MWAZI G’OKUYIGA 32
Oyiganye Yehova omu Kugwarha Engeso y’Olugero
“Muleke okugwarha olugero kwenyu kumenyikane oku bantu boshi.”—FLP. 4:5.
OLWIMPO 89 Oyunvirize, Okenge, y’Ogishwa
OKU BUKEGEa
Wakasiima obe murhi gwanyabashi? (Olole echifungo cha 1)
1. Mu njira ehe Abakristu bakwanene kuba kuguma n’omurhi? (Olole n’efoto.)
“ECHIYAGA chinene chirhakakuba omurhi gulembere.” Ogula mugani guyerekene oku omurhi gukwanene kulemba n’okudoba-doba yigulembera echiyaga chikomere. Nerhu rhukwanene kuba bantu bayanguhire omu kalamo yirhugenderera kukolera Yehova n’obusiime amango ebintu bikomeere byamarhengerera. Nka gurhe? Rhukwanene kugwarha olugero yirhugala kukoomera amango ehali yerhu yamahindamuka n’omukukenga amawazo m’abandi n’esimikiro zabo.
2. Ngeso zihe zakarhurhabala rhuchikoomeze amango ebintu byamahindamuka omu kalamo kerhu, na bichi rhwaganirako mu gunola mwazi?
2 Rhwabo nka bakozi ba Yehova, rhulonzeze kugwarha engeso y’olugero. Kandi rhulonzeze kuba berhohye n’okuba bantu bagwerhe obukenge. Mu gunola mwazi, rhwalola nka gurhe engeso zili nk’ezola zarhabere Bakristu baguma kulwisa bwinja ebibazo, amango ebintu byahindamukaga omu kalamo kabo. Kandi rhwalola nka gurhe nerhu ezola ngeso zakarhurhabala. Aliko, rhurhange rhuganire okuntu Yehova na Yesu banayerekana oku bushinganyanya engeso y’olugero.
YEHOVA NA YESU BANAYEREKANA ENGESO Y’OLUGERO
3. Bichi birhurhabere rhumenye oku Yehova ajira engeso y’olugero?
3 Yehova ayirikirwe “Ntaza” bulala arhakashaganyika, changwa kudundwa. (Kum. 32:4) Aliko kandi, ajira engeso y’olugero. Oku ebintu binali byahindamuka mu linola gulu, Mungu naye ali achihuzanya n’eyola hali y’achizera oku buli chintu alaganyize nji chayenera. Bulala Yehova arhulemere oku shusho lyage, nerhu arhuhere obuhashe b’okuchikoomeza amango ebintu yamahindamuka omu kalamo kerhu. Omu Biblia muli amakanuni m’okurhurhabala rhurhole esimikiro y’obwengehe chiro rhwahurana ebibazo bili gurhe. Omufano gwa Yehova yenyine n’amakanuni arhuhere, birhurhabere rhumenye oku arhayirikirwe “Ntaza” konyine, s’aliko kandi agwerhe engeso y’olugero.
4. Nka gurhe Yehova anayerekana olugero? Lerha omufano. (Mambo ya Walawi 5:7, 11)
4 Enjira za Yehova ziba zishinganyanya zinagwerhe olugero. Yehova arhaba mukali oku bantu. Omufano, waza okuntu Yehova aliyerekene engeso y’olugero oku shanja lye Izraeli. Arhalibahemere boshi bayinje bahaana enterekero eli kuguma, abe mukene changwa muchire. Omu hali ziguma, Yehova aliyemerere oku buli muntu ahaane enterekero nk’oku akanagala.—Osome Mambo ya Walawi 5:7, 11.
5. Nka gurhe Yehova aliyerekene obwirhohye n’olukogo? Lerha omufano.
5 Engeso ya Yehova y’obwirhohye n’olukogo, zinarhuma ayerekana olugero. Omufano, Yehova aliyerekene oku ali mwirhohye amango aliri hofi kulimbula abantu babi be Sodoma. Kugerera bamalayika bage, Yehova abwira omunya-kunali Loti, alibirhire omu eneo y’emisozi. Loti aliyubahire kulibirhira eyola munda. Naho, alakirira Yehova oku aleke yewe n’omulala gwage, balibirhire omu Soari, vile ngeke Yehova alihigirire kulimbula nayo. Yehova akasezeze Loti oku akwanene kukulikira obwerekezi bwage buzira buhaka. Aliko Yehova ayemerera Loti oku alibirhire omu Soari, arhanachilimbulaga eyola vile. (Mwa. 19:18-22) Myaka minene enyuma w’aho, Yehova ayunvira obonjo abantu balilamire omu vile ye Ninawi. Alirhumire omulebi Yona abwire abantu babi be Ninawi oku bowe n’evile yabo balimbulwa. Aliko amango abantu be Ninawi bahungama, Yehova abayunvira obonjo arhanachibalimbulaga n’evile yabo.—Yon. 3:1, 10; 4:10, 11.
6. Nka gurhe Yesu aliyiganyize Yehova omu kuyunva abandi? Lerha omufano.
6 Yesu aliyiganyize engeso ya Yehova y’olugero changwa okuyunva abandi. Arhumwaga oku gulu kuhubiri “entama zaherere z’eshanja ye Izraeli.” Aliko aliyerekene olugero amango aliri ahubiri abantu. Mango maguma, mukazi muguma orhaliri Muizraeli amulakirira mpu afumye omwali ‘waliri arhindibuzwa n’omuzimu.’ Yesu ayunvira oyola mukazi obonjo anafumya oyola munyere. (Mt. 15:21-28) Rhushambalage oku gwindi mufano. Oku murhondero gw’akasi kage k’amahubiri, Yesu aderha ntya: “Buli yeshi wampakana . . . , nani nji namuhakana.” (Mt. 10:33) Aliko si, alihakanire Petro, wamuhakanaga kasharhu koshi? Nanga. Yesu alimenyere oku Petro aliyunvirhe agayire bwenene oku bilolere eby’ajiraga analiri mulume mwimana. Amango Yesu afuuka, arhengerera Petro anamubwira oku amubabalire n’oku agenderere kumuzigira.—Lu. 24:33, 34.
7. Nk’oku olwandiko lwa Wafilipi 4:5 luderhere, gurhe rhulonzeze abandi barhubonage?
7 Rhwabwene oku Yehova Mungu na Yesu Kristu bali mufano gwinja g’okuyerekana olugero. Gurhe si oku birhulolere rhwabo? Yehova alonzeze rhube bantu banayerekana olugero. (Osome Wafilipi 4:5.) Intya kwe Tafsiri nguma ye Biblia ederhere olula lwandiko: “Muyerekane kugerera olugenzi lwenyu oku muli bantu bagwerhe olugero.” Rhwakachibaza ntya: ‘Abantu banabona oku indi muntu ogwerhe olugero, muntu onarholeka, onayemera amawazo m’abandi? Changwa banabona oku indi mukali changwa orhaharhulwa? Ka ndi muntu onaseza abandi bakole ebintu nk’oku nyono ndozeze bikolwe? Changwa si inanyunviriza abandi n’okuleka ebibasiimire byebikolwage amango bigalikene?’ Amango rhwamayerekana oku rhunayunviriza amawazo m’abandi, rhwanayerekana kangana gurhe rhuli rhwayiganya Yehova na Yesu. Lekaga rhuganire oku hali ebiri rhukwanene kuyerekanamo olugero; amango ebintu byamahindamuka omu kalamo kerhu, n’amango amawazo m’abandi n’esimikiro zabo birhali kuguma n’ebyerhu.
OGWARHE OLUGERO AMANGO EBINTU BYAMAHINDAMUKA
8. Bichi byakarhurhabala rhugwarhe olugero amango ebintu byamahindamuka omu kalamo kerhu? (Olole n’amafasiriyo m’eshishi.)
8 Birhuhemere rhugwarhe engeso y’olugero amango ebintu byamahindamuka omu kalamo kerhu. Amango ebintu byamahindamuka, ebyola byakarhulerhera ebibazo rhurhaliwazize haba n’akatyu oku byakarhuhikira. Rhwakagwarha ebibazo by’amagala bikomere by’aho han’aho. Changwa amango echibazo ch’okubula efuranga chamarhengerera aho han’aho, changwa amango ebintu byamahindamuka omu burhegesi bw’epolitike aha rhulamire. Ebyola byakarhuma akalamo karhukomerera bwenene. (Muh. 9:11; 1 Ko. 7:31) Chiro byakarhukomerera amango olubaga lwa Yehova lwamahindamula engabane yerhu changwa amango lwamarhuhema rhuje kukolera omu yindi fasi. Rhube rhuli rhwahurana ebibazo bili gurhe, rhwakagala kuchikoomeza n’ehali nka rhujirire ebila bintu bine: 1) amango rhwamayemera oku ebintu byahindamukire, 2) olangalire amango mayinjire, 3) oseze obwenge oku bintu binja, n’echa 4) okolere abandi.b Rhulolage nka gurhe bene-berhu bapatire enyungu omu kujira ntyo.
9. Nka gurhe mwene-werhu muguma na mukage bali bamisyonere bagalaga kulwisa ebibazo barhalilangalire?
9 Oyemere oku ebintu byahindamukire. Mwene-werhu Emanuele na mukage Francesca balihabirwe engabane y’okuba bamisyonere omu chindi chihugo. Oku banarhondera kuyiga olulimi luhya-hya n’okuhwanza kumenyana na bene-berhu na bali-berhu b’omu chibaga chihya-hya, obula bulwala bwe Korona bwarhondera, barhanalikwanene kuyegera abantu. Ech’okugayisa, nyina wa mwali-werhu Francesca afa aho han’aho. Francesca alivunikire omurhima analilonzeze abe haguma n’abantu b’omulala gwage, aliko obola bulwala b’okuyahukira burhakazigire abalamira eyola munda. Bichi byamurhabalaga agale kulwisa ebyola bibazo byoshi? Ech’oburhanzi, Emanuele na mukage Francesca basalira emwa Yehova omu kumuhema obwengehe yibagala kulwisa buli lusiku, y’emilago erharhuma bavunika omurhima bwenene. Yehova alishubize oku masala mabo omu mango makwanene kugerera olubaga lwage. Omufano, baliheberwe omurhima kugerera enganiro y’omu video ya mwene-werhu muguma waderhaga ntya: “Amango rhwamayemera juba-juba oku ebintu byahindamukire, kurhwanashuba kugwarha obusiime juba-juba n’okurhuhereza orozo l’okukoomera okuntu ebintu byahindamukire.”c Echa kabiri, baliheberwe omurhima bagale kuhubiri bwinja chiro banahwanzisa efunzo lye Biblia. Echa kasharhu, baliyemerere oburhabale bahabwaga na bene-berhu na bali-berhu. Mwali-werhu muguma onazigana kulaga oku bandi, aliri abarhumira emesaje buli lusiku eyumangire oku lwandiko lwe Biblia omu mwaka goshi. Amango nerhu rhwamayemera oku ebintu byahindamukire omu kalamo kerhu, rhwanagwarha obusiime omu birhwakagala kujira.
10. Nka gurhe mwali-werhu muguma alichikoomeze n’ebintu byahindamukaga omu kalamo kage?
10 Olangalire amango mayinjire, onaseze obwenge oku bintu binja. Christina, mwali-werhu w’omu Romania olamire omu Japon, alivunikire omurhima amango echibaga che Chingereza alirimo chishandwa. Aliko arhagendereraga kuwaza oku byarhengerere. S’ahubwe, aja omu chibaga chaliri chakolesa olulimi lwe Chijapani anajira okwage koshi y’ahwanza kuhubiri m’olola lulimi. Ahema mukazi muguma baliri bakola naye amurhabale kumenya bwinja olola lulimi. Oyola mukazi ayemera kukolesa Ebiblia n’ebronchire Siimira Akalamo Esiku n’Amango! yayigiriza mwali-werhu Christina Echijapani. Christina amenya Echijapani bwinja-bwinja, aliko ech’akamaro bwenene, oyola mukazi alonza kumenya binene oku bilolere Ebiblia. Amango rhurhagenderere kuwaza oku bintu byagerere n’okugwarha amawazo menja, ebintu byamahindamuka ahohan’aho byakarhulerhera enyungu rhurhaliwazize haba n’akatyu.
11. Bichi byarhabalaga mwene-werhu muguma na mukage bahime echibazo ch’okubula efuranga?
11 Okolere abandi. Mwene-werhu muguma na mukage balamire omu chihugo akasi kerhu kalahizwemo, balihurene echibazo ch’okubula efuranga amango birhaliyorohere abantu okugwarha olufuranga mw’echola chihugo. Nka gurhe balilwisize echola chibazo? Ech’oburhanzi, bachihangana kulama akalamo kayorohere. Echa kabiri, ahali h’okuseza obwenge oku chibazo chabo bowe bonyine, barhola omuhigo g’okurhabala abandi kugerera akasi k’okuhubiri. (Mdo. 20:35) Oyola mwene-werhu aderhere ntya: “Okugwarha binene by’okukola omu kasi k’amahubiri, kwalirhurhabere rhumenye rhwaseza amawazo merhu oku bintu byakavuna omurhima aliko rhuseze obwenge bwerhu omu kujira obulonza bwa Mungu.” Amango ebintu byamahindamuka omu kalamo kerhu, rhukwanene kuyibuka oku, kuli kw’akamaro bwenene rhugenderere kurhabala abandi ahanene kugerera akasi k’okuhubiri.
12. Nka gurhe omufano gw’entumwa Paulo gwakarhurhabala rhube tayari kuhindamuka omu kasi k’amahubiri?
12 Rhukwanene kuba tayari kuhindamuka omu kasi kerhu k’amahubiri. Rhunabugana abantu barhagwerhe amawazo mali kuguma banarhengere omu micho elengene. Entumwa Paulo aliri tayari kuhindamuka, n’omufano gwage gwakarhuyigiriza bintu binene. Yesu abaga ashimikire Paulo abe “ntumwa oku mashanja.” (Ro. 11:13) Naho, Paulo ahubiri Abayahudi, Abagiriki, abasomi, abantu barhahunukire balamire omu mavilaje, abarhwali, n’abami. Paulo “aba byoshi oku bantu be mbero zoshi.” (1 Ko. 9:19-23) Aliri awaza bwenene oku bilolere abantu aliri aganira nabo okuntu bakulaga, n’enyigirizo baliyemerere, n’echola chamurhabala kuhindamuka n’okuganira na buli muntu omu njira yakamurhabala abe mwira wa Mungu. Nerhu rhwakagwarha amalehe menja omu kasi k’amahubiri, amango rhuli tayari kuhindamuka, n’okuchihangana kuwaza okuntu rhwakarhabala buli muntu omu njira ekwanene.
OKENGE AMAWAZO M’ABANDI
Nka rhugwerhe engeso y’olugero, rhwakenga amawazo m’abandi (Olole echifungo che 13)
13. Buhanya buhe rhwakayaka buganirirwe omu 1 Wakorinto 8:9 amango rhukengere amawazo m’abandi?
13 Engeso y’olugero enarhurhabala kandi rhukenge amawazo m’abandi. Omufano, bali-berhu baguma banasiima kuchilimbisa (okuchipodowa; nk’okugeza etilo n’ebindi-bindi), aliko abandi bowe barhasiima kujira ntyo. Bakristu baguma banachishoga kunywa oku mavu n’olugero, aliko abandi bowe bachishogere okurhamanywa. Abakristu boshi balonzeze kugwarha amagala menja, aliko banachishoga enjira z’okubukwa zirhali kuguma. Akaba rhunawaza buli mango oku rhwabo rhwerhunajira ebintu binja, n’okuseza bene-berhu bajire nk’oku rhwabo rhunajira, rhwagayisa abandi, n’okulerha akalaba omu chibaga. Rhurhalonzeze chiro kujira echintu chili nk’echola! (Osome 1 Wakorinto 8:9; 10:23, 24) Rhushambale ku mifano ebiri eyerekene okuntu rhwakakolesa amakanuni me Biblia makarhurhabala rhugwarhe olugero n’okugendereza omurhula.
Nka rhugwerhe engeso y’olugero, rhwakenga amawazo m’abandi (Olole echifungo che 14)
14. Makanuni mahe me Biblia rhukwanene kubika omu bwenge amango rhuli rhwarhola esimikiro oku bilolere okuntu rhwayambala n’okuchilimbisa?
14 Okuyambala n’okuchilimbisa. Yehova arharhubwirire bichi rhukwanene kuyambala, aliko arhuhere amakanuni makarhuyerekeza. Rhukwanene kuyambala omu njira ehereze Mungu werhu olukengo, eyerekene olugero, emipaka, enayerekene oku rhugwerhe “obwenge buli oku mustari.” (1 Ti. 2:9, 10; 1 Pe. 3:3) Bobola, rhurhayambala mpu yirhuba ba mumbone. Amakanuni me Biblia makarhabala kandi abashamuka bamenye bachiheberaho amarhegeko mabo bonyine oku bilolere okuyambala, okugembwa changwa okusuka enviri. Omufano, bashamuka ba chibaga chiguma balilonzeze kurhabala bene-berhu baguma bachili misole baliri bayiganya okuntu abasole omu eneo yabo baliri bagembwa. Abola basole baligwerhe enviri ziyufuhire, aliko zichizingire-zingire zirhanachanwirwe bwinja. Nka gurhe abashamuka bakahanwire abola bene-berhu buzira kuhebaho amabo marhegeko? Omwimangizi w’omuzunguluko ahanula abola bashamuka oku baganire n’abola bene-berhu ntya: “Amango oli oku estrade n’abonviriza bali balolereza okuntu oboneke ahali h’okuseza obwenge oku by’oli waderha, k’okuderha oku hali echibazo oku bilolere okuntu oyambere n’okuntu ochilimbisize.” Amola mafasiriyo mayorohere marhabala bene-berhu bachili misole bamenye bichi bakwanene kujira n’abashamuka barhalichikenere kuhebaho amabo-mabo marhegeko.d
Nka rhugwerhe engeso y’olugero, rhwakenga amawazo m’abandi (Olole echifungo che 15)
15. Sheriya zihe n’amakanuni mahe me Biblia makarhurhabala rhurhole esimikiro oku bilolere amagala merhu? (Waroma 14:5)
15 Okushishikala amagala merhu. Buli Mukristu akwanene kurhola esimikiro oku bilolere okuntu ashishikala amagala mage. (Gal. 6:5) Amango Abakristu bali bachishoga okuntu bakwanene kubukwa, bakwanene kukenga esheriya ze Biblia ziderhere oku rhukwanene kuyaka eshagama n’obulaguzi. (Mdo. 15:20; Gal. 5:19, 20) Aliko omu yindi njira bakachishoga bonyine okuntu babukwa. Bantu baguma banaja kuhema konyine oburhabale oku banganga bali omu eneo yabo, aliko abandi banalonza eyindi njira bakabukwamo. Rhwakaba rhuchizerere rhwenyine oku njira ndebe y’okubukwa yakarhurhabala changwa yakarhulerhera obuhanya, aliko rhukwanene kukenga esimikiro za bene-berhu na bali-berhu oku bilolere okuntu balonzeze kubukwa. Bobola, rhurhayibagiraga chiro ebila bintu bine: 1) Obwami bwa Mungu bonyine bunji bwafumya loshi-loshi abantu. (Isa. 33:24) 2) Buli Mukristu akwanene “kuchiyemeza loshi” ebili binja bwenene emwage amango amarhola esimikiro oku bilolere amagala mage. (Osome Waroma 14:5.) 3) Rhurhachiira abandi olubanja oku bilolere esimikiro barholere, kandi rhurhanajira echintu choshi-choshi chakarhuma basibuka. (Ro. 14:13) 4) Abakristu banayerekana obuzigire n’okumenya oku obuguma bw’echibaga bobw’akamaro bwenene kulusha amawazo mabo bowe bonyine. (Ro. 14:15, 19, 20) Nka rhugenderere kuyibuka amola mawazo, rhwagwarha obwira bukomeere haguma na bene-berhu na bali-berhu n’okurhabala omurhula gugenderere kuba omu chibaga.
Nka rhugwerhe engeso y’olugero, rhwakenga amawazo m’abandi (Olole echifungo che 16)
16. Gurhe omushamuka akayerekana oku agwerhe olugero amango bali baganira ku chintu chilebe omu baraza? (Olole n’amafoto.)
16 Abashamuka bakwanene kuyerekana omufano gwinja oku bilolere okugwarha engeso y’olugero. (1 Ti. 3:2, 3) Omufano, omushamuka arhakwanene kuwaza oku, amango moshi ababo bashamuka bakayemera amawazo mage bulala akulire kulusha abandi. Anarhegera oku eroho lya Yehova lyakashunika omushamuka yeshi-yeshi omu baraza aderhe chintu chilebe chakabarhabala barhole esimikiro y’obwengehe. Nka bashamuka banene bayemerere esimikiro yarholerwe erhanavunire akanuni ke Biblia, omushamuka ogwerhe olugero ashigikira eyola simikiro chiro akaba akasiimire ebintu bigende nk’oku yewe aliwazize.
ENYUNGU OMUNTU ANAPATA AMANGO AGWERHE ENGESO Y’OLUGERO
17. Nyungu zihe Abakristu bagwerhe olugero bali basiimira?
17 Abakristu banapata nyungu zinene amango bagwerhe engeso y’olugero. Rhunagwarha obwira bukwirire haguma na bene-berhu na bali-berhu, n’echibaga chanagwarha omurhula. Rhunagwahra obusiime bulala abantu ba Yehova bagwerhe oborhere burhali kuguma banarhengere omu micho elengene. Kandi binasimisize bwenene, okumenya oku chiro akaba rhurhagwerhe oborhere buli kuguma, rhunamuharamya nka mulala gugwerhe obuguma. Ech’akamaro bwenene, rhugwerhe obusiime okumenya oku rhuli rhwayiganya Yehova Mungu, ogwerhe engeso y’olugero.
OLWIMPO 90 Rhuhebane Omurhima
a Yehova na Yesu bajira engeso y’olugero banalonzeze nerhu rhugwarhe eyola ngeso. Nka rhugwerhe engeso y’olugero, rhwabona oku birhuyorohere kuchikoomeza amango ebintu byamahindamuka omu kalamo. Omufano, amango rhwamahurana ebibazo by’amagala changwa amango rhwamahurana ebibazo by’okubula efuranga. Kandi rhwarhabala echibaga chigwarhe omurhula n’obuguma.
b Olole omwazi “Wakati Kunakuwa Mabadiliko Katika Maisha” (Amango Ebintu Byamahindamuka omu Kalamo), omu Amuka! Ni. 4, 2016.
c Olole evideo y’enganiro ya Mwene-Werhu Dmitriy Mikhaylov efarhene n’omwazi “Yehova Anageuza Mateso Kuwa Wakati wa Kuhubiri” (Yehova Amahindamula Amango m’Amalibuko Lube Rozo l’Okuhubiri) omu Ekaye lye Mbuganano—Akasi n’Akalamo k’Omukristu, ly’Omwezi gwa 3 n’ogwa 4, 2021.
d Y’omenya myazi minene oku bilolere okuyambala n’okulimbisa, olole esomo lya 52 ly’echitabu Siimira Akalamo Esiku n’Amango!