Efranga g’Omuzi gw’Amabi Moshi Si?

Echishubizo ch’Ebiblia

Nanga. Ebiblia erhaderhere oku efranga zili zibi, erhanayerekene efranga nka zezilerhere obubi boshi. Oluderho luzigana kuderhrwa mpu “efranga g’omuzi gw’amabi moshi” kuba kufanda kumalisa, n’okuheka kubi eby’Ebiblia ederhere. Omu bukweri Ebiblia ederhere oku “Okusima efranga g’omuzi gw’amabi moshi.”a—1 Timoteo 6:10, King James Version, rhwewe rhwe rhusezeze.

Bichi Ebiblia ederhere okubilolere efranga?

Ebiblia eyerekene oku nk’efranga zikolesezwe omu bulyo buyengehere, zakarhulerhera akamaro, n’okubera omuntu nka “bulanzi.” (Muhubiri 7:12) Omu kuyongera, Ebiblia ebwirire koko balala banahana n’omurhima goshi, n’echola chihirirwe m’okuhanana efranga.—Mezali 11:25.

Aliko kandi Ebiblia ehanire omukonge okubilolere okuseza akalamo koshi oku franga. Ederhere ntya: “Muleke emilamire yenyu erharhegekekwaga n’okusima efranga, si muleme mwatosheka n’ebimuherhe.” (Waebrania 13:5) Esomo birhuyigirize kuli kuderha oku rhukolese efranga bwinja buzira kuhigirira obuchire. S’ahubwe, rhukwanene rhuhigirire okuhanza rhwatosheka n’ebintu bili bya ngombwa oku kakalamo. Nk’ebilyo, emishangi n’aharhwalama.—1 Timoteo 6:8.

**Bichi birhumire Ebiblia elalika oku bilolere okusima efranga?**

Abantu baherhe obuhugu barhakapata akalamo k’esiku n’amango. (Waefeso 5:5) Impanvu nguma eli okuba obuhugu buli buharamye bw’ebishushanyo, changwa mparamyo y’obubeshi. (Wakolosai 3:5) Eyindi mpanvu eli okuba eyi abantu balwisa okwabo koshi yi babona ebibali bachifija, abantu bajira obuhugu banazigana kukakabulira amakanuni menja. Bala boshi “bali bahigizanya n’obuchire, barhakoyorha mweru-kweru,” ku Mezali 28:20 ederhere. Bakageregezwa kujira ebibi byoshi nk’okuyubahisa omuntu yi bamulya efranga, okunyegana n’okushuma, okugeza eby’efrode, okukidnape abantu (Okufarha abantu n’emisi banahema efranganga yi babalikula), n’okulenganya.

Chiro akaba okusima efranga kurhagezeze omuntu oku ngeso zivire zabiha, kuherhe ezindi ngaruka zibi. Ebiblia ederhere oku “balala bahigirire okuba bachire banarhogera omu murhego n’enyifinjo zinene z’obuhwinja zinakoromesya.”—1 Timoteo 6:9.

Gurhe rhwakayunguka n’amahano Ebiblia ehanire oku by’efranga?

Nkarhurhavunire amakanuni rhumenyere m’okuchiheka bwinja, n’emibereho esimisize Mungu eju y’okulonza efranga, rhwakengwa aharhuli, na Mungu arhuyemera anarhurhabale. Kubalala boshi banachihanagana n’omurhima goshi kumusimisa, Mungu alaganyize ntya: “Intakafa nakulekere, intakafa nakukabulire.” (Waebrania 13:5,6) Ashubire kurhuha echizero oku “omuntu mwimana ahabwa migisho minene.”—Mezali 28:20.

Amandiko m’Ebilia oku by’efranga

Matendo 7:12: “Efranga buba bulanzi.”

K’okuderha: Amango rhwamazikolesa bwinja, efuranga zakajira echi zarhumalira zinayongere oku bintu by’obulanzi.

Luka 12:15: “Chiro omuntu aba aherhe ebintu kamama, ebyaherhe birhakamuha akalamo.”

K’okuderha: Efranga arhali ch’echintu ch’akamaro bwenene omu kulamo, na ntacho ziyongerere oku buchunguke bwerhu.

1 Timoteo 6:10: “Okusima efranga g’omuzi gwa buli buko bw’amabi moshi, n’omukulwisa okwabo koshi yi bacha eyola nyorha, banene bahehwirwe kurhenga omu bwemere bwabo, banachikoromesa hoshi-hoshi n’amalumwa manene.”

K’okuderha: Efranga zowe zonyine arhali z’ezibi. S’ahubwe abantu basima efranga; banazijira chintu ch’oburhanzi bahigirire omu kalamo, banachilerhera ebibazo kamama, nk’emilala eshandukire, n’amagala marhakwirire eju y’okukola kukabya.

Waebrania 13:5: “Muleke emilamire yenyu erharhegekwaga n’okusima efranaga, si mutosheke n’ebimuherhe.”

K’okuderha: Ahali h’okuhigizanya n’obuchire akafa akachira, kuli kwinja okutosheka n’ebintu bya ngombwa omu kalamo.

Matayo 19:24: “Biyanguhire engamiya egere omu karhule k’esindani kulusha omuchire okugera omu bwami bwa Mungu.”

K’okuderha: Yesu abaga ahamagere muzana muguma w’omuchire amukulikire. Oyo bwana alahira bulala alisimire ebirugu byage bwenene. Omuntu onahira obuchire embere wa Mungu eyi amaja ewakuheza akalamo.

a Ogola mustari gwashubire kutafusiribwa: “Okusima efranga g’omuzi gwa buli buko bw’ebintu bibi byoshi.”