“Musimike, Ntakushaganyika”

1-2. Mu njira ehe Omukristu akahuzanywa n’enju ye etaje elehere bwenene? (1 Wakorinto 15:58)

OMU mwaka gwa 1978, enju ye etaje elehere bwenene, yaliyumbakirwe omu vile ye Tokyo, omu Japon. Abantu banachibaza nka gurhe enagala kulembera emisisi enazigana kugera mw’eyola vile. Bichi baenjenyere balijirire y’eyola nju elehere bwenene egala kulembera emisisi? Ba enjenyere bayiyumbakire omu bulyo bukomere aliko eyi enalembere bwenene y’egala kukomerera eyola misisi amango obudaka buli bwadirhimana. Abakristu bali nk’eyola nju elehere bwenene. Nka gurhe?

² Omukristu akwanene kugwarha olugero oku bilolere okuyorha asimikire n’okulemba changwa okuyanguha. Bimuhemere ayorhe aserere n’okushinga omugara n’okuhigirira buli mango kukenga esheriya n’amakanuni ma Yehova. (Osome 1 Wakorinto 15:58.) Aba “tayari kukenga” arhanayemera ashumikwa avune amakanuni ma Yehova. Oku lwindi lunda, bimuhemere agwarhe “olugero” changwa ayanguhe amango bigalikene changwa amango bimuhemere okujirantyo. (Yak. 3:17) Omukristu ogwerhe engeso y’olugero eli nk’eyola, anachilanga y’arhabamuntu orhaharhulwa onashinga omugagala, changwa kuba muntu w’okulekerera ebintu ntyo hoshaho. Mu gunola mwazi, rhwaganira nkagurhe rhurhakwanene kuziga rhwashaganyika. Kandi rhwaganira ku njira erhano Shetani anachihangana kukolesa y’anosya olwimango lwerhu n’okuntu rhwakahima emirhego yage.

NKA GURHE RHWAKASIMIKA?

3. Sheriya zihe z’Omurhegesi Mukulu ogwerhe ehaki y’okuhebaho amarhegeko zibonekene omu chitabu cha Matendo 15:28, 29?

³ Yehova yekwanene kuheberaho abantu bage esheriya, nabuli mango anarhabala abantu bage bibayorohere kuziyunva. (Isa. 33:22) Omufano, ebaraza lirhambwire ly’omukagana ka burhanzi lyalirhegerere njira esharhu Abakristu bakwanene kuyorhamo eyi baserere: 1) omu kuyaka emparamyo y’ebishushanyo, aliko rhunaharamya Yehova yewe yenyine, 2) omu kukenga esheriya ya Yehova ederhere oku eshagama eli nchesibwa, na 3) omu kukenga erhegeko lye Biblia ly’okuchiyasya ebijiro by’obubaraga. (Osome Matendo 15:28, 29.) Nka gurhe Abakristu zene bakagenderera kuyorha basimikire mw’ezola njira esharhu?

4. Gurhe rhunachishwekera ku Yehova yewe yenyine? (Ufunuo 4:11)

⁴ Rhunayaka emparamyo y’ebishushanyo, aliko rhunaharamya Yehova yewe yenyine. Yehova alihere Abaizraeli erhegeko ly’okumuharamya yewe yenyine. (Kum. 5:6-10) Kandi amango Yesu ageregezwa na Shetani alimubwirire oku, Yehova yenyine yirhukwanene kuharamya. (Mt. 4:8-10) B’obola, rhurhaharamya ebishushanyo byamadini. Rhurhanaharamya abantu. Omufano, abakulu bamadini, abarhegesi b’epolitike, changwa abantu banasharha amasharha malebe, abantu banakola amavideo, abantu banazina bamenyikene bwenene n’okubarhola boshi nka ba mungu. Rhunachihangana kuyorha oku lunda lwa Yehova n’okumuharamya yewe yenyine bulala “yiwalemaga ebintu byoshi.”—Osome Ufunuo 4:11.

5. Bulagurhe rhwukwanene kukenga esheriya ya Yehova ederhere oku rhukwanene kubona akalamo n’eshagama oku bili bichesibwa?

⁵ Rhunakenga esheriya ya Yehova ederhere oku bilolere obuchesibwa bw’akalamo n’eshagama. Bulagurhe? Bulala Yehova aderhere oku eshagama eshushanyize akalamo, enali mpano y’akamaro erhengere emwage. (Law. 17:14) Kurhenga amango Yehova abwira abantu oku bayinje balya enyama, abahereza erhegeko oku barhakwanene kulya eshagama. (Mwa. 9:4) Alishubire galukira elyola rhegeko amango ahereza Abaizraeli Esheriya ya Musa. (Law. 17:10) Kandi aliyerekeze ebaraza lirhambwire ly’omu kagana kaburhanzi libwire Abakristu boshi “bagenderere kuchiyasa . . . eshagama.” (Mdo. 15:28, 29) Rhunakenga bwenene elyola rhegeko amango rhwamarhola esimikiro oku bilolere okuntu rhwabukwa.b

6. Bichi rhunajira yirhugala kukenga amakanuni ma Yehova menyanya malolere okuchigendesa?

⁶ Rhunakenga loshi amakanuni ma Yehova m’enyanya m’okuchigendesa. (Ebr. 13:4) Entuma Paulo alikoleseze ebinwa by’omufano omu kurhuhanula “rhuyirhe” ebirumbu by’omubiri gwerhu, k’okuderha oku, rhukwanene kujira okwerhu koshi, rhulekane n’enyifinjo yoshi-yoshi ebihire. Rhunayaka kujira echintu choshi-choshi chakarhuma rhwajira eby’obubaraga. (Kol. 3:5; Yob. 31:1) Amango rhwamashumikwa kujira chintu chilebe chirhakwanene, aho han’aho rhwanayaka amawazo moshi-moshi changwa echijiro chakahanyagaza obwira bwerhu haguma na Mungu.

7. Bichi rhukwanene kuhigirira kujira, na bulagurhe?

⁷ Yehova aba alonzeze oku “rhumukenge birhengere oku murhima.” (Ro. 6:17) Eby’anarhubwira buli mango biba eyi bili binja, kandi rhurhakanahindamula haban’akatyu amarhegeko mage. (Isa. 48:17, 18; 1 Kor. 6:9, 10) Rhunajira okwerhu koshi yi rhusiimisa Yehova n’okugwarha amawazo mali nk’amomwandisi w’ezaburi waderhaga ntya: “Nahigirire kukenga amarhegeko mawe amango moshi kugera oku buzinda.” (Zb. 119:112) Aliko, Shetani y’ajira okuntu birhukomerere kukenga amakanuni ma Yehova. Njira zihe anakolesa?

GURHE SHETANI ANACHIHANGANA KUNOSYA OLWIMANGO LWERHU?

8. Gurhe Shetani anakolesa amalibuko y’achihangana kunosya olwimango lwerhu?

⁸ Okulibuzwa. Shetani anashumika abantu barhulibuze n’okurhuhidika y’ibanosya olwimango lwerhu. Omuhigo gwage kuli “kurhumira,” k’okuderha rhuheze obwira bwerhu haguma na Yehova. (1 Pe. 5:8) Abakristu b’omu kagana kaburhanzi baliri bayubahiswa, kushurhwa, n’okuyirhwa, bulala balihigirire kuyorha buzira kushaganyika. (Mdo. 5:27, 28, 40; 7:54-60) Na zene Shetani agenderere kurhulibuza. Rhwakabona ebyola omu njira zinene zilengene, kugerera ebintu Shetani ali akolera bene-berhu na bali-berhu b’omu Russie n’omu bindi bihugo. N’omu gulu lyoshi bali balibuza bene-berhu na bali-berhu mu njira nguma changwa eyindi.

9. Mufano guhe guyerekene oku rhukwanene kuchilanga oku kahidiko karhabonekene bwinja?

⁹ Akahidiko karhabonekene bwinja. Olekere okurhulibuza omu njira ebonekene bwinja-bwinja, Shetani anashuba kukolesa “ebijiro by’obulyalya.” (Efe. 6:11) Rhurhole omufano gwa mwene-werhu oyirikirwe Bob waliri omu bitaro, aligwerhe obulwala bukomere byanalihemere bamubere. Abwira ba dogtere oku chiro byaba gurhe arhayemera bamuhebamo eshagama. Abanganga bayemera oku bakenga esimikiro yage. Aliko ebudufu embere bamubere, owindi dogtere ayinja kulola Bob ey’abantu b’omulala gwage bagalukire eka. Abwira Bob oku barhakolesa eshagama, aliko baba bayigwerhe ahaburhambi oku nkabaga hali amango yakakenerwa. Nkabaga dogtere aliwazize oku Bob akahindamula amawazo mage bulala nta muntu w’omulala gwage walichili ahola. Aliko Bob arhazigaga ashaganyika, arhakazigire bamuhebamo eshagama chiro byaba gurhe.

10. Bulagurhe enkengero z’abantu barhakenga esheriya za Yehova zakarhuheba omu murhego? (1 Wakorinto 3:19, 20)

¹⁰ Enkengero z’abantu barhakenga esheriya za Yehova. Nka rhugenderere kugwarha enkengero zili kuguma n’ez’abantu barhakenga esheriya za Yehova, rhwakagerera aha rhwarhondera kusuzagura esheriya zage. (Osome 1 Wakorinto 3:19, 20.) Mango manene, “obwengehe bwalinola gulu” bunashumika abantu bamenye bakenga Mungu. Bakristu bageke omu bibaga bye Pergamamu ne bye Tiyatira, balishumikirwe n’abantu balibazungulukire yibajira eby’obumaguza n’okuharamya ebishushanyo. Yesu ahereza ehano likomere kw’ebyola bibaga byombi bulala byaliri byalekerera ebyola bijiro by’obubaraga. (Ufu. 2:14, 20) Zene, abantu barhuzungulike bakachihangana kurhushumika nerhu rhuyemere amawazo mabihire. Abantu b’omulala na bera berhu bakajira okwabo koshi yibarhuyemeza oku rhuli bantu barhaharhulwa oku bilolere okuvuna esheriya za Yehova. Omufano, bakaderha oku kurhali kw’akamaro bwenene okugenderera kugwarha olungezi luchere n’oku amakanuni m’okuchigendesa mali omu Biblia mali ma mira.

11. Yirhuyorha buzira kushaganyika, bichi rhukwanene kuyaka?

¹¹ Mango maguma, rhwakawaza oku obwerekezi Yehova ali arhuha burhavire bwayunvikana bwinja. Nachiro rhwakashumikwa “rhuchubuke ebiyandikirwe.” (1 Ko. 4:6) Abakulu bamadini b’omu siku za Yesu balijirire echaha chili nk’echola. Baliri bayongeera amabo marhegeko oku Sheriya, naho byanaja byakomerera abantu be hali y’eshishi kumakenga. (Mt. 23:4) Yehova anarhuhereza obwerekezi buyunvikene bwinja kugerera Echinwa chage n’olubaga lwage. Nta mpanvu rhugwerhe y’okuyongeera chintu chilebe oku bwerekezi anarhuheza. (Mez. 3:5-7) Bobola rhurhakwanene kuchubuka ebiyandikirwe omu Biblia changwa kuheberaho bene-berhu na bali-berhu amarhegeko oku bibalolere bowe bonyine.

12. Gurhe Shetani anakolesa “obubeshi bwa busha-busha”?

¹² Ebinwa by’okurhebeka. Shetani anakolesa “ebinwa by’okurhebeka bya busha-busha” ‘n’ebintu by’omusinji by’egulu’, y’ahabula abantu n’okulerha akavulindi omu bantu. (Kol. 2:8) Omu kagana kaburhanzi, ebyola bintu byaliheberemo efilofizofiya z’abantu, enyigirizo ze Chiyahudi zirhaliyumangire oku mandiko, n’enyigirizo zaliderhere oku Abakristu balikwanene kukulikira Esheriya ya Musa. Amola mawazo maliri marhebeka abantu n’okurhuma barhaseza obwenge bwabo oku Shoko y’obwengehe b’okuli k’okuderha Yehova. Zene, Shetani ali akolesa ebikoleso by’okuyeneza emyazi, n’Enternete omu kuyeneza hoshi emyazi ya mpu-mpu, n’emyazi y’obubeshi erhengere oku barhegesi b’epolitike. Rhwachibwenere myazi minene y’obubeshi omu mango m’obulwala b’okuyahukira bwe Korona.c Abahamirizi ba Yehova bakulikiraga obwerekezi burhengere oku lubaga lwage, balichilangire oku milago yahakiraga balala baliri bayunviriza emyazi y’obubeshi y’okuhabula.—Mt. 24:45.

13. Bulagurhe rhukwanene kuchilanga nabuzira kuhugiswa?

¹³ Ebintu by’okuhugisa. Rhukwanene kuyorha rhusezeze obwenge bwerhu oku “bintu by’akamaro bwenene.” (Flp. 1:9, 10) Amango rhuli rhwahugiswa, rhunaheza ebisanzi byerhu binene n’emisi omu kujira ebintu birhagwerhe kamaro. Ebintu rhunazigana kujira omu kalamo nk’okulya, okunywa, okuchisimisa n’akasi k’omubiri rhunakola, byakarhuhusiga. Rhukaseza bwenene obwenge bwerhu kw’ebyola bintu byoshi, rhwanahugiswa omu kalamo kerhu. (Lu. 21:34, 35) Oku bwindi, buli lusiku rhulirhwayunva myazi minene ederhere oku bilolere abantu bali bahamuka, n’obuhaka omu bintu by’epolitike. Rhukwanene kuchilanga bwenene y’ebyola bintu bimenye byarhuhugisa. Nka rhurhajirire ntyo, rhwakahwanza kuyunva omu murhima gwerhu n’omu bwenge bwerhu oku rhujage oku lunda lubele omu by’epolitike. Shetani anakolesa ezola njira zoshi rhwamaganirako, eyi agwerhe omuhigo g’okunosya olwimango lwerhu l’okujira ebintu binja. Rhujage rhwaganira okuntu rhwakahima amashumi mage n’okuyorha rhuserere buzira kushaganyika.

NKA GURHE RHWAKAYORHA BUZIRA KUSHAGANYIKA?

14. Chintu chiguma chihe chakarhurhabala rhuyorhe oku lunda lwa Yehova buzira kushaganyika?

¹⁴ Okengere bwenene bulagurhe wahanaga akalamo kawe emwa Yehova n’okubatizwa. Warholere entambu zili nk’ezola bulala olonzeze kuyorha oku lunda lwa Yehova. Oyibuke bichi byakurhabalaga y’ochizera oku wapatire okuli. Wahikira kumenya Yehova, wanahwanza kumukenga, kumuzigira, bulala ali Yisho w’embingu. Wakuzize obwemere bwawe muye bwanakushunikire ohungame. Walekere kukola ebintu bibi Yehova anashomba, warhondera kukola ebintu binja binamusimisa. Wachiyunvirhe osimire amango omenya oku Mungu akubabalire. (Zb. 32:1, 2) Wahwanzize kuhika oku mbuganano z’Echikristu wanahwanza kubalira abandi oku bintu binja wayigire. Wachihaniire emwa Yehova wanaba Mukristu obatizwe, nakugera zene oli walambagira mw’elyola barabara lyakalamo, onali wajira okwawe koshi y’ogenderera kulilambagiramo.​—Mt. 7:13, 14.

15. Bulagurhe okuyiga n’okukengera oku chinwa cha Mungu byakarhulerhera enyungu?

¹⁵ Oyige Echinwa cha Mungu onachikengereko. Omurhi gwakayorha gukomere bwenene nka gugwerhe emizi echimire omu budaka. Konakuguma, nka nerhu rhugwerhe obwemere bukomere mu Yehova rhwagala kuyorha buzira kushaganyika. Ok’omurhi guli gwagenderera kukula ku n’emizi yago enagenderera kuchima bwenene omu budaka. Amango rhuli rhwayiga n’okukengera oku chinwa cha Mungu, rhwanakomeza obwemere bwerhu kandi rhwanachizera bwenene oku enjira za Mungu ze zinja kulusha. (Kol. 2:6, 7) Owaze okuntu obwerekezi, amahano, n’obulanzi bya Yehova byarhabere akabozi bage b’omu mango magerere. Omufano, Ezekieli aliri merangwe amango malayika aliri arhola ebipimo by’ehekalu abonaga omu chibonekezi. Echola chibonekezi chalihebere Ezekieli emisi, kandi chirhuyigirize oku bilolere okuntu rhwakakenga amakanuni ma Yehova m’okuli oku bilolere obuharamye buchere.d (Eze. 40:1-4; 43:10-12) Nerhu rhunayunguka amango rhwamarhola ebisanzi by’okuyiga n’okukengera bwenene oku bilolere ebintu bikomere bili omu chinwa cha Mungu.

16. Gurhe okugwarha omurhima gurhakashaganywa kwalirhabere mwene-werhu Bob? (Zaburi 112:7)

¹⁶ Okomeze omurhima gwawe. Omwami Daudi aderha oku arhakafa ahezeze haba nakatyu obuzigire bwage ku Yehova amango ayimpa ntya: “Mungu we, omurhima gwani gusimikire.” (Zb. 57:7) Nerhu rhwakagwarha omurhima gusimikire, omu kulangalira Yehova bwenene. (Osome Zaburi 112:7.) Rhulole gurhe echola chalirhabere mwene-werhu Bob rhwabaga rhwaganirireko. Amango bamubwira oku eshagama yaheberwe hofi-hofi omu mango yakakenerwa, ashubiza ahohan’aho oku bakalonza kumuhebamo eshagama, akarhengere omu bitaro aho han’aho. Buzinda mwene-werhu Bob aderha ntya: “Nta ngangane yoshi-yoshi naligwerhe oku bilolere ebinakajirire, nta naliyubahire haba n’akatyu oku byakampikiire.”

17. Bichi ebi mwene-werhu Bob agereremo byakarhuyigiriza? (Olole n’efoto.)

¹⁷ Mwene-werhu Bob aliyorhere buzira kushaganyika, bulala alirholere esimikiro embere w’ebisanzi y’okuyorha buzira kudundwa embere aje oku bitaro. Ech’oburhanzi, alilonzeze kusiimisa Yehova. Echa kabiri, aliri ayiga bwinja bwinja ebye Biblia n’ebitabu byerhu biyumangiire oku Biblia biderhere oku bilolere obuchesibwa bw’akalamo n’eshagama. Echa kasharhu alichizerere oku, okukulikiza obwerekezi bwa Yehova kwakamulerhere enyungu zigenderere. Nerhu rhwakagwarha omurhima gurhakashaganyika chiro akaba yirhwahurana ebigeregezo bili gurhe.

18. Nka gurhe omufano gwa Baraka gurhuyigirize oku rhukwanene kulangalira Yehova? (Olole efoto y’oku chiganda.)

¹⁸ Olangalire Yehova. Rhuwaze oku kuntu Baraka aligalire kuhima evita bulala alilangalire obwerekezi burhengere emwa Yehova. Mw’agola mango abantu b’omu Izraeli barhalichirheganyize kulwa. Chiro barhanaligwerhe entwaro z’evita. Aliko Yehova abwira Baraka oku aje kulwa na Sisera omukulu wa basoda be Kaanani nabola basoda bage baligwerhe entwaro kamama. (Amu. 5:8) Omulebi-kazi Debora abwira Baraka oku achime omu lubanda kubuganana na Sisera n’ebitugari byage by’evita 900. Omu lubanda, byakakomerere Abaizraeli kulwa evita bulala Abakanaani baligwerhe ebitugari by’evita. Chiro akaba oku Baraka alimenyere echola akenga. Oku abasoda baliri bayandagala oku Musozi Tabori, Yehova ashesha envula nene bwenene kurhenga embingu. Ebitugari bya Sisera by’evita byazika omu byondo, na Yehova ahereza Baraka obuhimanyi. (Amu. 4:1-7, 10, 13-16) Konakuguma, Yehova njarhuhereza obuhimanyi rhukakenga obwerekezi ali arhuhereza kugerera olubaga lwage.​—Kum. 31:6.

OHIGIRIRE KUYORHA OSIMIKIRE

19. Bulagurhe ohigirire kuyorha osimikire?

¹⁹ Rhwagenderera kuyorha rhusimikire, amango moshi rhulamire mu zinola siku z’obuzinda. (1 Ti. 6:11, 12; 2 Pe. 3:17) Rhujage rhwahigirira okurhaziga rhwashaganyika haba n’akatyu n’ebigeregezo, akahidiko karhabonekene bwinja, enkengero z’abantu barhakolera Yehova, ebinwa by’obubeshi, n’ebintu byakarhuhugisa. (Efe. 4:14) Oku bwindi, rhujage rhwayorha rhusimikire, rhugenderere kuzigira Yehova n’okukenga amarhegeko mage. Mw’ebyo bisanzi by’enebyo, rhukwanene kuba bantu bagwerhe olugero. Omu mwazi gukulikireho njirhwaganira okuntu Yehova na Yesu bali mifano eshinganene oku bilolere okuyerekana engeso y’olugero.