Yehova Amalwira Yehoshafati

Yehoshafati mwami we Yuda, aharabisa amazabahu ma Baali n’esanamu omu chihugo. Alilonzeze abantu bamenye amarhegeko ma Yehova. Nantyo arhuma abarhwali n’Abalawi omu Yuda yoshi bayigirize abantu amarhegeko ma Yehova.

Amashanja maliri ahaburhambi bwabo, maliri mayubaha kulwisa echihugo che Yuda, bulala balimenyere oku Yehova ali haguma n’abantu bage. Chiro n’abola bantu b’amandi mashanja, balerhera Yehoshafati empembo. Aliko Abamoabu, Abaamoni, n’abandi barhengaga omu eneo ye Seiri, bayinja kulwisa abantu be Yuda. Yehoshafati alimenyere okw’akenere oburhabale bwa Yehova. Ahamagala abalume, abakazi, abana, boshi bayinje haguma omu Yerusalemu. Embere w’abola bantu boshi, asalira ntya: ‘Yehova, buzira woyo, rhurhakahima elila vita. Wekalamawe, orhubwire bichi rhujirage.’

Yehova ashubiza elyola sala omu kubabwira ntya: ‘Murhayubahaga. Nabarhabala. Muyumange ahamuli, murhachishaganyaga, mwabona oku nabachungula.’ Nka gurhe Yehova abachungulaga?

Esezi lyakulikiragaho, Yehoshafati achishoga abayimpaji, n’okubabwira balambagire baje embere z’abasoda. Barhenga omu Yerusalemu n’okuja efasi y’okulwira evita, yaliyirikirwe Tekoa.

Okw’abayimpaji baliri bakuuza Yehova n’omulenge gunene g’obusime, Yehova alwira abantu bage. Alerha entambala ahagarhi k’Abaamoni n’Abamoabu, bahwanza kulwa bonyine oku bonyine, na ntaye wafumire chiro n’omuguma, boshi bafa. Aliko Yehova alanga abantu be Yuda, abasoda, n’abadahwa. Abantu boshi baliri omu bihugo bibazungulukire, bayunva ebi Yehova ajirire, banamenya oku Yehova alichili alwira abantu bage. Nka gurhe Yehova anachungula abantu bage? Anajira ntyo mu njira zinene. Arhaba akenere oburhabale bw’abantu y’ajira ntyo.