Efoto ya hofi-hofi n’estrade n’echitambara chili enyanya
1922 Hamagera Myaka 100
“MUNGU . . . Arhuhere . . . obuhimanyi kugerera . . . Yesu Kristu.” (1 Ko. 15:57) Ebyola binwa, by’ebyachishogagwa nka lwandiko l’omwaka gwa 1922, byaliyibwise Abanafunzi be Biblia oku Yehova akabahembere eju y’obwimana bwabo. Mw’ogola mwaka Yehova alihembere abola bahubiri bagwerhe obushiru. Yehova alibagishire amango barhondera kuchapa (imprimer) ebitabu n’okubishomeka bonyine, kandi baliri bakolesa eradio yibahisa emyazi minja y’Obwami hale. N’oku buzinda b’omwaka gwa 1922, kandi byalibonekene bwinja oku Yehova alishubire kugisha abantu bage. Abanafunzi be Biblia balijirire embuganano nkulu erhakayibagirwa omu Cedar Point, Ohio, Etats-Unis. Ebyabaga kw’eyola mbuganano byalirhabere aku kasi k’olubaga lwa Yehova kurhenga agola mango na kuhika zene.
“EWAZO LISIMISIZE BWENENE”
Amango bantu banene baliri bahubiri, bene-berhu na bali-berhu baliri bakenera bitabu binene bwenene. Bene-berhu b’oku Beteli ye Brooklyn baliri bakula amagazeti, aliko balichili bakolesa amakompanyi m’abachuruzi omu kuchapisa ebiganda by’ebitabu. Mu myezi minene ekompanyi erhaliri yabakulira ebitabu bitosheze by’okukolesa omu kasi k’okuhubiri, Mwene-werhu Rutherford abaza Mwene-werhu Robert Martin, waliyumangire oruzini, akaba byakagalikana bagende bachikulira ebitabu bowe bonyine.
Oruzini l’omu Concord Street, Brooklyn, New York
Mwene-werhu Martin ayibukire ntya: “Elyola wazo lyalisimisize bwenene, bulala rhwakafungwire olwerhu ruzini l’okukula ebitabu.” Bene-berhu barhola enju y’okukoleramo y’okulipira oku barabara lye 18 omu Concord Street omu Brooklyn, banabona ebikoleso byoshi balibakenere.
Bantu baguma barhalisiimire bulala rhukola kuhwanza kuchikulira rhwenyine ebitabu byerhu. Owaliyumangire oruzini lwaliri lwarhukulira ebitabu, ayinja kurhulambagirira oku ruzini lwerhu luhyahya. Arhubwira ntya: “Mugwerhe amashini menja bwenene m’okukula ebitabu, aliko nta muntu mugwerhe omenyere kumakolesa. Mu myezi ndarhu yonyine mwaba eyi mwamamayirha moshi.”
Mwene-werhu Martin aderha ntya: “Byalibonekene nk’eby’olala mulume aderhega byakaba by’okuli, aliko rhwalichizerere oku Yehova arhurhabala nk’oku anarhula ajira, nantyo kwanalijirire.” Ebi Mwene-werhu Martin aderhaga byaliri byokuli. Buzira kulegama oruzini lwerhu lwarhondera kukula ebitabu 2 000 oku lusiku.
Abakozi bayumangire ahaburhambi bw’amashini mabo m’okuchapa ebitabu omu ruzini
EMYAZI MINJA ELI YAHIKIRA EBIHUMBI BY’ABANTU KUGERERA ERADIYO
Olekere okuchikulira bitabu biguma byonyine, abantu ba Yehova barhondera kukolesa eyindi njira y’okuyeneza emyazi minja, k’okuderha, Eradiyo. Enyuma y’emidi y’Olwamungu, Siku 26 Mwezi gwa 2, 1922, Mwene-werhu Rutherford aderhera oku radio ob’oburhanzi. Ageza ejambo oku radio ye KOG omu vile Los Angeles, Californie, Etats-Unis lyaliderhere “Amamiliyoni Malamire Zene Marhakafa Chiro”
Bantu bahikire ku 25 000 balikulikiire eyola programe. Baguma mubo baliyandikire mwene-werhu Rutherford amaruba m’okumubwira koko kw’elyola jambo agezaga. Maguma mw’amola maruba maliri ma Mwene-werhu Willard Ashford, olamire omu Santa Ana, Californie. Alibwirire Mwene-werhu Rutherford koko oku jambo agezaga “lisimisize lyanaliri lyakamaro.” Naho ayongera ntya: “Ahamwani haliri balwala basharhu barhakagalire kurhenga ahambuga. Bobola rhurhakagalire kuyinja kukulikira elyola jambo nachiro oku hakabere hali hofi nahamwerhu, olekere kugerera ogula mupango.”
Mandi majambo manene maligerere omu maboso makulikiragaho. Oku buzinda b’omwaka gwa 1922, Omunara g’Omulanzi gwaliderhere oku “hofi bantu 300 000 [baliyunvirhe] emyazi minja kugerera [eradiyo].”
Amaruba n’ebinwa bababwiraga byalibahebere omurhima, naho Abanafunzi be Biblia bahigirira kuyumbaka eyabo nju eradiyo lyakakoleremo oku Chizimba che Staten harhali hale ne Beteli ye Brooklyn. Omu myaka yakakulikire, Abanafunzi be Biblia bakakoleseze elyola radiyo lyaliyirikirwe, WBBR, yibayeneza emyazi minja y’Obwami ku bantu banene n’oku hantu halengene.
“ADV”
Omu siku 15, Mwezi gwa 6, 1922, egazeti y’Omunara g’Omulanzi yaderhere oku hakabere embuganano nkulu yakamalire siku 8 omu Cedar Point, Ohio, kurhangira siku 5-13 Mwezi gwa 9, 1922. Abanafunzi be Biblia baliyunvirhe basimire bwenene amango bahika kw’eyola mbuganano omu Cedar Point.
Omu jambo lyage lirhanzi, Mwene-werhu Rutherford abwira abunviriza bage ntya: “Inchizerere oku Mungu agisha enola mbuganano kandi achizera oku obuhamirizi bukomere bw’emyazi minja bwahanirwe kulusha oku burhasagihanwa hanola oku gulu.” Abaliri bageza amajambo kw’eyola mbuganano boshi balihebere bene-berhu na bali-berhu omurhima bagenderere kuhubiri.
Bantu banene bali oku mbuganano y’omu mwaka gwa 1922 omu Cedar Point, Ohio
Lwakarhano omu siku 8, Mwezi gwa 9, bantu 8 000 bahika kw’eyola mbuganano bayunjula omu chumbi bajiriragamo embuganano, balisimire bwenene kuyunviriza ejambo lya Mwene-werhu Rutherford. Balilangalire oku bamenya amafasiriyo m’eherufi “ADV,” zaliyandikirwe oku programe zabo. Oku banaliyikere ahola, baguma baliri babona echitambara chizingirwe enyanya w’estrade. Arthur Claus, walilamire omu vile ye Tulsa, Oklahoma, Etats-Unis, alibalamire aja kw’eyola mbuganano, alipatire ahantu henja akayikere y’akulikira bwinja eyola programe, bulala byali bikomere kuyunva amajambo bula nta mikro zaliriho changwa amabafule m’okuyongera omulenge.
“Rhwaliri rhwayunviriza bwinja-bwinja buli chinwa”
Yibachizera oku ntaye wayinja vuruga eprograme, owaliyumangire eprograme atangaza oku ntabo bacherewa bakwanene kuja mw’elyola chumbi amango Mwene-werhu Rutherford ali ageza ejambo. Aha sa 9:30 esezi, Mwene-werhu Rutherford arhondera ejambo lyage omu kuderha ebinwa bya Yesu bili omu Matayo 4:17: “Obwami bw’embingu buli hofi.” Amango aliri aderha okuntu abantu bakayunvirhe oku bilolere obola Bwami, aderha ntya: “Yesu aliderhere oku amango m’okubaho kwage akayerekeze akasi k’okushalula abantu bage, omu mango akagushire haguma ab’okuli banali bemana.”
Mwene-werhu Claus, waliyikere omu chumbi lizibuzibu omu ejambo lyaliri lyagezezwamo, ayibukire ntya: “Rhwaliri rhwakulikira bwinja-bwinja buli chinwa chaliri chaderhwa kw’eyola mbuganano.” Aliko h’anaho, Mwene-werhu Arthur achiyunva kubi n’okuhuluka omu chumbi embuganano yaliri yagezezwamo. Chiro akaba oku arhalilonzeze kurhengamo, bulala alimenyere oku barhakachimuyemerere ashube galukamo amango Mwe-werhu Rutherford alichiliri ageza ejambo lyage.
Hagerere kasanzi kageke, ahwanza kuchiyunva bwinja. Aderha oku amango aliri agaluka oku chumbi, ayunva abantu bali bakubira bwenene. Ayunva asimiire bwenene! Ahigirira oku ayunviriza elyola jambo lyoshi lyalisimisize chiro akaba bimuhemere kushona mpaka enyanya w’echumbi. Mwene-werhu Claus, musole waligwerhe myaka 23 amola mango, abona gurhe akashona kw’eyola nju. Aderha oku, bulala edirisha ly’okuchisusu ly’okulerha omwangaza omu nju lyalifungwirwe n’okubayegera abali omu chumbi, echola chamurhabala ayunvirize bwinja elyola jambo.
Aliko Arthur arhaliri yenyine. Bandi bera bage baguma nabo baliri oku chisusu. Muguma mubo aliri Frank Johnson, amuyegera n’okumubaza ntya: “K’ogwerhe akanefu omu mufuko gwawe?”
Arthur aderha: “Nechi nkagwerhe.”
Frank aderha: “Oli chishubizo oku masala merhu. K’obwene echila chitambara? Chili chimanyiso, chishwekerwe kw’agala makamba. Oyunvirize bwinja-bwinja Omuzuzi.a Hanola aderha, ‘munakwanene kutangaaza, kutangaaza’ naho wanacha amala makamba.”
Arthur, arhola akanefu kage yewe n’abera bage bagenderera kuyunviriza Mwene-werhu Rutherford kuhika amango aderha ebinwa byakamuyerekere oku akasanzi kamagera ache amakamba m’echola chitambara. Mwene-werhu Rutherford aligwerhe mwishingo gunene na bushiru bunene na nkabaga aliderhere n’omulenge gw’enyanya amango aderha ntya: “Mube bimana na bahamirizi b’okuli emwa Waliha. Mugendereze entambala kugera amango amadini m’obubeshi malimbulwe loshi. Muhubiri obula burhumwa buli hoshi. Egulu likwanene kumenya oku Yehova ye Mungu n’oku Yesu Kristu ali Mwami w’abami na Waliha waba waliha. Akala kali kasanzi k’akamaro bwenene omu ngani yoshi y’abantu. Mulole, Omwami ali arhambula! Mukwanene kubwira buli muntu ogola mwazi. Bobola, mutangaaze, mutangaaze, mutangaaze, Omwami n’Obwami bwage!”
Arthur aderha oku yewe n’abandi bene-berhu bacha amakamba n’echola chitambara chachizingula n’okuyandagala kubuya-buya. Wakasomere kwe’chola chitambara chaligwerhe e herufi “ADV; mutangaaze Omwami n’Obwami bwage.” Eherufi “ADV” chaliri chifupi n’echinwa ch’Echingireza ‘advertise’ chiderhere ‘kuhubiri’ changwa ‘kuhamiriza.’
AKASI K’AKAMARO
Embuganano y’omu Cedar Point yalirhabere bene-berhu na bali-berhu baseze obwenge bwabo oku kasi k’akamaro k’okuhubiri Obwami, na balala baligwerhe obulonza baligwerhe obusime b’okujira ntyo. Kolportere muguma (okala ayirikirwe zene painiya w’okukahunda) w’omu Oklahoma, Etats-Unis, ayandika ntya: “Rhwaliri rhwahubiri omu eneo bantu banene baliri bakola akasi k’okuhumba e Charbon banaliri bakene bwenene.” Aderha oku amango abantu baliri bayunva oburhumwa bwaliri omu gazeti Age d’Or, “baliri balaka.” Ayongera, “k’oku barhuliriza guli mugisho.”
Abanafunzi be Biblia babona oku banakwanene kukola nk’oku ebila binwa bya Yesu bili omu Luka 10:2 biderhere: “Emyaka y’okushalulwa elugire, aliko abakozi bali bageke.” Ok’ogola mwaka gwaliri gwayerekeza oku buzinda, Abanafunzi be Biblia balihigirire bwenene kuyamamaza oburhumwa b’Obwami buli hoshi omu gulu.
a Mango maguma Mwene-werhu Rutherford aliri ayirikwa “Muzuzi” bulala alikolere mango malebe nka muzuzi omu provense y’Emissouri, omu Etat-Unis.