Kukwe tare näire ni töi raba nemen ño jäme

1. ¿“Kä jäme Ngöbökwe” ye abokon dre aune köböire dre kwin tä nemen nikwe? (Filipenses 4:6, 7).

KÄ JÄME keteiti ye ñan gare nitre kä nebätä ie ye abokän, “kä jäme Ngöbökwe”. Nitre tä ja kete kwin Jehovabe ye töita jäme. Kä jäme Ngöbökwe tä nemen nikwe ngwane, jata nemen ruin kwin nie (ñäkädre Filipenses 4:6, 7 yebätä). Nire tä Jehová tarere yebe ni raba ja kete aune Ngöbö kä jäme bäkänkä yebe nita ja kete ye rabai bäri dite (1 Tes. 5:23). Nita Jehová mike gare jai, tö ngwen ie aune kukwei mike täte ngwane kä jäme ye tä nemen nikwe. Kä jäme ye tä ni töi mike jäme nita ja tuin kukwe tare ben ngwane.

2. ¿Kä jäme Ngöbökwe ye raba nemen nikwe ye ñobätä gare metre nie?

² ¿Kä jäme ngöbökwe ye raba nemen nikwe nita ja tuin kukwe tare ben ngwane? Ni töi raba nemen jäme bren tare tä nakainkä, kukweta nemen bare jötrö ngwarbe, nitre tä ngedain jabätä, ¿o ja mikata ni rüere ngwane? Kukwe ye jüräta nemen ni jökräbätä. Akwa Jesukwe ne niebare nitre ja tötikaka kwe ie: “Munkwe ñan kä jürä ngwian jabtä” (Juan 14:27). Kukwe niebare Jesukwe ne ja mräkätre kwati käkwe nuainbarera. Niaratre ja tuani kukwe tare ben ngwane, Jehová diebiti töi namani jäme.

BREN TARE TÄ NAKAINKÄ NGWANE, KÄ JÄME RABA NEMEN NIKWE

3. ¿Pandemia o epidemia ye raba kä jäme denkä ño nikän?

³ Pandemia o epidemia tä nemen bare ngwane, ni ñan tä nemen nüne käne erere. Pandemia COVID-19 ye köböite dre namani bare nitrebätä yebätä ani töbike. Encuesta nuainbare yete, pandemia ne näire ye köböite nitre ñan namani ja düke kwin ye nitre kwati käkwe mikani gare. Nitre nemen ja töibikaire krubäte une ulire dikarä (depresión),arato dö ña, droga dua, ni ja mräkäre ja nuainne tare aune ja krärä ketata akwle ye ririabare bäri jire pandemia nete. Bren tare nakaninkä mä käite ngwane, ¿mä raba dre nuainne ñan ja töibikakäre krubäte aune kä jäme Ngöbökwe rabadre mäkwe yekäre?

4. Kä krüte yebätä Jesukwe profecía niebare, ye tä nemen gare nie ¿ye ñobätä tä ni töi mike jäme?

⁴ Epidemia rakaikä “kä ketare ketare känti” mikani gare Jesukwe (Luc. 21:11). Kukwe ne gare nie tä ni töi mike jäme. ¿Ñobätä? Ñobätä ñan aune, kukwe ye rakaikä gare nie aune ye ñan tä ni töi mike niä. Kukwe ye rabai bare ño niebare Jesukwe ye erere nemen bare tuin nie. Ye medenbätä, nitre nünanka kä krüte näire kräke kukwe ne niebare ye nita mike täte. Niebare kwe: “Mun ñan rekwetaka” (Mat. 24:6).

5. a) Filipenses 4:8, 9 tä niere erere, ¿bren tare rakadrekä ngwane, nikwe dre ribedre Jehovai? b) ¿Grabación tä Bibliabätä kukwe nuadre ye tä ni dimike ño?

⁵ Bren tare tä nakainkä ngwane, nita nemen ja töibikare krubäte aune nita nemen nikenkä. Kukwe ye namani bare meri testiko kädekata Desibätä.b Grü, ngwaikrä aune doctor kwe krütani bren COVID-19 köböite ngwane, räkädre bren yei aune reketadrekä meye namanina umbre yebätä, ye jürä namanibätä. Sribi riadrete kän ye jürä namanibätä arato. Aune ngwian ñobiti mrö aune alquiler ütiä biain kwe ye namani ngwentari jai. Töbikakwe yebätä nämäne töbike bati bobu aune ñan nämäne nemen nuäre kräke ja dükakäre. Akwa töi namaninta jäme. ¿Nuainbare ño kwe? Kukwe meden meden ben nämäne ja tuin ye niebare kwe orasionte Jehovakwe ne kwe Jehovakwe töi mikadre jäme aune mikadre töbike kukwe kwinbätä yekäre (ñäkädre Filipenses 4:8, 9 yebätä). Grabación tä Bibliabätä ye nämäne kukwe nuin, Jehová kukwe nuakäre. Niara tä niere: “Nitre ñäkäkä Bibliabätä kukwei jäme ye nämä töbikakwe yebätä ti töi mike jäme aune Jehová töita tibätä ye nämä ngwen törö tie” (Sal. 94:19).

6. ¿Nita ja tötike kaibe aune niken gätäbätä ye tä ni dimike ño?

⁶ Bren tare tä nakainkä ngwane, ni nämäne dre nuainne käne ye ñan tä nemen nuäre ni kräke nuainkäre jankunu. Akwa ja tötika kaibe o nita kwen gätäbätä ye nikwe nuaindre jankunu. Kukwe ben nita ja tuin ye kwrere ben ja mräkätre mada tä ja tuin, akwa tätre ja ngwen metre jankunu Jehovai ye mikata gare nie tärä, täräkwatabätä aune video yebätä (1 Ped. 5:9). Gätä yebiti kukwe tä Bibliabätä ye nita mike ja töite aune gätä ye köböire nita ni mada dimike aune ni dimikata arato (Rom. 1:11, 12). Nitre Jehová mikaka täte nämäne bren, kä jürä nämänebätä o ja nämäne nemen ruin kaibe ie ngwane, Jehovakwe dimikani ño yebätä nikwe töbikadre ye käkwe tödeka nikwe mikai dite aune Jehovakwe ni dimikai arato ye täi gare metre nie.

7. ¿Ni raba ja ngwen ño Apóstol Juan erere?

⁷ Nikwe ja di ngwandre blitakäre jankunu ja mräkätre ben. Pandemia o epidemia köböite ni ñan raba ja tuen ngwärere ni madabe, ja mräkätre ben arato. Kukwe nekänti ja raba nemen ruin nie Juan erere, niara tö namani ja tuabätä ngwärere Gayo ben (3 Juan 13, 14). Akwa kä ruäre te ñan ja tuai kwe Gayo ben niebare kwe. Aisete raba dre nuainne ye erere nuainbare kwe: tärä juani kwe Gayo ie. Ni ñan raba ja tuen ngwärere ja mräkätre ben ngwane, nikwe llamadre o videollamada nuaindre ye kwin, o kukwe juandre ietre. Nikwe blitai jankunu ja mräkätre ben ngwane, ye käkwe ni dimikai ja tuakäre ja ruin kaibe nie yebe aune ni töi rabai bäri jäme. Aune nita töbike krubäte ruin nie ngwane, nikwe blitadre nitre umbre ji ngwanka ben aune kukwe niei kwetre töi kwinbiti ni dimikakäre ye nikwe kadre ngäbiti (Is. 32:1, 2).

KUKWE TARE NAKANINKÄ NGWANE, KÄ JÄME RABA NEMEN NIKWE

8. ¿Kukweta nemen bare jötrö ye raba kä jäme ye denkä ño mäkän?

⁸ Käta niken ñöte, dobo kri o kätä nukwe yebe mäkwe ja tuanina ngwane, kä kwati te mäta ja töibikare krubäte kukwe yebätä raba ruin nunye. Mä mräkä tare mäkwe krütani mäkän o jondron nianinte mäkän ngwane, mäta ja tare nike, ulire o rubun raba ruin nunye. Mäta jondron kä nebätä tarere o tödeka ñaka mäkwe ye ñan ai gärätä. Mäkwe ja tuani kukwe tare ben aune yebätä mäkwe ñaka ja töi mikai kwin ye nitre ruäre raba ngübare mäbätä (Job 1:11). Mäkwe ja tuani kukwe tare ben, akwa yebiti ta mä töi raba nemen jäme. Raba nemen bare ño ye ani mike ñärärä.

9. ¿Kukwe niebare Jesukwe ye tä ni dimike ño rabakäre juto kukweta nemen bare jötrö ngwarbe ye kräke?

⁹ Kukweta nemen bare jötrö ngwarbe yebe ñan ja tuai ruin nitre ruäre ie kä ne näire. Akwa Jesukwe kukwe niebare ye nita ngwen törö jai. Kukwe tare jatai nakainkä bäri aune kukwe yebe nikwe ja tuai gare nie. “Dobo rabadi nakaenkä kri krübäte” aune kukwe tare rakaikä kä krütadre känenkri niebare Jesukwe nitre ja tötikaka ie (Luc. 21:11). Kukwe käme jatai nirien bäri mikani gare Jesukwe, kukwe käme ye tuen nie, ja kämikata, ja nuainta tare aune rükakata (Mat. 24:12). Kukwe ye käkwe kukwe tare mikai nemen bare nitre ñan Jehová mikaka täte ye aibebätä ñan mikani gare Jesukwe. Ja mräkätre kwati ja tuabarera kukwe tare yebe (Is. 57:1; 2 Cor. 11:25). Kukweta nemen bare jötrö ngwarbe yebätä Jehovakwe kukwe tuabare ñan nuaindi ni kriemikakäre raba ruin nie, akwa nita dre ribere jai ja töi mikakäre jäme ye biain kwe nie.

10. Kukwe tare rakadrekä känenkri ja ükadrete biarebe yebiti nita tödeke nita bämike ¿ñobätä nie raba? (Proverbios 22:3).

¹⁰ Nikwe ja ükadrete kwin ye köböire töi jämebiti nikwe ja tuai kukweta nemen bare jötrö ngwarbe yebe. Akwa nita ye nuainne ngwane, ¿ni ñan tä tö ngwen Jehovai ai gärätä? Ñakare, ye ñaka ye erere. Nita ja ükete kwin ngwane, Jehovakwe ni dimikai ie tödekata nikwe nita bämike. ¿Ñobätä nita ye niere? Ñobätä ñan aune nikwe ja ükadrete kwin kukwe tare känenkri ye mikata gare Bibliabätä (ñäkädre Proverbios 22:3 yebätä).c Nikwe ja ükadrete biarebe kukwe tare rakadrekä känenkri ye juta Ngöbökwe tä niere jankunu nie kukweta täräkwatabätä, gätäte aune kukwe mikata gare yebiti.d ¿Nita tö ngwen Jehovai ngwane, nikwe dre nuaindi? Kukwe nieta ye nikwe mikai täte gwä ngwane kukwe tare rakadrekä ye känenkri.

11. ¿Margaret kukwe bämikani yebätä dre nemen gare nie?

¹¹ Meri testiko kädekata Margaret yebätä dre namani bare yebätä ani töbike. Kä nämäne nukwe niara käite yebätä rikadre mentokwäre ye nitre ji dokwäte niara käite käkwe niebare ie. Nitre kwati ngitiani yebätä ji ngidiani jite aune kä ñan namani dikakakäre. Ngübü namani krubäte yebätä Margaret namani karo teri. Akwa niarakwe ja ükaninte kwin ye köböire namaninte nire. Cartera kwe yete nämäne mapa keteiti ngwen yebiti ji mada diani kwe jai. Ji yebiti niarakwe dikabarera käne, rabadre bäri nuäre kräke gitiakäre kukwe tare rakadrekä ye ngwane. Niarakwe ja ükaninte kwin ye köböire namaninte kwäre.

12. ¿Kukweta nemen bare jötrö ye kräke kukwe ükaninte ye ñobätä nita mike täte?

¹² Ni kriemikakäre o kukwe ükatekäre kwin nitre ji dokwäte ni käite raba toque de queda nuainne o raba niken ni ngwena mentokwäre o raba ja töi mike kukwe mada nuainne. Nitre ruäre ñan töta nemen kukwe ye mikai täte, ñobätä ñan aune ñan töta nemen kä kwe tuainmetre yebätä. ¿Akwa ni kristiano tä ja ngwen ño? Biblia tä niere: “Ni Dänkien rabadre ütiäte ni mda mda okwäte, abkokäre ni jökrä tä mikani gobrane ji dokwäte, ye munkwe kukwei mika täte” (1 Ped. 2:13, 14). Juta Ngöbökwe tä kukwe bien nie mikakäre täte ni kriemikakäre arato. Dato actualizado ye nikwe biandre nitre umbre ji ngwanka ie ye tä ngwen törö käre nie kukwe tare rabadre bare ngwane, nita medente tädre gare nitre umbre ji ngwanka ie yekäre. ¿Nikwe dato jakwe bianina nitre umbre ji ngwanka ie? Ni rabadre gwi, ni rikadre medente o nita dre ribere jai yebätä juta Ngöbökwe raba kukwe bien mikakäre täte nie. Nikwe nitre mada dimikadre ñongwane aune ño ye raba niere nie arato. Nikwe ñaka kukwe mikai täte ngwane, nitre umbre ji ngwanka tä ja ngwen metre aune tä ni ngübare ye nikwe ja nire kwe aune ja nire nikwe ye nikwe mikai kukwe tare te (Heb. 13:17). Margaret niebare: “Nitre umbre aune juta Ngöbökwe kukwe ükaninte ye tikwe mikani täte ye köböire tita nire ye gare metre tie”.

13. ¿Nitre kristiano kwati tä kä jene jene känti ye tä dre nuainne kä tädre jutobätä aune tädre jäme jankunu yekäre?

¹³ Kukwe ñaka kwin tä nemen bare käbiti tibien ñodre, rüta, nitre tä ngadain jabätä ye köböite ja mräkätre kwati tä nüne kä jene jene känti. Akwa niaratre tä ja di ngwen kukwe mrä tä kisete ye nuainkäre aune kukwe driekäreta. Tätre jankunu kukwe kwin Ngöbökwe driere, nitre kristiano kirabe namanintre nüne kä mada känti kukwe tare namani bare yebätä ye erere (Hech. 8:4). Tä kukwe driere ye tä dimike töbike Gobran Ngöbökwe yebätä aune ñan kukwe nemen barebätä yebätä. Ye köböire kätä jutobätä aune kä jäme tä kwetre.

JA MIKAI MÄ RUERE AKWA KÄ JÄME TÄI MÄKWE

14. ¿Ja mikata ni rüere ye ngwane, ñobätä kä jäme ye raba nete nikän?

¹⁴ Kukwe meden tä ni töi mike jäme aune kä mike juto nibätä ye ñaka raba nemen nikwe ja mikata ni rüere ye ngwane, ñodre, gätä nuainne töi jämebiti, kukwe driere töi jämebiti aune kukwe meden nuainta nikwe köbö kwatire kwatire ye ni ñan raba nuainne, ñobätä ñan aune nitre ji dokwäte raba ni kain ngite ye jürä tä nemen nibätä. Kukwe drie ye ñäkäita ngwane, nita nemen töbike krubäte aune dre rabai bare ja känenkäre ye jüräta nemen nibätä. Ja ruin käre nie ye nierare. Akwa nikwe ja ngübadrebiti ne kwe ja mikata ni rüere ye köböite tödeka ñan riadrete nikän, Jesukwe niebare nitre ja tötikaka kwe ie erere (Juan 16:1, 2). Ye medenbätä, ¿ja mikata ni rüere ngwane, nikwe dre nuaindre ni töi tädre jäme jankunu yekäre?

15. ¿Ja mikata ni rüere ye ñobätä nikwe ñaka jürä ngwandre jabätä? (Juan 15:20; 16:33).

¹⁵ Kukwe Ngöbökwe tä niere: “Nire nire tö nünai kuin deme Kristo Jesukrä abko käkwe ja tare nikadi rüe kisete” (2 Tim. 3:12). Kukwe nieta texto yekänti ye ñan nämäne nemen nuäre ja mräkä kädekata Andréi kräke ka ngäbitikäre, sribi Ngöbökwe ñäkäibare juta kwe känti ngwane. Nämäne töbike: “Ja mräkätre kwati tärä nete, aisete jökrä ye ñan ka raba ngite”. Akwa kukwe ye käkwe ñan töi mikani jäme, ñakare aune nämäne ja töibikaire krubäte. Ja mräkätre mada abokän käkwe kukwe tuanimetre Jehová kisete aune niaratre mika raba ngite, ye nämäne gare ietre. Aune ñan nämäne ja töibikare krubäte Andréi erere. Aisete Andréi ja ngwani niaratre erere aune ja töi mikani kwe tö ngwen täte Jehovai. Ye bätärabe töi namani jäme aune kätä jutobätä kukwe tare yebiti ta. Ye erere ja raba nemen ruin nie arato. Bäkänä, nitrekwe ja mikai ni rüere niebare Jesukwe, akwa nikwe ja ngwain metre Jehovai niebare kwe arato (ñäkädre Juan 15:20; 16:33 yebätä).

16. ¿Ja mikata ni rüere ye ngwane, kukwe ükaninte meden mikadre täte?

¹⁶ Sribi nuainta nikwe ye ñäkäita ngwane, nitre umbre ji ngwanka o sukursal tä kukwe bien mikakäre täte ni kriemikakäre, mrö ja üaire rabadre nikwe jankunu yekäre o nuain raba ngwane kukwe driedre jankunu yekäre. Ye ngwane, kukwe ye nikwe mikadre täte aune kukwe bianta mikakäre täte ñan nüke gare nie yebiti ta, nikwe mikadre täte arato (Sant. 3:17). Kukwe ja mräkätrebätä aune sribi Ngöbökwe yebätä ye ni ñan mikadre gare, nire ie ñan mikadre gare yei (Ecl. 3:7).

17. Nitre apóstol erere, ¿nita ja töi mike kwatibe dre nuainbätä?

¹⁷ Kukwe keteitibätä Satana tä ja mike juta Jehovakwe rüere ye abokän nita kukwe mike gare Jesubätä yebätë (Apoc. 12:17). Satana aune nitre gobrainta kwe ye nikwe ñan tuanemetre ja ngwen nikenkä. Ja mikata ni rüere yebiti ta nita kukwe driere aune nitre tötike ngwane, käta nemen juto krubäte nibätä aune ni töita nemen jäme. Siglo kena ye ngwane nitre apóstol ñan kukwe driedre jankunu ye nitre ji dokwäte judío käkwe niebare ietre ngwane, niaratre ja ngwani metre aune Ngöbö kukwei mikani täte kwetre. Kukwe driebare jankunu kwetre aune ye köböire kä namani juto bätätre (Hech. 5:27-29, 41, 42). Bäkänä, sribi Ngöbökwe ñäkäita ngwane, nikwe töbikadre kwin käne kukwe driekäre (Mat. 10:16). Nikwe ja di ngwain ngwane, ja raba nemen ruin jäme nie, ñobätä ñan aune nikwe kä mikai juto Jehovabätä aune kukwe kwin nitre mikakäre kwäre ye nikwe driei ietre yebätä.

“NGÖBÖ MOTO JÄME YE TÄDI KÄRE MUNBE”

18. ¿Kä jäme ribeta jai ye kite medenkri?

¹⁸ Nita ja tuin kukwe tare ben ngwane, kä jäme raba nemen nikwe arato ye tädre gare metre nie. Kukwe tare ye näire kä jäme ribeta jai ye abokän kä jäme Ngöbökwe. Jehová aibe raba kä jäme ye bien nie. Bren tare tä nakainkä, kukwe tä nemen bare jötrö ngwarbe aune ja mikata ni rüere ngwane, nikwe tö ngwandre Jehovai. Nikwe ja mikadre juta kwe yekri aune kukwe käbämikata kwe nie yebätä nikwe töbikadre. Nikwe ye erere nuaindi ngwane, “Ngöbö moto jäme ye tädi käre” nibe (Filip. 4:9). Ja mräkätre tä ja tuin kukwe tare ben ngwane, nikwe dre nuaindre kä jäme Ngöbökwe rabadre kwetre yekäre ye rabai gare nie kukwe ja tötikara ja känenkäre yebätä.