KUKWE JA TÖTIKARA 46
¿Ñobätä ja diandrekä mento aune ja ngökadre ñöte?
Ni iti tä ja denkä mento Jehová kräke ngwane, Ngöbö aibe mikai täte kwe aune Ngöbö töi nuaindre ye rabai bäri ütiäte kräke tä käbämike ie orasionte (Salmo 40:8). Aune tä ja ngökö ñöte yebiti tä bämike ni mada ie, ja dianinanka mento kwe Ngöbö kräke. Ja diankata mento Jehová kräke ye kukwe bäri ütiäte dianta nuaindre jai. Ütiäte krubäte, aisete nita nuainne ngwane, ni ñan tä nemena nüne käne ye erere. ¿Dre raba mä töi mike kukwe ne nuainne?
1. ¿Dreta ni töi mike ja denkä mento Jehová kräke?
Jehová tare nikwe ye tä ni töi mike ja denkä mento kräke (1 Juan 4:10, 19, TNM). Bibliata niere: “Mäkwe Jehová Ngöbö mäkwe tare ja brukwä tätebiti, ja nire tätebiti, ja töi tätebiti aune ja di tätebiti” (Marcos 12:30, TNM). Jehová tare nikwe ye nita bämike kukwe nuainta nikwe aune blita jakwe yebiti. Ni brare aune merire tä ja tarere yebätä tätre ja mäkete. Ye erere arato nita Jehová tarere bökän ngwane, nita ja denkä mento kräke aune ja ngökö ñöte.
2. ¿Jehovata kukwe meden kwin bien ni testiko kwe ja ngökani ñöte ie?
Mäkwe ja ngökai ñöte ngwane, Jehová mräkätre tä nüne kä jutobiti ye ngätäite mä rabai. Ye ngwane, Ngöböta mä tarere ye rabai gare mäi kukwe keta kabre köböire aune mä rökrai bäri ken (mäkwe ñäkä Malaquías 3:16-18 yebätä). Jehová rabai mä Rüne aune ja mräkätre kä jökräbiti tä Ngöbö tarere ye rabai mä mräkäre aune mä rabai tare kwetre arato (mäkwe ñäkä Marcos 10:29, 30 yebätä). Bäkänä, mä jämi ja ngökö ñöte känenkri mä rabadre kukwe ruäre nuainne. Mä rabadre Jehová mike gare jai, tarere aune mäta tödeke Monso kwe ie ye mä rabadre bämike. Mrä mada, mäkwe ja nire mäkwe ye diainkä Jehová kräke ye mä rabadre käbämike ie. Mäkwe kukwe jökrä ne nuaindi biti mäkwe ja ngökai ñöte ngwane, nüna käre kä jutobiti ye rabai mäkwe. Ngöbö kukwei tä niere, ja ngöka ñöte ye arato tä mun mike kwäre (1 Pedro 3:21).
JA TÖTIKE BÄRI NGUSETA
Mäkwe ja diandrekä mento Jehová kräke aune ja ngökadre ñöte ye ñobätä ütiäte ye ani mike gare jai.
3. Nire mikai täte ye ni itire itire ie tä gare
Nitre israelita kira ye ngätäite nitre ruäre nämäne nütüre, raba Jehová mike täte, arato raba ngöbö ngwarbe Baal ye mike täte. Akwa nämänentre ja ngököta akwle. Aisete, Jehovakwe Elías ni niara kukwei niekä juani töi ükatekäre. Ñäkädre 1 Reyes 18:21 yebätä aune kukwe ne kädriedre jabe:
¿Kukwe meden namani diandre nuaindre jai nitre israelita ie?
Nitre israelita erere, nikwe nire mikai täte ye tä diandre nuaindre jai nie. Ñäkädre Lucas 16:13 yebätä aune kukwe ne kädriedre jabe:
¿Ñobätä ni ñan raba Jehová mike täte ye bengwairebe jondron o ni mada mike ngöböre jai?
Ni niena Jehová mike täte jutuadre ie yekäre, ¿ni raba dre nuainne?
4. Mä tare nuäi Jehovakwe yebätä töbiketari
Jehovakwe regalo kwin keta kabre bianina nie, aune ¿ni raba dre bien niarai? VIDEO mikadre ñärärä.
¿Kukwe meden känti Jehovakwe ja tare bämikanina mäi? Ñäkädre Salmo 104:14, 15; 1 Juan 4:9, 10, TNM yebätä aune kukwe ne kädriedre jabe:
Regalo keta kabre Jehovakwe bianina nie, ¿ye meden abokänbätä mäta debe bien bäri?
Regalo nebätä mäta töbike ngwane, ¿mä töita nemen ño niara kräke?
Regalo bianta nie ye käita nemen juto nibätä, aisete ni regalo bianka nie yei nita debe bien ye ni töta nemen bämikai. Ñäkädre Deuteronomio 16:17 yebätä aune kukwe ne kädriedre jabe:
Kukwe keta kabre Jehovakwe bianina mäi yebätä mäta töbiketari ngwane, ¿mä töita nemen jondron bianbätä ie? ¿Mä dre biandre ie?
5. Ja diankä mento ye tä kukwe kwin mike bare
Ni käi kitadrekä, sribi ütiäte, ngwian, ye tä kä mike juto nibätä nütüta nitre kwatikwe. Akwa, ¿ye metre? VIDEO mikadre ñärärä, biti kukwe ne kädriedre jabe:
Ni jadakaka yei fútbol nämäne tuin ütiäte krubäte akwa, ¿ñobätä tuanimetre kwe?
Fútbol tuanimetre kwe aune ja töi mikani kwe sribire Jehová kräke, ¿kukwe kwin diani nuaindre kwe jai raba ruin mäi? ¿Ñobätä?
Apóstol Pablo jämi nemen kristiano känenkri kukwe ütiäte kri nämäne käne. Niarakwe ja tötikani ni ütiäte dirikä lei judío yebätä ben. Akwa kukwe ye tuanimetre kwe ja mikakäre kristiano. ¿Ja töi kwitaninta kwe? Ñäkädre Filipenses 3:8 yebätä aune kukwe ne kädriedre jabe:
Pablo jämi ja mike kristiano känenkri kukwe nuainbare kwe ye nämäne tuin “jändrän ngwarbe” kwrere ie, ¿ye ñobätä niebare kwe?
¿Kukwe tuanimetre kwe ye köböire dre kwin namani kwe?
Mä Jehová mikai täte ngwane, ¿mä nünain kwin raba ruin mäi? ¿Ñobätä mä töita kore?
Pablo ja mikani kristiano ngwane, kukwe keta kabre bäri kwin namani kwe kukwe tuanimetre kwe ye kräke.
NITRE RUÄRE TÄ KUKWE NE NIERE: “Ne kukwe metre ye gare tie, akwa ti jämi juto ja ngökakäre ñöte”.
¿Ja diandrekä mento Jehová kräke ye kukwe kwin nuainta raba ruin mäi? ¿Ñobätä?
¿DRE NIBI GARE MÄI?
Jehová tare nikwe ye tä ni töi mike ja denkä mento kräke aune ja ngökö ñöte.
Ngwankäreta törö
¿Ñobätä Jehová aibe mikadre täte aune taredre ja brukwä tätebiti?
¿Jehovata kukwe meden kwin bien ni Testiko kwe ja ngökani ñöte yei?
¿Mä törba ja diainkä mento Jehová kräke?
KUKWE MIKE GARE BÄRI JAI
Ñobätä ni kantaka aune ni jadakaka käkwe ja dianinkä Jehová kräke ye mike gare jai.
Kukwe madabätä ja diandrekä mento Jehová kräke ye mike gare jai.
“¿Ñobätä ja diandrekä mento Jehová kräke?” (Ni Mikaka Mokre, 15 enero 2010)
Nitre tä ja denkä mento Jehová kräke yebätä kätä juto ye mike ñärärä video musical nekänti.
Ñobätä meri iti ja töi mikani kukwe nuain nämäne kwe ye kwite ye mike gare jai biografía “Drekäre nita nete ye kä kwati te tikwe ngwantariba jai” yete.
“Biblia niaratre töi kwitani” (Ni Mikaka Mokre, 1 noviembre 2012)