Walimenyere Si?

Bulagurhe kwaliri kwinja enguuku n’epijo zaliyemererwe kuhaanwa nka nterekero?

ESHERIYA ya Musa yaliderhere ok’omuntu akahere Yehova enguuku changwa epijo nka nterekereko. Ezola nyunyi zombi zakazaga zigana kuderhwa haguma omu sheriya z’enterekero; nguma yakakolesezwe ahali h’ey’abo. (Law. 1:14; 12:8; 14:30) Bulagurhe echola chaliri chinja? Mpanvu nguma yaliri oku enguuku zirhakazagi bonekana buli mango. Bulagurhe?

Enguuku ziba nyunyi zizigana kubalama zilamire omu chihugo choshi che Israeli omu myezi y’echuka. Aliko buli Mwezi gw’Ekumi, zinabalamira omu bihugo bw’eside bili mw’echuka, n’okugaluka omu Izraeli amango ebyasi byamahwanza kumera n’okushisha. (Wim. 2:11, 12; Yer. 8:7) Omu Izraeli ya mira, echola chakarhumire byakomerera Abaizraeli okuhaana enguuku nka nterekero omu myezi y’emboho.

Oku lwindi lunda, epijo zirhazigana kubalama, bobola zaliri zabonekana omu Izraeli omu mwaka goshi. N’okubwindi, epijo zaliri zarhungwa ahambuga. (Huzanya na Yohana 2:14, 16.) Nk’oku echitabu chiguma chiderehere “amavilage n’evile zoshi z’omu Palestine zalirhungirwemo amapijo. Buli muntu aligwerhe enju y’epijo ahamwage, changwa echirhule omu chibambazi ah’ezola nyunyi zakalamire.” (Bible Plants and Animals)​—Huzanya na Isaya 60:8.

Yehova aliyerekene obuzigire anab’amenyere ehali abantu balimo omu kuyemera enyunyi zakabonekene omu mwaka goshi z’Abaizraeli bamuhage nka nterekero.