe kore ye nüke gare nitre científico kwati ie. Ñobätä ñan aune, ni töbätä iti käkwe jondron jökrä ye sribebare nüke gare ietre. Yebätä jondron kite nikwite jatäri drieta kä jökräbiti tibien kwelate ye ñaka tuin era ietre. Jondron jökrä sribebare ye ñaka jerekäbe nükani kore ye namani gare ja mräkätre kwati ie, yebätä monsotre rabadre ja kite ne kwe tödeka kwe ye rabadre bäri dite.d

16. ¿Ni jondron jökrä Sribekä ye monso tä mike era jai yebätä rabadre blite ño ye nitre rüne raba driere ie? (1 Pedro 3:15; üai mikadre ñärärä).

¹⁶ Monsotre mike juto kukwe mikata täte kwe ye mikakäre gare (ñäkädre 1 Pedro 3:15 yebätä). Kukwe “¿Creación o evolución?” tä jw.org yete, sección “Los jóvenes preguntan” ye nitre rüne raba känene ja kitakäre monsotre ben. Kukwe meden metre aune tuin metre ie, ye ngwandretari ie biti dimikadre blite ni madabe kukwe yebätä. Ñaka rabadre ja kwete ni madabe kukwe yebätä, ngwandre törö ie. Nitre tä juto biarebe ni kukwe nuakäre töi jämebiti ngwane, ñobätä kukwe metre ni kräke yebätä blitadre bentre kukwe nuärebiti. Nitre kwelate raba niere ie: “Dre tuin tie yebe tita mike tuin era jai, akwa ti ñan Ngöbö tuabare”. Ye ngwane monso kristiano raba niere: “Mä rikadre dikekä kä tokwäte ta ngwane, kä ngwandre ngwarbe akwa ñö okwä bä nuäre kwandre mäi ye ñaka namani ja töbiti rükai mä töite. Ñö okwä ye ñaka namani ja töbiti. Ye erere arato, kä tibien sribebare bä nuäre ye ni iti töbätä käkwe sribebare”.

17. ¿Nitre rüne raba monsotre dimike ño biarebe blitakäre nitre madabe ñongwane erere? Kukwe meden kwrere ngwantari raba monsokwe nitre nänkä kwelate ben ie, ye mä raba niere ruäre.

¹⁷ Monso mikadre juto blitakäre Bibliabätä nitre ben ñongwane erere (Rom. 10:10). Blitata Bibliabätä ngwane, musika täkäta ye kwrere nie raba. Musika ye ni ñan raba täke kwin bengwairebe, kenanbe ñan rabai nemen nuäre ni kräke akwa ja kitata niken kiakiabätä ye ngwane, bätärekä bätärekä jatai nemen nie. Ye erere nemen bare, dre mikata täte nikwe bätä blitata ngwane. Kenanbe ni raba blite kukwe nuärebätä nitre ben. Ñodre, monso kristiano raba niere monso mada ie: “¿Nitre ingeniero tä ja kite jondron nire yebätä jondron sribekäre ye gare mäi? Clase täbiti ni raba video ne tuin raba tuin ño mäi”. Video serie “¿Ni iti käkwe sribebare?” ye mika tuare ie biti ngwandretari ie: “Nitre científico tä jondron sribebarera yebätä ja kite aune tä mada sribere erere yebätä käikitakata, aisete ¿jondron sribeba metre yebätä nire käikitadrekä?”. Kukwe nuäre ne kwrerebiti monsotre töi mika raba kukwe metre mike gare jai.

DIMIKE TÖDEKE JANKUNU

18. ¿Mun raba monsotre dimike ño tödeke bäri Ngöböbiti?

¹⁸ Nitre ñaka Jehová mike era jai ye ngätäite nita nüne (2 Ped. 3:3). Nitre rüne, mun raba monsotre munkwe dimike kukwe ütiäte Ngöbökwe yebätä ja kite ye köböire tödeka kwe rabai dite aune dre käme aune dre kwin ye rabai ütiäte kräketre. Jehovakwe jondron sribebare kwin jatäri yebätä mike töbiketari, köböire tödeka kwe rabai bäri dite. Profecía Bibliabätä tuanina nemen bare ye munkwe dimika mike nüke gare ietre. Ütiäte krubäte, mun raba orare ben aune orare kräke. Jehovakwe kukwe kwin mikai nemen bare mun kräke tädre gare munye (2 Crón. 15:7).