Oyerekane kugerera olugenzi lwawe k’oli muuntu ogwerhe olugero. Wakachibaza ntya: ‘Abantu banabona oku indi muntu ogwerhe olugero, muntu onarholeka, onayemera amawazo m’abandi? Changwa banabona oku indi mukali changwa orhaharhulwa? Ka ndi muntu onaseza abandi bakole ebintu nk’oku nyono ndozeze bikolwe? Changwa si inanyunviriza abandi n’okuleka ebibasiimire byebikolwage amango bigalikene?’ Amango rhwamayerekana oku rhunayunviriza amawazo m’abandi, rhwanayerekana kangana gurhe rhuli rhwayiganya Yehova na Yesu. Birhuhemere rhugwarhe engeso y’olugero amango ebintu byamahindamuka omu kalamo kerhu. Amango ebintu byamahindamuka, ebyola byakarhulerhera ebibazo rhurhaliwazize haba n’akatyu oku byakarhuhikira. Rhwakagwarha ebibazo by’amagala bikomere by’aho han’aho. Changwa amango echibazo ch’okubula efuranga chamarhengerera aho han’aho, changwa amango ebintu byamahindamuka omu burhegesi bw’epolitike aha rhulamire. Ebyola byakarhuma akalamo karhukomerera bwenene. (Muh. 9:11) Chiro byakarhukomerera amango olubaga lwa Yehova lwamahindamula engabane yerhu changwa amango lwamarhuhema rhuje kukolera omu yindi fasi. Rhwakagala kuchikoomeza n’ehali nka rhujirire ebila bintu bine: 1) amango wamayemera oku ebintu byahindamukire, 2) olangalire amango mayinjire, 3) oseze obwenge oku bintu binja, n’echa 4) okolere abandi. w23.07 buk. 21-22 chi. 7-8

Omulebi Daniyeli alichili musole amango Abababiloni bamuheka nka mushwekwa hale n’emwabo. Aliko, chiro akaba oku Danieli alichili musole, abakulu b’abasoda be Babiloni baliri basomerwa okuntu aliri. Baliri babona “ebibonekene na mesho,” oku Danieli aliri muntu “orhagwerhe nshembo analigwerhe esura ekwirire” analirhengere omu mulala gukengerwe. (1 Sa. 16:7) Bobola, Abababiloni bamukoomeza ayinje akola omu nju ya mwami. (Da. 1:3, 4, 6) Yehova alizigiire Danieli, arhali oku bulala aliri abonekana akwirire changwa bulala aligwerhe engabane y’akamaro oku bwami, s’aliko bulala oyola musole alichishogere kugwarha oborhere bwinja. Aliko, amango Yehova aderha oku Danieli ali kuguma na Nowa na Yobu, amola mango nkabaga Danieli aligwerhe nka myaka hofi 20. Bobola Yehova alibwene oku oyola musole ali kuguma na Nowa na Yobu balimukolere oku bwimana mu myaka minene. (Mwa. 5:32; 6:9, 10; Yob. 42:16, 17; Eze. 14:14) Kandi Yehova aligenderere kuzigira Danieli omu mango m’akalamo kage koshi kasimisize.​—Da. 10:11, 19. w23.08 buk. 2 chi. 1-2

Amango oli washonda kugula enju. Nta ngangane, wakaja kulola eyola nju masu oku masu, wanalambagiramo, wanalambagira embuga, omu byumba byoshi, n’okulola bwinja-bwinja ebigabi byoshi by’eyola nju. Rhwakajira chintu chilebe chili nk’echola amango rhuli rhwasoma n’okuyiga Ebiblia. Nk’ofire chakusoma juba-juba, wakayiga konyine ebintu by’omusinji k’okuderha “enyigirizo z’omusinji z’ebinwa bichesibwa bya Mungu.” (Ebr. 5:12) Aliko, nka kulala byakakuhema oje “omunju” yomenya bwinja-bwinja oku biyilolere, bikuhemere oyige Ebiblia bwinja-bwinja y’oyunva loshi ebilimo. Enjira nyinja y’okuyiga Ebiblia kuli kumenya nka gurhe ebye Biblia ederhere omu chitabu chilebe bifarhene n’ebili omu chindi chitabu. Ochihangane kuyunva eby’oba ochizerere, kandi ochihangane kurhegeera empanvu zirhumire wachizera oku ebyola bili by’okuli. Yirhuyunva bwinja ebigabi bye Chinwa cha Mungu byoshi, hali bintu biguma rhukwanene kuyiga bwinja-bwinja. Entumwa Paulo ali hebere omurhima bene-babo na bali-babo Babakristu, bayige bwinja echinwa cha Mungu, n’echola chakabarhabere “yibagala kumenya bwinja-bwinja obugali, obule, okulungera, n’enkumbu” y’okuli. N’okubuzinda byanabalerhera enyungu banagwarha “emizi n’okuyorha baserere” omu bwemere bwabo. (Efe. 3:14-19) Nerhu birhuhemere kujira okola k’onoko. w23.10 buk. 18 chi. 1-3