Hulda Ahikire Omuhigo Gwage

OMU chihugo che Indonesie, oku chizimba chigeke che Sangir Besar, halamire basharhu mu bali-berhu. Myaka milebe egerere, baliri bakola haguma oku mashinji. Abola bali-berhu bamenyikene bwenene kw’echola chizimba eju y’akasi banakola k’okuhubiri changwa kurhabala abantu bamenye e Biblia. Aliko mw’agola mango, bali bagwerhe akandi kasi baliri bakola.

Ech’oburhanzi, baliri balambagira omu menji, banarhalagula mw’amabale malemerere n’oku maheka eshi. Maguma mw’amola mabale maliri mangana ngana n’akabumbu. Naho, abakazi baliri bayikala oku rhuchumbi rhugeke geke rhwempaho banarhola ehama n’okurhondera kubera amabale mw’enchangarare zigeke geke kulusha egi ly’engoko. Enyuma wahola, baliri barhola amola mabale m’enchangarare n’okumaheba omu mbegeti ze plastike naho banamaheka emwababo. Buzinda, baliri baheba amola mabale omu mifuko mizibu zibu banayipakiza omu bitugari bizibu zibu yinji makoleswa omu kuyumbaka amabarara.

Muguma mw’abola bali-berhu aliri Hulda. Ehali yage yalirhumire byamuyorohera ageze bisanzi binene mw’akola kasi kulusha abandi aliri akola nabo. Ahanene aliri akolesa efranga aliri abona y’agala kushishikala omulala gwage. Aliko lero, alilonzeze kubika kw’ezola franga y’azikolesa echindi chintu chilebe. Alilonzeze kugula etablete y’aheba mwe aplikasiyo ya JW Library^®. Hulda alimenyere oku amavideo n’ebindi bintu bili mw’eyola aplikasiyo, by’akamurhabere omu kasi k’amahubiri n’okuyiga bwinja e Biblia.

Hulda aliri akola sa ebiri buli lusiku mu mwezi muguma n’enusu, y’abera amabale makayenera omu mutugari gugeke. Nabuzinda, apata e furanga zinene z’okugula etablete.

Hulda aderhere ntya: “Chiro akaba naliri nakola bwenene n’emisi y’anampwera eju y’okubera amabale, naliri nayibirira juba juba amola malumwa amango naliri nakolesa eyola tablete yaliri y’antabala ngwarhe bumenyi bunene omu kasi k’okuhubiri, n’okurheganya embuganano z’echibaga omu bulyo bunyorohere bwenene.” Kandi, aderhere oku eyola tablete yalimurhabere bwenene omu mango m’obulwala b’okuyahukira, yaliri yamurhabala y’akulikira embuganano zoshi zechibaga n’okuhubiri. Rhugwerhe obusime haguma na Hulda bulala alihikire omuhigo gwage.