Ni raba nüne kärekäre

1. Ja nire kärekäre käbämikata Jehovakwe nie yebätä nita töbiketari ngwane, ¿ye tä ni töi mike ño?

NIRE tä Jehová mike täte yekwe ja “nire käre” rabai tä käbämike (Rom. 6:23, TNM). Kukwe käbämikata nebätä nita töbiketari ngwane, nita kite niara tarere bäri. Ani töbike kukwe nebätä: Ni Rün kä kwinbiti tä ni tarere krubäte yebätä tä jondron kwin ne käbämike nie nikwe ñan kämikadrekäbätä yekäre.

2. ¿Ja nire käre käbämikata ye tä ni dimike ño?

² Ja nire käre käbämikata Ngöbökwe nie ye tä ni dimike ja tuakäre kukwe tare ben. Ni rüe käkwe ni rötadrekä gata yebiti akwa yebiti ta nikwe Jehová mikadre täte jankunu ¿Ñobätä? Kukwe keteitibätä ye abokän nita ja ngwen metre Jehovai aune ni krütadre ngwane, Jehovakwe ja nire biainta nie aune ni ñan krütai jire ie ni raba tö ngwen (Juan 5:28, 29, TNM; 1 Cor. 15:55-58; Heb. 2:15). ¿Ni raba nüne kärekäre ye ñobätä gare metre nie? Kukwe ruärebätä ye ani mike gare jai.

JEHOVATA NÜNE KÄREKÄRE

3. ¿Jehová raba ni mike nüne kärekäre ye ñobätä gare metre nie? (Salmo 102:12, 24, 27).

³ Jehová raba ni mike nüne kärekäre gare nie ñobätä ñan aune ja nire kite niarakri aune niarata käre (Sal. 36:9). Jehovata käre aune täi käre bersikulo ruäre tä mike gare ye ani mike gare jai. Jehová “tä käre aune kärekäre” nieta Salmo 90:2 yete. Salmo 102 yete kukwe ye kwrere mikata gare arato (ñäkädre Salmo 102:12, 24, 27 yebätä).b Ni Ngöbö kukwei niekä Habacuc nämäne blite Ni Rün kä kwinbätä yebätä ngwane, niebare kwe: “¿Mä ñan ai tä käre ya Jehová? Ngöbö tikwe, mä ñaka krüte” (Hab. 1:12).

4. Jehova tä kärekäre ye ñan tä nüke gare nie, ¿akwa ñobätä ye ñan ni mikadre töbike?

⁴ Jehová tä käre aune “täi kärekäre”, ¿ye ñan tä nemen nuäre mä kräke mikakäre nüke gare jai? (Is. 40:28). Mä ye ñan aibe tä töbike kore. Elihú käkwe niebare Jehovabätä: “Kä kwäbe niarabiti ye ni töi ñaka raba ngitiekä mikakäre gare jai” (Job 36:26). Akwa kukwe ñan nüke gare nie yebätä kukwe mika ñan gare ye ñan ai gärätä. Ñodre, ñötra ye tä sribire ño ñan nüke gare nie. Akwa yebätä ñan metre ye ñan ai gärätä. Ye erere arato, Jehová tä käre aune täi kärekäre ye ñan raba nemen nuäre nitre kä tibienbätä kräke mikakäre nüke gare jai raba ruin nie. Kukwe jökrä ñan nüke gare nie akwa kukwe metre ni Sribekä yebätä tä yete (Rom. 11:33-36). Ne madakäre, jondron jökrä sribebare o universo ye känenkri ni ni Sribekä nämänena. Ñodre, ñänä aune muke mada mada ye känenkri. Biblia tä niere: “Niarakwe kä tibien sribebare aune sribebare kwe ja di yebiti”. Aune tä niere arato: “Kä tibien sribebare” (Jer. 51:15; Hech. 17:24). Ni raba nüne kärekäre ye kukwe meden mada tä mike gare metre nie ye ani mike gare jai.

NI SRIBEBARE NÜNANKÄRE KÄREKÄRE

5. ¿Tödeka meden nämene ni brare aune meri kena yekwe?

⁵ Jondron nire jökrä sribebare Jehovakwe ye kä rükadre ngwane gatadre, akwa ni kä tibienbätä sribebare kwe nünankäre kärekäre. Jehovakwe kukwe ne niebare Adán ie: “Kri dre kuin btä dre käme mikakrä gare, se ngwäkä makwe ñan tö ngwian kwete jire chi, ñobtä ñan angwane makwe kri ngwäkä se kwetadre angwane, ma krütadi” (Gén. 2:17, JK). Adán käkwe Ngöbö mikadre täte akräke nünandre kärekäre kwe. Kri ngwäkä ni mikakäre nüne kärekäre ye Ngöbökwe tuainmetre kwete ja känenkäre raba ruin nie. Ye köböire rabadre nüne “kärekäre” (Gén. 3:22, JK).c

6, 7. a) ¿Ni krütadre ye ñan ai kräke ni sribebare ye kukwe meden tä mike gare nie? b) ¿Ja nire käre rabai mäkwe ngwane mä tö dre nuainbätä? (Üai mikadre ñärärä).

⁶ Ni jisai yete kukwe keta kabre raba nemen bäri kukwe tä nemen gare nie nita nire ye kräke, ye kukwe keta kabre tä bämike namanina gare nitre científico ie. Video keteiti grababare hora 3 millón näre te, ye erere kukwe raba nemen ni jisaite ye mikani gare täräkwata keteitibätä kä 2010 yete. Kä rikadre 300 näre ta video ye tuakäre täte. Kukwe mikata gare ye chi raba ruin nie. Akwa Jehovakwe ni jisai sribebare yete kukwe kabre raba nemen bäri kukweta nemen gare nie kä 70 o 80 te ye kräke (Sal. 90:10).

⁷ Jehovakwe ni töi mikani nünanbätä kärekäre arato. “Nüna kärekäre ye mikani kwe ni nire brukwäte” nieta Bibliakwe (Ecl. 3:11).Ye medenbätä gata ye ni rüe (1 Cor. 15:26). Ani töbike kukwe nebätä. Nita näkäin bren jume ngwane, ¿nita nemen kwekebe aune ni ñan tä kukwe nuainne? Ñakare. Nita niken doctor känti, kräkä biandre kwe nie bren kräke yekäre. Ni ñan krütadre yekäre nita ja di ngwen kukwe nuainkäre. Aune ni mräkä bati o umbre nikwe tä krüte ngwane, ye tä nemen tare krubäte nie kukwe ye ñan tä nekä jötrö ngwarbe (Juan 11:32, 33). Ni ni Sribekä käkwe ni töi mikani kore. Erametre niarakwe ni mikai nüne kärekäre. Ni raba nüne kärekäre ye kukwe mada mada tä mike gare nie. Jehovakwe dre nuainbarera aune tö dre nuain yebiti niara töi nämäne ño käne ye erere töita jankunu ye kukwe ruäre tä bämike ye ruäre ani mike gare jai.

JEHOVÁ TÖI NÄMENE ÑO YEBÄTÄ ÑAN JA TÖI KWITE

8. ¿Isaías 55:11 ye tä dre mike gare nie Jehová töita ño yebätä?

⁸ Adán aune Eva ja mikani ngite yebätä ni jökrä tä krüte, akwa Jehová töi nämene ño ye erere töita jankunu (ñäkädre Isaías 55:11 yebätä).d Ni ja ngwanka metre ie käkwe nünandre kärekäre ie tö täbe. ¿Ñokänti gare nie? Dre niebarera kwe aune dre nuainbarera kwe ja töi mikakäre nemen bare yebätä gare nie.

9. ¿Jehovata dre käbämike? (Daniel 12:2, 13).

⁹ Nitre krütanina ye gaikröta aune ja nire käre biain ietre käbämikata Jehovakwe (Hech. 24:15; Tito 1:1, 2, TNM). Nitre krütanina ye Jehová tö gakröbätä nämene gare metre Job ie (Job 14:14, 15). Nitre kä tibienbätä gaikröta aune ja nire kärekäre rabai kwetre ye nämene gare ni Ngöbö kukwei niekä Daniel ie (Sal. 37:29; ñäkädre Daniel 12:2, 13 yebätä).e Jehová raba “ja nire käre” bien nitre niara mikaka täte ie ye nämene gare nitre judío Jesús näire ie (Luc. 10:25; 18:18, TNM). Kukwe käbämikata yebätä Jesukwe blitabare bä kabre aune niara ara ganinkröta Rünkwe (Mat. 19:29, TNM; 22:31, 32; Luc. 18:30; Juan 11:25, TNM).

10. ¿Nitre ganinkröta mekera ye tä dre bämike? (Üai mikadre ñärärä).

¹⁰ Jehová ja nire bianka nie aune nitre krütani ie raba ja nire bienta. Ja di biani kwe Elías ie meri kän muko krütani ye ngobo gakrökäreta (1 Rey. 17:21-23). Ja känenkäre ja di biani ie Eliseo ie meri nünanka Sunem ye ngobo gakrökäreta (2 Rey. 4:18-20, 34-37). Jehová die tärä nitre krütanina ye ie ja nire biankäreta ye nemen gare nitre ganinkröta ne aune mada yebiti. Aune Jesús nämene kä tibienbätä ngwane, die nämäne kukwe ye nuainkäre namani gare metre (Juan 11:23-25, 43, 44, TNM). Gwä ngwane Jesuta kä kwinbiti aune “kukwe jökrä kä kwinbiti aune kä tibienbätä mikani gare ie”. Aisete “nitre krütani” gadrekröta aune mikadre nüne kärekäre ye mikai nemen bare (Mat. 28:18; Juan 5:25-29, TNM).

11. ¿Ni kökanintari ye köböire dre raba nemen nikwe?

¹¹ ¿Monso tare Jehovakwe ye ñobätä tuanimetre kwe ja tare nike aune krüte? Jesukwe kukwe ye mikani gare: “Ñan ñobätä aune Ngöbökwe ni tarebare krubäte yebätä Monso ngöräbe kwe biani kwe ne kwe ni jökrä tä tödeke ie ye ñaka gadrete, ñakare aune ja nire kärekäre rabadre kwe” (Juan 3:16, TNM). Jehovakwe monso kwe biani ni kökatarikäre köböire ja nire kärekäre raba nemen nikwe (Mat. 20:28). Kukwe ütiäte nuainbare Ngöbö töi mikakäre nemen bare yebätä apóstol Pablo kukwe ne mikani gare: “Kena ni iti kä Adán käkwe ja mikani ngite Ngöbö rüere, ye köböite ni jökrä tä krüte, ye kwrere arato ni itibe köböire Ngöbökwe ni tödekaka Jesubti krütanikrütani erere mikadita nire. Ye abko, Adán köböite ni jökrä kä nebtä tä krüte, ye kwrere arato Kristo köböire Ngöbökwe ni jökrä tödekaka Kristobti mikadita nire” (1 Cor. 15:21, 22).

12. ¿Jehová töita ño ni kräke ye Gobran Ngöbökwe käkwe mikai nemen bare ño?

¹² Gobran Ngöbökwe aune Ngöbö töi rabadre bare kä tibienbätä ye nitre ja tötikaka Jesukwe ribedre orasionte ye Jesukwe driebare nitre ja tötikaka kwe ie (Mat. 6:9, 10). Nitre kä tibienbätä käkwe nünandre kärekäre ye tä Ngöbö töi ño ye ererebätä. Yekäre Jehovakwe Jesús kädekani Rei Gobran Ngöbökwe yete aune tä nitre 144.000 ükökrö sribikäre gwairebe Jesube ja töi mikakäre nemen bare (Apoc. 5:9, 10).

13. ¿Jehovata dre nuainne gwä ngwane aune mäkwe dre nuaindre?

¹³ Kä nengwane Jehovata “nitre kwati” krubäte ükökrö aune tä kite nünankäre Gobran Ngöbökwe yete (Apoc. 7:9, 10; Sant. 2:8). Bätä ngwan aune rüe köböite nitre ñan tä keteitibe akwa nitre tä nitre kwati ye ngätäite tä ja di ngwen ñan bätä ngwankäre jabätä. Ngitra ye kwitata kwetre sribikäre ni raba niere (Miq. 4:3). Niaratre ñan tä rüre nitrebe, ñakare aune kukwe metre Jehovabätä aune bike dre nuainne ye tä mike gare nitre ie dimikakäre ja nire käre rabadre kwetre yekäre (1 Tim. 6:19, TNM). Nitre ye tä ja mike Gobran Ngöbökwe yekri yebätä mräkätre kwe raba ja mike rüere, jondron o ngwian ñan raba nemen kwetre, akwa dre dre ribedre kwe jai ye Jehovata bien ietre (Mat. 6:25, 30-33; Luc. 18:29, 30, TNM). Gobran Ngöbökwe ye metre aune Jehová töita ño ye nuaindi jankunu kwe ye nemen gare kukwe nebiti nie.

KÄ JA KÄNENKÄRE BÄ NUÄRE

14, 15. ¿Gata gaite kärekäre käbämikata Jehovakwe ye rabai bare ño?

¹⁴ Jesús niena Reire Gobran Ngöbökwe yete aune Ngöbö töita ño ye mikai nemen bare kwe (2 Cor. 1:20). Kä 1914 yete ja käne tä nitre ja mikaka rüere ye gobraine (Sal. 110:1, 2). Jesús aune nitre 144.000 ye kebera ganane täte rübätä aune nitre blo gaite kwe (Apoc. 6:2).

¹⁵ Gobran Ngöbökwe gobrandi mil krati ye ngwane, Jesukwe nitre krütani ye gaikröta aune nitre Ngöbö mikaka täte ye dimikai kwe rabakäre töi metre. Ni nuaite mrä ye bitikäre nitre kukwe metre nuainkä yekwe “kä tibien rabai aune nünain kärekäre” te kwetre (Sal. 37:10, 11, 29). Aune gata “ni rüe mrä ye gaite täte” (1 Cor. 15:25, 26). ¡Kukwe ye tä kä mike juto nibätä!

16. ¿Kukwe meden bäri ütiätebätä nikwe Jehová mikadre täte?

¹⁶ Nibira gare nie erere, tödekara nikwe ye tä mikani gare metre Bibliabätä. Tödekara ye tä ni dimike ja ngwen metre Jehovai kukwe tare tä nakainkä kä krüte ne näire. Akwa ni tö kukwe kwin nuainbätä Jehová okwäbiti ngwane, nikwe ja ngwandre metre ie aune Jesús ie ñan rabatekäre kwäre aibe, ñakare aune tare ja brukwä tätebiti nikwe yebätä nikwe nuaindre (2 Cor. 5:14, 15). Ja tare ye kätä ni dimike ja ngwen jankunu niara erere aune blite tödeka nikwe yebätä (Rom. 10:13-15). Ni töita ja aibebätä ye nita ja di ngwen ganainkäre bäri aune ja töi mikakäre mantiame ngwane, bäri Jehová tö ja ketabätä nibe kärekäre (Heb. 13:16).

17. ¿Kukwe meden tä nuaindre ni itire itire ie? (Mateo 7:13, 14).

¹⁷ ¿Aune ni? ¿Nikwe nünain kärekäre? Jehovata kukwe ye käbämike nie akwa nikwe ja di ngwandre nänkäre jankunu ji metre yebiti (ñäkädre Mateo 7:13, 14 yebätä).f Nikwe nünain kärekäre ngwane, ¿nikwe nünain ño? Kukwe ye rabai gare nie kukwe ja tötikara ja känenkäre yebätä.