Mäkwe monsotre mäkwe dimika sribikäre Ngöbökrä
1. Kukwe nieta Salmo 148:12, 13 yebätä, ¿ye tä nitre rüne töimike dre nuainne?
1 Jehová tä monsotre kia nübaire niara käikitekä (Sal. 148:12, 13). Erametre, nitre rüne kristiano tä kukwe Bibliabätä driere monsotre kwe yei aune dre tuin kwin Ngöböi o dre tuin käme ie ye driere ietre arato. Akwa rabadre arato tötike ne kwe rabadre sribire Ngöbökräke. ¿Nuaindre ño kwetre?
2. ¿Ni rüne tä kukwe bämike ye raba mate ño monsotre kwe yebätä?
2 Kukwe kwin bämikadre käne. Nitre 300 ie Gedeonkwe niebare: ‘Tita dre nuainne ye munkwe mika ñärärä aune ye erere munkwe nuain’ (Jue. 7:17). Ye erere arato, ni rüne tä ja ngwen ño ye erere monsotre kwe tätre nuainne. Ja mräkä iti abokän tä sribire deu nükebe dekä; sabadote dekä tä nüketa gwi ye ngwane tä nemen nainte krubäte, akwa yebiti ta tä niken monsotre kwe yebe kukwe driere. Kukwe yebiti tä mike gare monsotre kwe yei sribi Ngöbökwe ye mikadre bäri käne (Mat. 6:33). ¿Monsotre mäkwe ye okwäbiti mätä sribi Ngöbökwe nuainne kä jutobiti? ¿Tätre mä tuin orare, ñäke Bibliabätä, blite gätäte bätä kukwe driere? Ni rüne ngite yebätä ñan raba ja ngwen metre monso kwe ye okwäbiti, akwa niaratre tätre kukwe kwin bämike monso kwe ye okwäbiti Jehová käikitakakäre, ye ngwane monsotre raba kukwe Ngöbökwe ye kain ngäbiti (Deu. 6:6, 7; Rom. 2:21, 22).
3. ¿Nitre rüne raba sribi meden mike monsotre kwe ye käne aune dre nuaindre kwetre dimikakäre?
3 Kukwe mikadre nuainkäre ie. Monsotre kia tä kite nirien angwane rün kwe tä dimike ne kwe rabadre dikekä, blite o ja ngwäkite akwle. Tä kite jondron ruäre nuainne kaibe angwane, ni rüne tä kukwe mada mike käne nuainkäre ietre. Nitre rüne kristiano tätre monsotre kwe dimike, ne kwe rabadre sribi Ngöbökwe ye den ja käne, akwa kä nuäibiti bätä kukwe meden gare ietre ye ererebätä tätre nuainne (1 Cor. 9:26). Kukwe kädriekäre Kwela Sribi Ngöbökwe Kräke bätä kukwe nüke gare ietre ye ererebätä blitadre gätäte kwetre, ¿ye mätä driere ietre ne kwe rabadre nuainne kaibe? (Sal. 35:18.) ¿Mätä kite sribi Ngöbökwe jene jene nuainkäre? ¿Mätä niaratre töimike ja ngökakäre ñöte bätä sribikäre köbö täte Ngöbökräke? ¿Mätä dre nuainne ne kwe monsotre mäkwe rabadre ja kete nitre sribi Ngöbökwe nuainkä kä jutobiti yebe? (Pro. 13:20.)
4. Monsotre tädre chi aune rün kätä dimike sribi Ngöbökwe ye nuainne ye köböire ¿dre kwin raba nemen kwetre?
4 Salmista käkwe niebare: ‘Ngöbö tikwe, ti nämene bati nükebe kä nengwane mätä ti tötike aune ti täbe blite kukwe kwin mäkwe yebätä’ (Sal. 71:17). Monso mäkwe tädre chi angwane, mäkwe dimika ne kwe rabadre sribi Ngöbökwe ye nuainne. Mäkwe kukwe Ngöbökwe driei ietre angwane ye käkwe niaratre kriemikai jatadre ünän ye ngwane (Pro. 22:6).