KUKWE JA TÖTIKARA 26
¿Ñobätä ja tare nikata?
Kukwe tare tä nakainkä ngwane nitre tä nemen niere “¿Se ñobätä?”. Kukwe ngwantarita ne Biblia tä mike gare ye tä ni töi mike jäme.
1. ¿Satanakwe dre nuainbare kukwe käme mikakäre kä tibienbätä?
Diablu, Satana ja mikani Ngöbö rüere. Tö namani ni mada gobrain, aisete Adán aune Eva töi mikani kwe ja mike Ngöbö rüere arato. Kukwe kwin ñäkäi nämäne Eva ie nütüdre Evakwe yekäre kukwe ngwarbe niebare kwe ie ngökakäre (Génesis 3:1-5). Ye abokän ni kä tibienbätä ñaka Ngöbö mikadre täte ngwane, nikwe nünandre bäri kä jutobiti nie nämäne kwe. “Mä ñaka krütai” niebare kwe Eva ie ngwane, ni ngökabare kena kwe. Yebätä niara “ni ni ngökaka rün” nieta Bibliakwe (Juan 8:44, Ngöbö Täräe [NGT], tärä okwä ükaninte).
2. ¿Adán aune Eva dre diani nuaindre jai?
Jehovakwe ja töi mikani mantiame Adán aune Eva kräke. Yebätä niaratre tuanimetre kwe kri ngwä jardín Edente ye jökrä kwete, akwa keteitibe ñäkäibare kwe ietre (Génesis 2:15-17). Yebiti ta, niaratrekwe ja töi mikani kri ngwäkä ye kwete. Evakwe “kri ngökwä ye ötani biti kwetani” aune Adankwe “kwetani” arato (Génesis 3:6, TNM). Niaratre ñaka Ngöbö mikani täte. Adán aune Eva töi nämäne metre, aisete kukwe metre nuaindre kwetre ye ñan nämäne ribi kräketre. Akwa nierare ñan Ngöbö mikani täte kwetre, yebiti ja mikani ngite kwe aune Ngöbökwe gobraindre yei niaratre ñan tö namani. Ye köböite kukwe tare namani bare bätätre (Génesis 3:16-19).
3. Adán aune Eva kukwe nuainbare ye köböite ¿dre nemen bare nibätä?
Adán aune Eva ja mikani ngite ye köböite ni jökrä töi ngite. Adán aune Eva ja mikani ngite ngwane töi ñaka namanina metre, aisete nitre jökrä jatani jiebiti ye töi ngite arato. Biblia tä blite Adanbätä ngwane tä niere: “Ni itibe köböite ngite jatani kä tibienbätä, angwane ngite köböite gata jatani. Ne kwrere gata nikani ni jökräbiti” (Romanos 5:12, NGT).
Akwa, ¿ñobätä ja tare nikata? Ruäre ngwane, kukwe blo dianta nuaindre jai yebätä, nitre mada ñan tä kukwe kwin den nuaindre jai yebätä o kukwe ngüba ñaka nikwe tä nemen bare nibätä yebätä (mäkwe ñäkä Eclesiastés 9:11 yebätä).
JA TÖTIKE BÄRI NGUSETA
Kukwe käme nuainta aune ja tare nikata ye ñobätä ñaka ngite kitadre Ngöböbiti aune kukwe yebätä ja nemen ruin ño ie ye mike gare jai.
4. ¿Ja tare nikata yebätä nire ngite?
Ngöböta kä tibien ne gobraine nütüta nitre kwatikwe. ¿Akwa ye metre? VIDEO mikadre ñärärä.
Ñäkädre Santiago 1:13 aune 1 Juan 5:19 yebätä aune kukwe ne kädriedre jabe:
¿Ja tare nikata aune kukwe käme nuainta yebätä Ngöbö ngite?
5. ¿Gobran Satanakwe köböite dre namanina bare?
Ñäkädre Génesis 3:1-6 yebätä aune kukwe ne kädriedre jabe:
¿Kukwe meden niebare Satanakwe ni ngökakäre? (Bersikulo 4 aune 5 mikadre ñärärä).
¿Jehová nämäne kukwe kwin ñäkäire ni kä nebätä ie ye Satanakwe mikani gare ño?
¿Jehovakwe ni kä nebätä gobraindre ne kwe kä rabadre juto nibätä ye ni ñan ribere jai ye Satanakwe mikani gare ño?
Ñäkädre Eclesiastés 8:9 yebätä aune kukwe ne kädriedre jabe:
Kira nükebe nengwane Jehová ñaka kä tibien gobraine, ¿aisete dre namanina bare?
Adán aune Eva töi nämäne metre, nämänentre nüne kä bä nuäre te, akwa Satana kukwe nuani kwetre aune ja mikani kwetre Jehová rüere.
Ja mikani ngite ye köböite, ngite, gata aune ja tare nika ye namani kä jökräbiti tibien.
Jehovakwe ngite, ja tare nika aune gata ye diainkä. Ni töi rabaita metre aune nünain kä bä nuäre te.
6. Ja tare nikata ye nemen tare Jehovai
¿Nita ja tare nike ye ñan nemen tare Ngöböi? Rei David aune apóstol Pedro käkwe dre tikani ye mike gare jai. Ñäkädre Salmo 31:7 aune 1 Pedro 5:7 yebätä aune kukwe ne kädriedre jabe:
Kukweta ni kisete yebätä Jehová töita aune nita ja tare nike ye nemen tare ie, ¿yebätä ja ruin ño mäi?
7. Kukwe tare ye jökrä Ngöbökwe diainkä
Ñäkädre Isaías 65:17 aune Apocalipsis 21:3, 4 yebätä aune kukwe ne kädriedre jabe:
Kukweta ni ngwen ja tare nike ye Jehovakwe diainkä täte aune kukwe blo ye ükaite kwe käbämikata kwe. ¿Ye tä mä dimike? ¿Ñobätä?
¿Ne gare mäi?
Satana ni ngökabare kena yebiti kukwe ngwarbe niebare kwe Jehovabätä. Kukwe niebare kwe yebiti Jehová bämikani käme kwe, ñobätä ñan aune Jehová ñaka kukwe ükatekä kwin aune ñaka gobranka metre niebare kwe. Jehová köböra kukweta ni ngwen ja tare nike ye denkä. Ye ngwane, kukwe niebarebätä ye ngwarbe ye bämikai kwe. Aune niara bäri gobranka metre bämikai kwe arato. Jehová kä rabadreta deme ye bäri ütiäte kukwe jökräbiti ta (Mateo 6:9, 10).
NITRE RUÄRE TÄ KUKWE NE NIERE: “Ngöbökwe ni sribebare ja tare nikakäre”.
¿Mäkwe dre niedre?
¿DRE NIBI GARE MÄI?
Kukwe tare nakainkä käbiti tibien ye Satana, Adán aune Eva köböite. Nita ja tare nike ye nemen tare Jehovai aune köböra ja tare nika ye denkä.
Ngwankäreta törö
¿Diablukwe kukwe meden niebare Eva ngökakäre?
¿Adán aune Eva ñan ja mikani täte ye köböite dre nemen bare?
Nita ja tare nike ye nemen tare Jehovai, ¿ñobätä nita ye niere?
KUKWE MIKE GARE BÄRI JAI
Ja mika ngite ye dre gärätä ye mike gare jai Bibliabätä.
Satana kukwe dätebare jardín Edente ye mike gare bäri jai.
“¿Ñobätä Ngöböta ja tare nika ye tuenmetre nakainkä?” (Ni Mikaka Mokre, 1 enero 2014)
Kukwe keteiti tä ni töi mike jäme aune kukwe ñaka nuäre ngwantarita mikata gare yebätä ñäke.
“¿Ñobätä nitre judío murie ketani? ¿Ñobätä Ngöbökwe tuanimetre nakainkä?” (Artículo jw.org)
Kukwe tare aibe nämäne nemen bare ni iti bäre, akwa dre namani gare ie ye mike gare jai.