Dirire kukwe nuärebiti

Jesukwe nuainbare ño

VIDEO: Jehovata ni ngübare ño ye Jesukwe diribare nuäre

1. VIDEO mike ñärärä o ñäke Mateo 6:​25-27 yebätä. Biti kukwe ngwantarita nebätä töbiketari:

1. Jehovata ni ngübare, ¿ye Jesukwe bämikani ño dirikäre?

2. Kukwe nämäne gare krubäte Jesuye nukwä yebätä, ¿se ñobätä kukwe braibe aune nuäre niebare kwe dirikäre? ¿Ñobätä kukwe ye namani kwin dirikäre?

Jesús kukwe kwin bämikani, ¿ye tä dre driere nie?

2. Nikwe diridi kukwe nuärebiti ngwane, kukwe ye rükaita töro nitre ie aune matai brukwäte.

Ja ngwen Jesús erere

3. Ñan blita krubäte. Kukwe ketare ketare gare mäi ye ñan mike gare jökrä ni ja tötikaka ie, ñakare aune ja töi mike kukwe tä täräbätä ye kädriere ben. Mätä kukwe ngwentari ie ngwane, mäkwe kukwe ngüba bätärekä ie. Akwa, kukwe ñaka gare ie o kukwe niedre kwe ye ñan tä Bibliabätä ngwane, mä raba kukwe mada ngwentari ie ne kwe kukwe ye rükadre gare kwin ie. Kukwe rükadrera gare ni ja tötikaka ie ngwane, näin ja käne aune punto mada yebätä ja tötike ben.

4. Dre garera ni ja tötikaka ie yebiti dimike kukwe mrä mike gare jai. Ñodre, nitre gaikröta yebätä munbike ja tötike ngwane, nitre krütanina tä ño yebätä dre gare ie ye ngwandreta törö kwe mäkwe ribe ie.

5. Mäkwe kukwe bämikai ño yebätä töbike kwin käne. Mä jämi kukwe bämike ye känenkri ngwentari jai:

1. “¿Tibike kukwe bämike ye nuäre rükadre gare?”.

2. “¿Rükai gare drekebe ngwarbe ni ja tötikaka ie?”.

3. “¿Kukwe ütiäte ti tö driedi ye ai rükaita törö ie o kukwe bämikai ye aibe rükai törö ie?”.