Ebibazo By’abanasoma Ebitabu Byerhu

Bulagurhe enyuma y’okuburhwa kwa Yesu, Mariya na Yusufu baliyorhere e Betelehemu ahali h’okugaluka emwabo e Nazareti?

Nta chishubizo Ebiblia ehanire. Aliko Ebiblia erhuhere amafasiriyo masimisize, makarhurhabala rhumenye bulagurhe barhagalukaga e Nazareti agola mango.

Malayika alibwirire Mariya oku akahekere obukule n’okuburha omwana. Amango Malayika ababwiraga obola burhumwa, Yusufu na Mariya balilamire omu Nazareti, vile y’akaburhano ya Yusufu, omu Galilaya. (Lu. 1:26-31; 2:4) Enyuma waho, amango barhenga Emisri bashuba galuka e Nazareti. Yesu akulira eyola munda, aba Munya-nazareti. (Mt. 2:19-23) Bolola e Nazareti enarhuyinja omu bwenge amango rhwamayibuka amazino Yesu, Yusufu, na Mariya.

Mariya aligwerhe muchi wage oyirikirwe Elizabeti walilamire omu Yudeya. Elizabeti, aliri muka omudahwa Zakariya, nyina wa Yohana mubatiza. (Lu. 1:5, 9, 13, 36) Mariya abaga alilambagirire Elizabeti e Yudeya abera haguma naye myezi esharhu. Enyuma waho Mariya ashuba kugaluka e Nazareti. (Lu. 1:39, 40, 56) Echola checharhumaga Mariya amenya e eneo lye Yudeya.

Enyuma w’amango malebe, Yusufu akenga erhegeko “ly’okuchiyandikisa.” Naho Yusufu abalama kurhenga e Nazareti kuja e Betelehemu omu “vile ya Daudi” eyola munda y’obulebi bwaliyerekene oku Masiya akaburhirwe. (Lu. 2:3, 4; 1 Sa. 17:15; 20:6; Mik. 5:2) Amango Mariya amala kuburha Yesu, Yusufu arhalilonzeze Mariya ajire olugenzi lulehere l’okugaluka e Nazareti anagwerhe akabonjo. Barhanga kuyorha e Betelehemu, ahantu hakalambagirwa bilometre mwenda ntya kuja e Yerusalemu. Echola chakurhumire byabayorohera kurhola omwana wabo n’oku muheka oku hekalu yibahana enterekero nk’oku esheriya yalihemere.—Law. 12:2, 6-8; Lu. 2:22-24.

Malayika wa Mungu abaga abwirire Mariya oku omugala akahabirwe “echirhi ch’obwami cha Daudi” ‘akanarhegekere nka Mwami.’ Nkabaga Mariya na Yusufu bali wazize oku kuli kwakamaro oku bona Yesu aburhirwe omu vile ya Daudi. (Lu. 1:32, 33; 2:11, 17) Inkabaga baliwazize oku buli bwengehe okurhanga kuyorha e Betelehemu kugera ahabakahabirwe obwerekezi burhengere emwa Mungu oku bilolere echi bakwanene kujira.

Rhurhakamenya bisanzi bingana gurhe bali malire omu Betelehemu amango Abanajimu (bantu banalagula abandi omu kulolereza okuntu omwezi, enyenyezi, ezuba, bili byabonekana). Aliko kugera amola mango, ogula mulala gwalilamire omunju eyi “omwana wabo akola ali murhabana,” si eyi arhachili kabonjo. (Mt. 2:11) Bibonekene oku ahali h’okugaluka Enazareti bali yorhere e Betelehemu mu mango malebe n’okulamayo nka y’enamwababo.

Herode ahana erhegeko oku “abana boshi b’oburhabana bagwerhe myaka ebiri kuja eshishi bayirhwe.” (Mt. 2:16) Amango Yusufu na Mariya bapata omukonge gurhengere emwa Mungu oku bilolere elyola rhegeko, Yusufu, Mariya na Yesu balibirhira e Misiri kugera amango Herode afaga. Enyuma w’aho Yusufu aheka omulala gwage e Nazareti. Bichi byarhumaga barhashuba kugaluka e Betelehemu? Yibayaka mugala wa Herode waliri mubi kuguma n’eshe oyirikirwe Arkelao waliri arhambula e Yudeya, aliri muntu mubi bwenene. Kandi Malaika alishubire kukengusa Yusufu amenye aja eyola munda. E Nazareti, Yusufu akagalire kulembera yi Yesu omu bulanzi boshi n’oku murhabala abe muharamye w’okuli wa Mungu.—Mt. 2:19-22; 13:55; Lu. 2:39, 52.

Byakashobokana oku, Yusufu afaga eyi Yesu arhaza kufungula enjira y’abantu bakwanene kulama omu mbingu. Yusufu nj’afuuka hanola oku gulu. Banene nji babuganana naye n’okumenya binene oku bilolere bulagurhe yewe na Mariya baliyorhere e Betelehemu amango Yesu amala kuburhwa.