MWAZI G’OKUYIGA 46
Yehova Arhulaganyize oku Ajira Egulu Libe Paradizo
“Omuntu oli wachilonzeza omugisho yewe yenyine omu gulu, nj’agishwa na Mungu w’okuli.”—ISA. 65:16.
OLWIMPO 3 Misi Yani, Bunihire Bwani, Inkulangalire
OKU BUGEKEa
1. Burhumwa bwa nyabachi omulebi Isaya ahaga ababo Baizraeli?
OMULEBI Isaya aliderhere oku Yehova “ali Mungu w’okuli.” Echinwa chitafsiribwe “okuli” chinwa oku chinwa chili “amena.” (Isa. 65:16, amahugulo m’eshishi.) “Amena” k’okuderha “bibe ntyo,” changwa “kweri.” Amango echinwa “amena” chikolesweze omu Biblia oku bilolere Yehova changwa Yesu, kuba kurhuyemeza oku chintu chilebe chili ch’okuli. Bobola, oburhumwa Isaya abwiraga ababo Baizraeli bwaliyunvikene: Amango Yehova amalaganya chintu chilebe buli mango chinayenera. Kweri, Yehova anayeneza ebilagane byage amango moshi.
2. Bulagurhe rhukwanene kulangalira oku ebilagane bya Yehova oku bilolere amango mayinjire nji byayenera, na bichi rhwaganirako?
2 Ka nerhu rhwakachizera oku ebilagane bya Yehova oku bilolere amango mayinjire nji byayenera? Hofi myaka 800 enyuma w’echihe cha Isaya, entumwa Paulo afasiriya bulagurhe rhwakachizera oku ebilagane bya Mungu binayenera amango moshi. Paulo aderhere ntya: “Birhakashobokana oku Mungu aderhe obubeshi.” (Ebr. 6:18) Kuguma n’oku eshoko y’amenji erhakakula amenji makwirire enakule amalimo omunyu, intyo k’onoko Yehova ali shoko y’okuli arhakaderha eby’obubeshi. Che chirhumire, rhukwanene kulangalira bwenene byoshi Yehova aderhere biheberwemo ebilagane byage byoshi oku bilolere amango mayinjire. Mu gunola mwazi, rhwaganira ku binola bibazo: Bichi Yehova arhulaganyize oku arhuha omu mango mayinjire? Na chemezo chihe Yehova arhuhere chiyerekene oku echilagane chage nji chayenera?
BICHI YEHOVA ARHULAGANYIZE?
3. a) Chilagane chihe abakozi ba Mungu banasima bwenene? (Ufunuo 21:3, 4) b) Gurhe bantu baguma banashubiza amango rhwamaganira haguma nabo oku bilolere echola chilagane?
3 Echilagane rhwaganirako chili ch’akamaro bwenene oku bakozi ba Mungu boshi, b’omu gulu lyoshi. (Osome Ufunuo 21:3, 4.) Yehova alaganyize oku hali amango “olufu lurhakachibaho, ey’emishibo, ey’endulu ey’amalumwa birhakachibaho chiro.” Banene mu rhwewe rhunasoma eyola mistari omu kurhuliriza abantu rhuli rhwahubiri n’okubabwira gurhe akalamo nji kaba omu gulu lye Paradizo. Gurhe banene banashubiza amango rhwamaganira nabo kw’echila chilagane? Nkabaga bakaderha: “Ebila bintu bili binja bwenene, aliko ntachizerere akaba nji byayenera.”
4. a) Amango Yehova ahana echilagane chage che Paradizo, bichi alimenyere oku nji byarhengerera mu zinola siku zerhu? b) Olekere n’okuhana echilagane bindi bichi Yehova ajirire?
4 Buzira ngangane, amango Yehova ayerekeza entumwa Yohana ayandike oku bilolere akalamo omu Paradizo, alimenyere oku nerhu zene rhwakabwira abandi oku bilolere obula bulangalire, amango rhuli rhwahubiri oburhumwa b’Obwami. Kandi Yehova alilebere oku byakakomerere bantu banene kuyemera oku ebila bintu byakahindamukire omu mango mayinjire. (Isa. 42:9; 60:2; 2 Ko. 4:3, 4) Bobola, gurhe rhwakarhabala abandi yibachizera oku emigisho eganirirwe omu Ufunuo 21:3, 4 nji yayenera? Na nka gurhe rhwakakomeza obulangalire bwerhu mu Yehova n’omu bilagane byage? Yehova arharhuhaga echola chilagane chisimisize konyine, aliko kandi arhuhere empanvu zirhuyemezeze zakarhuma rhwamulangalira. Mpanvu zihe ahanire?
YEHOVA ARHULAGANYIZE OKU KWERI ECHILA CHILAGANE NJI CHAYENERA
5. Mistari ehe eli omu Ufunuo erhuhere empanvu y’okugwarha obulangalire omu bilagane bya Mungu, na gurhe ederhere?
5 Rhubwene empanvu z’okuchizera echilagane cha Yehova che Paradizo omu mistari ekulikire. Haderhere ntya: “Olala oyikere oku chirhi ch’obwami aderha: ‘Tala! Indi najira ebintu byoshi bibe bihyahya.’ Ashuba yongera: ‘Yandika, bulala ebila binwa bili bya kuchizerwa binali by’okuli.’ Kandi ambwira ntya: ‘Byamalire yenera! Nyono nye Alfa na Omega, nye w’oburhanzi nye naw’obuzinda.’”—Ufu. 21:5, 6a.
6. Bulagurhe ebyemezo bili omu Ufunuo 21:5, 6 bikomeze obulangalire bwerhu omu chilagane cha Mungu?
6 Bulagurhe eyila mistari ye Biblia ekomeeze obulangalire bwerhu omu chilagane cha Mungu? Echitabu Ufunuo—Upeo Wao Mtukufu U Karibu! chiderhere ntya oku bilolere eyila mistari: “Ebi Yehova ali ajira byakahuzanywa n’okusinye edokima erhuyemezeze oku nj’ayeneza burundu echilagane chage.”b Bobola, omu Ufunuo 21:3, 4 rhunasoma ebi Mungu alaganyize oku ajira. Kandi omu mustari gwa 5 n’ogwa 6, ayongerere esinyatire yage erhuyemezeze oku eby’alaganyize nji byayenera bwinja bwinja. Lekaga rhulole okuntu Yehova arhuyemezeze oku rhwakamulangalira.
7. Inde ohwanzize kuderha omu mustari gwa 5, na bulagurhe eby’aderhere bili by’akamaro?
7 Omustari gwa 5 gurhondere ntya: “Olala oyikere oku chirhi ch’obwami aderha.” (Ufu. 21:5a) Ebila binwa bili by’akamaro bwenene bulala biyerekene mango maguma mu mango masharhu aha Yehova yewe yenyine ali aderha. Bobola, echila chemezo chihanirwe na Yehova, si arhali malayika ogwerhe emisi, changwa Yesu wafulwaga, s’aliko Yehova yewe yenyine! Chiyerekene oku rhwakachizera bwinja bwinja ebindi binwa aderhere bikulikire. Bulagurhe rhwakaderha ntyo? Bulala Yehova “arhakabesha.” (Tit. 1:2) Bobola, ebinwa rhunasoma omu Ufunuo 21:5, 6 nji byayenera kweri kweri.
“TALA! INDI NAJIRA EBINTU BYOSHI BIBE BIHYAHYA”
8. Bichi Yehova aderhere y’ayerekana oku echilagane chage nji chayenera? (Isaya 46:10)
8 Naho, Yehova aderhere ntya: “Tala!” (Ufu. 21:5) Echinwa che Chigiriki chitafsiribwe “tala!” chikolesezwe kanene omu chitabu cha Ufunuo. Chitabu chiguma ch’amareferanse chiderhere oku, chili chimenyeso ch’okusomerwa “chikolesezwe omu kurhabala owasoma aseze obwenge oku bikulikireho.” Bichi Mungu ajire akulikizaho? Aderhere ntya: “Indi najira ebintu byoshi bibe bihyahya.” Kweri, Yehova ahindamula ebila bintu omu mango mayinjire. Aliko bulala achizerere bwenene oku nj’ayeneza echilagane chage, aderhere nk’owamalire kuhindamula ebyola bintu byoshi.—Osome Isaya 46:10.
9. a) Ebinwa biderhe oku Yehova “nj’ajira ebintu byoshi bibe bihyahya,” bichi bilonzeze kuyerekana? b) Bichi nji byahikira “embingu” “n’egulu” byazene?
9 Lekaga rhuganire oku binwa bikulikireho bili omu Ufunuo 21:5, biderhere ntya: “Najira ebintu byoshi bibe bihyahya.” Eyola sura ye Biblia, ederhere ku bintu bibiri Yehova ajira. Ech’oburhanzi, Yehova alimbula linola gulu lishajire. Echa kabiri alerha egulu lihya-hya. Omu Ufunuo 21:1, haderhere ntya: “Embingu ya burhanzi n’egulu lya burhanzi byabaga byagerere.” “Embingu ya burhanzi” mali marhegesi m’epolitike mali mashumikwa na Shetani n’abazimu bage. (Mt. 4:8, 9; 1 Yoh. 5:19) Nk’oku biderherwe omu Biblia, “egulu” lyakashushanywa n’abantu balilamireko. (Mwa. 11:1; Zb. 96:1) Bobola, “egulu lya burhanzi” lishushanyizwe n’abantu babi balilamireko. Yehova arhakatosheka n’okukwiziza “embingu” “n’egulu”; byazene konyine, s’ahubwe nj’abilimbula burundu. Naho nj’akula embingu n’egulu bya zene n’okuhebaho “embingu n’egulu bihyahya,” k’okuderha oburhegesi buhyahya obunji bwarhegeka abanyakunali.
10. Bichi Yehova nj’ajira bihyahya?
10 Omu Ufunuo 21:5, aharhujire rhwasoma oku bilolere ebintu Yehova aderhere oku ahindamula bibe bihyahya. Obwene oku Yehova arhaderhere oku: “Indi najira ebintu bihyahya byoshi.” S’ahubwe, aderhere: “Indi najira ebintu byoshi bibe bihyahya.” Na ntyo, Yehova nj’ajira egulu n’abantu bibe nka bihyahya omu kubigalula oku bushinganyanya. Nk’oku Isaya abaga alebere, Yehova nj’ajira egulu habe hantu hakwirire bwenene kuguma n’oku ebustani ye Edeni yaliri. Kandi nj’arhujira bahyahya omu kufumya buli muguma werhu loshi loshi. Ebilema, empumi, abarhayunva boshi nji bafuma, chiro n’abafiire nji bafuuka.—Isa. 25:8; 35:1-7.
“EBILA BINWA BILI BYAKUCHIZERWA BINALI BY’OKULI. . . . BYAMALIRE YENERA!”
11. Bichi Yehova alibwirire Yohana ajire, na bulagurhe?
11 Kandi bichi Mungu ajirire yarhuyemeza oku rhwakamulangalira? Yehova abwira Yohana ntya: “Yandika, bulala ebila binwa bili byakuchizerwa binali by’okuli.” (Ufu. 21:5) Yehova arhahanaga konyine erhegeko ‘ly’okuyandika.’ Aliko kandi aderhere n’empanvu yarhumaga ahana elyola rhegeko. Aderhere ntya: “Binola binwa bili byakuchizerwa binali by’okuli,” k’okuderha, Echinwa cha Mungu chili cha kulangalirwa chinali ch’okuli. Rhugwerhe eshukrani y’okubona okuntu Yohana akengaga erhegeko ‘ly’okuyandika.’ Nantyo rhwakasoma oku chilagane cha Mungu che gulu lihyahya n’okukengera oku migisho minja bwenene eli embere zerhu.
12. Bulagurhe Yehova aderhere: “Byamalire kuyenera!”
12 Bindi bichi Mungu ashubire kuderha? “Byamalire kuyenera!” (Ufu. 21:6) Bulagurhe Yehova aderhere oku ebila bilagane byamalire kuyenera. Akaderha ntyo bulala nta chintu n’echiguma chakamubuza kuyeneza omuhigo gwage. Naho Yehova aderhere echindi chintu ch’akarhuma rhwayemera oku echilagane chage nji chayenera bwinja bwinja. Bichi aderhere?
“NYONO NYE ALFA NA OMEGA”
13. Bulagurhe Yehova aderhere: “Nyono nye Alfa na Omega”?
13 Nk’oku rhwabaga rhwabwene embere, Yehova yenyine aderhere kasharhu koshi omu bibonekezi ahaga Yohana. (Ufu. 1:8; 21:5, 6; 22:13) Mw’ezola turu esharhu Yehova aderhere ntya: “Nyono nye Alfa na Omega.” Alfa ye herufi y’oburhanzi y’olufabe lwe Chigiriki na omega ye herufi y’obuzinda. Omu kuchiyirika “Alfa na Omega,” Yehova alonzeze kurhurhabala rhumenye oku, amango amarhondera chintu chilebe anachiyeneza.
Amango Yehova amarhondera chintu chilebe, anachihisya oku buzinda (Olole echifungo che 14, 17)
14. a) Lerha omufano guyerekene mu njira ehe Yehova ayerekene oku ali “Alfa” na mu njira nchi nj’ayerekana oku ali “Omega.” b) Chemezo chihe chiyerekenwe omu lwandiko lwa Mwanzo 2:1-3?
14 Amango Yehova amala kulema Adamu na Eva, ababwira omuhigo gwage gurhanzi oku bilolere abantu n’egulu. Ebiblia ederhere ntya: “Mungu abagisha, Mungu anababwira ntya: ‘Muburhe munabe banene, muyunjuze egulu munalirhegeke.’” (Mwa. 1:28) Amango Yehova arhonderesa omuhigo gwage aliri nk’oli aderha “Alfa.” Akasanzi nji kayinja, amango oluburho lwa Adamu na Eva lunakenga lushinganyanya nji lwayunjula oku gulu n’okulihindamula libe paradizo. Mw’agola mango mayinjire Yehova nj’aba nka amaderha “Omega.” Amango Yehova amala kulema “embingu n’egulu na buli chintu chilimo,” aderha chintu chilebe y’ayerekana oku omuhigo gwage gukwanene kuyenera loshi loshi. Chibonekene omu Mwanzo 2:1-3. (Osome.) Yehova aderha oku olusiku lwa mushanvu luli luchesibwa. Ko kuderha gurhe? Echola chiyerekene oku, omuhigo gwa Yehova oku bantu n’egulu nji gwayenera oku buzinda b’olusiku lwa mushanvu.
15. Bichi byarhumaga Shetani awaza oku agwerhe obuhashe b’okurhuma Yehova arhayeneza omuhigo gwage?
15 Amango Adamu na Eva bamala kuchijira bigamba, baba banya-byaha, barhuma n’abana babo baba banya-byaha. (Ro. 5:12) Oku byalijire byaba, byashusha oku birhachigalikana abantu bashinganyanya banakengere Yehova bayunjuze egulu. Shetani alibuzize Yehova kuyeneza omuhigo gwage si? Nkabaga Shetani aliwazize oku Yehova arhayeneza omuhigo gwage. Nkabaga aliwazize oku Yehova akayirhire Adamu na Eva n’okushuba kulema owindi mulume n’omukazi bashinganyanya y’ayeneza omuhigo gwage oku bantu boshi. Aliko nka Mungu ajiraga ntyo, Ibilisi akabere eyi amashobeka Mungu oku ali mubeshi. Bulagurhe? Bulala, ebinwa bili omu Mwanzo 1:28, biyerekene oku Yehova ali abwira Adamu na Eva oku oluburho lwabo lwakayunjwize egulu.
16. Bulagurhe Shetani aliwazize oku akashobekere Yehova oku agambirwe kuyeneza omuhigo gwage?
16 Gwindi muhigo guhe Shetani aliwazize oku Mungu akarholere? Nkabaga Shetani aliwazize oku Yehova akalekere Adamu na Eva baburhe abana barhashinganene, aliko barhakafire bahikire oku bushinganyanya. (Muh. 7:20; Ro. 3:23) Mw’eyola hali, buzira ngangane Ibilisi akabere ey’ashobekere Yehova oku agambirwe kuyeneza omuhigo gwage. Bulagurhe? Bulala echola chirhakayeneze omuhigo gwa Mungu, k’okuderha okuyeneza omuhigo gwe Paradizo oku gulu, oluburho lwa Adamu na Eva lw’abantu bakengere, banali bashinganyanya.
17. Gurhe Yehova alijirire y’ahima obugamba bwa Shetani n’obw’abantu barhanzi, na gurhe nji byaja byaba oku buzinda? (Olole n’efoto.)
17 Yehova alimalire obugamba bwa Shetani n’obw’abantu barhanzi omu njira ekozeze Shetani eshonyi. (Zb. 92:5) Yehova aliyemerere Adamu na Eva baburhe abana na kugerera echola, ebinwa bya Yehova byaba by’okuli. Arhabesha. Kandi Yehova ayerekene oku amango amaderha oku ajira chintu chilebe, ntacho chakamubuza kuchiyeneza. Arhuhere echemezo oku omuhigo gwage nji gwayenera omu kuhaana “oluburho” lwakachungwire echizazi ch’abantu banakenga cha Adamu na Eva. (Mwa. 3:15; 22:18) Shetani arhaliwazize oku ntyo ku Yehova akajirire omu kumala echola chibazo, olola luburho lw’akahanire akalamo kage nka nchungu yachungula bantu banene! Bulagurhe? Bulala enchungu eyumangire oku buzigire burhali b’obwikazize. (Mt. 20:28; Yoh. 3:16) Shetani yewe arhakagwarha eyola ngeso, yewe ali mwikazize. Bobola, bichi byarhengerera eju y’ogola mupango gw’enchungu? Oku buzinda bwa myaka 1 000 y’Oburhegesi bwa Kristu, oluburho lukengere lushinganyanya lwa Adamu na Eva nji balama omu gulu lye paradizo nk’oku Yehova anabaga alaganyize burhanzi. Mw’agola mango, Yehova nj’aderha nk’oku anabaga aderhere oku ali, “Omega.”
GURHE RHWAKOMEZA OBWEMERE BWERHU OMU CHILAGANE CHA YEHOVA CHE PARADIZO?
18. Byemezo bihe bisharhu Mungu arhuhere? (Olole n’echisanduku “Mpanvu Esharhu Zakarhuma Rhwalangalira Echilagane cha Yehova.”)
18 Mu gunola mwazi rhwabwene mpanvu zihe zirhumire rhwachizera oku egulu nji lyaba Paradizo. Bichi rhwakabwira abandi yi bayemera oku kweri ebila nji byayenera? Ech’oburhanzi Yehova yewe yenyine ahaanire echola chilagane. Echitabu cha Ufunuo chiderhere ntya: “Olala oyikere oku chirhi ch’obwami aderha: ‘Tala! Indi najira ebintu byoshi bibe bihyahya.’” Agwerhe obwengehe, emisi, n’enyorha y’okuyeneza echilagane chage. Echa kabiri, Yehova amenyere oku eby’aderhere kweri nji byayenera. Echola ch’echirhumire aderha ntya: “Ebila binwa bili byakuchizerwa binali by’okuli. . . . Byamalire kuyenera!” Echa kasharhu, ntachintu chakabuza Yehova kumaliriza chintu chilebe arhondere. Echola ch’echirhumire aderha ntya: “Nye Alfa kandi nye Omega.” Yehova nj’ayerekana oku Shetani ali mubeshi orhakamubuza kuyeneza omuhigo gwage.
19. Amango abantu bamagwarha engangane oku bilolere echilagane cha Mungu che Paradizo, gurhe wakajira?
19 Oyibuke oku, amango oli wabwira abantu ebi Yehova aderhere by’okurhuyemeza oku ebilagane byage nji byanera, onaba ey’oli wakomeza obwemere bwawe muye. Bobola, amango wamasomera omuntu echilagane chihebere omurhima che Paradizo yayinjire chiderherwe omu Ufunuo 21:4, akaja aderha ntya: “Ebila bishushire oku bili binja bwenene binali by’okuli,” gurhe wakaja wajira? Wakamusomera omustari gwa 5 n’ogwa 6 onamufasiriye. Omuyereke nka gurhe Yehova arhuhere echemezo ch’echilagane chage omu kuchisinyeko n’esinyatire yage yewe yenyine.—Isa. 65:16.
OLWIMPO 145 Echilagane cha Mungu che Paradizo!
a Mu gunola mwazi rhwaganira oku chemezo Yehova arhuhere yi rhurhagwarha engangane omu chilagane chage oku egulu lihyahya nji lyabaho. Amango moshi rhuli rhwaganira n’abantu kw’echola chemezo, rhunaba eyi rhuli rhwakomeza obulangalire bwerhu mw’ebyola bilagane bya Yehova.
b Olole echitabu Ufunuo—Upeo Wao Mtukufu U Karibu! bukurasa 303-304, chifungo 8-9.