KUKWE JA TÖTIKARA 42
¿Ni kaibe aune ja mäkäte yebätä Biblia tä dre niere?
Kä rabadre juto nibätä yekäre ja mäkädrete ye nitre ruäre tä nütüre. Akwa ni kaibe aune ni ja mäkäninte ye ñan jökräbätä kä juto. Bibliata niere, ni kaibe aune ja mäkäte ye regalo biani Jehovakwe.
1. ¿Kukwe meden kwin tä ni kaibe kräke?
Nita ja mäkete ye tä kwin nuainne akwa nirekwe ñaka nuaindi ye bäri kwin nieta Bibliakwe (mäkwe ñäkä 1 Corintios 7:32, 33, 38 yebätä). ¿Ni iti ñan ja mäkäite ye rabai bäri kwin nieta ye dre gärätä? Ye abokän ni kaibe ye muko tä kwin o ñakare ye ñan tä töibikaire ie. Aisete, käta bäri ngwarbe ie. Ruäre raba sribire bäri Jehová kräke ñodre, niken kä madakänti kukwe driere. Aune nitre kaibe raba kä denkä bäri jai ja ketakäre bäri kwin Jehovabe.
2. ¿Kukwe meden kwin tä ni ja mäkäninte kräke?
Kukwe kwin tä ni kaibe kräke ye erere arato, kukwe kwin tärä ni ja mäkäninte kräke. Bibliata niere: “ni nibu ye bäri kwin ni itibe ye kräke” (Eclesiastés 4:9). Nitre ja mäkäninte tä ja jie ngwamana Biblia ie ngwane, kukwe ye tä nemen bare. Ni ja mäkäninte metre ye ja taredi, ja mikai ütiäte, aune ja ngübai, tätre käbämike jai. Ye medenbätä, ja ruin bäri kriemikani ietre nitre ñan tä ja mäkäninte metre tä jabe ye kräke. Ne madakäre, ni ja mäkäninte metre ngätäite monso tä kite nirien ye ie jata nemen ruin kriemikani.
3. ¿Ja mäkäteta yebätä Jehová töita ño?
Jehovakwe nitre mäkäninte kena ngwane, niebare kwe: “ni brare käkwe kämikadrekä rün aune meyebätä” aune “rabadre ni itibe kwrere” (Génesis 2:24). Ni ja mäkäninte tä nire ngwane, rabadre ja tarere aune tädre käre jabe ie Jehová tö. Ni ja mäkäninte metre tä ja mike ngite ni madabe ngwane, aibe köböite raba ja tuenmetre nieta kwe. Ye erere ngwane, ni brare o meri ñan ja mike ngite ye tö muko tuainmetre o ñakare ye Ngöböta tuenmetre kisete (Mateo 19:9).a Ni kristiano tädre ja mäkäninte ni nibu ben ye Ngöbö ñan kai ngäbiti jire (1 Timoteo 3:2).
JA TÖTIKE BÄRI NGUSETA
Mä kaibe o mä ja mäkäninte, mä raba dre nuainne kä ngwankäre juto jabätä aune Jehovabätä ye ani mike gare jai.
4. Mäta kaibe yebiti kukwe kwin nuainne
Ni tädre kaibe ye nämäne tuin Jesús ie regalo ye kwrere (Mateo 19:11, 12). Ñäkädre Mateo 4:23 yebätä aune kukwe ne kädriedre jabe:
¿Jesús nämäne kaibe yebiti dre nuainbare kwe sribikäre Rün kwe kräke aune nitre mada dimikakäre?
Jesukwe sribibare ye erere ni kristiano kaibe käkwe ja töi mikai sribire ngwane, raba nüne kä jutobiti. VIDEO mikadre ñärärä, biti kukwe ne kädriedre jabe:
¿Ni kristiano tä kaibe yebiti raba sribire ño kwin?
¿Ne gare mäi?
Kä rabadre nuäi nibiti ngwane, ja mäkädrete ye Biblia ñan tä niere. Akwa, nita bati aune la flor de la juventud ye käi tärä niken ta ngwane, ja mäkädrete ye nieta kwe, ñobätä ñan aune ni tö rababätä krubäte ni madabe ye raba ni mike ñan töbike kwin kukwe diankäre nuaindre jai (1 Corintios 7:36).
5. Mä ja muko kwin känä
Nirebe mäkwe ja mäkäite ye kukwe keteiti bäri ütiäte tä diandre nuaindre jai mäi. Ñäkädre Mateo 19:4-6, 9 yebätä aune kukwe ne kädriedre jabe:
¿Ni kristiano jämi ja mäkete känenkri ñobätä rabadre töbike kwin käne?
Ni kwin ja mukore ye abokän tä ja töi meden meden kwin bämike ye Biblia raba mä dimike mike gare jai. Kukwe jökräbiti ta, ni Jehová tarekä ye mäkwe känä ja mukore.b Ñäkädre 1 Corintios 7:39 aune 2 Corintios 6:14 yebätä aune kukwe ne kädriedre jabe:
Ni kristiano metre tö ja mäkäite ngwane, ¿ñobätä rabadre ja mäkete ni kukwe metrebätä aibe ben?
Ni ñan Jehová tarere ben mä ja mäkäite ngwane, ¿ja rabai ruin ño Jehovai raba ruin mäi?
Jondron nire krobu ñan ja erebe mäkätä yugo arabebätä ngwane, krobu tä ja tare nike. Ye erere, ni kristiano käkwe ja mäkäite ni ñan Jehová tarere ben ngwane, ja tuadi kukwe kri ben kwe.
6. Ja mäkäte tuin ño Jehovai ye erere mike tuin jai
Kira nitre israelita näire, nitre ruäre nämäne ja tuenmetre kukwe ngwarbebätä. Ñäkädre Malaquías 2:13, 14, 16 yebätä aune kukwe ne kädriedre jabe:
¿Ñobätä Jehová brukwä ja tuanmetreta kukwe ngwarbebätä ye kräke?
Ni ja mäkäninte metre ye iti tä ja mike ngite ni madabe aune ja tuanmetreta, ye tä kukwe tare mike bare monsobätä aune ni ñan ja mike ngite yebätä.
VIDEO mikadre ñärärä, biti kukwe ne kädriedre jabe:
Ni ñan kukwebätä ben mäta ja mäkäninte ngwane, ¿mä raba dre nuainne, ne kwe kä tädre juto munbätä?
7. Kukwe nieta Jehovakwe ja mäkätebätä ye mike täte
Kukwe nieta Jehovakwe ja mäkäte yebätä ye nitre ruäre kräke ñan raba nemen nuäre mikakäre täte.c Akwa nireta ja di ngwen mikakäre täte ye kräke tä kukwe kwin mike bare. VIDEO mikadre ñärärä.
Ñäkädre Hebreos 13:4 yebätä aune kukwe ne kädriedre jabe:
¿Kukwe nieta Jehovakwe ja mäkätebätä ye kwin raba ruin mäi? ¿Ñobätä mäta töbike kore?
Ni kristiano tä ja mäkete o ja tuenmetre ye jökrä rabadre tike täräbätä registrare ngübata Jehovakwe, ñobätä ñan aune bäsi kä jökrä känti gobrantre tä kukwe ye ribere. Ñäkädre Tito 3:1 yebätä aune kukwe ne kädriedre jabe:
Mäta ja mäkäninte ngwane, ¿ye tä ükaninte kwin lei ngwärekri?
NITRE RUARE TA KUKWE NE NGWENTARI: “Drekäre ja mäkädrete? Tikadre täräbätä ribeta?”.
Mä raba dre niere kukwe yebätä?
¿DRE NIBI GARE MÄI?
Ni kaibe aune ja mäkäte ye biani regalore Jehovakwe. Ni kaibe o ni ja mäkäninte, akwa kukwe ükaninte Ngöbökwe ye ererebätä nünanta ngwane, nüna raba kä jutobiti.
Ngwankäreta törö
¿Ni iti tä kaibe ye köböire raba dre nuainne bäri kwin?
¿Ñobätä ni kristiano rabadre ja mäkete ni kukwebätä aibe ben nieta Bibliakwe?
¿Kukwe meden aibebätä ja tuanmetre raba nieta Bibliakwe?
KUKWE MIKE GARE BÄRI JAI
¿Ja mäkädrete “ni kukwebätä” aibe ben nieta ye dre gärätä?
Kukwe ketamä mikata gare noviazgo yebätä aune ja mäkäte yebätä abokän raba mä dimike kukwe kwin den nuaindre jai ye mike gare jai.
Kukwe namani ja mräkä iti ie abokän kräke Jehovakwe kukwe bäri kwin biani ie, ñobätä gare metre ie ye mike gare jai.
Ni kristiano tö ja tuainmetre o ja diankabätä mento ngwane, ¿rabadre töbike drebätä?
“Ngöbökwe ni mikani ni itibe kwrere” ye nikwe mikadre ütiäte jai (Ni Mikaka Mokre, diciembre 2018)
a Nota 4 yete kukwe kwain mäi ja diankata mento yebätä (ni ja mäkäninte ye iti ñan nemen ni madabe ngwane).
b Kä ruäre känti, nitre rüne tä duana o bosi känene akwle ngäbäkre kwe kräke. Duana o bosi ye Jehová tarekä ye nitre rüne töbikaka kwin tä mike gare käne jai. Niaratre kräke kukwe ne bäri ütiäte ni ngwian bökäne ya o ni ütiäte ya ye kräke.
c Mäta nüne ni iti ben akwa mä ñan ja mäkäninte metre ben ngwane, mäkwe ni ye tuainmetre o ñakare ye tä gare mäi.