Bichi Rhwakayiga Kugerera Amaruba Mabiri ma Petro?

1. Kasanzi kageke amango Petro aliri hofi kufa, Yehova alimuyerekeze akole kasi kahe?

ENTUMWA Petro, alikolere Yehova oku bwimana mu myaka minene. Aliri agenda na Yesu omu kasi kage k’okuhubiri, enyumwa w’aho, ahwanza kuhubiri abantu barhaliri Bayahudi, na buzinda ayinja kukola omu baraza lirhambwire. Oku buzinda bw’akalamo kage amango alimenyere oku ali hofi kufa, Yehova amuhereza akandi kasi kanene k’okukola. Omu mwaka gwa 62-64 ntya N.K.Y, aliyerekezwe n’eroho lichesibwa ayandike maruba mabiri, k’okuderha, echitabu cha 1 n’echa 2 cha Petro. Petro alichizerere oku amola maruba makarhabere Abakristu enyuma y’olufu lwage.—2 Pe. 1:12-15.

2. Bulagurhe amola maruba maliri m’akamaro mw’akola kasanzi?

² Amango Petro ayerekezwa n’eroho lya Mungu ayandike amola maruba, bene-babo na bali-babo “baliri bagayiswa bwenene n’ebigeregezo bilengene” baliri bahurana. (1 Pe. 1:6) Abantu babi baliri bachihangana kulerha enyigirizo z’obubeshi n’olugenzi lubi omu chibaga che Chikristu. (2 Pe. 2:1, 2, 14) Abakristu balilamire omu Yerusalemu baliri hofi kuhurana “obuzinda bw’ebintu byoshi,” k’okuderha, abasoda be Roma bakalimbwire eyola vile n’ehekalu lyayo. (1 Pe. 4:7) Nta ngangane, amola maruba ma Petro malibarhabere bamenye gurhe bakalembera ebibazo baliri bahurana n’okuchirheganya oku bigeregezo byakabahikiire omu mango mayinjire.b

3. Bulagurhe rhukwanene kuyiga amaruba ma Petro mayerekezwaga n’eroho lya Mungu?

³ Chiro akaba oku Petro ayandikiraga Abakristu b’omu kagana ka burhanzi amola maruba, Yehova amajira mabe chigabi ch’Echinwa chage. Bobola rhwakayunguka kugerera amola maruba. (Ro. 15:4) Kuguma n’abola Bakristu, nerhu rhulamire omu gulu liri mw’abantu bagwerhe olugenzi lubihire lwakarhuma byarhukomerera kukolera Yehova. Oku bwindi, hanola hofi-hofi rhwahurana amalibuko makomere bwenene kulusha malala marhengereraga amango Abaroma balimbula evile ye Yerusalemu n’ehekalu lyayo. Rhwabona nyibuso ziguma z’akamaro mw’amola maruba mabiri ma Petro. Amola maruba marhurhabala rhube tayari oku bilolere obuzinda bwalinola gulu libi, rhumenye rhwayinja rhwayubaha abantu, n’okugenderera kukuza obuzigire bunene ku buli muguma n’owindi. Enyibuso zili nk’ezola zakarhabala kandi abashamuka yibagala kurhabala bene-babo na bali-babo omu chibaga, bagenderere kugwarha obwemere bukomere.

OGENDERERE KULINGIRIZA

4. Nk’oku biyerekenwe omu 2 Petro 3:3, 4, bichi byakashaganya obwemere bwerhu?

⁴ Rhuzungulukirwe n’abantu barhagwerhe obwemere omu eby’Ebiblia ederhere oku bilolere amango mayinjire. Abapinzani bakarhushekera bulala rhwamaderha mu myaka minene ok’obuzinda bwayinjire. Bantu baguma banaderha ok’obola buzinda burhakafa bwayinjire chiro. (Osome 2 Petro 3:3, 4.) Amango rhwamayunva ebinwa bili nk’ebyola oku muntu rhuli rhwahubiri, eyirhunakola naye, changwa oku muntu w’omu mulala gwerhu, obwemere bwerhu bwakashaganyika. Petro alifasiriye echintu chakarhurhabala.

5. Bichi byakarhurhabala rhugenderere kugwarha amawazo menja amango rhuli rhwalingiriza obuzinda bwalinola gulu? (2 Petro 3:8, 9)

⁵ Bantu baguma bakabona oku Yehova alegamire kulerha obuzinda bwalinola gulu libi. Ebinwa bya Petro byakarhurhabala, bulala birhuyibwise oku, okuntu Yehova anabona akasanzi kurhali kuguma chiro n’okuntu abantu banabona akasanzi. (Osome 2 Petro 3:8, 9.) Myaka chihumbi, emwa Yehova luli nka lusiku luguma. Yehova analembera, arhanalonzeze habe omuntu n’omuguma wakalimbulwa. Aliko, amango olola lusiku nji lwahika, naho linola gulu libi lyanahikira obuzinda bwalyo. Rhugwerhe lukengo lunene l’okukolesa akasanzi kayorhere omu kuhubiri abantu bamashanja moshi.

6. Nka gurhe “rhwakabika hofi omu bwenge” olusiku lwa Yehova? (2 Petro 3:11, 12)

⁶ Petro arhuhebere omurhima “rhubike hofi omu bwenge” olusiku lwa Yehova. (Osome 2 Petro 3:11, 12.) Nka gurhe rhwakajira ntyo? Buli lusiku rhwakachihangana kuwaza oku kalamo kakwirire bwenene nji rhwagwarha omu gulu lihya-hya. Chapa omu bwenge bwawe oli wayisa akayaga kakwirire bwenene, oli walya akalyo kenja bwenene, oli wayakiira abazigirwa bawe bali bafuuka, n’okuyigiriza abantu balilamire omu myaka kamama yamagera oku bilolere okuyenezwa kw’amalebi me Biblia. Okuwaza kw’ebyola bintu, kwakurhabala olingirize akola kasansi oku nyorha enene, eyonachizerere oku rhulamire omu siku z’obuzinda. Amango ‘rhwamagwarha obumenyi embere w’akasanzi’ oku bilolere amango mayinjire, “rhurhahabulwa” n’abalimu b’obubeshi.—2 Pe. 3:17.

ORHAYUBAHAGA ABANTU

7. Nka gurhe okuyubaha omuntu kwakarhulerhera engaruka?

⁷ Okurhunali rhwabiika hofi omu bwenge olusiku lwa Yehova, rhulonzeze kujira okwerhu koshi yirhubwira abandi emyazi minja. Aliko, hali amango rhwakagwarha obuba. Bulagurhe? Bulala rhwakagwarha obuba oku bilolere ebi abantu bakawaza eju yerhu changwa ebibakarhukolera. Ebyola byalihikire Petro. Omu budufu amango Yesu aliri asamba, Petro aliyubahire kuderha oku ali mwanafunzi wa Yesu, anamuhakana kanene oku arhamuyinji. (Mt. 26:69-75) Aliko, Petro aligalire kuhima obuba bwage, na buzinda ayandika ntya n’obwizere: “Mumenye mwayubaha ebibanayubaha, changwa mumenye mwagwarha omulago.” (1 Pe. 3:14) Ebinwa bya Petro birhurhabere rhumenye rhwayubaha omuntu.

8. Bichi byakarhurhabala rhumenye rhwayubaha omuntu? (1 Petro 3:15)

⁸ Bichi byakarhurhabala rhuleke kuyubaha omuntu? Petro arhubwirire ntya: “Muchese Kristu Waliha omu mirhima yenyu.” (Osome 1 Petro 3:15.) Echola chiheberwemo okuchiyibusya oku, Yesu Kristu ali Mwami werhu n’oku agwerhe misi minene. Akaba ogwerhe obuba b’okubwira muntu mulebe oku bilolere emyazi minja, oyibuke Omwami werhu. Ochape omu bwenge gurhe ali arhegeka omu mbingu anazungulukirwe n’amamiliyoni m’abamalayika. Oyibuke oku agwerhe “oburhwali boshi . . . omu mbingu n’oku gulu” n’oku njaba ‘haguma nawe esiku zoshi kugera oku buzinda bwalinola gulu.’ (Mt. 28:18-20) Petro arhuhebere omurhima rhube “tayari amango moshi” kuderhera obwemere bwerhu. Ka wakasiima kuhubiri muntu mulebe oku kasi, oku masomo, changwa kuhubiri ahandi-handi hantu? Owaze mbere w’akasanzi amango wakagala kujira ntyo, naho ojewarheganya ebi wakaderha. Osalire y’ogwarha obushiru n’okulangalira Yehova oku akurhabala.—Mdo. 4:29.

“OGWARHE OBUZIGIRE BUNENE”

9. Nka gurhe Petro aligambirwe kuyerekana obuzigire mango maguma? (Olole n’efoto.)

⁹ Petro aliyigire gurhe akayerekana obuzigire. Aliriho amango Yesu aderha ntya: “Namabahereza erhegeko lihya-hya, oku muzigirane buli muguma n’owindi; nka kulala nani nabazigiire nenyu muzigirane.” (Yoh. 13:34) Chiro akaba ntyo, Petro alahira kulya na bene-babo na bali-babo b’amandi mashanja bulala aliyubahire Abakristu Babayahudi. Entumwa Paulo ayirika echola chijiro Petro ajiraga “bulyalya.” (Gal. 2:11-14) Petro ayemera elyola hano analeka limuyigirize chintu chilebe. Mw’agola maruba mombi ayandikaga, aderhere bwinja-bwinja oku rhurhakwanene kuyunva obugizire ku bene-berhu na bali-berhu konyine, s’aliko kandi rhukwanene kubayereka obuzigire.

10. Bichi byakarhurhabala rhuyereke bene-berhu na bali-berhu “obuzigire burhagwerhe bulyalya.” Fasiriya. (1 Petro 1:22)

¹⁰ Petro aliderhere oku rhukwanene kugwarha “obuzigire burhagwerhe bulya-bulya ku bene-berhu na bali-berhu” b’omu chibaga. (Osome 1 Petro 1:22.) Rhunagwarha obuzigire buli nk’obola amango rhuli “rhwakenga enyigirizo zoshi z’okuli” rhuli rhwayigirizwa. Ezola nyigirizo z’okuli ziheberwemo enyigirizo ziderhere oku “Mungu arhajira kabolo.” (Mdo. 10:34, 35) Rhurhakaderha oku rhukengere erhegeko lya Yesu oku bilolere obuzigire amango rhuli rhwazigira bantu baguma omu chibaga n’okuboola abandi. Kweri, rhwakachiyunva rhuyegerere bwenene bantu baguma kulusha abandi, kuguma na Yesu naye. (Yoh. 13:23; 20:2) Aliko Petro arhuyibusize oku rhukwanene kuzigira bene-berhu na bali-berhu boshi bulala bali bagumu b’omu mulala gwerhu.—1 Pe. 2:17.

11. Okuzigira abandi “n’omurhima goshi” k’okuderha gurhe?

¹¹ Petro arhuhebere omurhima “rhuzigirane buli muguma n’owindi bwenene n’omurhima goshi.” M’olula lwandiko, okuzigira owindi “bwenene” kuli kumuzigira chiro byakaba bikomere okumuyereka obola buzigire. Omufano, gurhe byakaba nka mwene-werhu changwa mwali-werhu arhugoseze changwa kurhuvuna omurhima mu njira nguma changwa eyindi? Burhanzi, rhwakalonza kumukolera nk’oku arhukolere ahali h’okumuyereka obuzigire. Aliko, Petro aliyigire kugerera omufano gwa Yesu oku Mungu arhasiima amango rhwamachiholera. (Yoh. 18:10, 11) Petro ayandika ntya: “Mumenye mwagalula obubi oku bubi changwa ebidusi oku bidusi. Aliko, mujuhe omu kuhaana omugisho.” (1 Pe. 3:9) Amango wamayerekana obuzigire bunene waba muntu mwinja n’okuyereka obukenge chiro nakubalala bakaba bakugayisize.

12. a) Bindi bichi obuzigire bunene bunarhurhabala kujira? b) Bichi wahigirire kujira nk’oku biyerekenwe omu video Tulinde Umoja Wetu ni Zawadi ya Muzuri Sana (Rhulange Obuguma Bwerhu Eli Mpaano Nyinja Bwenene.)

¹² Omu maruba mage marhanzi, Petro alikoleseze echinwa “buzigire bunene.” Obuzigire buli nk’obola bunashukulira, arhali byaha bigeke byonyine, s’aliko “byaha binene.” (1 Pe. 4:8) Nkabaga ahala Petro aliri ayibuka esomo Yesu amuyigirizaga oku bilolere okubabalirana, haliri hamagera myaka minene. Agola mango, bishobokene oku Petro aliri awaza oku ali mwinja amango aderha oku akwanene kubabalira owabo “kugera kali mushanvu.” Aliko oku Yesu amubwiraga ku nerhu arhubwirire, rhubabalire “kugera ku kali 77,” k’okuderha, buzira kuleka. (Mt. 18:21, 22) Akaba bikukomerere kukolesa elyola hano, omenye wavunika omurhima! Abakozi boshi ba Yehova barhashinganene, mango maguma banabona oku bibakomerere kubabalira. Echintu ch’akamaro bwenene okwanene kujira, kuli kuchihangana bwenene obabalire mwene-wenyu changwa mwali-wenyu onajire omurhula haguma naye.c

BASHAMUKA, MUKOLE BWINJA AKASI K’OKULAGIRA ENTAMA ZA YEHOVA

13. Bichi byakarhuma byakomerera abashamuka kulanga bene-babo na bali-babo?

¹³ Petro arhayibagiraga chiro haba n’akatyu ebi Yesu amubwiraga amala kufuuka: “Lagira entama zani zidorho.” (Yoh. 21:16) Akaba oli mushamuka, elyola hano likulolere nawe. Aliko hali amango byakakomerera omushamuka kupata akasanzi k’okukola eyola ngabane y’akamaro. Abashamuka bakwanene kurhanga kuchizera oku abantu b’emilala yabo bagwerhe byoshi bakenere yibagenderera kulama, na buli muntu omu mulala achiyunve azigiirwe, n’okurhabala omulala gwage guyorhe hofi na Yehova. Kandi banayerekana olwiganyo lwinja omu kukola akasi k’amahubiri, okurheganya n’okugeza ebigabi oku mbuganano z’echibaga, n’oku mbuganano zikulu. Aliko abandi bagwerhe engabane y’okukola omu Komite y’Obunvikane n’Ebitaro, n’abandi banayemera engabane y’okukola ne Departema Elolere Akasi k’Okuchapa Epla n’Okuyumbaka omu Eneo. Kweri, abashamuka bagwerhe binene by’okukola!

14. Bichi byakarhabala abashamuka yibagala kukola akasi k’obulagizi oku chishumba? (1 Petro 5:1-4)

¹⁴ Petro alihebere ababo abashamuka omurhima “balange echishumba cha Mungu.” (Osome 1 Petro 5:1-4.) Akaba oli mushamuka, rhumenyere oku ozigiire bene-benyu na bali-benyu, onalonzeze kubashishikala. Aliko mango maguma wakachiyunva nk’ogwerhe binene by’okukola changwa wakachiyunva oluhire n’okubona oku orhagala kuyeneza eyola ngabane. Gurhe wakajira? Obwire Yehova okuntu oli wachiyunva na kangana gurhe olonzeze kurhabala bene-benyu na bali-benyu. Petro ayandika ntya: “Akaba omuntu yeshi-yeshi ali akolera abandi, ajire ntyo nka muntu olangalire emisi Mungu anahaana.” (1 Pe. 4:11) Nkabaga bene-benyu na bali-benyu bakaba eyi bali bahurana ebibazo birhakahwa mu zinola siku z’obuzinda. Aliko muyibuke oku “omungeri mukulu,” Yesu Kristu, akabarhabala kulusha owindi muntu yeshi-yeshi. Ajira ebyola byoshi zene n’omu gulu lihya-hya. Yehova ahemere abashamuka bajire ntya: Bazigire bene-babo na bali-babo, babalange n’okuba “lwiganyo oku chishumba.”

15. Nka gurhe mushamuka muguma aliri alagira echishumba? (Olole n’efoto.)

¹⁵ William, w’amakola myaka minene eyali mushamuka, arhegerere akamaro k’okukola akasi k’obulagizi. Amango obula bulwala b’okuyahukira bwe Korona (COVID-19) burhondera, ebaraza lyabo ly’abashamuka lyaliyikere, lyabona oku bili by’akamaro buli mushamuka ayinje aganira na buli muguma omu chigusho chage ch’amahubiri buli boso. Afasiriye ntya: “Banene mu bene-berhu na bali-berhu baliri omu maju mabo bowe bonyine, n’amawazo mabo makahindamukire juba-juba n’okuba mabi.” Amango mwene-werhu changwa mwali-werhu aligwerhe ebibazo, William aliri amuyunviriza y’arhegeera bichi bimulazize na bichi akenere. Naho aliri achihangana kulonza myazi milebe n’evideo oku site yerhu ye Enternete, yabikolesa omu kurhabala oyola mwene-werhu changwa mwali-werhu. William aderhere ntya: “Akasi k’obulagizi kali k’akamaro bwenene zene kulusha amandi mango moshi. Rhunakola bwenene omu kurhabala abandi bantu bayige oku bilolere Yehova, rhukwanene kugenderera kujira ntyo omu kulanga echishumba cha Yehova. Birhuhemere rhukole bwenene yirhugala kurhabala bene-berhu na bali-berhu yibayorha omu kuli.”

OLEKE YEHOVA AKUKOOMEZE KUHIKA OKU BUZINDA

16. Mu njira zihe rhwakakolesamo ebirhwayigire omu maruba mabiri ma Petro?

¹⁶ Rhwaganirire oku nyigirizo zigeke zili omu maruba mabiri ma Petro. Nkabaga amola maruba makurhabere omenye ebintu okwanene kuhindamula omu kalamo kawe. Omufano, ka wakasiima oyinje wakengeera bwenene oku migisho y’omu gulu lihyahya ly’amango mayinjire? Ka wachihebereho omuhigo g’okuhubiri oku kasi, oku masomo, changwa omu mandi-mandi mango moshi? Hali ezindi njira wabwene wakayerekanamo obuzigire bunene bwenene ku bene-benyu na bali-benyu? Bashamuka wee, muhigirire si kugenderera kukola akasi k’okulagira entama za Yehova oku bulonza na buzira kushunikwa? Ochigerereze woyo wenyine ngahe okwanene kujira amaja-mbere, aliko orhavunikaga omurhima. “Waliha [Yesu] ali mwinja,” anakurhabala y’ogala kuhindamula chintu chilebe. (1 Pe. 2:3) Petro arhurhabere rhuchizere ntya: “Mungu . . . yenyine abakoomeza kuhika oku buzinda. Abakomeza mumenye mwashaganywa, abaheba emisi, abarhabala yimurhadundwa.”—1 Pe. 5:10.

17. Nyungu zihe wakapata nk’olembere n’okuleka Yehova akukoomeze kuhika oku buzinda?

¹⁷ Mango maguma Petro alichiyunvirhe nk’arhakwanene kuba eburhambi bwa Mugala wa Mungu. (Lu. 5:8) Aliko kugerera obuzigire n’oburhabale bwa Yehova na Yesu, Petro agenderera kukulikira Yesu oku bwimana. Bobola, Yehova amuyemerera “aje omu Bwami bw’esiku n’amango bwa Waliha na Muchunguzi Yesu Kristu.” (2 Pe. 1:11) Olola lwaliri luhembo lusimisize bwenene! Akaba ogenderere kubera mwimana kuguma na Petro, n’akaba olekere Yehova agenderere kukukoomeza, nawe nji wagwarha oluhembo lw’akalamo k’esiku n’amango. ‘Nji wahikira omuhigo g’obwemere bwawe, k’okuderha, obuchunguke bwawe.’—1 Pe. 1:9.