Siimira Obulangalire Bwawe Buzira Kuhola

1. Bulagurhe Abrahamu aligenderere kulangalira oku akapatire omwana?

YEHOVA alilaganyize mwira wage Abrahamu oku amashanja moshi m’oku gulu makagishirwe kugerera oluburho lwage. (Mwa. 15:5; 22:18) Bulala Abrahamu aligwerhe obwemere bukomere mu Mungu, alichizerere oku echilagane cha Mungu nji chayenera. Chiro akaba ntyo, amango Abrahamu aligwerhe myaka 100 na mukage myaka 90, oyola mulume n’omukazi bemana barhaligwerhe omwana. (Mwa. 21:1-7) Aliko, Ebiblia ederhere ntya: “Kugerera obulangalire, [Abrahamu] aligwerhe obwemere oku akabere eshe w’amashanja manene nk’oku byabaga byaderherwe.” (Ro. 4:18) Omenyere okw’ebi Abrahamu alilangalire byaliyenere. Aburha omwana w’oburhabana, Isaka, alilingirize mu myaka minene. Bulagurhe Abrahamu alichizerere oku Yehova akayeneze echilagane chage?

2. Bulagurhe Abrahamu aligwerhe obwizere oku echilagane cha Yehova nji chayenera?

² Bulala Abrahamu alimenyere Yehova bwinja, “aligwerhe obwizere bukomeere oku echi [Mungu] alaganyize” anachiyeneza. (Ro. 4:21) Yehova aliyemerere Abrahamu n’oku muyirika munya-kunali bulala aligwerhe obwemere. (Yak. 2:23) Nk’oku biyerekenwe omu Waroma 4:18, Abrahamu aligwerhe obulangalire n’obwemere. Leka rhuganire oku binwa Paulo aderhaga oku bilolere obulangalire, nk’oku biderherwe omu Waroma sura ya 5.

3. Bichi Paulo afasiriye oku bilolere obulangalire?

³ Paulo afasiriye bulagurhe rhukwanene kuchizera oku “olangalire arhahola.” (Ro. 5:5) Kandi arhurhabere rhumenye nka gurhe obulangalire bwerhu rhwewe nka Bakristu bukwanene kukomera. Oku rhunali rhwaganira oku Waroma 5:1-5, owaze gurhe obulangalire bwawe bw’amango mayinjire bwagenderere kukomera oku esiku zinali zagera. Mw’enola nganiro, rhwaganira kandi okuntu obulangalire bwawe bwakashuba kukomera bwenene kulusha nk’oku buli zene. Leka rhurhange rhuganire oku chilagane chinja bwenene Paulo aderhaga oku chirhakavuna omurhima.

OBULANGALIRE BWERHU BWINJA BWENENE

4. Bichi biganirirwe omu Waroma 5:1, 2?

⁴ Osome Waroma 5:1, 2. Ebyola binwa Paulo abiyandikiraga echibaga che Roma. Bene-berhu na bali-berhu b’eyola munda, babaga bayigire oku bilolere Yehova na Yesu, babaga bayerekene obwemere, banabaga babere Bakristu. Eju y’echola, Mungu ‘abayirika banya-kunali kugerera obwemere bwabo,’ anabashiga amavurha kugerera eroho lyage lichesibwa. Bakajire balangalira oku Mungu nj’abahereza oluhembo lwinja bwenene, banalichizerere oku nji balupata.

5. Bulangalire nyabachi abashiigwa bagwerhe?

⁵ Buzinda Paulo ayandikira Abakristu bashiigwa be Efeso oku bilolere obulangalire Mungu abaga abahere. Echola chilagane chakarhumire bapata “echi bashokola bowe nka bachesibwa.” (Efe. 1:18) Kandi Paulo alibwirire n’Abakolosayi ngahe nji bahabirwa oluhembo lwabo. Ali buyirikire “bulangalire bubikirwe eju yenyu omu mbingu.” (Kol. 1:4, 5) Abakristu bashiigwa bagwerhe obulanagalire oku nji bafuuka, n’okulama akalamo k’esiku n’amango omu mbingu emunda nji barhambula haguma na Kristu.—1 Te. 4:13-17; Ufu. 20:6.

6. Bichi mwene-werhu muguma w’omushiigwa aliderhere oku bilolere obulangalire bwage?

⁶ Abakristu bashiigwa basimisizwe bwenene n’obola bulangalire. Muguma mubo, Mwene-werhu Frederick Franz, aliderhere okuntu agendaga achiyunva eju y’obola bulangalire, aderha ntya: “Obulangalire bwerhu nji bwayenera bwinja bwinja na buli muguma werhu omu 144 000 n’japata ebi Yehova amulaganyize. Oluhembo lwerhu nji lwaba lwinja bwenene kulusha buli chintu choshi rhwakawaza.” Enyuma w’okukolera Mungu mu myaka minene oku bwimana, omu mwaka gwa 1991 Mwene-werhu Franz aderha ntya: “Rhuchigenderere kusimiswa bwenene n’obola bulangalire bwerhu. . . . Oku rhunali rhwagendera kulindira, kurhunali rhwagenderera kusimiswa nabo bwenene. Chili chintu ch’akachiro rhuli rhwalingiriza. Rhuli tayari kugenderera kuchilindira chiro akaba rhukwanene kuchilindira emiliyoni y’emyaka. Zene yi nagenderera kusiimiswa n’obola bulangalire kulusha oku byaliri mira.”

7-8. Bulangalire buhe bakozi banene ba Yehova bagwerhe? (Waroma 8:20, 21)

⁷ Banene omu bantu bali baharamya Yehova zene, bagwerhe obwindi bwindi bulangalire. Abrahamu aligwerhe obulangalire buli ntyo, k’okuderha akalamo k’esiku n’amango oku gulu omu burhegesi b’Obwami bwa Mungu. (Ebr. 11:8-10, 13) Paulo aliyandikire oku bilolere ebintu binja bwenene abantu bagwerhe obola bulangalire nji bapata. (Osome Waroma 8:20, 21.) Amango oyiga b’oburhanzi oku bilolere ebilagane bye Biblia by’amango mayinjire, bihe walibwene bikusiimisize bwenene? Ka chili chilala chiderhere oku lusiku luguma nji waba mushinganyanya n’ok’orhakachijira echaha? Changwa walisimisizwe n’okumenya oku abazigirwa bawe nji bafuuka n’okushuba kulama omu paradizo oku gulu? Kugerera obulangalire Mungu arhuhere, ogwerhe bintu binene binja olingirize.

⁸ Obe ogwerhe obulangalire b’okulama esiku n’amango omu mbingu changwa oku gulu, obola buli bulangalire bw’akarhuma wagwarha obusiime. Kandi obulangalire bwerhu bwinja bwagenderera kukomera. Ebindi Paulo ashubaga kuyandika birhuyerekere okuntu ebyola byakagalikana. Leka rhuganire oku bintu ayandikaga bilolere obulangalire bwerhu. Ebinwa byage byarhurhabala rhuchizere loshi oku ebirhulangalire byoshi nji byayenera.

OKUNTU OBULANGALIRE BUNAKOMERA

9-10. Nk’oku omufano gwa Paulo guyerekene, bichi byakahikira Abakristu? (Waroma 5:3) (Olole n’efoto.)

⁹ Osome Waroma 5:3, 4. Obwene oku amalibuko mali omu byakarhuma obulangalire bwerhu bwakomera bwenene. Nkabaga wakasomezwa n’okuyunva ntyo. Aliko, abanafunzi ba Yesu boshi nji bahurana amalibuko. Rhuganire oku mufano gwa Paulo. Alibwirire Abakristu balilamire omu Tesalonike ntya: “Amango rhwaliri haguma nenyu, rhwaliri rhwababwira embere w’ebisanzi oku rhwakapatire amalibuko, n’antyo ku byanabere.” (1 Te. 3:4) Anayandikira abaliri e Korinto ntya: “Bene-berhu rhurhalonzeze kubabisha oku bilolere amalibuko rhwahurene . . . Rhwaheza obulangalire n’okuwaza oku hoshaho rhukala kufa.”—2 Ko. 1:8; 11:23-27.

¹⁰ Chiro na zene, Abakristu bakapata amalibuko mu njira nguma changwa eyindi. (2 Ti. 3:12) Gurhe si woyo? Wachigerere kulibuzwa bulala ogwerhe obwemere mu Yesu wanarhondera kumukulikira? Nkabaga abera n’abantu b’omulala gwawe baliri bakushekera. Nkabaga abandi balihikire kuba bashombanyi bawe. Nkabaga eju y’okuba munihirwa, wapatire ebibazo n’omukulu wawe w’akasi changwa n’abenyu onakola nabo. (Ebr. 13:18) Wapatire amalibuko marhengerere oku barhegesi bulala oli wahubiri abandi oku bilolere obulangalire bwawe si? Chiro akaba malibuko manyabachi rhuli rhwahurana, aliko Paulo arhubwirire oku rhukwanene kugwarha obusiime. Bulagurhe?

11. Bulagurhe birhuhemere kuhigirira kulembera buli chigeregezo choshi choshi?

¹¹ Rhwakagwarha obusiime amango rhuli rhwalibuzwa, bulala rhumenyere oku echola ch’akarhurhabala rhukuze engeso y’akamaro bwenene. Nk’oku biderherwe omu Waroma 5:3, “amalibuko manalerha okulembera.” Abakristu boshi nji bahurana n’amalibuko, bobola Abakristu boshi bakwanene kulembera. Rhukenere kuhigirira kulembera amalibuko moshi moshi nji rhwakahurana. Nji rhwahabwa oluhembo rhulangalire, nka rhulembeere n’okugenderera kukolera Yehova. Rhurhalonzeze kuba kuguma n’abalala Yesu aliri awazako amango aliri aderha oku bilolere omufano gwe mburho zarhogeraga oku budaka buli oku bale. Abantu bali kuguma n’ezola mburho, bali balala banayemera oburhumwa oku burhanzi, aliko “buzinda eyi bahurana amalibuko changwa obupinzani” banasibuka changwa banakwazika. (Mt. 13:5, 6, 20, 21) Okuderha okuli, amalibuko changwa ebigeregezo birhaba binja, aliko rhunayunguka amango rhwamalembera n’okugenderera kukolera Yehova. Mu njira ehe?

12. Nyungu zihe rhwabona amango rhwamalembera ebigeregezo?

¹² Omwanafunzi Yakobo ayerekene emigisho rhwakapata amango rhwamalembera ebigeregezo. Ayandikire ntya: “Muleke engeso y’okulembera emalirize akasi kayo, yi muba bantu bayenere barhanali ku shembo omu bintu byoshi, barhabulire chintu.” (Yak. 1:2-4) Yakobo aderhere oku rhukwanene kukuza engeso y’okulembera. Echola ch’akarhurhabala rhukuze bwenene engeso y’okulindira, obwemere bukomeere, n’okugenderera kulangalira Mungu. Aliko, hali eyindi yindi njira rhwakapatamo enyungu nka rhugenderere kulembera ebigeregezo.

13-14. Bichi okulembera kunalerha, na ngahe bibuganene n’obulangalire bwerhu? (Waroma 5:4)

¹³ Osome Waroma 5:4. Paulo ayerekene oku okulembera kwakarhuma “Mungu arhuyemera.” Okulembera kwawe kwakarhuma Yehova akuyemeera. Echola chirhayerekene oku Yehova aba asiimire amango rhuli rhwahurana ebigeregezo changwa ebibazo. S’aliko asiimire bulala oli walembera ebigeregezo oku bwimana. Bihebere omurhima bwenene okumenya oku amango rhwamalembera rhwanasiimisa Yehova!—Zb. 5:12.

¹⁴ Oyibuke oku Abrahamu alihurene ebigeregezo, n’amango abilembera oku bwimana Yehova asiimiswa naye. Yehova ali muyirikire mwira wage anamubona oku ali munya-kunali. (Mwa. 15:6; Ro. 4:13, 22) Nawe byakashobokana obonekane kuguma naye. Mungu anasiimiswa nawe arhali bulala oli wakola binene omu kasi kage changwa engabane oli wayeneza. Yehova anasiimiswa nerhu amango rhugenderere kuba bemana chiro akaba rhuli rhwahurana ebigeregezo. Chiro akaba emyaka yerhu, ehali yerhu, changwa obuhashe rhugwerhe, rhweshi rhwakalembera. Ka hali echigeregezo oli walembera zene, onagenderere kubera mwimana emwa Yehova? Akaba ntyo kubili, oyibuke oku oli wasiimisa Mungu. Amango rhwamarhegeera oku Mungu arhuyemerere, echola ch’akakomeza obulangalire bwerhu.

OBULANGALIRE BUKOMERE

15. Bichi Paulo aderhere omu Waroma 5:4, 5, na chibazo chihe ebyola byakalerha?

¹⁵ Paulo afasiriye oku rhunasimisa Yehova amango rhwamagenderera kuba bemana emwage, n’okulembera ebigeregezo. Rhulole gurhe Paulo agenderere kuderha: “Ehali y’okuyemerwa, [enayerekeza oku] bulangalire, n’olangalire arhahola.” (Ro. 5:4, 5) Ebyola byakasomeza bantu balebe. Bulagurhe? Bulala nk’oku biyerekenwe omu Waroma 5:2, Paulo abaga aderhere oku Abakristu be Roma babaga bagwerhe obulangalire, “obulangalire b’obukuuze bwa Mungu.” Bobola, abantu bakachibaza, ‘akaba abola bantu baligwerhe obulangalire, bulagurhe Paulo ashubaga kubuderhako?’

16. Gurhe obulangalire bunarhondera kukula omu muntu? (Olole n’efoto.)

¹⁶ Rhwakayunva bichi Paulo alonzaga kuderha amango rhwamagenderera kuyibuka oku obulangalire chili chintu china kula. Omufano: K’oyibukire amango oyunva ob’oburhanzi echilagane chinja chisimisize bwenene chili omu Chinwa cha Mungu? Nkabaga agola mango waliri wakengeera oku, echilagane ch’okulama esiku n’amango omu paradizo oku gulu chili chinja bwenene, aliko orhalichizerere oku kweri nji chayenera. Aliko, amango warhonderaga kuyiga bwenene oku bilolere Yehova, n’ebilagane bye Biblia, wagenderera kugwarha obwizere oku echola chilagane nji chayenera.

17. Gurhe obulangalire bwawe bunagenderera kukula enyuma y’okuchihaana emwa Yehova n’okubatizwa?

¹⁷ Chiro n’enyuma y’okuchihaana emwa Yehova n’okubatizwa, wahikira kumumenya bwinja n’oku muzigira bwenene. Naho wachizera bwenene kulusha ebintu alaganyize. (Ebr. 5:13–6:1) Nkabaga wakaba eyi wagerere omu hali eli kuguma n’ebiyandikirwe omu Waroma 5:2-4. Nkabaga wakaba eyi wahurene n’ebigeregezo bilengene, aliko wabilembera na Yehova akuyereka oku achivugire woyo. Bulala omenyere oku Yehova akuzigiire, anasimisizwe nawe, zene okala ogwerhe mpanvu zinene kulusha mira z’okulangalira eby’alaganyize. Obulangalire bwawe bwagenderere kukomera kulusha oku byaliri burhanzi. Omenyere oku ebyola nji byayenera. Obola bulangalire bwawe bwabere b’okuli kweri kweri. Onakola osimisiizwe nabo bwenene, bunakuhumire oku murhima bwenene. Buhumire kubuli chigabi ch’akalamo kawe, bunahindamula okuntu onakolera omulala gwawe, okuntu onarhola esimikiro, na chiro okuntu onakolesa ebisanzi byawe.

18. Chemezo chihe Yehova arhuhere?

¹⁸ Entumwa Paulo ayongerere echindi chintu ch’akamaro oku bilolere obulangalire wagwarhire enyuma y’okumala kuyemerwa na Mungu. Mungu akuyemezeze oku obulangalire bwawe nji bwayenera. Bulagurhe wakayemera echola? Omu kumala, Paulo abwirire Abakristu echila chinwa chirhengere emwa Mungu: “Olangalire arhahola bulala obuzigire bwa Mungu bwashesherwe omu mirhima yerhu kugerera eroho lichesibwa rhwahabirwe.” (Ro. 5:5) Ogwerhe empanvu zoshi z’okuchizera obola bulangalire k’okuderha obulangalire bwawe Yehova akuhere.

19. Bichi okwanene kuchizera oku bilolere obulangalire bwawe?

¹⁹ Okengeere oku chilagane Yehova ahaga Abrahamu na gurhe ayemerwaga na Mungu, na bulagurhe Mungu alimuyirikire mwira wage. Ebintu Abrahamu alilangalire byaliyenere. Ebiblia ederhere ntya: “Abrahamu amalire kuyerekana okulindira, ahabwa echola chilagane.” (Ebr. 6:15; 11:9, 18; Ro. 4:20-22) Arhalivunikire omurhima bwenene chiro. Wakachizera oku nk’ogenderere kuyorha mwimana, nji wapata oluhembo lw’ebintu olangalire. Ogwerhe mpanvu zinene z’okugwarha obusiime bulala eby’olangalire nji byayenera; orhakanavunika omurhima! (Ro. 12:12) Paulo ayandikire ntya: “Mungu onahaana obulangalire ajage abayunjunza obusiime boshi n’omurhula bulala mumulangalire, yi mugwarha obulangalire bunene kugerera eroho lyage lichesibwa.”—Ro. 15:13.