SOMO LYE 10
Bichi Embuganano z’Abahamirizi ba Yehova Zakakumalira?
Wachigerere kuhamagalwa oku mbuganano y’Abahamirizi ba Yehova? Akaba orhasaga hikako, hali oku wakayunva obuba b’okujako oburhanzi. Hali oku wakachibaza: ‘Gurhe biba kw’ezo mbuganano? Bichi zimalire? Bulagurhe bimpemere njeko?’ Mu linola somo, wayiga gurhe okubuganana n’abandi kwakakuyegeza hofi na Mungu, n’okukurhabala bwawe-bwawe.
1. Ahanene, bichi birhuma Abahamirizi ba Yehova babuganana?
Yunva ebi mwandisi muguma we Biblia ayandikaga biyerekene mpanvu nguma nkulu y’okubuganana n’abandi: “Nakuuza Yehova omu chibaga chizibu-zibu.” (Zaburi 26:12) Intyo kon’oko, Abahamirizi ba Yehova banayunva mwishingo gunene amango bamabuganana haguma. Omu gulu lyoshi, buli boso banabuganana haguma yi bakuuza Mungu, bayimpe, banasalire. Hali amango omu mwaka banashuba buganana omu bigusho bizibu-zibu yi baharamya haguma.
2. Bichi nji wayiga oku mbuganano zerhu?
Oku mbuganano, Abahamirizi banayigiriza ebirhengere omu Biblia, “banayifasiriya bwinja n’okuhundula eby’ederhere.” (Osome Nehemia 8:8.) Nk’ohikireko, nji wayiga oku bilolere Yehova, n’engeso zage zinja. Ok’oli wagenderera kumenya kangana gurhe akuzigiire, ku wanayegera hofi naye. Nji washuba kurhegeera gurhe akakurhabala ogwarhe akalamo kaherhe echi kamalire.—Isaya 48:17, 18.
3. Nyungu zichi okukomerana n’abandi nji wabugana oku mbuganano zerhu kwakakulerhera?
Yehova arhubwirire oku “rhulaganeko buli muguma n’owindi yi rhuchundana omu buzigire n’omu bijiro binja, buzira kuleka kubuganana haguma.” (Waebrania 10:24, 25) Oku mbuganano zerhu, nji wabugana kw’abantu banalaganako buli muguma n’owindi, nabo basimire kuyiga binene oku bilolere Mungu kuguma nawe. Nji wayunva gurhe yibashambala oku mawazo marhengerere omu Biblia mahirire omurhima. (Osome Waroma 1:11, 12.) Nji washuba kumenyana n’abandi; nk’abalamba, abashabire awo bashabirwe, baherhe obusime chiro akaba oku bakaba bali omu bibazo. Ezola zili mpanvu ziguma omu zirhumire Yehova alonzeze rhuhwanze rhwabuganana oku kahunda!
HUMBA BWENENE
Jaga walalo gurhe embuganano z’Abahamirizi ba Yehova ziba, na bulagurhe kuli kwinja okuchihangana kuzihikako.
4. Embuganano z’Abahamirizi ba Yehova
Abakristu ba burhanzi baliri babuganana haguma oku kahunda yi baharamya Yehova. (Waroma 16:3-5) Osome Wakolosai 3:16, muje mwaganira kw’echila chibazo:
Nka gurhe Abakristu ba burhanzi baliri baharamya Yehova?
Zene, Abahamirizi nabo banabuganana oku kahunda oku Chumbi ly’Obwami. Y’obona gurhe embuganano zabo ziba, ziha EVIDEO. N’aho, olole efoto eyerekene embuganano y’echibaga, muje mwaganira kw’ebila bibazo.
Ebi wabwene binaba oku Chumbi ly’Obwami, ngahe bifarhene n’ebi wasomere mu Wakolosai 3:16?
Mw’eyila video changwa kw’eyila foto, ka hali echindi chintu wabwene oku bilolere embugano chikusimisize?
Osome 2 Wakorinto 9:7, muje mwaganira kw’echila chibazo:
Chirhuma Abahamirizi ba Yehova barhahema abajaga oku mbuganano zabo efuranga?
Mwembi mwalimu wawe, mushurhe elisho oku b’inji byaganirirwa oku mbuganano z’eli boso.
Chigabi chihe ch’embuganano chikusimisize bwenene, onawazize oku nji chakurhabala?
Walimenyere si?
Oku jw.org, wakabona ngahe na saa zinga embuganano zinajirika buli hantu oku gulu lyoshi.
Oku mbuganano zerhu kunagera amajambo, ebyerekane, n’evideo. Embuganano zinarhondera zinahwe n’olwimpo, n’esala
Mu bigabi biguma-biguma by’eprograme, binahema abunviriza bashubize
Buli yeshi anayegerezwa: Emilala, abalamba, abashaja, n’abana
Rhurhahema furanga. Abahamirizi ba Yehova barhageza-geza entoonga bahema entulo
5. Bihemere okuchihangana y’omuntu ahika oku mbuganano
Waza oku mufano g’omulala gwa Yesu, yi bahika oku mbuganano nkulu yaliri yaba buli mwaka, bakazaga lambagira bilo-metre 100, entondo n’orhubanda, barhenga e Nazareti, bagana e Yerusalemu. Osome Luka 2:39-42, muje mwaganira kw’ebila bibazo:
Owazize ok’olula lugenzi l’okuja e Yerusalemu lwalihemere okuchihangana si?
Bulagurhe okwanene kuchihangana bwenene y’ohika oku mbuganano?
Okujira ntyo kuherhe echi kumalire si? Bulagurhe?
Ebiblia ederhere ok’okubuganana haguma muharamye Yehova kuli kw’akamaro bwenene. Osome Waebrania 10:24, 25, muje mwaganira kw’echila chibazo:
Bulagurhe rhukwanene kuja oku mbuganano oku kahunda?
HALI ABANTU BANADERHA: “Birhahemere mpu mpaka obuganane n’abandi. Wakanayigira Ebiblia ahambuga hoshaho.”
Lwandiko luhe, awo mufano guhe gwe Biblia guyerekene okuntu Yehova yewe alonzeze?
OKU BUGEKE
Okuja oku mbuganano kwakurhabala omenye binene oku bilolere Yehova, okomeze obwira bwawe haguma naye, onamuharamye haguma n’abandi.
Rhuchiyibusye
Bulagurhe Yehova arhuhirire omurhima rhubuganane haguma?
Bichi nji wayiga oku mbuganano z’Abahamirizi ba Yehova?
Owazize oku bichi bindi wakayunguka nk’ohikire kw’ezo mbuganano?
EYINDI MYAZI
Gurhe wakajira akaba yiwayunva oyubahire okuja oku mbuganano? Lola gurhe omulume waliri achiyunva ntyo azindaga ey’akala asima embuganano.
Lola gurhe murhabana muguma asimaga embuganano, na bichi ajiraga y’agenderera kuhika ko.
Hala gurhe abandi banachiyunva oku bilolere okuja oku mbuganano.
“Bulagurhe Bihemere Okuja oku Mbuganano oku Chumbi ly’Obwami?” (Mwazi guli oku jw.org)
Lola gurhe akalamo ka gangi muguma waliri omu chigusho ch’ababandi kahindamukaga achimala kuja oku mbuganano z’Abahamirizi ba Yehova.
“Ntaho Nakajire Buzira Bunduki Lyani” (Omunara g’Omulanzi, Lusiku 1 Mwezi gwa 7, 2014)