Oku Bwirhohye Oyemere oku Hali eby’Orhenji

1. Buhashe buhe Yehova arhuhere, na bulagurhe?

YEHOVA arhulemere omu njira esomeze; rhwakagala kuwaza, rhwanayiga ebintu bihyahya, rhwanabiyunva, n’okumenya gurhe rhwakabikolesa omu kalamo kerhu. Bulagurhe arhulemere ntyo? Yehova alonzeze rhurhole esimikiro z’obwengehe ziyimangire oku bumenyi b’okuli amango rhuli rhwamukolera.​—Mez. 2:1-5; Ro. 12:1.

2. a) Mipaka ehe rhugwerhe? (Yob. 37:23, 24) (Olole n’efoto.) b) Gurhe rhunayunguka amango rhwamayemera oku bwirhohye emipaka yerhu?

² Chiro akaba oku rhugwerhe obuhashe b’okuyiga, rhuherhe emipaka omu bi rhumenyere. (Osome Yobu 37:23, 24.) Rhuwaze oku mufano gwa Yobu. Yehova alimusheshere kw’envula y’ebibazo omu kumuyereka oku hali binene arhamenyere. Ebyola bibazo byarhuma achirhohya n’okuhindamula amawazo mage. (Yob. 42:3-6) Nerhu rhunapata enyungu zinene amango rhwamayemera oku bwirhohye oku rhurhenji ebintu byoshi. Obwirhohye buli nk’obola bunarhushunika rhuchizere oku Yehova arhubishulira byoshi rhukenere kumenya kanuni, yi rhugala kurhola esimikiro z’obwengehe.​—Mez. 2:6.

3. Bichi rhwaganirako mu gunola mwazi?

³ Mu gunola mwazi, rhwaganira oku bilolere bintu biguma rhurhenji n’ebibazo rhwakahurana eju y’okurhabimenya. Rhwashuba kubona bulagurhe kuli kwinja okurhamenya bintu bilebe. Okuganira kw’agola mawazo kwarhuma rhwachizera bwenene oku Yehova, “Ojira obumenyi bushinganene,” amango moshi anarhubwira ebi rhukenere kumenya kanuni.​—Yob. 37:16.

RHURHENJI OLUSIKU OBUZINDA BWAYINJA

4. Nkoku Matayo 24:36 hayerekene, bukweri buhe buguma rhurhamenyere?

⁴ Osome Matayo 24:36. Rhurhenji olusiku obuzinda bw’elila gulu libi bwayinja. Chiro na Yesu, amango aliri oku gulu arhalimenyere “olusiku n’esa.”a Buzinda, Yesu abwira entumwa zage oku Yehova yenyine ye herhe ehaki y’okuchishoga amango bintu bilebe “bikwanene kuba.” (Mdo. 1:6, 7) Yehova apangire akasanzi obuzinda bwa linola gulu bwahika, aliko rhurhakamenya bwinja-bwinja mangochi.

5. Gurhe rhwakachiyunva bulala rhurhamenyere bwinja olusiku obuzinda bwayinja?

⁵ Nk’oku Yesu anaderhaga, rhurhamenyere byarhuhema rhulindire siku zingana gurhe kugera olusiku obuzinda nji bwayinja. Eju y’echola, hali oku rhwakagambwa kulindira n’okuvunika omurhima, ahanene akaba rhugwerhe siku zinene eyi rhuli rhwalindira olusiku lwa Yehova. Changwa rhwakabona nka bikomere okugenderera kulembera okuntu abantu b’omulala gwerhu changwa abandi banarhuchunaguza bulala obuzinda burhaza kuyinja. (2 Pe. 3:3, 4) Hali oku rhwakachiyunva nka nkabaga, nka rhwaliyinji bwinja olusiku obuzinda bwayinja, byakarhuyorohere kugenderera kulindira n’okugala kulembera amango abandi bali barhuchunaguza.

6. Bulagurhe kuli kwinja okurhamenya olusiku obuzinda bwahika?

⁶ Omu bukweri, bulala Yehova arharhubwiraga amango obuzinda bwayinja, arhuhere orozo l’okuyerekana oku rhunamukolera bulala rhumuzigire rhunamulangalire. Rhurhakolera Yehova eyi rhusezeze obwenge oku lusiku l’obuzinda, wamenya nk’obwemere bwerhu buherhe olusiku bukwanene kuhwerako. Ahubwe ahali h’okuseza obwenge bwerhu oku mango “olusiku lwa Yehova” lwayinja, kuli kwinja okuseza obwenge oku bintu binja nji byayenera amango nji lwahika. Omu kujira ntyo, rhwagala kugenderera kuchishwekera ku Yehova n’okujira byoshi rhwakagala yi rhumusimisa.​—2 Pe. 3:11, 12.

7. Bichi rhumenyere?

⁷ Kuli kwinja okuchiseza oku birhumenyere; k’okuderha okw’esiku zizinda zarhonderaga omu mwaka gwa 1914. Omu Bibliya, Yehova arhuhere obulebi buyerekene bwinja-bwinja oku esiku zizinda zakarhondere omu mwaka gwa 1914. Ashuba kurhubwira ebintu binene bwenene oku bilolere okuntu akalamo kakabere oku gulu kurhengera ogola mwaka. Eju y’echola, rhuherhe obwizere bukomere ku kweri “olusiku lukulu lwa Yehova luli hofi.” (Sef. 1:14) Kandi rhuyinji akasi Yehova alonzeze rhukole, k’okuderha okubwira bantu banene nk’oku byakashobokana koshi oku “myazi minja y’Obwami.” (Mt. 24:14) Obola burhumwa buli bwahubiribwa omu maeneo na bihugo bigerere ku 240 n’omu ndimi zirhalukire 1 000. Birharhuhemere oku rhumenye “olusiku n’esa” yi rhukola akola kasi n’obushiru.

RHURHAMENYERE OKUNTU YEHOVA AKAJIRA EBINTU MU HALI ZILEBE

8. Ebinwa “akasi ka Mungu w’okuli” biba bili byaderhera bichi? (Muhubiri 11:5)

⁸ Arhali buli mango yi rhunamenya “akasi ka Mungu w’okuli.” (Osome Muhubiri 11:5.) Ebyola binwa biderhere oku bilolere ebi Yehova anajira birhengerere changwa eby’akayemera bibe y’ayeneza obulonza bwage. Rhurhakamenya bwinja-bwinja empanvu zoshi zakarhuma Yehova ayemera chintu chilebe chibe changwa bichi akajira kanuni y’arhurhabala. (Zb. 37:5) E Bibliya ehuzenye okurhamenya akasi ka Mungu w’Okuli n’okurhamenya okuntu omwana anakula omu nda ya nyina. Chiro n’abasomi barhasaga kuyunva bwinja gurhe omwana anakula omu nda ya nyina. Intyo kon’oko nerhu rhurhakayunva bwinja okuntu Yehova anakola ebintu.

9. Bulala rhurhamenyere bwinja-bwinja ebi Yehova arhujirira, gurhe rhwakarhondera kuchiyunva?

⁹ Okurhamenya gurhe Yehova ajira y’arhurhabala kwakarhuma rhwagwarha engangane amango rhuli rhwarhola esimikiro. Hali oku rhwakagangana kuyemera rhwalekana na bintu bilebe omu kalamo yi rhugala kukola binene omu kasi ka Yehova, changwa okuhamira omu eneo ekenere bahubiri banene. Amango rhwamagambwa kuyeneza emihigo yerhu y’ekiroho, changwa rhurhabwene ebintu biyerekene bwinja-bwinja okw’akasi kerhu k’amahubiri yikaburha amalehe menja, changwa nkabaga rhuli rhwahurana ebigeregezo omu kasi kalebe k’echiteokrasi, hali oku rhwakachibaza akaba rhunachiyemererwe na Mungu.

10. Okurhamenya gurhe Yehova ajira y’arhurhabala kunarhurhabala kukuza ngeso zihe z’akamaro?

¹⁰ Bulala rhurhamenyere bwinja ebi Yehova arhujirira, echola chakarhurhabala rhukuze engeso z’akamaro nk’obwirhohye n’olugero. Zinarhurhabala rhuyunve oku buli mango Yehova yeb’amenyere ebinja bwenene emwerhu. (Isa. 55:8, 9) Kandi rhunayiga kunihira Yehova bwenene n’okumulangalira mu byoshi rhuli rhwakola yi rhubigala. Amango rhuli rhwapata amalehe menja omu kasi k’amahubiri changwa omu yindi proje y’echiteokrasi, kweri rhunasingiza Yehova. (Zb. 127:1; 1 Ko. 3:7) Amango ebintu birhagendere nk’oku rhwalilangalire, bihemere rhuyibuke oku Yehova ali abona byoshi. (Isa. 26:12) Rhwanajira ebi rhwakagala kujira, n’okulangalira okw’esiku zoshi Yehova arhurhabala. Rhuchizerere bwinja-bwinja okw’ali arhuha obwerekezi rhukenere, chiro akaba okw’arhali ajira ntyo omu njira y’ebisomerene nk’oku aliri ajira mira.​—Mdo. 16:6-10.

11. Bintu bihe by’akamaro rhumenyere byakarhurhabala?

¹¹ Rhumenyere kw’amango moshi Yehova aba Mungu w’obuzigire, w’ehaki n’obwengehe. Rhunamenyere oku Yehova anabona ebi rhunamukolera n’ebi rhunakolera bene-berhu na bali-berhu oku bili by’akachiro, n’amango moshi anahemba abali bemana kuye.​—Ebr. 11:6.

RHURHAMENYERE EBYABA OMUSEZI

12. Nk’oku Yakobo 4:13, 14 haderhere, bichi rhurhenji bwinja-bwinja?

¹² Osome Yakobo 4:13, 14. Omu bukweri, rhurhakamenya gurhe akalamo kerhu kaba omusezi. Mu linola gulu libi, bintu binene byakarhuhikira rhurhalilangalire eyi na ntacho rhwakachimaza ku byo. (Muh. 9:11) N’eju y’echola rhurhakamenya akaba emipango yerhu nji yafarha, changwa akaba nji rhwaba rhuchilamire yi rhubona gurhe yayenera.

13. Gurhe rhwakachiyunva bulala rhurhamenyere gurhe ebintu byaba omu mango mayinjire?

¹³ Byakarhukomerera kulembera ebibazo bulala rhurhamenyere bwinja-bwinja ebyarhengera omu mango mayinjire. Nka gurhe? Hali oku rhwakayubaha oku bilolere ebyarhengerera, n’echola chanarhuma rhwaheza obusime bwerhu. Akalamo kerhu kakahindamuka omu kuntu rhurhaliwazize, changwa ebintu bibi byakarhengerera aho han’aho, n’ebyola byanarhuma rhwachiganya n’okuyunva obuba bunene. Changwa amango ebirhwalinihire byamafunda kuyenera, rhwakachiyunva rhugayire n’okuheza obushiru bwerhu.​—Mez. 13:12.

14. Obusime bwerhu bugenderere bwakalerhwa na bichi? (Olole n’efoto.)

¹⁴ Na chiro ebintu bili gurhe byarhengerera omu kalamo kerhu, rhwakayerekana oku rhunakolera Yehova bulala rhumuzigire s’arhali eju y’obwikazize. Engani ze Bibliya ziyerekene oku rhurhakwanene kulangalira mpu Yehova arhulanga yi nta chibazo choshi chirhupatage, n’oku arhaba apanga embere ebyarhuhikira omu kalamo kerhu. Ayinji k’okugwarha obusime kwerhu changwa nanga kurhakalerhwa n’okumenya ebyarhuhikira omu mango mayinjire. S’ahubwe, binalerhwa n’okulonza obwerekezi bwage n’okumukenga. (Yer. 10:23) Omu kumulangalira amango rhuli rhwarhola esimikiro, eyi rhuli nk’abali baderha ntya: “Yehova akalonza rhwalama, nji rhwajira echi changwa echila.”​—Yak. 4:15.

15. Bichi rhumenyere oku bilolere amango mayinjire?

¹⁵ Chiro akaba oku rhurhamenyere ebyarhubera omusezi, rhumenyere bwinja oku Yehova arhulaganyize akalamo k’esiku n’amango; habe omu mbingu changwa oku gulu. Rhumenyere okw’arhakabesha na ntacho chakamubuza kuyeneza ebilagane byage byoshi. (Tit. 1:2) Yewe yenyine ‘yi wakagala kuleba obuzinda bw’echintu, na kurhenga mira anaba aderha ebintu birhaza kuba.’ Byoshi alebaga amango e Bibliya yaliri yayandikwa byaliyenere, na byoshi alebere oku bilolere amango mayinjire byayenera. (Isa. 46:10) Rhumenyere oku ntacho chakarhucha oku buzigire Yehova arhuherheko. (Ro. 8:35-39) Arhuha obwengehe, echirhulirizo, n’emisi rhukenere yi rhugenderera kulembera. Na chiro rhwahurana ebibazo bili gurhe rhwakachizera oku Yehova arhurhabala n’okurhugisha.​—Yer. 17:7, 8.

RHURHAKAYUNVA BWINJA KANGANA GURHE YEHOVA ARHUMENYERE

16. Bichi Yehova amenyere oku birhulolere na gurhe echola chirhumire wachiyunva? Zaburi 139:1-6

¹⁶ Osome Zaburi 139:1-6. Omulemi werhu amenyere gurhe rhukolerwe, amenyere bichi byarhumire omubiri gwerhu gwaba nk’oku guli, bichi binarhuma rhwachiyunva okuntu rhuli rhwachiyunva na bichi byarhumire obwenge bwerhu bwaba nk’oku buli. Anarhulagako amango moshi. Aba amenyere ebi rhuli rhwaderha na bichi rhwalonzaga kuderha, ebi rhuli rhwajira na bula gurhe rhuli rhwajira ntyo. Mwami Daudi aliderhere, okw’amango moshi Yehova aba alonzeze kurhurhabala, anaherhe obuhashe b’okurhurhabala. Okumenya k’Omurhwali Mukulu w’amahanga moshi, Mulemi ogala byoshi, walemaga embingu n’egulu anarhulagako kangana aho, bisimisize loshi! Che charhumaga Daudi naye aderha ntya: “Obumenyi buli nk’obola bunsomeze bwenene. Bulugire bwenene omu kuntu ntakabuyunva.”​—Zb. 139:6, amahugulo m’eshishi.

17. Bulagurhe rhwakabona oku bikomere okuyemera oku Yehova arhumenyere bwinja?

¹⁷ Nkabaga eju y’omulala rhwakuliragamo, emicho yerhu, obwemere rhwaliherhe mira, byakarhukomerera kubona oku Yehova ali Darha w’obuzigire orhulagireko. Changwa nkabaga rhwakachiyunva okw’amagosa merhu ma mira malikomere bwenene omu kuntu Yehova arhakachifa alonzeze kurhumenya anali hale bwenene nerhu. Chiro na Daudi hali amango alichiyunvirhe ntyo. (Zb. 38:18, 21) Changwa omuntu oli wachihangana kuhindamula akalamo kage y’akulikiza amakanuni ma Mungu m’ehaki akachibaza ntya: ‘akaba kweri Mungu anyinji, bulagurhe akanihira oku mpindamule akalamo kani n’obo b’oborhere bwani?’

18. Bichi rhwakayunguka omu kumenya oku Yehova arhumenyere bwinja kulusha oku rhuchimenyere? (Olole n’efoto.)

¹⁸ Rhwakayiga kuyemera oku Yehova arhuyinji bwinja kulusha nk’oku rhuchiyinji, n’okw’anarhubona mw’ebintu binja ebi rhurhakagala kuchibonamo. Anabona amagosa merhu, aliko ayinji oborhere rhwakasima rhugwarhe, n’eju y’echola arhuzigire. (Ro. 7:15) Nka rhwamarhegera okw’amango moshi Yehova anabona oborhere bwinja rhuli rhwachihangana kugwarha, rhwapata emisi rhukenere yi rhugenderera kumukolera oku bwimana eyi rhunaherhe obusime.

19. Bichi rhukwanene kumenya bwinja oku bilolere Yehova?

¹⁹ Rhumenyere oku Yehova ali buzigire. N’omu bukweri ntaye wakagwarha engangane kw’echola. (1 Yo. 4:8) Rhumenyere okw’amakanuni mage m’ehaki maba mayerekene okw’arhuzigire n’okw’alonzeze rhugwarhe akalamo kakwirire bwenene. Rhunamenyere kandi oku Yehova alonzeze nji rhupate akalamo k’esiku n’amango. Arhuhere enchungu y’ebyola byoshi bishobokana. Eju y’oluhembo lw’enchungu, rhwakachizera oku rhwakagala kumukolera chiro akaba rhurhashinganene. (Ro. 7:24, 25) Kandi rhumenyere oku “Mungu ali mukulu kulusha emirhima yerhu anayinji ebintu byoshi.” (1 Yo. 3:19, 20) Yehova anabona buli choshi oku birhulolere, anachizerere oku rhwakagala kujira obulonza bwage.

20. Bichi byakarhurhabala rhurhagwarhaga obuba bunene oku bilolere ebintu rhurhenji?

²⁰ Yehova arharhubisha emyazi rhukwanene kumenya kanuni. Che chirhumire rhurhakwanene kugwarha obuba eju y’echintu rhurhenji, s’ahubwe rhuseze obwenge oku by’akamaro bwenene. Rhukajira ntyo, rhwayerekana oku rhulangalire Yehova bwenene oherhe “obumenyi bushinganene.” (Yob. 36:4) Chiro akaba oku hali ebintu rhurhayunvirhe bwinja zene, rhuyinji oku Yehova nj’agendereza kurhuyigiriza ebintu bihyahya esiku n’amango, rhunasimire bwenene bulala rhurhakaleka kugenderera kuyiga ebintu bihyahya oku bilolere Mungu werhu Mukulu.​—Muh. 3:11.