Okuntu Yehova Anashubiza Amasala Merhu

1-2. Bichi rhwakachibaza oku bilolere amasala merhu?

WACHIGERERE kuchibaza akaba Yehova ali ashubiza amasala mawe si? Akaba ntyo ku bili, omenye oku arhali wenyine. Bene-berhu na bali-berhu banene banachibaza ntyo, ahanene amango baliri bahurana ebibazo. Akaba rhuli rhwalibuka, nerhu rhwakabona oku bikomere okurhegera oku Yehova ali ashubiza amasala merhu.

² Rhwaganira bulagurhe rhwakachizera oku Yehova anashubiza amasala m’abanamukolera. (1 Yo. 5:15) Kandi rhwashubiza kw’ebila bibazo bikulikire: Bulagurhe byakabonekana mango maguma oku Yehova arhali ashubiza oku masala merhu? Njira zihe Yehova ali akolesa omu kushubiza oku masala merhu zene?

HALI OKU YEHOVA ARHAKASHUBIZA OMU BULYO RHWALILANGALIRE

3. Bulagurhe Yehova alonzeze rhusalire emwage?

³ Amandiko marhuyemezeze oku Yehova arhuzigire bwenene n’oku anarhubona oku rhuli bantu b’akachiro emwage. (Hag. 2:7; 1 Yo. 4:10) Eyola y’empanvu erhumire arhubwira oku rhumuheme oburhabale omu sala. (1 Pe. 5:6, 7) Alonzeze kurhurhabala rhuyorhe hofi naye n’okulembera ebibazo rhuli rhwahurana.

4. Nka gurhe rhumenyere oku Yehova anashubiza oku masala m’abantu banamuharamya? (Olole n’efoto.)

⁴ Omu Biblia, rhunazigana kusoma okuntu Yehova aliri ashubiza amasala b’abakozi bage. Hali omufano oyibukire si? Mufano muguma ali Mwami Daudi. Aligwerhe banzi banene babi omu kalamo kage koshi, analiri azigana kuhema Yehova oburhabale kugerera esala. Mango maguma, alilakirire Yehova ntya: “Yehova wee, oyunvirize esala lyani, oyunve omulenge gwani g’okuhema oburhabale. Omu bwimana bwawe n’okunali kwawe onshubize.” (Zb. 143:1) Yehova ashubiza oku masala ma Daudi m’okuhema amuyokole. (1 Sa. 19:10, 18-20; 2 Sa. 5:17-25) Echola che charhumaga Daudi aderha ntya oku bwizere: “Yehova ali haguma na balala boshi banamuhamagala.” Nerhu rhwakagwarha obwizere buli nk’obola.​—Zb. 145:18.

5. Mira, ka Yehova aliri azigana kushubiza amasala m’abakozi bage okuntu balilangalire? Lerha omufano. (Olole n’efoto.)

⁵ Hali okuntu Yehova arhakashubiza amasala merhu omu njira rhwalilangalire. Eyola y’ehali yahikiraga entumwa Paulo. Aliri ahema Mungu amukule “omushaki omu mubiri.” Kasharhu koshi, Paulo aliri asalira bwenene eju y’echola chibazo. Ka Yehova alishubize oku masala mage? Nechi. Aliko arhali okuntu Paulo alilangalire. Ahali h’okumukulira echola chibazo, Yehova alimuhereze emisi akenere y’okugenderera kumukolera oku bwimana.​—2 Ko. 12:7-10.

6. Mango maguma, nka gurhe byakabonekana oku Yehova arhali ashubiza oku masala merhu?

⁶ Hali mango nerhu rhwakapata echishubizo oku masala merhu chirhali kuguma n’ebirhwalilangalire. Rhwakachizera oku Yehova amenyere okuntu akarhurhabala omu njira ekwirire bwinja bwenene. Akajira “[chiro] binene bwenene kulusha ebirhwamuhemaga changwa ebirhuwazize.” (Efe. 3:20) Eju y’echola, echishubizo cherhu chakayinja omu kasanzi changwa omu njira rhurhaliwazize.

7. Bulagurhe byakarhuhema rhuhindamule ebi rhuli rhwahema omu sala? Lerha omufano.

⁷ Rhwakahindamula ebi rhuli rhwahema omu sala okurhunali rhwarhegera bwinja-bwinja obulonza bwage. Rhuganire oku mufano gwa Martin Poetzinger. Siku zigeke amalire kushaba, Mwene-werhu Poetzinger ashwekwa omu nkambi k’amalibuko k’Abanazi. Burhanzi, aliri ahema Yehova amurhabale ashwekulwe omu nkambi k’amalibuko, y’agala kushishikala mukage, n’okushuba kugalukira akasi k’amahubiri. Aliko, enyuma w’amaboso mabiri, nta njira yoshi-yoshi Yehova aliyerekene oku alirheganyize y’okumushwekula. Bobola ahwanza kusalira ntya: “Yehova wekalama wee, onyereke bichi olonzeze injirage.” Naho ahwanza kuwaza oku malibuko abandi bene-babo balibalembera omu nkambi. Banene mubo baliri balaga bwenene eju yabakabo n’abana babo. Mwene-werhu Poetzinger aj’asalira ntya: “Yehova, koko bwenene kw’enola ngabane mpyahya. Ontabale nkomeze bene-berhu n’okubaheba omurhima.” Mw’eyola myaka mwenda yakulikiragaho amalaga omu nkambi, aligenderere kujira ntyo!

8. Bintu bihe by’akamaro rhukwanene kuyibuka amango rhuli rhwasalira?

⁸ Rhukwanene kuyibuka oku Yehova agwerhe omuhigo, kandi aguyeneza omu kasanzi arheganyize. Ogola muhigo guheberemo okuntu nj’amala loshi-loshi ebibazo byoshi bili byarhuma rhwalibuka zene, k’okuderha ebibazo nk’ebinjira, amalwala, n’olufu. Yehova nj’ayeneza echola chilagane kugerera Obwami bwage. (Da. 2:44; Ufu. 21:3, 4) Aliko oku akola kasanzi kanahika, Yehova achilekere Shetani orozo l’okugenderera kurhambula linola gulu.b (Yoh. 12:31; Ufu. 12:9) Nka Yehova amalaga ebibazo byoshi abantu bali bahurana zene, byakabonekana nka Shetani ali arhambula bwinja egulu zene. Bobola, chiro akaba oku rhukwanene kulingiriza oku Yehova ayeneza ebilagane biguma, echola chirhaderhere oku arhulekere buzira burhabale. Rhuganire ku njira ziguma Yehova anakolesa omu kurhurhabala.

ENJIRA YEHOVA ANAKOLESA OMU KUSHUBIZA OKU MASALA MERHU ZENE

9. Nka gurhe Yehova akurhurhabala amango bihemere rhurhole esimikiro? Lerha omufano.

⁹ Anarhuhereza obwengehe. Yehova arhulaganyize oku arhuhereza obwengehe rhukenere yirhugala kurhola esimikiro zinja. Rhunakenera ahanene obwengehe burhengere emwa Mungu, amango rhuli rhwarhola esimikiro y’ebirhwakola omu kalamo, akaba rhwabera balamba changwa rhwashaba changwa kushabwa. (Yak. 1:5) Rhushambale oku mufano gwa mwali-werhu muguma ochili mulamba oyirikirwe Maria.c Aligwerhe obusiime b’okukola nka painiya w’oku kahunda amango abuganana na mwene-werhu muguma. Maria aderhere ntya: “Ok’obwira bwerhu bwaliri bwagenderera kukomera, kurhwanaliri rhwagenderera kusiimana buli muguma n’owindi. Nalimenyere oku nalikwanene kurhola esimikiro. Nasalira bwenene eju y’echola. Nalikenere obwerekezi bwa Yehova, aliko kandi nalimenyere oku arhali Yehova yi wakarholere esikimiko ahali hani.” Maria arhegera oku Yehova alishubize oku amasala mage m’okuhema obwengehe. Nka gurhe? Okw’anali alonza emyazi omu bitabu byerhu, abona emyazi yakamurhabala kupata ebishubizo oku bibazo byage. Kandi akulikira amahano m’obwengehe ma nyina waliri akolera Yehova oku bwimana. Amola mahano marhabala Maria agerereze okuntu aliri achiyunva. Bobola, okujira ntyo kwamurhabala arhole esimikiro y’obwengehe.

10. Nk’oku olwandiko lwa Wafilipi 4:13 luderhere, bichi Yehova anajira omu kurhabala abakozi bage? Lerha omufano. (Olole n’efoto.)

¹⁰ Anarhuhereza emisi y’okulembera. Nka kulala ajiriraga entumwa Paulo, Yehova anarhuhereza emisi rhukenere yirhulembera ebibazo byerhu. (Osome Wafilipi 4:13.) Waza okuntu Yehova arhabalaga mwene-werhu muguma oyirikirwe Benjamin alembere ebibazo byage. Benjamin aligezeze myaka minene y’obusole bwage eyibalamire yewe n’abantu b’omulala gwage omu nkambi z’empunzi omu Afrika. Benjamin aderhere ntya: “Naliri nasalira Yehova buli mango n’okumuhema ampe emisi y’okujira ebintu bimusimisize. Yehova ashubiza amasala mani omu kumpereza omurhula gwa ndani, obushiru b’okugenderera kuhubiri, n’ebitabu byantabala ngenderere kubera hofi naye.” Agenderere kuderha ntya: “Okusoma eby’aberhu Bahamirizi bagereremo n’okumenya okuntu Yehova abarhabalaga kulembera ebibazo byabo, kwantabala nani mpigirire kubera mwimana emwage.”

11-12. Nka gurhe Yehova akachishoga kukolesa bene-berhu na bali-berhu omu kushubiza oku masala merhu? (Olole n’efoto.)

¹¹ Anakolesa omulala gwerhu gw’Echikristu. Ebudufu, embere ahaane akalamo kage nka nterekero, Yesu asalira bwenene. Ahema Yehova amenye aleka abantu bawaza oku adukangire Mungu n’okumuchira olubanja eju y’echola. Ahali h’okujira ntyo, Yehova amurhabala omu kumurhumira muguma mu bene-babo, k’okuderha, malaika amuhebe emisi. (Lu. 22:42, 43) Nerhu Yehova akarhurhabala kugerera mwene-werhu changwa mwali-werhu wakarhuhamagala oku telefone changwa kuyinja kurhulambagirira. Rhweshi rhwakalonza akasanzi k’okubwira bene-berhu na bali berhu “echinwa chinja.”​—Mez. 12:25.

¹² Waza oku mufano gwa mwali-werhu oyirikirwe Miriam. Maboso mageke enyuma y’okufisa eba, Miriam ayorha yenyine omu nju eyanali achiyunva ahwererwe anagwerhe mugayo gunene bwenene. Aligenderere kulaka analikenere kugwarha omuntu akashambala naye. Aderhere ntya: “Ntaligwerhe chiro emisi y’okuhamagala muntu mulebe, naho nasalira emwa Yehova. Oku nanchili nalira n’okusalira, muntu mulebe ampamagala oku telefone. Aliri mushamuka muguma w’echibaga, mwene-werhu muzigirwa.” Oyola mushamuka na mukage barhuliriza Miriam. Achizerere oku Yehova yewarhumaga oyola mwene-werhu ahamagale.

13. Gurhe Yehova akakolesa balala barhamukolera omu kushubiza oku amasala merhu? Lerha omufano.

¹³ Akakolesa abantu barhamukolera. (Mez. 21:1) Mango maguma Yehova anashubiza amasala m’abantu bage omu kushunika abantu barhamukolera babarhabale. Omufano, alishunikire Mwami Artashasta ahereze Nehemia oruhusa l’okugaluka e Yerusalemu y’agala kurhabala oku kasi k’okuyumbaka buhya-hya eyola vile. (Neh. 2:3-6) K’onakuguma zene, Yehova akashunika balala barhamukolera yibarhurhabala amango rhuli omu bulagirire.

14. Nka gurhe ebi Soo Hing ageragamo bikuhebere omurhima? (Olole n’efoto.)

¹⁴ Mwali-werhu oyirikirwe Soo Hing alirhegerere oku Yehova amurhabere kugerera munganga wage. Omugala alilwere obulwala b’omu bwenge bukomere. Amango oyola mugala ajira e aksida ekomere bwenene, yewe n’eba baleka akasi kabo yibagala kumushishikala. Echola charhuma bagwarha echibazo ch’okubula efuranga. Soo Hing aderhere oku arhakachigalire kulembera akandi kahidiko kakalerherwe n’echola chibazo. Abwira Yehova byoshi byaliri omu murhima gwage n’omu kumuhema oburhabale. Oyola munganga arhola omuhigo g’okulonza okuntu akamurhabala yewe n’abantu b’omulala gwage. Echola charhuma apata oburhabale kurhenga oku burhegesi n’efasi ekwirire y’okulama. Enyuma waho, Soo Hing aderha ntya: “Rhwalichibwenere gurhe Yehova arhurhabere. Kweri ali ‘Munviriza w’esala.’”​—Zb. 65:2.

RHUKENERE OBWEMERE YIRHUBONA N’OKUYEMERA ECHISHUBIZO CHA YEHOVA

15. Bichi byarhabalaga mwali-werhu muguma arhegere oku Yehova aliri ashubiza oku masala mage?

¹⁵ Amasala merhu marhashubizwa buli mango omu njira zisomeze bwenene. Aliko ebishubizo rhunapata birhunaba rhukenere yirhugala kubera bemana emwa Darha w’embingu. Bobola, ochihangane kurhegera okuntu Yehova ali ashubiza amasala mawe. Mwali-werhu muguma oyirikirwe Yoko, aliri abona nka Yehova arhashubiza oku masala mage. Aliko amola mango arhondera kuyandika eliste y’ebintu aliri ahema Yehova. Enyuma wa kasanzi kalebe, alola mw’akola karne kage, arhegera oku Yehova ashubize ku manene omu masala mage, na chiro oku amushubize oku byabaga arhachiyibukire haba n’akatyu. Mango oku mandi, birhuhemere rhurhole akasanzi k’okukengera n’okuwaza okuntu Yehova ali ashubiza oku masala merhu.​—Zb. 66:19, 20.

16. Nka gurhe rhwakayerekana obwemere oku bilolere amasala merhu? (Waebrania 11:6)

¹⁶ Rhunayerekana obwemere arhali omu kusalira konyine, s’aliko n’omu kuyemera okuntu koshi-koshi arhushubize. (Osome Waebrania 11:6.) Rhuganire oku mufano gwa Mike na mukage, Chrissy. Baligwerhe omuhigo g’okukola oku Beteli. Mike aderhere ntya: “Nyono na mukani rhwajazize eformilere turu zinene n’okusalira emwa Yehova oku bilolere ogola muhigo, aliko barharhuhamagalaga.” Mike na mukage Chrissy baligenderere kuchizera oku Yehova amenyere bwinja-bwinja ngahe abakolesa omu kasi kage. Bajira okwabo koshi bakagala omu kugenderera kukola nka bapainiya b’okukahunda omu kurhabala omu eneo yalikenere abahubiri n’okurhabala oku kasi k’okuyumbaka k’olubaga lwa Yehova. Zene yibakola akasi k’okurhangula ebibaga. Mike aderhere ntya: “Yehova arhashubizaga amango moshi amasala merhu okuntu rhwalilangalire. Aliko alimashubize omu njira nyinja bwenene rhurhaliwazize chiro.”

17-18. Nk’oku olwandiko lwa Zaburi 86:6, 7 luderhere, bichi rhwakachizera?

¹⁷ Osome Zaburi 86:6, 7. Omwandisi w’ezaburi Daudi, alichizerere oku Yehova anayunviriza n’okushubiza amasala mage. Nawe wakagwarha obwizere buli nk’obola. Emifano rhwaganirireko mu gunola mwazi erhuyemezeze oku Yehova akarhuhereza obwengehe n’emisi rhukenere yirhugala kulembera. Akakolesa bene-berhu na bali berhu changwa abantu barhali bamukolera zene yibarhurhabala mu njira ndebe.

¹⁸ Chiro akaba oku hali mango Yehova arhakashubiza amasala merhu omu njira rhwali langalire, rhumenyere oku amashubiza. Arhuhereza ebirhukenere n’omu kasanzi kakwanene. Bobola ogenderere kusalira ey’onagwerhe obwemere oku Yehova akuyunviriza, ey’onachizerere oku akushishikala zene “n’okunjayeneza enyifinjo ya buli chintu choshi chilamire” omu gulu lihya-hya lyayinjire.​—Zb. 145:16.