Gurhe Wakachirheganya Bwinja Eju ye Mbuganano?

Akaba onayiga Ebiblia na muhamirizi wa Yehova muguma, hali okuntu y’onarheganya embere w’echihe buli mwazi mwayiga. Konakuguma, y’oyunguka bwenene n’Embuganano, kuli kwinja orheganye embere w’echihe. Wagala okahanza warheganya oku kahunda.

Ochishoge ebisanzi n’ahantu h’okurheganyiza. Kasanzi kahe obwene oku kawakayigamo bwinja? Wakachishoga ebisanzi by’esezi, embere y’okurhondera akasi, changwa ebudufu ey’abana balyamire si? Chiro akaba wayiga bisanzi bigeke byonyine, bihemere ochishoge miniti migeke wayigamo; orhanayemeraga echindi chintu n’echiguma chakubuza kujira ntyo. Olonze ahantu harhulerere, olekane nabuli choshi chakarhuma orhafumbamiza obwenge oku by’oli wayiga. Omufano, bihemere okuzimya eradio, eteleviziyo n’etelefone. Okusalira embere y’okuyiga, kwa kurhabala oyibagire emilago y’olusiku n’okugala kuseza obwenge oku chinwa cha Mungu.​—Wafilipi 4:6, 7.

Ohire ebimenyeso oku bishubizo n’okurheganya ebi washubiza. Orhange oyunve ewazo likulu ly’omwazi oli walonza kuyiga. Owaze oku mwazi gw’esura; olole gurhe buli mwazi gugeke-geke gufarhene n’omwazi gukulu, ona lole bwinja buli foto n’ebibazo by’okuchiyibusa bikazize amawazo makulu m’enganiro. N’ahandi, osome buli chifungo, onalonze echishubizo ku buli chibazo. Olonze n’okusoma omu Biblia yawe amandiko mayerekenwe, onawaze gurhe mafarhene n’omwazi gukulu gw’eyo sura. (Matendo 17:11) Amango wamabona echishubizo oku chibazo, wanachiheba kw’echimenyeso y’orhachiyibagira. Nantyo oku mbuganano, akaba osimire, wakaheba efune enyanya y’ohana echishubizo omu binwa byawe wenyine.

Amango olemere warheganya emyazi minene y’okuganirwako oku mbuganano buli boso, obumenyi bwawe bwe Biblia bwana yongezeka.​—Matayo 13:51, 52.

• Bichi wakajira y’ogwarha eprograme nyinja y’okurheganya embuganano?

• Gurhe wakarheganya y’ohana echishubizo oku mbuganano?