Daudi na Sauli

Daudi amalire kuyirha Goliyati, Mwami Sauli amujira mukulu w’abasoda bage. Daudi ahima ntambala zinene anaba muntu omenyikene bwenene. Buli mango Daudi aliri arhenga oku vita, abakazi baliri bahuluka eyi bali bamuzinira n’okumuyimpira ntya: ‘Sauli ayirhire ebihumbi, na Daudi ayirhire ebihumbi n’ebihumbi!’ Sauli ayunvira Daudi obongwa n’okulonza kumuyirha.

Daudi aliyinji kuziha olunanga bwinja-bwinja. Lusiku luguma eyi Daudi ali azihira Sauli olunanga, oyola mwami amukabula echumu. Daudi ayunama hityu, n’echumu lyachishinga omu chibambazi. Enyuma waho, turu zinene Sauli aliri alonza kuyirha Daudi. Buzinda, Daudi alibirhirira hale n’okuja kuchibisha omu rungu.

Enyuma waho, Sauli arhola basoda 3 000 baja kuhiga Daudi. Buzira kumenya, hagera amango aja omu lukunda lon’olo omu Daudi n’abalume bage balichibishire. Abalume ba Daudi bamubohereza ntya: ‘Lero wamapata orozo lukuyirha Sauli.’ Daudi agenda kubuyabuya aha Sauli ali n’okucha akachira oku goti lyage. Sauli arhamenyaga chiro. Amalire kujira ntyo, Daudi achiyunva kubi bwenene bulala arhayerekene obukenge oku mwami na mushigwa wa Yehova. Arhayemeraga abantu bage bayirhe Sauli. Anahamagala chiro Sauli, amubwira okw’akamuyirhire amango abonaga orozo l’okujira ntyo. Sauli alijire ahindamula amawazo mage okubilolere Daudi si?

Nanga. Sauli agenderera kuhiga Daudi. Lusiku luguma ebudufu, Daudi na Abishai, omwana wa mwali-wabo, basheshera kubuyabuya omu nkambi ya Sauli. Chiro na Abneri, mukulu w’abasoda baliri bachunga Sauli aliri aj’ero. Abishai aderha ntya: ‘Lero rhwamamufarha muza! Leka muyirhe.’ Daudi ashubiza ntya: ‘Yehova yenyine amushahula. Rhurhole konyine echumu lyage n’omukuzo gwage gw’amenji, rhuchigendere.’

Daudi ashonera oku musozi gwaliri hofi ah’akabwene bwinja-bwinja enkambi ya Sauli. Aderha ntya n’omulenge gunene: ‘Abneri we, charhumaga orhalanga mwami wawe? Ngahe omukuzo n’echumu lya Sauli bili?’ Sauli arhegera omulenge gwa Daudi n’okuderha ntya: ‘Wakanyirhire muza, aliko orhajirire ntyo. Imenyere oku we waba mwami we Izraeli wakulikiraho.’ Sauli agaluka emwage. Aliko arhali abantu boshi b’omulala gwa Sauli babaligayire Daudi.