Kä krüte näire reitre nibu tä ja rüere

Profecía kädrieta nete ye ruäre rakadrekä ja näirebe. Kukwe ye jökrä tä mike gare nita nüne “kä krüte näire” (Dan. 12:4).

Esquema tä profecía mike gare aune tä rei ngwitärikri bätä rei mötörikri mike gare kä 1870 nükebe ni näire.

Texto Bibliabätä: Apoc. 11:7; 12:13, 17; 13:1-8, 12.

Profecía: Jondron nire bä käme ye tä nitre kä tibienbätä gobraine kä kwati krubäte te. Kä krüte näire jondron nire ye dokwä kwä kükükäre nuainbare tare. Akwa biti dokwä ye namaninta räre aune nitre jökrä nikani jondron nire ye jiebiti. Jondron nire bä käme yebiti Satana tä rüre meri “bkün mda mda rüere”.

Tä nemen bare: Ñü Kri ye bitikäre gobrantre keta kabre jatani gobrane aune jatanintre ja mike Jehová rüere. Kä nikani kwati krubäte ta ye bitikäre, juta dite Gran Bretaña ye di nianinkä rübare kri kena ye näire. Akwa Estados Unidos ja mikani kiri ngwane namaninta dite. Kä krüte näire Satana tä gobrantre käbiti tibien yebiti näin kisere juta Ngöbökwe jiebiti.
Texto Bibliabätä: Dan. 11:25-45.

Profecía: Rei ngwitärikri aune rei mötörikri käkwe rüdi jabe kwärikwäri rabakäre bäri dite.

Namani bare: Alemania rübare Gran Bretaña aune Estados Unidos ye rüere. Kä 1945 yete Unión Soviética aune juta ja ketaka ben ye namani rei ngwitärikri. Kä 1991 yete Unión Soviética ye nikani timo. Ye bitikäre Rusia aune juta ja ketaka ben ye namani rei ngwitärikri.
Texto Bibliabätä: Is. 61:1; Mal. 3:1; Luc. 4:18.

Profecía: Jehovakwe ni niara “kukwei ngwanka” juani ji ükatekäre Mesías gobrandi ye käne. Nitre Jehová “kukwei ngwanka” ye jatani kukwe kwin driere nitre töi jäme ie.

Namani bare: Kä 1870 yete ja käne Charles Russell aune nitre sribikä ben jatani ja tötike Bibliabätä kukwe metre mikakäre gare jai. Ni Ngöbö mikaka täte rabadre kukwe driere ye ütiäte krubäte namani gare ietre kä 1881 yete. Aisete kukwe ne erere tikani kwetre aune döräibare kwetre: “Nitre mil ribeta kukwe driekäre” aune “Ni dianinkä üai demebiti kukwe driekäre”.
Texto Bibliabätä: Mat. 13:24-30, 36-43.

Profecía: Ni iti käkwe trigo nurai nökani tirete. Akwa ni ja mikaka niara rüere käkwe nura käme nökani te. Nura käme ririabare aune trigo nikani känse. Trigo ngwä öta näire trigo dianinkä mento nura käme yebätä.

Namani bare: Kä 1870 yete ja käne nire kristiano metre aune nire kristiano ngwarbe namani gare bäri mrebe. Kä krüte näire nitre kristiano metre ükaninkrö konkrekasionte aune dianinkä jenena nitre kristiano ngwarbe yebätä.
Texto Bibliabätä: Dan. 2:31-33, 41-43.

Profecía: Ni üai kri sribebare jondron bätäkäbiti ye ngoto hierrore aune dobore.

Tä nemen bare: Dobro ngätä ye abokän nitre gobrainta Gran Bretaña aune Estados Unidos yekwe abokän tä nikwite gobrantre ye rüere. Ye köböite gobrantre ye ñaka raba gobrane ja di tätebiti nitre yebiti hierro ribi ye kwrere.
Texto Bibliabätä: Mat. 13:30; 24:14, 45, TNM; 28:19, 20.

Profecía: “Trigo ngwä” ötani aune ükaninkrö “ju nura ngwä ükakrä” yete aune “ni klabore ie tö ngwan raba bätä töbätä” ye kädekani “nitre gwi” ngübabitikäre. “Kukwe kwin Gobran Ngöbökwe yebätä” ye drie jatani “kä jökräbiti tibien”.

Namani bare: Kä 1919 yete ni klabore ie tö ngwanta ye kädekani juta Ngöbökwe ngübabitikäre. Yete ja käne ja mräkätre jatani kukwe driere bäri. Kä nengwane, nitre testiko Jehovakwe tä kukwe driere juta 200 biti bäri yete aune tä kukwe Bibliabätä döräire kukwe 1000 jene jenebiti bäri.
Texto Bibliabätä: Dan. 12:11; Apoc. 13:11, 14, 15.

Profecía: Jondron nire bä käme krotu krobu käkwe jondron nire bä käme mada ye üai sribe mananbare kwe aune ja nire biani kwe ie.

Namani bare: Juta dite Gran Bretaña aune Estados Unidos käkwe Sociedad de Naciones ye ükate mananbare. Juta mada mada käkwe dimikani kukwe yebätä. Kä 1926 nükebe kä 1933 rei ngwitärikri ja mikani siba Sociedad de Naciones yete. Sociedad de Naciones raba ni mike nüne jäme nitre namani nütüre. Ye erere nitre tä nütüre Naciones Unidas (ONU) yebätä kä nengwane, akwa Gobran Ngöbökwe aibe raba ni mike nüne jäme.
Texto Bibliabätä: Dan. 8:23, 24.

Profecía: Rei iti rubun krubäte käkwe jondron keta kabre gaite.

Namani bare: Juta dite Gran Bretaña aune Estados Unidos nitre kwati murie ketanina aune jondron keta kabre juanina ngwarbe kwetre. Ñodre, rübare kri bobukäre ye ngwane Estados Unidos käkwe bomba atómica kitani kubu juta keteiti ja mikani rüere yekänti.
Texto Bibliabätä: Dan. 11:31; Apoc. 17:3, 7-11.

Profecía: Jondron nire käme “bä tain” krotu kräjätä jatadre kä mrebiti kä timo yekri aune rabadre rei ni kwäkäre erere. Tärä Daniel tä rei ye kädeke “jondron bä käme aune jondron mada gatekä”.

Namani bare: Rübare kri bobukäre ye ngwane Sociedad de Naciones ye juani tibien. Rü ye bitikäre ONU ye ükaninte. Sociedad de Naciones mikani ütiäte Gobran Ngöbökwe yebiti ta ye erere ONU mikata ütiäte jai. ONU käkwe rü gaikä iglesia ngwarbe ngwarbe ye rüere.
Texto Bibliabätä: 1 Tes. 5:3, TNM; Apoc. 17:16.

Profecía: “Kä titibe aune kukwe blo ñaka” ye juta käbiti tibien käkwe niedi, ye bitikäre “krotu krä jätä” aune jondron nire bä käme käkwe rü gaikä “meri bti kä ngwarbe” ye rüere gatekäre. Mrä mada juta jökrä ye gaite.

Rabai bare: Nüna rabaira jäme kä tibienbätä ye juta jökrä rabai niere. Biti, juta tä ONU yekri käkwe iglesia ngwarbe ye jökrä gaite. Yebiti ja tare nika kri ye kömikai aune gobrantre jökrä gaite Armagedón ye ngwane mikai krüte.
Texto Bibliabätä: Ezeq. 38:11, 14-17; Mat. 24:31.

Profecía: Gog rükai nitre Ngöbö mikaka täte ye käite. Ye bitikäre, nitre dianinkä üai demebiti ye angeletre käkwe ükaikrö.

Rabai bare: Rei ngwitärikri aune gobrantre mada kä tibienbätä käkwe rü gaikä juta Ngöbökwe rüere. Rü gaikä ye bätäräbe nitre dianinkä üai demebiti täi kä tibienbätä ye ükaikrö kä kwinbiti.
Texto Bibliabätä: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

Profecía: Ni nänkä mädä ngwenbiti käkwe Gog aune nitre rükä kwe ye gaite ngwane rüe ganaindi kwe. Jondron nire bä käme ye kitai ñukwä jutra okwä kri te aune ni üai kri sribebare ye mrükaite burere.

Rabai bare: Jesús rei Gobran Ngöbökwe rüdi juta Jehovakwe dokwäre. Nitre 144,000 aune angeletre yebe juta jökrä ja ükaninkrö ye gaite kwe. Satana tä gobrane ye mikai krüte kore.