KUKWE JA TÖTIKARA 41
KANTIKO 108 Jehovata ni tarere metre
Ja tare metre Jehovakwe ye tä nuin kärekäre
“ Munkwe debe bian Jehovai, ñobätä ñan aune niara ye töi kwin; ja tare metre Jehovakwe ye tä nuin kärekäre” (SAL. 136:1).
KUKWE NEBÄTÄ JA TÖTIKAI
Käre ni tare Jehovakwe tä nemen gare nie Bibliabätä ngwandre törö jai ye käkwe ni dimikai ja tuin töbikakwe o nita nemen ulire yebe.
1, 2. ¿Kukwe tare tare tä nemen bare ja mräkätrebätä yebätä jata nemen ruin ño ietre?
ÜAI MIKATA tuare página 13 yete erere, barco keteiti tä nain mrenbiti murie ribi tä mate, mren romon ye tä barco däkwite ngwane nitre barco jie ngwanka ye kräke ñaka nemen nuäre barco ngwankäre. Tuin üiabätä erere jondron keteiti tä mäkäni barcobätä aune tä kitani ñote. Mren tä nemen romon ye ngwane jondron ye kitata mrente nguse ne kwe barco ye ketadrebätä kwe.
2 ¿Kukwe ñan nuäre ben mäta ja tuin? Ye erere ngwane barcobätä blitani ye kwrere ja ruin mäi. Ruäre ja ruin kwin mäi ye ngwane Jehovakwe mä tare aune tä mä dimike ye gare kwin mäi, akwa kä mada ngwane kukwe tare ben mäta ja tuin ye ngwane niara töi ñaka mäbätä ruin mäi (Sal. 10:1; 13:1). Ruäre ngwane ja ketamuko mäkwe ye raba kukwe kwin niere mäi mä dimikakäre (Prov. 17:17; 25:11). Akwa kä näin ta ngwane mä jatai töbike jenenta. Jehová ñaka töbike mäbätä raba kite ruin mäi. Ja ruin kore mai ngwane ¿mä raba “ancla” ye kite ño ja ketabätäkäre, ye abokän Jehová tä mä tarere aune tä mä dimike aune käre nuaindi kwe yei mä täi tö ngwen?
3. a) ¿Jehovakwe ni tare yebätä tä ja ngwen metre nie ye abokän dre gärätä? (Salmo 31:7; 136:1). b) ¿Ja tare metre Jehovakwe ye erere ni mada ñaka bämike jire ye ñobätä nie raba? (Üai mikadre ñärärä).
3 Jehová tä ja ngwen metre nie ni tare kwe yebätä ye tä nemen “ancla” kitata mrente nguse, ye kwrere ni kräke ja tuata kukwe täre ben ye ngwane (Ñäkädre Salmo 31:7a; 136:1 yebätä).b Ja tare metre ye abokän ñaka nekä jire tä nuin kärekäre. Jehová ja tare metre bämikaka bäri kwin. Aisete kukwe nieta Éxodo 34: 6, 7 aune Salmo 86: 5 ye tä mike gare nie Jehová töi keta kabre kwin ngätäite, keteiti ye abokän niara tä “ja ngwen metre nie” ni tare kwe yebätä. ¡Aisete nitre niara mikaka täte ye ñaka mikaite kaibe jire kwe! Mäkwe kukwe ne ngwain törö jai ngwane mä täi dite ja tuakäre kukwe tare ben (Sal. 23:4).
Ancla ye köböire murie dite ye ñan tä barco ngwen ngrenkä, ye erere arato Jehovakwe ni tare yei nita tö ngwen kwatibe ngwane, ni täi dite kukwe tare ye näire. (Párrafo 3 mikadre ñärärä)
JEHOVAKWE NI TARE YE BIBLIA TÄ DRIERE
4. ¿Dreta kite nüke gare kena nie Bibliabätä? ¿Kukwe mada jene niedre nie ye ñobätä ni ñan kai ngäbiti?
4 Bibliabiti ni töita kite ngitiekä metre kukwe ruärebätä ye ngätäite Jehovata ni tarere metre ye tä nüke gare nie ye ta ni dimike ja tuakäre kukwe tare ben. Ancla kitata mrente nguse ru ketatekäre ye kwrere ja tare metre Jehovakwe täi ni ketete. Kukwe metre Bibliabätä tä kite nemen gare kena nie ye abokän Ngöbö kä Jehová, Jesús ye abokän monso mubai kwe, nitre krütanina ye töi ñaka niena, aune kä tibien kwitai bä nuäre bätä nitre nünain kärekäre te nieta Bibliakwe (Sal. 83:18; Ecl. 9:5; Juan 3:16; Apoc. 21:3, 4). Kukwe ne kwrere drieta mäi Bibliabiti bitikäre mä ñaka ngökata ye tä nemen tuin ja okwä jenebiti mäi ngwane, kukwe nebätä mä ñaka ja töi kwite mada. Ye erere arato mä tare metre Jehovakwe ye rabai tuin era mäi ngwane, kukwe tare ben mäta ja tuin ye Jehová ñan töibikaire nieta, ye ñan rabai era mä kräke. Ye medenbätä ari blite jankunu kukwe yebätä.
5. ¿Dre käkwe ni iti dimikani kukwe ngwarbe mikata tate kwe ye kitakäre tibien?
5 Mä jatani ja tötike kena Bibliabätä ye ngwane, ¿dre käkwe mä dimikani kukwe ngwarbe mika nämäne täte mäkwe ye kitakäre tibien? Dre dre nämäne iglesia mäkwe yete mä jatani kete kukwe drie nämäne Bibliabiti mäi yebätä raba ruin nunye. Jesús ye abokän Ngöbö arabe mä nämäne nütüre, akwa mä jatani ja tötike kwin Bibliabätä ye ngwane, kukwe ye nükani gare metre ta mäi. Kukwe ngwarbe drie nämäne käne mäi ye nükani gare mäi. Aisete mä kukwe ye tuanimetre aune Jesús ye abokän ‘Ngöbö odei mubai’ aune ‘niara ye sribebare kena jondron jökrä ye känenkri’ ye mäkwe kani ngäbiti (Col. 1:15; Juan 3:18). Kukwe ngwarbe mika nämäne täte nikwe ye abokän jondron dite ñan nuäre dikantekäre ye kwrere akwa raba nemen bare nie (2 Cor. 10:4, 5). Kukwe ngwarbe ni tärä mike mentongwäre ye ngwane ni ñaka tä denta ja käne jire (Filip. 3:13).
6. ¿“Ja tare metre Jehovakwe ye tä nuin kärekäre” ye ñobätä Salmo 136 tä kädekate bä kabre?
6 Kukwe tare ben mäta ja tuin yebätä Jehová ñan mä tarere ruin mäi ngwane, nünenkä chi aune töbiketari kukwe yebätä. Biti dreta mä töite ye mäkwe keta dre nieta Bibliakwe yebätä. Dreta mä ngwen töbike ye mäkwe keta ja tare metre Jehovakwe drieta Bibliakwe tä Salmo 136:1 kukwe ja tötikara nebätä yekänti. Mä kukwe ne ngwantari jai: ¿Ñobätä ja tare Jehovakwe ye “metre” nieta Salmos yete? ¿Aune ñobätä salmo ye arabe känti “ja tare metre Jehovakwe ye tä nuin kärekäre” ye kädekateta 26 näre? Aisete kukwe metre Bibliabätä nükani gare kena mäi ye mä dimikani, ye kwrere arato ja tare metre Jehovakwe ye mä dimikai. Ye köböire Jehová töi ñaka mäbätä nieta mäi ye mä ñan mikai era jai aune mä ñaka kai ngäbiti mä ñan tä kukwe ngwarbe kai ngäbiti ye erere.
7. ¿Jehovakwe ni tare ye texto meden meden tä mike gare?
7 Ni tare Jehovakwe texto keta kabre Bibliabätä ye tä mike gare. Akwa ketebubätä ani blite. Jesukwe niebare nitre ja tötikaka kwe ie: “Mun bäri ütiäte nukwä kia kabre ye kräke” (Mat. 10:31). Ñan kukwe ne niebare kwe: “Mun abokän ütiäte kri nukwä kabre bitita ruin tie”. Jehová ara käkwe kukwe ne niebare juta kwe ie: “Tikwe mä mikai dite. Jän, tikwe mä dimikai. Ti küde ruinkri kukwe metre nuainkäre yebiti tikwe mä ketaite dime” (Is. 41:10). Niara ñan niebare: “Tikwe mun dimikai Raba ruin tie”. Texto ketebu ne ñan tä ruin tie niere, aune ñan tä kukwe mike gare jerekäbe, ñakare aune kukwe ye nuaindi kwe aune rabai bare käbämikata kwe. Aisete kukwe tare ben mäta ja tuin ngwane mäkwe töbikatari bersikulo nebätä ye ngwane, ja ñan rabai ruin jäme jerekäbe mäi, ñakare aune Jehová tä mä tarere ye jutuai metre mäi. Töbiketari kukwe yebätä aune dreta mä ngwen töbike ye niere Jehovai. Mäkwe nuaindi ye erere ngwane, nitre kristiano siklo kena käkwe niebare erere nikwe nie: “Ngöbökwe ni tare ye namani gare nie bätä nikwe mikani era jai” (1 Juan 4:16).c
8. ¿Jehovakwe ni tare ye täbe tuin ngwarbe nie ye ngwane, dre nuaindre?
8 ¿Nane Jehová ñan tä mä tarere ye täbe nüke mä töite ngwane, ¿mä raba dre nuainne? Dreta nüke mä töite ye mäkwe keta dre namanina gare mäi yebätä. Jehová ñan mä tarere ruin mäi yebiti ta mä tare kwe ye tädre gare metre mäi, ñobätä ñan aune Biblia ñaka ni ngökö, kukwe ngwarbe nüke ni töite ye ie mäkwe ñaka ja ngökamana. Aune Biblia ye tä kukwe metre niere ye ngwen törö jai, kukwe jene nüke ni töite. Akwa Jehovakwe ni tare ñobätä ñan aune ja tare ye kite niarakri (1 Juan 4:8).
“JEHOVÁ ARA JIRE” TÄ NI TARERE YEBÄTÄ TÖBIKADRETARI
9, 10. ¿Jesukwe niebare “ti Rün ara tä mun tarere” ye ngwane, drebätä nämäne blite? (Juan 16:26, 27; üai mikadre ñärärä).
9 Jesukwe kukwe mada niebare känti ni tare Jehovakwe tä nemen gare nie ye abokän: “Ti Rün ara jire käta mun tarere” niebare kwe nitre ja tötikaka kwe ie. Yebätä töbikadretari (Ñäkädre Juan 16:26, 27 yebätä). ¿Ñobätä ye niebare kwe ie? ¿Jerekäbe niara töi nämä nitre ja tötikaka kwe ye töi mikai jäme ya? Nämäne blite kukwe madabätä. Ja nämä ruin ño nitre ja tötikaka kwe ie yebätä ñan nämä blite, ñakare aune kukwe bäri ütiätebätä ye abokän orasion.
10 Kä nikani chitani tä ye ngwane Jesukwe niebare nitre ja tötikaka kwe ie rabadre orare Jehovai niara käbiti akwa ñan oramana kwe jai ietre (Juan 16:23, 24). ¿Ñobätä kukwe niebare kwe ye nämäne ütiäte kräketre? Ñobätä ñan aune Jesús ganinkröta aune nämänentre ja kete kwin ben yebätä nane niaratre töi rabai nemen orare ie. Ye bitikäre mikadre gare kwe Rün kwe ie akwa ye erere ñan rabai bare ye Jesukwe mikani gare metre ta ietre. Ñobätä ñan aune niebare kwe ietre “ti Rün ara jire kätä mun tarere”. Erametre Jehová tä ni tarere bokän yebätä niara ara käkwe orasion nikwe kukwe nuai aune kukwe metre ne Biblia ara tä mike gare nie. Ñobätä mäkwe töbikadre kukwe nebätä. Ñobätä ñan aune mä jatani ja tötike Bibliabätä ye ngwane, Jesús namani gare mäi aune namani tare mäkwe (Juan 14:21). Akwa nitre kristiano siklo kena ye erere mäkwe orasion nuaindi ye ngwane Jehovakwe mä tare aune niara ara käkwe orasion mäkwe kukwe nuai ye tädre gare metre mäi. Köbö kwatire kwatire mä täi orare niarai ngwane “ni Rün kä kwinbiti” tä mä tarere ye ie mäta tödeke ye bämikai mäkwe (1 Juan 5:14).
Mä raba orare töi kwatibebiti Jehovai, ñobätä ñan aune ni “Rün” kä kwinbiti tä ni tarere (Párrafo 9 aune 10 mikadre ñärärä)e
KUKWE NGWARBE TÄ NI MIKE TÖBIKE KITE MEDENKRI YE MIKE GARE JAI
11. ¿Jehová ñan ni tarere ruin nie ye ñobätä tä kä mike juto Satanabätä?
11 ¿Jehovakwe ni ñan tare ye ñobätä nututa? Satana ye köböire ni ñan tare Jehovakwe nita nemen nütüre, ye metre. Ñobätä ñan aune Satana tä “ni känene juankäre ngwarbe” aune nikwe töbikadre kore ye ie niara tö (1 Ped. 5:8). Akwa Jehovakwe ni kökanintari ni tare kwe yebätä akwa nikwe ñaka kukwe ye mikadre era jai yei Satana tö (Heb. 2:9). Jehovakwe ni ñan tare nütüta ye ngwane, ¿nirebätä kä mikata juto? Satana ara. Ni di riaikä aune ni ñan rabaira sribire Jehová kräke ye ngwane, ¿nirebätä kä ngwain juto? Satana arabätä. ¡Jehováñan niena Satana tarere yebätä niara tö ni tuai töbike ja erere! (Efes. 6:11). Ni rüe Satana töita ño ni kräke ye nita gai jabätä ngwane, nita ja di ngwen ñan ja mikakäre kö okwä kwe yete aune ja mike dite niara rüere (Sant. 4:7).
12, 13. ¿Jehovakwe ni tare akwa ni ngite yebätä nita nemen töbike ño?
12 Jehová ñan ni tarere ye ni raba kite nütüre Satana koboite akwa kukwe mada köböite arato, ni därebare ngite yebätä (Sal. 51:5; Rom. 5:12). Arato ni därebare ngite ye köböite ni ñaka raba ja kete Jehovabe kena ye erere yebätä, ja ñan nemen ruin kwin nie, ni ñan nemen töbike kwin aune nita nemen bren ngrabare.
13 Ni ngite yebätä nita ja tuin kukwe keta kabre blo ben. Ñodre, jata nemen ruin ngite nie, nita nemen ja töibikaire krubäte, kä jürä tä nemen nibätä aune nita nemen ja gaire. Kukwe ninina ne tä nemen bare nibätä nita ja mike ngite ngwane. Ne madakäre, ni nierare ngite aune Jehovakwe ni sribebare ño ye ererebätä ni ñaka ja ngwen gare nie yebätä ni töita nemen kore arato (Rom. 8:20, 21). Ni ngite ye abokän karo ye kwrere llanta tä nike ngwarbe ye ngwane: ñaka raba sribire kwin. Aisete ni dätebare ño ye erere ni ñan ja ngwen ye arabebätä ni ñan tare Jehovakwe ye nita nemen nütüre. Akwa jata nemen ruin ye kwrere nie ye ngwane, Jehová ye abokän Ngöbö dite, nire tä niara mike täte bätä tarere ye ie niara tä ja tare metre bämike kukwe ye nikwe ngwandre törö jai (Neh. 1:5).
14. ¿Ni ñan tare Jehovakwe nütüta nemen ye ngwane, ni kökanintari ye raba ni dimike ño? (Romanos 5:8; aune recuadro “Ja ngübadrebiti ne kwe ñaka ja ngökamana kukwe käme ye ie” ye mikadre ñärärä).
14 Ruäre ngwane ni raba nemen nütüre, bäri kwin ni ñan tädre tare Jehovakwe. Kukwe ye erere bäkänä akwa ye medenbätä ni bäri tare Jehovakwe. Ñobätä ñan aune ni ñaka raba jondron mada nuainne ja tare Jehovakwe ye ganainkäre. Akwa yebiti ta ni tare kwe ye medenbätä, monso kwe juani kwe ni kökatarikäre ngite yebätä (1 Juan 4:10). Ne madakäre Jesús ñan jatani kä tibienbätä nitretöi metre ye kökatarikäre, ñakare aune nitretöi ngite ye nikwe ngwandre törö jai (Ñäkädre Romanos 5:8 yebätä). Nikwe kukwe nuaindre metre jökrä ye Jehová ñaka ngübare nibätä, ñobätä ñan aune ni ngite yebätä ñan rabai nuäre ni kräke gare ie yebätä. Ni ñan tare Jehovakwe ye ni raba nemen nütüre ni därebare ngite ye köböire, akwa kukwe ne mikadre nüke gare jai ye käkwe ni dimikai ja di ngwen jankunu ja tuakäre ni töita nemen ye kwrere ben ye ngwane (Rom. 7:24, 25).
NIKWE JA TÖI MIKADRE JA NGWEN METRE
15, 16. Nita ja ngwen metre Jehovai ye ngwane, ¿dre tädre gare metre nie aune ñobätä? (2 Samuel 22:26).
15 Jehová tö ni tuai kukwe kwin den jai aune ancla ye kwrere ja ketete dime niarabätä kukwe tare ye näire (Deut. 30:19, 20). Aune niarakwe ñaka ni mikaite kaibe kukwe ño ñobiti ta (Ñäkädre 2 Samuel 22:26 yebätä).d
16 Jehovakwe ni tare aune tä juto biare ni dimikakäre kukwe tare näire ye nikwe ngwandre törö jai ye käkwe ni mikai dite ancla kitata mrente ru ketabätäkäre ye kwrere. Nibira gare nie Jehovakwe ni tare ye ñan raba nemen era ni kräke ngwane kukwe metre gare nie niarabätä ye nikwe ñaka käi kwitadrekä jabiti ja ruin ño nie yebätä. Jehová tä ni tarere metre ye tä nuin kärekäre Biblia tä niere ye nikwe ñaka käi kwitadrekä jabiti.
KANTIKO 159 Jehová käikitadrekä
a Salmos 31:7: “Ja tare metre mäkwe käkwe kä mikai juto krubäte tibätä, ñobätä ñan aune tita ja tare nike ye jutuen mäi, kukweta ti mike ja töbikaire krubäte ye gare mai”.
b Salmos 136:1: “Munkwe debe bian Jehovai, ñobätä ñan aune niara ye töi kwin; ja tare metre Jehovakwe ye tä nuin kärekäre”.
c Kukwe mada tä mikani Deuteronomio 31:8, Salmo 94:14 aune Isaías 49:15 yebätä.
d 2 Samuel 22:26: “Ni ja ngwen metre yebe mäta ja ngwen metre; ni ñaka ja mike ngite, ye mäta mike tuin jai ni ñaka ja mike ngite ye erere”.
e KUKWE MIKATA GARE ÜAIBÄTÄ: Eteba iti tä orare muko kwe ye kräke arato dre nuaindi ngwian yebätä aune ngängän kwe ye rabadre Jehová tarere yebätä tä orare.