Adamu na Eva bamalire kurhenga omu bustani ye Edeni, baburha bana banene. Omurhabana wabo murhanzi yekala Kaini, aba muhinzi, n’omurhabana wabo wa kabiri yekala Abeli, aliri arhunga enyama.

Lusiku luguma, Kaini na Abeli baja kuhereza Yehova entulo. Omenyere entulo byebichi si? Luba luhembo lw’akamaro omuntu anaha mwira wage. Yehova asiima entulo ya Abeli, aliko eya Kaini yowe nanga. Echola charhuma Kaini ayunva burhe bunene. Yehova abwira Kaini ok’obola burhe bwakarhumire ajira ebintu bibi. Aliko Kaini arhayunvaga.

Ahali h’okuyunva ebi Yehova amubwirire, Kaini abwira Abeli ntya: ‘Oyinje rhuje omu shwa.’ Babere bali omu shwa, Kaini achikabula ku mwene-wabo n’okumuyirha. Bichi Yehova alijirire eju y’echola? Yehova ahana Kaini omu kumufukuza aje hale n’omulala gwabo. Kaini arhakachigalukire emwabo.

Ka hali eby’eyila ngani yakarhuyigiriza? Byakarhuhikira rhwanagaya amango ebintu birhagendere okuntu rhwalilonzeze. Rhukayunva oburhe, changwa abandi bakarhuhanula bulala babwene oku rhugwerhe oburhe, rhukwanene kuleka juba-juba oburhe bwerhu n’okurhulera.

Bulala Abeli alizigire Yehova n’okujira ebintu binja, Yehova arhakafa amuyibagire chiro. Mungu nj’afula Abeli amango nj’ahindamula egulu libe paradizo.

Hagera amango abantu baba banene oku gulu. Banene mubo baliri babi. Chiro na bamalayika baguma baba babi. Barhenga emunda balilamire omu mbingu bayandagala hanola oku gulu. Oyinji bulagurhe bajiraga ntyo si? Bajiraga ntyo yi bayambala emibiri y’abantu n’okurhola abakazi.

Abola bamalayika baburha abana b’oburhabana kw’abola bakazi. Abola bana bakula, bagwarha misi minene n’okuba bahambazi (banahangalana) bwenene. Baliri bakolera abantu kubi. Yehova arhakalekere ebyola bintu bibi bigenderere ntyo. Naho arhola edesiziyo y’okuharabisa abola bantu babi omu nvula y’echihonzi.

Aliko haliri muntu muguma orhaliri kuguma nabo. Alizigire Yehova. Ezino lyage aliri Nowa. Aligwerhe omukazi na bagala basharhu, Shemu, Hamu, na Yafeti na bazaana basharhu. Yehova abwira Nowa kw’ayumbake esafina nzibuzibu yi yewe n’omulala gwage bafuma Envula y’Echihonzi. Esafina yaliri sanduku nzibuzibu yakayerera oku menji. Kandi Yehova abwira Nowa ahire nyama zinene omu safina yi nazo ziyokolwa.

Aho han’aho, Nowa arhondera kuyumbaka esafina. Nowa n’omulala gwage bayiyumbakaga mu myaka 50 ntya. Bayumbaka esafina bwinja-bwinja nk’oku Yehova anababwiraga. Mw’agola mango, Nowa aliri abwira abantu okubilolere eyola nvula Y’echihonzi. Aliko ntaye walimuyunvirize.

Buzinda, akasanzi k’okuja omu safina kahika. Lekaga rhulole ebyajaga byarhengerera.