KUKWE JA TÖTIKARA 34
¿Nita Jehová tarere ye ni raba bämike ño ie?
¿Mä jatani ja tötike Bibliabätä ngwane, ja ruin bäri Ngöbö ken mäi? ¿Mä niena ja kete ben, akwa mä tö ja ketai bäri kwin ben? Ye erere ngwane, ne ngwen törö jai, mäta Jehová tarere bäri ye jutuai ie ngwane, mä taredi bäri kwe aune mä ngübadi kwe. ¿Mäta niara tarere ye mä raba bämike ño ie?
1. ¿Nita Jehová tarere ye bämikata ño?
Nita mike täte ngwane, tare nikwe nita bämike (mäkwe ñäkä 1 Juan 5:3 yebätä). Akwa ñaka tä ni mike ja dibiti ja mike täte, ñakare aune nikwe mikai täte o ñakare ye tä ni tuenmetre den akwle jai. ¿Ñobätä? Ñobätä ñan aune Jehová tö ni tuai ja mike täte ja brukwä tätebiti (Romanos 6:17). Ye abokän, tare mäkwe yebätä tö mä tuai ja mike täte aune ñan nuain mananta mäi yebätä. Jehová tare mäkwe ye mä raba bämike kukwe ketebubiti ye kräke Sección 3 aune 4 ne sribebare, ye abokän kukwe tuin kwin ie ye mäkwe nuaindre aune kukwe mate blobätä ye mä ñan nuaindre.
2. ¿Ñobätä ñan raba nemen nuäre ni kräke ja tare bämikakäre Jehovai?
“Ni kukwe kwin nuainkä tä ja tuin kukwe keta kabre” ben (Salmo 34:19). Ni töi ngite yebe ni jökrä tä ja tuin. Yebiti ta, ruäre ngwane ngwian ñakare yebe ja tuata, kukwe blo nuainta nibätä aune kukwe mada tare ben ja tuata. Nita ja tuin kukwe tare ben ngwane, bäri ñan tä nemen nuäre ni kräke Jehovata dre ribere nie ye nuainkäre. Aune tä nemen bäri nuäre ni kräke ñan mikakäre täte. Akwa, Jehovata dre ribere mäi ye mäta ja di ngwen nuainne ngwane, kukwe jökrä yebiti ta niara tare mäkwe mäta bämike. Arato mäta ja ngwen metre ie mäta bämike. Aune niarakwe ja ngwain metre mäi aune ñaka mä tuainmetre jire kwe (mäkwe ñäkä Salmo 4:3 yebätä).
JA TÖTIKE BÄRI NGUSETA
Nita Jehová mike täte ye ñobätä ütiäte kräke aune dre raba ni dimike ja ngwen käre metre ie ye ani mike gare jai.
3. Satana ñäkäbare mä rüere
Kukwe nieta Bibliabätä tärä Job yekänti, Satanakwe ñäkäbare Job rüere. Akwa ñaka Job aibe rüere, ñakare aune ni jökrä tö Jehová mikai täte ye rüere arato. Ñäkädre Job 1:1 aune 1:6-2:10 yebätä aune kukwe ne kädriedre jabe:
¿Ñobätä Job nämäne Jehová mike täte niebare Satanakwe? (Job 1:9-11 mikadre ñärärä).
¿Satana tä dre niere mä aune nitre jökrä rüere? (Job 2:4 mikadre ñärärä).
Ñäkädre Job 27:5b yebätä aune kukwe ne kädriedre jabe:
¿Job nämäne Jehová tarere bökän ye bämikani ño kwe?
Job ja ngwani metre yebiti nämäne Jehová tarere bämikani kwe.
Nita ja ngwen metre yebiti nita Jehová tarere nita bämike.
4. Kä mike juto Jehová brukwäbätä
Ñäkädre Proverbios 27:11 yebätä aune kukwe ne kädriedre jabe:
Mäta Jehová mike täte aune mäta kukwe kwin den nuaindre jai ngwane, ¿jata nemen ruin ño Jehovai? ¿Ñobätä?
5. Mä raba ja ngwen metre Jehovai
Jehová tare nikwe ye tä ni töi mike blite ni madabe niarabätä. Aune nita ja ngwen metre ie ye tä ni töi mike blite niarabätä kukwe tare yebiti ta. VIDEO mikadre ñärärä, biti kukwe ne kädriedre jabe:
¿Ñan tä nemen nuäre mä kräke blitakäre Jehovabätä ni madabe?
Miri tuare videote erere, ¿dre käkwe Grayson dimiri ñan kä jürä ngwen jabätä?
Kukwe tuin kwin Jehovai ye nita tarere aune kukwe tuin käme ie ye kräke nita ja brukwä mike ngwane, tä nemen bäri nuäre ni kräke ja ngwankäre metre ie. Ñäkädre Salmo 97:10 yebätä aune kukwe ne kädriedre jabe:
Mä jatani ja tötike nükebe nengwane ye ben töbätä, ¿kukwe meden Jehovata tarere aune kukwe meden kräke brukwä?
¿Ñokänti mä raba nemen kukwe kwin tarere aune ja brukwä mike kukwe käme kräke?
6. Jehová mika täte ye tä kukwe kwin mike bare ni kräke
Jehová mikadre täte ye käre kwin. Ñäkädre Isaías 48:17, 18 yebätä aune kukwe ne kädriedre jabe:
¿Dre bäri kwin ni kräke ye gare Jehovai raba ruin mäi? ¿Ñobätä mäta töbike kore?
Mä jatani ja tötike Bibliabätä aune Jehová ye Ngöbö metre namani gare mäi, ¿ye käkwe mä dimikanina ño nüke nengwane?
NITRE RUÄRE TÄ KUKWE NE NIERE: “Tita ja ngwen ño ye Ngöbö ñaka töibikaire jire”.
Nita kukwe nuainne yebiti kä mika raba juto Jehovabätä aune kä mika raba ulirebätä, ¿ye mä raba mike gare texto medenbiti?
¿DRE NIBI GARE MÄI?
Kukwe tare yebiti ta mäta Jehová mike täte aune ja ngwen metre ie yebiti niara tare mäkwe mäta bämike.
Ngwankäreta törö
¿Job kukwe kwin bämikani ye tä dre driere mäi?
¿Jehová tare mäkwe ye mäkwe bämikadi ño ie?
¿Dre käkwe mä dimikai ja ngwen metre Jehovai?
KUKWE MIKE GARE BÄRI JAI
Ño mä raba ja ngwen metre Jehovai aune konkrekasion ie ye mike gare jai.
Satanakwe ñäkäbare ye mike gare bäri jai.
Monsotre kia raba Jehová tarere arato ye mike gare jai.
Monsotre mada töta nemen monso kukwebätä tuai kukwe nuainne ja dibiti ngwane, ¿ño raba ja ngwen metre Jehovai?
Monsotre tö mä tuai dre nuainne yebätä kä ngwen nüke jai (4:00)