Bashamuka, Muyiganye Omufano gwa Gideoni

1. Nk’oku olwandiko lwa 1 Petro 5:2 luderhere, kasi kahe k’akamaro abashamuka bakwanene kujira?

ABASHAMUKA b’Abakristu bakwanene kushishikala entama z’akachiro za Yehova. Abola balume banachihaana bwenene banabona oku engabane bagwerhe y’okushishikala bene-babo na abali-babo eli y’akachiro bwenene, kandi banakola bwenene “nk’abangeri . . . banalagira bwinja-bwinja.” (Yer. 23:4; osome 1 Petro 5:2.) Rhubwirire Yehova koko bwenene bulala rhugwerhe abalume bali nk’abola omu bibaga byerhu!

2. Bibazo bihe bashamuka baguma bakahurana?

² Abashamuka banahurana bibazo binene, amango bali bayeneza engabane zabo. Omufano, abashamuka bakwanene kukola bwenene yibashishikala echibaga. Omushamuka w’omu Etats-Unis oyirikirwe Tony, byalimuhemere agwarhe engeso y’olugero bwenene, oku bilolere amakasi akwanene kuyemera. Aderhere ntya: “Amango obula bulwala bwe Korona burhondera, nalichihanganire kukola makasi manene bwenene oku bilolere okurheganya embuganano z’echibaga n’akasi k’amahubiri. Chiro akaba oku naliri nakola binene, halichili binene by’okukola. N’echola charhuma ntachigwarha bisanzi binene by’okusoma Ebiblia, okuyiga nyenyine n’okusalira.” Ilir, mushamuka omu Kosovo, alihurene n’echindi-chindi chibazo. Amango aliri omu eneo yalirimo evita, alibwene oku bimukomerere kukenga obwerekezi burhengere oku lubaga lwa Yehova. Aderhere ntya: “Obushiru bwani bwaligeregezwe amango ebiro by’omurhabi bimpa engabane y’okurhabala bene-berhu na bali-berhu bali omu eneo elimo obuhanya. Naligwerhe obuba, n’obola bwerekezi bwalibonekene nka burhayunvikene bwinja.” Tim, oli misiyonere omu Asie, alibwene oku bimukomerere kukola ebintu byoshi akwanene kujira buli lusiku. Aderhere ntya: “Mango maguma naliri nachiyunva nduhire bwenene ntakanachigalire kushishikala bene-berhu na bali-berhu.” Bichi byakarhabala abashamuka bali bahurana ebibazo bili nk’ebyola?

3. Inkagurhe rhweshi rhwakayunguka omu kuganira oku mufano gw’Omuzuzi Gideoni?

³ Omufano gw’Omuzuzi Gideoni gwakayigiriza abashamuka bintu binene. (Ebr. 6:12; 11:32) Aliri alanga n’okuyigiriza abantu ba Mungu. (Amu. 2:16; 1 Ny. 17:6) Kuguma na Gideoni, abashamuka bashimikirwe yibashishikala abantu ba Mungu omu mango m’ebibazo bikomere. (Mdo. 20:28; 2 Ti. 3:1) Omufano gwa Gideoni g’olugero, obwirhohye, n’obukenge byakarhuyigiriza bintu bilebe. Okulembera kwage, kwaligereregezwe amango aliri akola engabane zage. Rhube rhuli bashamuka changwa nanga, rhwakagwarha shukrani nene oku bashamuka berhu. Rhwakarhabala abola balume bakulire ekiroho banakola bwenene omu kurhushishikala omu bibaga byerhu.—Ebr. 13:17.

AMANGO OLUGERO N’OBWIRHOHYE BYAWE BYAMAGEREGEZWA

4. Gurhe Gideoni ayerekene obwirhohye n’olugero?

⁴ Gideoni aliri muntu mwirhohye onagwerhe olugero.b Amango Malaika wa Yehova abwira Gideoni oku achishogerwe y’achungula Abaizraeli omu maboko m’Abamidiyani bagwerhe emisi, oyola mulume mwirhohye ashubiza ntya: “Obuuko bwani b’obugwerhe bantu bageke bwenene omu buuko bwa Manase, nani nye muntu orhagwerhe kachiro haba nakatyu omu nju ya darha.” (Amu. 6:15) Gideoni alichiyunvirhe oku arhakwanene kuhabwa eyola ngabane, aliko Yehova alimenyere oku akayigala. Kugerera oburhabale bwa Yehova, Gideoni akola bwinja-bwinja engabane yage.

5. Mangochi byakakomerera omushamuka kugwarha olugero n’okuba mwirhohye?

⁵ Abashamuka banajira okwabo koshi yibayerekana engeso y’obwirhohye n’olugero mu buli chintu choshi. (Mik. 6:8; Mdo. 20:18, 19) Barhachibanda omu chifuba oku bilolere ebi bali bakola changwa ebi bayeneze, barhanachiyunva nka ntacho bamalire bulala bagwerhe buzamba bulebe. Aliko mango maguma, byakakomerera omushamuka kugwarha olugero n’okuba mwirhohye. Omufano, hali oku akayemera ngabane zinene naho zanamugamba kuziyeneza zoshi. Changwa byakamukomerera kuyerekana olugero n’obwirhohye amango bantu balebe bali bamusingiza, changwa kandi, bantu balebe bakamuderha-derha kubi oku bilolere okuntu anakola ebintu. Bichi abashamuka bakayiga kugerera omufano gwa Gideoni chakabarhabala omu hali zili nk’ezola?

6. Bichi abashamuka bakayiga kugerera omufano gwa Gideoni g’olugero? (Olole n’efoto.)

⁶ Oheme oburhabale. Omuntu ogwerhe olugero anarhegera oku hali ebintu arhakagala kujira. Gideoni aligwerhe olugero bulala alihemere abandi oburhabale. (Amu. 6:27, 35; 7:24) Intyo kw’abashamuka bayengehere bakwanene kujira nabo. Tony, rhwabaga rhwashambereko embere, aderhere ntya: “Kurhengana n’okuntu nakoomezwe nchili mwana, naliri nayemera buli ngabane yoshi bampere chiro n’eyintakagala kuyeneza. Bobola nachishoga oku rhuganire oku ngeso y’olugero omu buharamye bwerhu b’omulala, nanayunviriza ebi mukani aderhaga. Kandi nashuba kulola oku jw.org evideo Kama Yesu, Uwazoeze, Uwategemeze na Uwatie Wengine Nguvu (Kuguma na Yesu, Okoomeze, Orhabale Onakomeze Abandi).” Tony arhondera kubwira abandi bamurhabale oku makasi. Gurhe ebintu byalijire byaba? Tony aderhere ntya: “Amakasi m’omu chibaga mali magenderera kushishikalwa, nani ngwerhe ebisanzi binene by’okukomeza obwira bwani haguma na Yehova.”

7. Nka gurhe abashamuka bakayiganya omufano gwa Gideoni amango bamabaderha-derha kubi? (Yakobo 3:13)

⁷ Omenye wagwarha oburhe amango muntu mulebe amakuderha-derha kubi. Echindi chibazo abashamuka bakahurana nacho chili amango bamabaderha-derha kubi. Kandi omufano gwa Gideoni gwakabarhabala, alimenyere oku arhashinganene naho agenderera kurhulera amango abanya Efraimu bamuderha-derha kubi. (Amu. 8:1-3) Gideoni arhashubizaga n’oburhe. Ayerekana oku ali mwirhohye omu kuyunviriza ebibaliri baderha, anabashubiza okubwinja n’echola charhuma barhulera. Abashamuka bayengehere banayiganya Gideoni omu kuyunviriza bwinja-bwinja n’okushubiza oku bwinja amango bamabaderha derha kubi. (Osome Yakobo 3:13.) Amango bamajira ntyo banarhabala omu kulerha omurhula omu chibaga.

8. Gurhe abashamuka bakwanene kujira amango bamabasingiza? Lerha omufano.

⁸ Ohereze Yehova obukuuze bwoshi. Amango abantu bahereza Gideoni erenge bulala ahimire Abamidiani, alisezeze obwenge ku Yehova. (Amu. 8:22, 23) Gurhe abalume bashimikirwe bakayiganya omufano gwa Gideoni? Bakwanene kuhereza Yehova obukuuze ku byoshi bali bayeneza. (1 Ko. 4:6, 7) Omufano, akaba bali basingiza omushamuka oku bilolere obuhashe agwerhe b’okuyigiriza, akwanene kuderha oku enyigirizo rhunahabwa zirhengere omu chinwa cha Mungu, kandi rhweshi rhunayigirizwa kugerera olubaga lwa Yehova. Abashamuka bakwanene kuchibaza akaba bali bayigiriza omu njira ehereze Yehova obukuuze, changwa akaba bali balonza abantu babasingize. Rhuganire oku mufano gw’omushamuka oyirikirwe Timothy. Amango arhondera kukola nka mushamuka, Timothy aliri asiima kugeza amajambo m’abantu boshi. Aderhere ntya: “Naliri nazigana kurhondera n’ebinwa by’omurhondero bilehere binali mw’emifano ekomeere. Abantu baliri bazigana kunsiingiza kugerera ebyola. Aliko, echola chaliri charhuma abonviriza banseza k’obwenge ahali h’okubuseza oku Biblia changwa ku Yehova.” Amango Timothy arhegeera echola, abona oku akwanene kuhindamula okuntu anayigiriza y’abonviriza barhayinja bamuseza k’obwenge bwenene. (Mez. 27:21) Gurhe byajire byaba? Afasiriye ntya: “Bunola bene-berhu na bali-berhu bambwirire oku ejambo lyani lyabarhabere kulwisa ebibazo, kulembera ebigeregezo, changwa kugala kuyegera Yehova bwenene. Inanchiyunva ngwerhe obusiime bunene amango nanyunva ebyola binwa, kulusha okuntu naliri nachiyunva amango baliri bansigiza omu myaka egerere.”

AMANGO BIRHUKOMERERE KUKENGA CHANGWA KUYEREKANA OBUSHIRU

9. Bichi byakarhumire byakomerera Gideoni kukenga Yehova n’okugwarha obushiru? (Olole efoto y’oku chiganda.)

⁹ Amango Gideoni ahabwa engabane y’okuyerekeza eshanja lye Izraeli, byalimuhemere akenge anagwarhe obushiru. Alihabirwe engabane ekomeere bwenene y’okushanda amazabahu m’eshe baliri bakolera kw’emparamyo ya Baali. (Amu. 6:25, 26) Enyuma waho, Gideoni amalire kugusha abasoda, Yehova abwira Gideoni turu ebiri zoshi, oku apunguze oluganjo lwabasoda bage. (Amu. 7:2-7) Buzinda abwirwa oku arhere enkambi yabanzi bage omu budufu bukulu.—Amu. 7:9-11.

10. Gurhe obukenge b’omushamuka bwakageregezwa?

¹⁰ Abashamuka bakwanene “kuba tayari kukenga.” (Yak. 3:17) Omushamuka onakenga anabatayari kukulikira eby’Amandiko maderhere n’obwerekezi burhengere oku lubaga lwa Mungu. Omu kujira ntyo omushamuka anayerekana omufano gwinja oku bandi. Aliko, byakachimukomerera kuyerekana obukenge. Omufano, hali oku mango maguma byakamukomerera kukulikira obwerekezi ahabirwe. Akachibaza akaba obwerekezi bulebe bunakwanene, changwa hali oku bakamuhema akole ngabane ndebe yakarhuma bamushweka. Gurhe abashamuka bakayiga omufano gwa Gideoni omu kuyerekana obukenge omu hali zili nk’ezola?

11. Bichi byakarhabala abashamuka kugenderera kukenga?

¹¹ Oyunvirize bwinja-bwinja obwerekezi onabukolese. Mungu abwira Gideoni gurhe ashanda amazabahu m’eshe, na ngahe ayumbaka amazabahu mahyahya ma Yehova, n’anyama ehe akwanene kuhana nka nterekero. Gideoni arhashibaga aja eyi n’eyi oku bilolere obwerekezi ahabirhwe, si akola bwinja-bwinja nk’oku Yehova anamubwirire. Zene, abashamuka banapata obwerekezi burhengere oku lubaga lwa Yehova kugerera amaruba, amatangazo, n’obwindi bwerekezi bwarhurhabala rhuyorhe rhugwerhe amagala menja, rhunagenderere kuba hofi na Yehova. Rhunazigira abola bashamuka bulala banakulikira oku bwimana obwerekezi burhengere oku lubaga lwa Yehova. Echibaga choshi chanayunguka n’obola bwerekezi.—Zb. 119:112.

12. Nka gurhe abashamuka bakakolesa ehano liri omu Waebrania 13:17, amango Olubaga lwa Yehova lwamababwira oku bahindamule okuntu baliri bajira mw’ebintu?

¹² Obe tayari kuhindamula ebintu. Oyibuke oku Yehova alibwirire Gideoni oku agalule eka hofi abasoda bage boshi. (Amu. 7:8) Akachibazize ntya: ‘Ka bili by’akamaro mpunguze abasoda bani? Okujira ntyo kwarhuma nahima elila vita?’ Chiro akaba ntyo, Gideoni alikengere. Zene abashamuka banayiganya omufano gwa Gideoni omu kukenga amango Olubaga lwerhu lubabwirire bajire bintu bilebe okuntu barhalikomeere. (Osome Waebrania 13:17.) Omufano, omu mwaka gwa 2 014, Ebaraza Lirhambwire lyahindamula okuntu enshololo z’okuyumbaka Amachumbi m’Obwami n’ezokuyumbaka Amachumbi m’Embuganano Zikulu zalema zahaanwa. (2 Ko. 8:12-14) Ebibaga birhachiyinjaga byajuha efuranga byaliri byahozwa z’okuyumbaka Amachumbi m’Obwami n’Amachumbi m’Embuganano Zikulu. Aliko zene, Olubaga lwerhu yilwakolesa enshololo zirhengere omu bibaga byoshi oku gulu, omu kuyumbaka Amachumbi m’Obwami n’Amachumbi m’Embuganano Zikulu hoshi malikenerwe, chiro akaba echibaga chakasholola lufuranga lugeke konyine. Amango José ayunva oku bahindamwire ogola mupango, agwarha engangane oku nkabaga ogola mupango ntacho gwahikako. Awaza ntya: ‘Nta Chumbi ly’Obwami nji lyachifa lyayumbakirwe. Arhali ntyo kw’ebintu binakolwa eno mwerhu.’ Bichi byarhabalaga José ashigikire obola bwerekezi? Aderhere ntya: “Ebinwa bili omu Mezali 3:5, 6 byanyibusya oku nkwanene kulangalira Yehova. N’ogola mupango gwalerhere amalehe menja bwenene! Rhurhali rhwayumbaka Amachumbi m’Obwami manene konyine, aliko kandi, rhwayigire kuhaana enshololo omu njira zilengene, yirhweshi rhubona ahantu h’okujirira Embuganano.”

13. a) Bichi Gideoni alichizerere? b) Nka gurhe abashamuka bakayiganya Gideoni? (Olole n’efoto.)

¹³ Ojire obulonza bwa Yehova n’obushiru. Gideoni alikengere Yehova chiro n’amango aligwerhe obuba, chiro oku n’engabane yage yakamulerhere obuhanya. (Amu. 9:17) Amango amala kupata echemezo chirhengere emwa Yehova, Gideoni achizera oku Mungu amurhabala kulanga abantu bage. Abashamuka balamire omu maeneo akasi kerhu kalahizwe, banayiganya omufano gwa Gideoni. Banachiheba oku mustari g’oburhanzi omu kuongoza embuganano, akasi k’amahubiri chiro akaba bali bayubahiswa oku bashwekwa, oku bababaza ebibazo, oku baheza akasi kabo, changwa kukolerwa kubi.c Omu mango m’amalibuko makulu, nji byahema abashamuka bagwarhe obushiru b’okukenga, amahano nji bahabwa chiro akaba bakahanyagaza akalamo kabo amango bamamakulikira. Omufano, nji rhwakahabwa obwerekezi okuntu rhwahana oburhumwa bukomere bwenene b’okuchira abantu olubanja, nabichi rhukwanene kujira yirhufuma amango m’echirhero cha Gogu wa Magogu.—Eze. 38:18; Ufu. 16:21.

MANGOCHI BIKOOMERE KULEMBERA

14. Bulagurhe byalikomerere Gideoni kulembera?

¹⁴ Gideoni alikwanene kukola bwenene y’ayeneza engabane yage y’ewe nka Muzuzi. Amango Abamidiani balibirha evita omu budufu bukulu, Gideoni abakulikiranya omu lubanda lwe Yezreeli omu njira yoshi eganire oku lwinji lwe Yordani nkabaga lwalizungulukirwe n’omuzirhu. (Amu. 7:22) Ka Gideoni aligalukiire oku lwinji lwe Yordani? Nanga! Chiro akaba oku aliluhire bwenene, yewe nabasoda bage 300, baliyambukire olwinji bagenderera kubakulikiranya. Buzinda, bahima Abamidiyani.—Amu. 8:4-12.

15. Bulagurhe mango maguma binakomerera omushamuka kulembera?

¹⁵ Mango maguma omushamuka akachiyunva aluhire bwenene amango ali ashishikala echibaga n’omulala gwage. Omu hali zili nkezola, gurhe abashamuka bakayiganya omufano gwa Gideoni?

16-17. Bichi byarhabalaga Gideoni kulembera, na bichi abashamuka bakwanene kuchizera? (Isaya 40:28-31) (Olole n’efoto.)

¹⁶ Olangalire oku Yehova akuhereza emisi. Gideoni alilangalire oku Yehova amuhereza emisi, nantyo ku Yehova analijirire. (Amu. 6:14, 34) Mango maguma Gideoni n’abasoda bage baliri bakulikiranya abami babiri b‘Abamidiyani, eyi bali oku magulu aliko byakashobokana oku abola bami bowe baliri oku ngamiya. (Amu. 8:12, 21) Aliko, Mungu alirhabere Abaizraeli babafarhe banahime eyola ntambala. Abashamuka nabo bakwanene kulangalira Yehova “orhaluha arhanayunva arhanagukire.” Abahereza emisi amango bayikenere.—Osome Isaya 40:28-31.

¹⁷ Rhuganirage oku mufano gwa mwene-werhu Matthew, muguma w’omu Komite y’Obunvikane n’Ebitaro. Bichi byamurhabalaga kulembera? Matthew aderhere ntya: “Naliheberwe emisi erhengere emwa Yehova ederherwe omu lwandiko lwa Wafilipi 4:13. Mango manene, eyi naliri nachiyunva nduhire oku kuntu ntakagala kukola chintu chilebe, naliri nasalira n’omurhima goshi nalakirira Yehova, ampereze emisi y’omubiri n’eyomu bwenge nkenere yingala kurhabala bene-berhu. Mw’ebyola bisanzi, naliri nachiyunva nk’eroho lichesibwa lya Yehova lyampere emisi yingala kulembera.” Kuguma na Gideoni, abashamuka berhu bazigirwa banakola bwenene yibashishikala abantu ba Yehova, chiro akaba oku birhaba biyorohere kujirantyo buli mango. Nechi abashamuka bakwanene kugwarha olugero n’okurhegeera oku buli mango barhakagala kujira buli chintu choshi nk’oku balilonzeze kuchijira. Naho bakwanene kulangalira Yehova oku ayunviriza amasala mabo m’okuhema oburhabale, kandi abahereza emisi y’okugala kulembera.—Zb. 116:1; Flp. 2:13.

18. Omu kuchiyibusya, nka gurhe abashamuka bakayiganya engeso za Gideoni?

¹⁸ Abashamuka bakayiga binene kugerera omufano gwa Gideoni. Abashamuka bakwanene kugwarha olugero n’obwirhohye oku bilolere makasi mangana gurhe bayemera kukola, kandi n’okuntu bakachifarha amango abantu bamabaderha-derha kubi, changwa bamabasingiza. Bakwanene kuyerekana obukenge n’obushiru, ahanene oku linola gulu libi lya Shetani liri lyayegera obuzinda bwalyo. Kandi bakwanene kuchizera oku nachiro bagwarha bibazo bili gurhe, Mungu akabarhabala. Kweri, rhugwerhe eshukarani kw’abola bangeri bali bakola bwenene kandi “rhugenderere kukenga abalume bali nk’abola.”—Flp. 2:29.