Ochirheganyize oku Malibuko Makulu Si?

1. Bulagurhe bili by’obwengehe oku chirheganya oku binjira?

OKUCHIRHEGANYA kwakayokola akalamo kerhu. Omufano, amango echinjira chamarhengerera abantu bachirheganyize embere w’akasanzi byakabayorohera bayokole akalamo kabo n’okurhabala abandi. Echigusho ch’Ebulaya chinachihangana kuhereza abandi oburhabale chiderhere ntya oku bilolere echola: “Okuchirheganya bwinja kwakayokola akalamo.”

2. Bulagurhe rhukwanene kuchirheganya oku malibuko makulu? (Matayo 24:44)

² “Amalibuko makulu” nji marhogera oku bantu omu kasanzi barhaliwazize. (Mt. 24:21) Aliko, amalibuko makulu nji marhaba kuguma n’ebindi binjira, bulala rhumenyere oku mayinja. Hamagera myaka 2 000 ntya, Yesu ahanwire abanafunzi bage oku bachirheganye k’olola lusiku. (Osome Matayo 24:44.) Nka rhuchirheganyize, byarhuyorohera kulembera echola chihe chikomere n’okurhabala abandi nabo bajire ntyo.​—Lu. 21:36.

3. Gurhe okulembera, olukogo, n’obuzigire byarhurhabala rhuchirheganye oku malibuko makulu?

³ Rhukenere kugwarha ngeso esharhu zarhurhabala rhugale kuchirheganya oku malibuko makulu. Gurhe nji rhwajira nji bakarhubwira oku rhuje kuhubiri oburhumwa b’okucha olubanja n’abantu barhaharamya Yehova banarhupinga? (Ufu. 16:21) Nji rhwakenera kulembera yirhukenga Yehova n’okuchizera oku arhulanga. Gurhe nji rhwajira akaba bene-berhu bahezeze ebintu byabo bilebe changwa ebintu byabo byoshi? (Hab. 3:17, 18) Bulala rhubagwerheko olukogo nji rhwabahereza oburhabale bakenere. Gurhe nji rhwajira nka byamarhuhema rhulame haguma na bene-berhu na bali-berhu mu siku zilebe amango amashanja machihebere haguma nji marhurhera? (Eze. 38:10-12) Nji rhwakenera kubayereka obuzigire bukomere yirhugala kuhima echola chihe chikomere.

4. Gurhe Ebiblia erhuyerekere oku rhukwanene kugenderera kuyerekana okulembera, olukogo, n’obuzigire?

⁴ Echinwa cha Mungu chirhuhebere omurhima rhugenderere kuyerekana okulembera, olukogo, n’obuzigire. Olwandiko lwa Luka 21:19 luderhere ntya: “Kugerera okulembera kwenyu, mwayokola akalamo kenyu.” Wakolosai 3:12 haderhere ntya: “Muyambale . . . olukogo.” N’omu 1 Watesalonike 4:9, 10 haderhere ntya: “Mungu abayigirize kuzigirana buli muguma n’owindi. . . . S’aliko rhubahebere omurhima bene-berhu mushube kujira ntyo bwinja kulusha.” Ebila binwa byoshi byayandikirwaga abanafunzi babaga bayerekene okulembera, olukogo, n’obuzigire. Aliko, byalibahemere bagenderere kuyerekana ezola ngeso. Nerhu rhukwanene kujira ntyo. Yirhubigala, rhwaganira gurhe Abakristu ba burhanzi baliyerekene buli ngeso mw’ezola. Naho rhwabona gurhe rhwakayiganya omufano gw’abola banafunzi n’okujira ntyo kwarhurhabala rhuyerekane oku rhuchirheganyize oku malibuko makulu.

MUKOMEZE OKULEMBERA KWENYU

5. Gurhe Abakristu ba burhanzi balilembere ebigeregezo?

⁵ Abakristu b’omu siku za Paulo balikenere kulembera. (Ebr. 10:36) Baliri bahurana ebibazo bili kuguma n’eby’abantu ba mw’ezola siku baliri baharuna. Aliko kandi baliri bahurana ebibazo bulala baliri Bakristu. Banene mubo baliri balibuzwa, barhaliri balibuzwa n’abakulu b’amadini m’Echiyahudi n’abarhegesi b’Abaroma konyine, s’aliko n’emilala yabo nayo yaliri yabalibuza. (Mt. 10:21) Kandi balikwanene kujira okwabo koshi y’enyigirizo z’ebigamba by’obwemere zirhagaba echibaga changwa mpu zibashumike. (Mdo. 20:29, 30) Aliko, abola Abakristu balilembere oku bwimana. (Ufu. 2:3) Nka gurhe? Baliri bawaza oku mifano y’abantu baderherwe omu Biblia balilembere nka Yobu. (Yak. 5:10, 11) Baliri basalira yibagwarha emisi. (Mdo. 4:29-31) Kandi banaliri bachiseza oku bintu binja bakapatire kugerera okulembera kwabo.​—Mdo. 5:41.

6. Bichi wayigire kugerera okuntu Merita alijirire y’alembera obupinzani?

⁶ Nerhu rhwakalembera amango rhuli rhwayiga oku kahunda emifano eli omu Biblia y’abantu balembere n’eyindi eli omu bitabu byerhu n’okuyikengerako. Omu kujira ntyo, mwali-werhu oyirikirwe Merita w’omuchihugo che Albanie, ali galire kulembera obupinzani bukomere b’omumulala. Aderhere ntya: “Engani ya Yobu eli omu Biblia yampebere omurhima bwenene. Alilibukire bwenene eyi arhanamenyere inde oli warhuma alibuka na buzinda aderha ntya: ‘Kugera aha nafira, ntakaleka haban’akatyu obushwekerezi bwani!’ (Yob. 27:5) Nabona kangana gurhe ebibazo bya Yobu byalikabizye bwenene kulusha eby’emwani. Chiro akaba oku Yobu arhalimenyere inde oli wamulerhera ebyola bibazo, aliko nyono nalimenyere ngahe bili byarhengerera.”

7. Chiro akaba rhurhali rhwahurana ebibazo bikomere zene, bichi rhukwanene kuyiga kujira kurhenga zene?

⁷ Kandi rhwakakomeza okulembera kwerhu omu kusalira Yehova kanene n’okumubwira byoshi birhulazize. (Flp. 4:6; 1 Te. 5:17) Nkabaga orhali wahurana ebibazo bikomere mu zinola siku. Aliko si, onasalira Yehova amango ogwerhe emilago, ebintu byakuchubukire, changwa amango wabulire gurhe wakajira? Akaba onasalira Mungu oku kahunda wamubwira ebibazo bigeke-geke ogwerhe zene, nji orhagwarha engangane z’okumusalira omu mango wagwarha ebibazo bikomere bwenene omu mango mayinjire. Naho wachizera kweri oku amenyere bwinja-bwinja mangochi akwanene kukurhabala na bichi akwanene kujira.​—Zb. 27:1, 3.

8. Gurhe omufano gwa mwali-werhu Mira g’okulembera ebibazo gwakarhurhabala zene nji rhulembere ebibazo by’omumango mayinjire? (Yakobo 1:2-4) (Olole n’efoto.)

⁸ Rhukayorha rhuli bemana ku Yehova amango rhuli rhwahurana ebigeregezo zene, nji rhwagala kulembera ebigeregezo bikomere amango m’amalibuko makulu. (Ro. 5:3) Bulagurhe rhwakaderha ntyo? Bene-berhu na bali-berhu banene baderhere oku amango moshi bamagala kulembera ehali zikomere, echola chinabarhabala kulembera ebindi bibazo byakulikiraho. Amango bamalembera ebibazo kugerera oburhabale bwa Yehova, banagwarha obwemere bukomere oku Yehova alonzeze kubarhabala. Nabulala bagwerhe obwemere mu Yehova bakagala kulembera ebibazo byakulikiraho. (Osome Yakobo 1:2-4.) Mwali-werhu Mira oli painiya w’omuchihugo che Albanie, alibwene oku, okuntu ali lembere abibazo omu mango magerere kwalimurhabere agenderere kulembera ebibazo bili byamuhikira zene. Ayemerere oku mango maguma aliri achiyunva oku yewe yenyine y’eli wahurana bibazo binene. Aliko, aja ayibuka kanganagurhe Yehova amurhabere mu myaka 20 yamagera naho aja achibwira ntya: ‘Nkwanene kuyorha mwimana. Ntaziga naleka kukolera Yehova zene n’obo antabere kulembera ebibazo binene bikomere mweyi myaka yoshi.’ Nawe wakayibuka kangana gurhe Yehova akurhabere olembere. Ochizere oku aba amenyere buli mango okuntu walembere ebibazo naye nji akuhemba. (Mt. 5:10-12) Naho, hanola amalibuko makulu nji mahwanza, nji waba wamenyere gurhe wakalembera n’okuhigirira kugenderera kulembera.

OYEREKANE OLUKOGO

9. Nka gurhe echibaga che Antiyokiya y’omu Siriya chaliyerekene olukogo?

⁹ Bankawawaza oku byahikiraga Abakristu b’omu Yudeya amango bahurana enzara ekalihire. Amango echibaga ch’omu Antiyokiya y’omu Siriya chiyunva oku bilolere eyola nzara ekalihire, buzira ngangane bayerekana olukogo kw’abola bene-babo b’omu Yudeya. Aliko baliyerekene olukogo lwabo omu bijiro. ‘Bahigirira bulimuguma nk’oku akanagala, barhume oburhabale ku bene-berhu balamire omu Yudeya.’ (Mdo. 11:27-30) Chiro akaba oku abola bene-berhu na bali-berhu baliri balibuka n’enzara balilamire hale, Abakristu b’omu Antiyokiya balihigirire kubarhabala.​—1 Yo. 3:17, 18.

10. Mu njira zihe rhwakayerekana mw’olukogo amango aberhu Bakristu bamahurana echinjira? (Olole n’efoto.)

¹⁰ Nerhu rhwakayerekana olukogo zene, amango rhwamarhegera oku aberhu Bakristu bahurene echinjira. Rhunajira juba-juba omu kuhaana oburhabale nkabaga omu kubaza abashamuka akaba rhwakakola kwakola kasi, omukuhaana enshololo oku kakasi k’omu gulu lyoshi, changwa okusalira eju ya balala bahurene n’echinjira.b (Mez. 17:17) Omufano, omu mwaka gwa 2020, Ekomite z’Okuhaana Oburhabale Amango m’Echinjira zirhalukire 950, zaliheberweho oku gulu lyoshi yi zihaana oburhabale ku balala balibukenere omu mango m’obula bulwala b’okuyahukira bwe Korona. Rhugwerhe eshukrani nene bwenene ku bene-berhu na bali-berhu baliri bakola mw’ezola komite z’okuhana oburhabale. Bulala baligwehere olukogo ku bene-berhu na bali-berhu, balibahekeere ebintu by’omubiri balikenere n’okubarhabala bagenderere kukolera Yehova, n’omu hali ziguma-ziguma nk’okuyumbaka buhya-hya enju zabo n’efasi z’okuharamizya.​—Huzanya na 2 Wakorinto 8:1-4.

11. Gurhe rhunahereza Darha w’embingu obukuze amango rhwamayerekana olukogo?

¹¹ Amango rhwamayerekana akababaro enyuma w’echinjira, abandi nabo banarhegera kangana gurhe rhwachihanire. Omufano, omu mwaka gwa 2019, Echihusi chiyirikirwe Dorian chalishandire Echumbi ly’Obwami ly’omu Bahamas. Amango bene-berhu baliri bashuba kuyumbaka buhya-hya elyola Chumbi ly’Obwami, bahema omuntu onayumbaka orhali Muhamirizi wa Yehova ababwire furanga zinga bamuhage yabakolera akola kasi. Ababwira ntya: “Indonzeze nani kuhaana enshololo . . . nahaana ebikoleso, efuranga z’okulipa abakozi, n’ebindi bintu byoshi. . . . Nani ndozeze kuhaana ebyola oku lubaga lwenyu. Insomezwe n’okuntu munakolera bene-benyu na bali-benyu.” Bantu banene omu gulu barhenji Yehova. Aliko banene mubo banachibonera gurhe Abahamirizi ba Yehova banajira omu kurhabala abandi. Rhugwerhe lukengo lunene okumenya oku ebijiro byerhu by’olukogo byakarhuma abantu balonza kumenya binene bwenene oku bilolere Yehova oli “mugale omu olukogo”!​—Efe. 2:4.

12. Gurhe okuyerekana olukogo zene kuli kwarhurheganya oku malibuko makulu? (Ufunuo 13:16, 17)

¹² Bulagurhe nji byarhuhema rhuyerekane olukogo amango m’amalibuko makulu? Ebiblia ederhere oku balala nji barhashigikira oburhegesi bwalinola gulu, bahurana ebibazo zene n’omumango m’amalibuko makulu. (Osome Ufunuo 13:16, 17.) Bene-berhu na bali-berhu nkabaga nji bakenera oburhabale bw’ebintu yibagala kugenderera kulama. Amango Omwami werhu Yesu Kristu nji ayinja kuchira abantu olubanja, rhulonzeze oku nji arhubugane eyi rhuli rhwayerekana olukogo yinji arhuhamagala “rhushokole Obwami.”—Mt. 25:34-40.

OKOMEZE OBUZIGIRE BWAWE KU BENE-BENYU NA BALI-BENYU

13. Nk’oku olwandiko lwa Waroma 15:7 luyerekene, gurhe Abakristu ba burhanzi balikomeze obuzigire bwabo ku buli muguma n’owindi?

¹³ Obuzigire che chali chimenyeso chaliri chayerekana Abakristu baburhanzi. Aliko si, byalibayorohere kuyerekana obuzigire? Rhuganirage okuntu echibaga che Roma chaliri mw’abantu barhengere omu micho elengenemo. Baguma baliri Bayahudi balihemerwe bakenge Esheriya ya Musa, aliko abandi balirhengere omu mashanja malengene banakuliraga omu micho elengene. Byakashobokana oku Bakristu baguma baliri baja, aliko abandi bowe baliri eyi bagwerhe obuhuru. Byakana shobokana oku nabo baligwerhe ababo baja, gurhe abola Bakristu baliri bayerekana obuzigire buli muguma n’owindi chiro akaba oku balirhengere omu micho elengene? Entumwa Paulo alibahanwire: “Muyegerezanye bulimuguma n’owindi.” (Osome Waroma 15:7.) K’okuderha gurhe? Echinwa chitafusiribwe “kuyegereza,” chiderhere kuyegereza omuntu n’obushagaluke, k’okuderha kumuyegereza eka changwa omu chigusho ch’abera. Omufano, Paulo abwira Filemoni gurhe akwanene kuyegereza Onesimo omuja wamutorokaga: “Omuyegereze bwinja.” (Flm. 17) Kandi Akila na Prisila baliyegereze Apolo walimenyere bintu bigeke oku bilolere enyigirizo ze Chikristu nk’ezibowe balimenyere “bagenda naye.” (Mdo. 18:26) Chiro akaba oku abola Bakristu barhaligwerhe emicho eli kuguma, barhayemeraga echola chalerha akavulindi ahagarhi kabo, aliko bayegerezanya buli muguma n’owindi.

14. Nka gurhe Anna n’eba baliyerekene obuzigire?

¹⁴ Rhwakayerekana oku rhugwehe obuzigire ku bene-berhu na bali-berhu omu kujira obwira haguma nabo n’okugeza ebisanzi haguma nabo. N’echola chabashunika nabo barhuyereke obuzigire. (2 Ko. 6:11-13) Waza oku bintu mwali-werhu Anna achibwenere haguma n’eba. Siku zigeke bamalire kupata engabane y’okukola nka bamisiyonere Emazikiro me Afrika, obulwala bwe Korona bwarhondera. Eju y’obola bulwala barhakagalire kuja oku mbuganano ya masu oku masu haguma na bene-babo na bali-babo b’omu chibaga. Birhanalibayorohere oku menyana na bene-babo na bali-babo. Nka gurhe oyola mulume na mukage bakayerekene obuzigire? Baliri bakolesa evideokonferense yi bayinja baganira na bene-berhu na bali-berhu n’okubabwira oku balonzeze kubamenya bwinja. Emilala yalisimisizwe bwenene n’obuzigire abola bamisiyonere balibayerekere, n’echola charhuma bahwanza kubahamagala n’okubayandikira amamesaje. Bulagurhe abola bamisiyonere balichihanganire kumenyana na bene-berhu na bali-berhu omu chibaga chihya-hya bahamiragamo? Anna aderhere ntya: “Ntakafa nayibagire ebijiro by’obuzigire bene-berhu na bali-berhu banyerekere nyono n’omulala gwani omu bisanzi binja n’omu bisanzi bibi, emifano yabo yanshunikire nyerekane obuzigire.”

15. Bichi wayigire kugerera omufano gwa mwali-werhu Vanessa oku bilolere okuzigira bene-berhu na bali-berhu boshi? (Olole n’efoto.)

¹⁵ Banene mu rhwewe baba omu bibaga bili mu bene-berhu na bali-berhu barhengere omu micho elengenemo n’abantu barhagwerhe oborhere buli kuguma. Rhwakakomeza obuzigire bwerhu kubo boshi omu kuchiseza oku ngeso zabo zinja. Mwali-werhu Vanessa oli wakolera omu chihugo che Nouvelle-Zélande, ali bwene oku bimukomerere kujira obwira na muntu mulebe omu chibaga chage. Aliko, enyuma waho achishoga kuyinja ageza bisanzi binene haguma n’abantu bagwerhe oborhere burhamusimisize. Okujira ntyo kwamurhabere arhegere echintu charhumire Yehova ababazigira. Aderhere ntya: “Kurhengera aha bani aberere mwimangizi w’omuzunguluko, rhunageza bisanzi binene na bene-berhu na bali-berhu bagwerhe oborhere burhali kuguma, kandi nabwene oku binyorohere kuyunvikana nabo. Nkalanzigira bene-berhu na bali-berhu babuli buko. Omu kuderha okuli Yehova abazigire nabo bulala rhweshi arhuhebere omu chigusho chili mw’abantu bagwerhe oborhere burhali kuguma.” Amango rhwamayiga kubona abandi okuntu Yehova anababona, rhwanayerekana oku rhubazigire.​—2 Ko. 8:24.

16. Bulagurhe nji rhwakenera kuzigira bene-berhu na bali-berhu omu mango m’amalibuko makulu? (Olole n’efoto.)

¹⁶ Nji byarhuhema rhuzigire bwenene bene-berhu na bali-berhu amango m’amalibuko makulu. Amango amola malibuko nji marhondera, ngahe nji rhwakula obulanzi? Bankawalola gurhe Yehova aliyerekeze abantu bage amango Ebabiloni ya mira erherwa, aderha ntya: “Mugende bantu bani, muje omu byumba byenyu bya ndani, munachinge emilyango. Muchibishe mubisanzi bigeke kugera ah’oburhe bwahwera.” (Isa. 26:20) Byakashobokana oku nji rhwakulikira obwerekezi buli nk’obola amango m’amalibuko makulu. “Ebyumba byandani” byakashushanya n’ebibaga byerhu. Amango m’amalibuko makulu, Yehova arhulaganyize oku nji arhulanga nka rhugenderere kumukolera haguma na bene-berhu na bali-berhu omu buguma. Bobola, rhukwanene kukola bwenene zene yirhugwarha obuzigire bukomere ku bene-berhu na bali-berhu. Rhukajira ntyo nji rhwafuma amola malibuko!

RHUCHIRHEGANYE ZENE

17. Rhukachirheganya zene, bichi nji rhwagala kujira amango m’amalibuko makulu?

¹⁷ “Olusiku lukulu lwa Yehova” nji maba mango m’ebibazo bikomere bwenene oku bantu boshi. (Sef. 1:14, 15) Abantu ba Yehova nabo nji bahurana ebibazo. Aliko, rhukachirheganya zene, nji rhwagala kuyorha rhurhulerere n’okurhabala abandi. Nji rhwagala kulembera ebibazo byoshi-byoshi nji rhwakaba rhugwerhe. Amango bene-berhu na bali-berhu nji baba bali balibuzwa, nji rhwajira okwerhu koshi yirhubahereza oburhabale, omu kubayereka olukogo n’okubaha ebibakenere. Kandi nka rhuyigire kuzigira bene-berhu na bali-berhu zene, nji rhwabayereka obuzigire omu mango mayinjire. Naho Yehova nji arhugisha omu kurhuhereza akalamo k’esiku n’amango omu gulu amalibuko n’ebinjira byoshi nji byaba byayibagirwe.—Isa. 65:17.