Misole Wee, Mugenderere Kujira Amaja-mbere Enyuma y’Okubatizwa

1. Bintu binene bihe binja emisole yakolere?

BULI mwaka, ebihumbi by’emisole binabatizwa n’okuba Bakristu. Ka warholere eyola ntambu? Akaba ntyo ku bili, bene-benyu na bali-benyu b’ekiroho bachishingiire woyo, na Yehova naye achishingiire woyo! (Mez. 27:11) Orhange owaze oku bintu bingana gurhe wakolere. Omufano, nkabaga mu myaka minene wayigire Ebiblia n’obushiru. Ebi wayigire byakuyemezeze oku Ebiblia chili Chinwa cha Mungu. Aliko ech’akamaro bwenene, wahikire kumenya n’okuzigira Owayandikisaga echola chitabu chichesibwa, k’okuderha, Ebiblia. Obuzigire bwawe ku Yehova bwakomera bwenene kuhika aha wahaniraga akalamo kawe emwage wanabatizwa. Walirholere omuhigo gwinja orhakalola!

2. Bichi rhwaganirako mu gunola mwazi?

² Embere obatizwe walihurene ebibazo bikomere byakakubuzize kugendereza obwimana bwawe emwa Yehova. Aliko, ok’onali wagenderera kukula, wahurana ebigeregezo bihyahya. Shetani achihangana kuhoza obuzigire bwawe ku Yehova n’okuchihangana kukubuza omenye wagenderera kumukolera. (Efe. 4:14) Orhakwanene kuyemera ebyola bikuhikire. Bichi byakakurhabala ogenderere kubera mwimana emwa Yehova n’okuyeneza echilagane wajiraga ch’okumukolera? Okwanene kugenderera kujira okwawe koshi y’ohikira kuba Mukristu okulire ekiroho. (Ebr. 6:1) Aliko, nka gurhe wakajira ntyo? Echola chirhwaganirako mu gunola mwazi.

BICHI BYAKAKURHABALA OJIRE AMAJA-MBERE M’EKIROHO WOYO NKA MUKRISTU?

3. Bichi Abakristu boshi bakwanene kujira enyuma y’okubatizwa?

³ Enyuma y’okubatizwa, rhweshi rhukwanene kukulikira ehano entumwa Paulo ahaga ababo Bakristu b’omu Efeso. Abaheba omurhima babe Bakristu “bakulire.” (Efe. 4:13) Omu bindi binwa, aliri ababwira, ‘Mugenderere kujira amaja-mbere.’ Rhwakayunva bichi Paulo alonzaga kuderha amango rhwamahuzanya okuntu omuntu anakula ekiroho n’okuntu omwana anakula. Abazere banasima akabonjo kabo n’okuchivugirako. Aliko oyo mwana arhabera kabonjo esiku n’amango. Nji hagera amango alekana “n’engeso z’omwana mudorho.” (1 Ko. 13:11) Intyo ku bili oku bilolere Abakristu nabo. Enyuma y’okubatizwa rhukwanene kugenderera kujira amaja-mbere. Rhushambalage ku mahano maguma makarhurhabala kujira ntyo.

4. Ngeso ehe nyinja yakakurhabala ojire amaja-mbere m’ekiroho? Ofasiriye. (Wafilipi 1:9)

⁴ Okuze obuzigire bwawe ku Yehova. Ozigire Yehova bwenene. Aliko obuzigire omugwerhe ko bwakashuba kukomera bwenene. Nka gurhe? Entumwa Paulo aliyerekene njira nguma, nk’oku biyerekenwe omu Wafilipi 1:9. (Osome.) Paulo asalira ok’obuzigire bwa Abanya-filipi “bugenderere kuluga bwenene bwenene.” Bobola, obuzigire bwerhu ku Yehova bwakagenderera kuyushuka bwenene. Nka gurhe rhwakajira ntyo? Rhwakajira ntyo omu kugenderera kugwarha “obumenyi burhagwerhe magosa n’oburhegerezi buyenere.” Oku rhuli rhwagenderera kumenya Yehova, kurhwanagenderera kumuzigira, n’okusiima engeso zage n’okuntu anajira ebintu. Enyorha yerhu y’okumusimisa yanaba nene, rhurhakanalonza chiro kujira chintu chilebe chakamuvuna omurhima. Rhwanajira okwerhu koshi yirhumenya bichi alonzeze rhujire n’okuntu rhwakabijira.

5-6. Nka gurhe rhwakagenderera kukuza obuzigire bwerhu ku Yehova? Ofasiriye.

⁵ Yesu aliyiganyire engeso za Yehova oku bushinganyanya. Bobola, amango rhwamahikira kumenya Yesu bwinja, rhwanazigira Yehova naye bwenene. (Ebr. 1:3) Enjira nyinja bwenene rhwakamenyamo bwinja Yesu, kuli kuyiga ebitabu bine bye Injili. Akaba orhaza rhondera soma Ebiblia buli lusiku, wakahwanza yisoma omu kuhwanziza oku bitabu biganirire oku ngani ya Yesu. Amango oli wagenderera kusoma oku ngani ziganirire eju ya Yesu, oseze obwenge bwawe oku ngeso zage. Abantu baliri bachiyunva huru kumuyegera, analiri arhola abana omu fune zage n’obuzigire. (Mk. 10:13-16) Yesu aliri mwinja na mwira; n’echola chaliri charhuma abanafunzi bage bachiyunva huru kumuyegera n’okumubwira okuntu baliri bachiyunva. (Mt. 16:22) Omu kujira ntyo, Yesu aliri ayiganya Eshe w’embingu. Yehova naye ali wakuyegerwa juba-juba. Rhwakamuyegera kugerera esala. Rhwakamubwira amawazo merhu moshi n’okuntu rhuli rhwachiyunva kugerera esala. Rhuchizerere oku arhakarhubona kubi amango rhwamajira ntyo. Arhuzigiire; anarhulagireko.​—1 Pe. 5:7.

⁶ Yesu aliri ayunvira abantu obonjo. Entumwa Matayo aliderhere ntya: “Amango abona ebigusho by’abantu, abayunvira obonjo bulala baliri nk’abakulirwe k’oluhu n’okukabulwa eyi n’eyi nka ntama zirhaherhe mungeri.” (Mt. 9:36) Na nka gurhe Yehova anachiyunva? Yesu aliderhere ntya: “Darha oli omu mbingu arhakasima hakajira n’amuguma mw’abala badorho asherere.” (Mt. 18:14) Ebyola binwa birhusimisize bwenene bulala birhuyerekere oku Yehova arhuzigire bwenene. Oku rhuli rhwagenderera kumenya Yesu bwinja ku n’obuzigire bwerhu ku Yehova bwagenderera kuyushuka.

7. Nka gurhe okugeza akasanzi haguma n’Abakristu bakulire ekiroho kwakakurhabala?

⁷ Wakashuba yiga binene omu kuyerekana obuzigire n’okujira amaja-mbere m’ekiroho amango oli wageza akasanzi haguma na bene-berhu na bali-berhu bakulire ekiroho b’omu chibaga chawe. Orhegere bichi bibalerhere busime bunene. Barhali bachiganya oku bilolere omuhigo barholere g’okukolera Yehova. Obabwire bakubwire oku bibagereremo omu kasi ka Yehova. Amango bikuhemere orhole omuhigo gw’akamaro, obaheme empanulo. Omu kuderha okuli, “ebintu binagenda bwinja kugerera bahanuzi banene.”​—Mez. 11:14.

8. Gurhe wakajira nka wamagwarha engangane oku bilolere eby’Ebiblia ederhere?

⁸ Ohime engangane zawe. Nk’oku rhwabibwene omu chifungo cha 2, Shetani ajira okwage koshi y’akubuza oleke kujira amaja-mbere m’ekiroho. Njira nguma akajira mo ntyo, kuli kurhuma wagwarha engangane oku bilolere enyigirizo ziguma ze Biblia. Omufano, nkabaga bantu baguma nji bachihangana kukuyemeza oku arhali Mungu yi warhulemaga n’oku rhuliho kugerera empindamuko. Amango walichiliri mwana, nkabaga orhakazaga biwazako, aliko zene, abalimu bawe bakala bali bakuyigiriza byo oku masomo. Aliko nkabaga barhanasaga kulonza chiro kumenya akaba Omulemi abaho changwa nanga. Oyibuke akanuni kali omu Mezali 18:17: “Omuntu orhanga kuderha olushinja lwage, anabonekana nka ye wayazize, kugera ah’owabo ayinja n’okumubaza ebibazo.” Ahali h’okufi chakuyemera konyine ebi wayunvirhe oku masomo, oyige enyigirizo z’okuli zili omu Chinwa cha Mungu, Ebiblia. Olonze emyazi omu bitabu byerhu. Oganire na bene-berhu na bali-berhu baliyemerere mira enyigirizo z’empindamuko. Obabaze bichi byabayemezaga oku hali Omulemi orhulagireko. Ezola ngani zakakurhabala ogerereze ebintu biyemezeze oku haba Omulemi.

9. Bichi omufano gwa Melissa gwakuyigirize?

⁹ Mwali-werhu muguma oyirikirwe Melissa aliyigire emyazi elolere obulemi yamurhabalaga ahime engangane zage.b Aderhere ntya: “Oku masomo, abalimu banayigiriza enyigirizo z’empindamuko omu kuntu zanabonekana nka zinaba z’okuli. Burhanzi, ntalilonzeze kumenya emyazi oku bilolere empindamuko bulala naliri nayubaha oku hali okuntu nakabugana oku empindamuko eli y’okuli. Aliko nawaza oku Yehova arhalonzeze rhumukolere nka mpumi. Bobola nahwanza kulonza emyazi oku bilolere empindamuko. Nasoma echitabu Je, Kuna Muumba Anayekujali? (Ka Hali Omulemi Okulagireko?) n’ebronshire Uhai Ulitokana na Muumba? (K’Akalamo Kalemwaga Si?) na Maswali Matano Muhimu Kuhusu Chanzo cha Uhai (Bibazo Birhano by’Akamaro oku Bilolere Omurhondero gw’Akalamo). Echola chinanalikenere kweri. Kwakabere kwinja nka najiraga ntyo kurhenga mira.”

10-11. Bichi byakakurhabala ogenderere kuhima amashumi mabi? (1 Watesalonike 4:3, 4)

¹⁰ Ochilange n’olugenzi lubi. Amango oli omu myaka y’olubiriko, enyifinjo z’okujira echijiro ch’obuhya zakaba zinene bwenene, na mango maguma abandi bakakushumika ojire obubaraga. Echola chi Shetani alonzeze ojirage. Bichi byakakurhabala ogenderere kuhima amashumi? (Osome 1 Watesalonike 4:3, 4.) Omu masala mawe wenyine, obwire Yehova okuntu oli wachiyunva. Omubwire okuntu kweri oli wachiyunva onamuheme akuhe emisi. (Mt. 6:13) Oyibuke oku Yehova analonzeze kukurhabala s’arhali kukuhana. (Zb. 103:13, 14) Kandi wakashuba kulonza oburhabale omu Chinwa cha Mungu. Melissa rhwashambalagako burhanzi, aliri alwisa amawazo m’eby’eshonyi. Aderhere ntya: “Okusoma Ebiblia buli lusiku kwalintabere ngenderere kulwisa ezola nyifinjo zani zibi. Kwanyibusa oku ndi wa Yehova na ndonzeze okumukolera omu kalamo kani.”​—Zb. 119:9.

¹¹ Orhalonzaga kumala ebibazo byawe oku bwenge bwawe-bwawe wenyine. Oganire n’abazere bawe oku bilolere echibazo chawe. Birhaba biyorohere okushambala nabo oku myazi eli nk’eyola, aliko kweri kuli kw’akamaro okujira ntyo. Melissa aderhere ntya: “Nasalira yingwarha obushiru, naho naja nashambala na Darha oku bilolere echibazo chani. Enyuma y’okujira ntyo, nachiyunva bwinja bwenene. Nalimenyere oku Yehova achishingiire nyono.”

12. Nka gurhe wakarhola esimikiro zinja?

¹² Oleke amakanuni me Biblia makuyerekeze. Oku wanagenderera kukula, abazere bawe bayinja bakuleka ojire eby’olonzeze. Aliko omenye oku hachili bintu binene orhaza menya. Nka gurhe wakachilanga y’orhajira amagosa makahanyagaza obwira bwawe haguma na Yehova? (Mez. 22:3) Mwali-werhu muguma oyirikirwe Karine, afasiriye ebyamurhabalaga arhole esimikiro zinja. Omukristu okulire ekiroho arhakenere amarhegeko ku buli chintu omu kalamo kage. Aderhere ntya: “Nkenere okuyunva amakanuni m’Ebiblia ahali h’okumenya amarhegeko konyine.” Amango oli wasoma Ebiblia, ochibaze ntya: ‘Bichi olula lwandiko lunyigirize oku bilolere amawazo ma Yehova? Ka muli akanuni kakantabala inkole ebintu bisimisize Yehova? Nyungu zihe napata amango namakolesa amola makanuni?’ (Zb. 19:7; Isa. 48:17, 18) Omu kusoma Ebiblia n’okukengeera oku makanuni mayo, wabona oku bikuyorohere kurhola esimikiro zisimisize Yehova. Ok’onali wagenderera kujira amaja-mbere m’ekiroho, ku wanabona oku birhakuhemere ohabwe amarhegeko mu buli choshi bulala wab’omenyere amawazo ma Yehova oku bilolere echola.

13. Nka gurhe abera benja bakakurhabala? (Mezali 13:20)

¹³ Ochishoge abera bazigiire Yehova. Nk’oku rhwashambalaga burhanzi, abera wakachishoga bakakurhabala obe Mukristu okulire ekiroho. (Osome Mezali 13:20.) Mwali-werhu muguma oyirikirwe Sara abaga ahezeze omwishingo gwage. Bobola chintu chiguma charhengerera chamurhabalaga ashube agwarhe omwishingo gunene. Sara ashambere ntya: “Nagwarha abera bahyahya omu kasanzi kakwanene. Buli boso, rhwaliri rhwayiga Omunara g’Omulanzi haguma na mwali-werhu ochili musole. Owindi mwira-wani antabala mpwanze kuhaana ebishubizo oku mbuganano. Abola bera bani bantabala mpwanze kubona okw’efunzo lyani-lyani n’okusalira, bili bintu by’akamaro bwenene. Nahwanza gwarha obwira bukomere haguma na Yehova, na nashuba kugwarha omwishingo.”

14. Bichi Julien ajiraga y’agwarha abera benja?

¹⁴ Nka gurhe wakajira obwira haguma n’abantu bakakurhabala ojire ebintu binja omu kalamo? Julien oli mushamuka w’echibaga zene aderhere ntya: “Amango nalichiliri musole, nalijirire obwira n’abantu benja amango naliri nahubiri nabo. Abola bera baligwerhe obushiru omu kasi k’okuhubiri banantabala imbone omwishingo omu kasi k’okuhubiri. Nahwanza waza oku muhigo g’okukola akasi k’amango moshi. Kandi narhegera oku ntaligwerhe bera banene benja, bulala naliri nalonza abera b’omu myaka yani. Buzinda, nashuba kujira abandi bera b’oku Beteli. Omufano gwabo gwayinja gw’antabala nyinje namenya eby’okuchisimisa, n’echola charhuma nayegera bwenene Yehova.”

15. Mukonge guhe Paulo ahaga Timoteo oku bilolere abera? (2 Timoteo 2:20-22)

¹⁵ Gurhe wakajira nka wamarhegera ok’okukomerana na muntu mulebe omu chibaga kwakahanyagaza obwira bwawe haguma na Yehova? Paulo alimenyere oku bantu baguma omu chibaga barhakagwarha amawazo n’ebijiro bili nka by’Omukristu, bobola abwira Timoteo achiyase n’abola bantu. (Osome 2 Timoteo 2:20-22.) Obwira bwerhu haguma na Yehova buli bw’akamaro bwenene. Rhwachihanganire bwenene yirhugwarha obwira bukomere haguma na Yehova, bobola rhurhakwanene kuleka obwindi bwira boshi-boshi buhanyagaze obwira bwerhu haguma na Yehova.​—Zb. 26:4.

NKA GURHE OKUCHIHEBERA H’EMIHIGO KWAKAKURHABALA OJIRE AMAJA-MBERE M’EKIROHO?

16. Mihigo nyabachi okwanene kuchiheberaho?

¹⁶ Ochihebere h’emihigo y’akamaro. Ochishoge emihigo y’okukomeza obwemere bwawe n’okukurhabala obe Mukristu okulire ekiroho. (Efe. 3:16) Omufano, wakarhola omuhigo g’okujira efunzo lyawe-lyawe wenyine n’okusoma Ebiblia buli lusiku. (Zb. 1:2, 3) Changwa wakachihangana oyinje wasalira buli mango n’omurhima gwawe goshi. Nkabaga bikuhemere okenguke oku bilolere okuntu onachishoga eby’okuchisimisa nabyo n’okuntu onakolesa ebisanzi byawe. (Efe. 5:15, 16) Amango Yehova ali abona oli wachihangana bwenene kujira amaja-mbere, ayunva asimisizwe bwenene.

17. Bichi okurhabala abandi kwa kulerhera?

¹⁷ Waba Mukristu okulire bwenene ekiroho, amango oli warhabala abandi. Yesu aliderhere ntya: “Hali busime bunene bwenene omu kuhaana olekere omu kuhaabwa.” (Mdo. 20:35) Wagwarha busime bunene amango oli wakolesa akasanzi kawe n’emisi yawe y’omu busole y’okurhabala abandi. Omufano, wakachihebera h’omuhigo g’okurhabala abakala bashaja n’abagwerhe obulema bali omu chibaga chawe. Nkabaga wakabajira omu soko kuji bagulira ebintu, changwa kubarhabala bamenye kukolesa ebikoleso byabo by’echielektronike nk’etelefone, etablete changwa e ordinatere yabo. Akaba oli mwene-werhu, wakachihebera h’omuhigo g’okuba mugwasi w’akasi na ntyo, y’ogala kurhabala bene-benyu na bali benyu. (Flp. 2:4) Kandi, wakayerekana obuzigire oku bandi omu kuganira nabo oku bilolere emyazi minja y’Obwami. (Mt. 9:36, 37) Akaba byakagalikana, wakachihebera h’omuhigo g’okukolera Yehova omu kasi k’amango moshi.

18. Nka gurhe okukola akasi k’amango moshi kwakakurhabala ojire amaja-mbere m’ekiroho?

¹⁸ Akasi k’amango moshi kakakuha orozo lunene l’okujira amaja-mbere m’ekiroho. Okuba painiya kwakakufungulira omulyango g’okuji soma Amasomo m’Abayeneza Injili y’Obwami. Kwakakurhabala okole oku Beteli changwa oku kasi k’okuyumbaka k’echiteokrasi. Mwali-werhu muguma ochili musole w’omupainiya oyirikirwe Kaitlyn aderhere ntya: “Okugeza akasanzi omu mahubiri haguma na bene-berhu na bali-berhu bagerere mu binene, chaliri chintu ch’akamaro cha ntabalaga njire amaja-mbere m’ekiroho enyuma y’okubatizwa. Omufano gwabo gwantabere nyongere obumenyi bwani oku bilolere Ebiblia na nkomeze obufundi bwani b’okuyigiriza.”

19. Migisho ehe wagwarha ok’onali wagenderera kujira amaja-mbere m’ekiroho?

¹⁹ Ok’onali wagenderera kujira amaja-mbere m’ekiroho, wagwarha migisho minene. Orhaba oli wakolesa emisi yawe omu kujira ebintu birhagwerhe kachiro. (1 Yo. 2:17) Wayaka obuhanya bunahikira omuntu amango amarhola esimikiro zibi. S’ahubwe, wagwarha akalamo kenja n’obusime. (Mez. 16:3) Omufano gwawe gwinja gwaheba bene-benyu na bali-benyu omurhima, emisole n’abakala bakulire. (1 Ti. 4:12) N’ech’akamaro bwenene, wagwarha omurhula n’omwishingo omuntu anapata amango ali asimisa Yehova n’okugwarha obwira bukomere haguma naye.​—Mez. 23:15, 16.